1-2. Hlamusela ndlela leyi misinya ya milawu ya Bibele yi sungulaka ku tirha hayona eka munhu loyi se a nga le ka xiyimo xexo.

 HI SIKU ra vona ra mucato, vatekani lava nga ti sasekisa va rhiya ndleve loko ku ri karhi ku nyikeriwa mbulavulo wa vona wa mucato lowu sekeriweke eBibeleni. Matsalwa lama ku buriwaka ha wona eka mbulavulo a hi ro sungula va ma twa. Ku sukela siku leri, Matsalwa lawa ku buriweke ha wona va ta ma teka ma ri ma nkoka. Hikwalahokayini? Hikuva va ta sungula ku ma tirhisa tanihi vatekani.

² Swi tano ni loko vatekani lava nga Vakreste va va vatswari. Swi nga ha endleka malembe ndzhaku va twe mivulavulo yo tala leyi vulavulaka hi ku kurisa vana. Kambe sweswi, tinhla ta mivulavulo yoleyo i ta nkoka eka vona. Va ta va na n’wana loyi va faneleke va n’wi kurisa. Byebyo i vutihlamuleri lebyikulu. Entiyisweni, loko swiyimo swa hina swi cinca, ni langutelo ra hina hi matsalwa lama hi ma toloveleke ra cinca. Lexi hi xona xivangelo lexi endlaka vagandzeri va Yehovha va hlaya Matsalwa naswona hilaha tihosi ta Vaisrayele a ti byeriwe hakona, ti anakanyisisa ha wona “vutomi bya [tona] hinkwabyo.”—Det. 17:19.

3. Hi ta bula hi yini eka nhlokomhaka leyi?

³ Vatswari mi ni njombo leyikulu swinene leyi Mukreste a nga vaka na yona, ku nga ku dyondzisa vana va n’wina hi Yehovha. Kambe a mi lavi ku va dyondzisa hi Xikwembu ku hetisisa nawu ntsena. Mi lava ku pfuna vana va n’wina va xi rhandza hi mbilu hinkwayo. Mi nga endla yini leswaku vana va n’wina va rhandza Yehovha? Eka nhlokomhaka leyi, hi ta bula hi misinya ya milawu ya mune ya le Bibeleni leyi nga mi pfunaka tanihi vatswari. (2 Tim. 3:16) Hi ta tlhela hi vona ndlela leyi vatswari van’wana  lava nga Vakreste swi va vuyeriseke hayona ku tirhisa ndzayo ya Bibeleni.

4. Hi wihi nsinya wa nawu lowu nga pfunaka vatswari va kota ku pfuna vana va vona va rhandza Yehovha hi mbilu hinkwayo? (Yakobo 1:5)

⁴ Nsinya wa nawu wo sungula: Lava nkongomiso wa Yehovha. Kombela Yehovha a ku nyika vutlhari leswaku u kota ku pfuna vana va wena va n’wi rhandza. (Hlaya Yakobo 1:5.) Hi yena a nga hi nyikaka switsundzuxo leswinene. Ku ni swivangelo swo hlaya leswi endlaka hi lava switsundzuxo swakwe. Xiya swimbirhi. Xo sungula, Yehovha u ni ntokoto wo tala tanihi mutswari. (Ps. 36:9) Xa vumbirhi, switsundzuxo swakwe swa vutlhari mikarhi hinkwayo swa vuyerisa.—Esa. 48:17.

5. (a) Nhlangano wa Yehovha wu humesa yini ku pfuna vatswari? (b) Hilaha swi kombisiweke hakona eka vhidiyo, u dyondze yini eka ndlela leyi ndyangu wa ka Amorim wu kuriseke vana hayona?

⁵ Hi ku tirhisa Rito rakwe ni nhlangano wakwe, Yehovha u hi nyika swakudya swo tala leswi humaka eBibeleni, leswi nga ku pfunaka u kurisa vana va wena va rhandza Yehovha. (Mat. 24:45) Hi xikombiso, u nga kuma switsundzuxo leswi pfunaka swinene eka nxaxamelo wa mikandziyiso lowu nga ni nhlokomhaka leyi nge “Leswi Nga Pfunaka Ndyangu,” ku nga tinhlokomhaka leti khale a ti kumeka eka Xalamuka! kambe sweswi ti kumekaka eka website ya hina. Nakambe, tivhidiyo to tala leti nga eka jw.org ti ni mimbulavurisano ni swikece leswi nga pfunaka vatswari ku tirhisa ndzayo ya Yehovha loko va ri karhi va kurisa vana va vona. *—Swiv. 2:4-6.

6. Tatana un’wana u titwa njhani hi nkongomiso lowu yena ni nsati wakwe va wu kumaka eka nhlangano wa Yehovha?

⁶ Vatswari vo tala va kombise ku khensa mpfuno lowu Yehovha a hi nyikaka wona hi ku tirhisa nhlangano wakwe. Tatana la vuriwaka Joe u ri: “Ku kurisa vana vanharhu leswaku va kula va rhandza Yehovha a hi ku dya vuswa. Mina ni nghamu hi khongela eka Yehovha mikarhi hinkwayo leswaku a hi pfuna. Mikarhi yo tala, a hi twa onge nhlokomhaka kumbe vhidiyo yo karhi a yi huma hi nkarhi lowu hi yi lavaka ha wona leswaku hi kota ku langutana ni xiyimo lexi hi nga eka xona. Mikarhi hinkwayo a  hi lava ku kongomisiwa hi Yehovha.” Joe ni nsati wakwe va kume leswaku tinhlokomhaka leti ni tivhidiyo swi pfuna vana va vona ku rhandza Yehovha.

7. Hikwalahokayini swi ri swa nkoka leswaku vatswari va va ni mhaka ni xikombiso lexi va vekelaka vana va vona? (Varhoma 2:21)

⁷ Nsinya wa nawu wa vumbirhi: Va vekele xikombiso lexinene. Vana va languta vatswari va vona naswona mikarhi yo tala va va tekelela. I ntiyiso leswaku a ku na mutswari loyi a nga endliki swihoxo. (Rhom. 3:23) Hambiswiritano, vatswari vo tlhariha va tikarhatela ku vekela vana va vona xikombiso lexinene. (Hlaya Varhoma 2:21.) Tatana un’wana loko a vulavula hi vana u ri: “Va fana ni swiponci, va tswonga xin’wana ni xin’wana.” U tlhela a ku: “Va swi vona loko hi nga swi endli leswi hi va dyondzisaka swona.” Kutani loko hi lava leswaku vana va hina va rhandza Yehovha, hina hi fanele hi rhanga hi n’wi rhandza ni ku tlhela hi swi kombisa.

8-9. U dyondze yini eka leswi vuriweke hi Andrew na Emma?

⁸ Ti tele tindlela leti vatswari va nga ti tirhisaka ku dyondzisa vana va vona ku rhandza Yehovha. Twana leswi makwerhu Andrew la nga ni malembe ya 17 a swi vulaka, u ri: “Mikarhi hinkwayo vatswari va mina a va ndzi dyondzisa nkoka wa xikhongelo. Madyambu man’wana ni man’wana bava a a khongela na mina hambiloko se ndzi tikhongelerile. Mikarhi hinkwayo vatswari va mina a va hi byela va ku: ‘U nga vulavula na Yehovha ko tala hilaha u lavaka hakona.’ Sweswo swi ndzi pfune ngopfu naswona sweswi ndzi titwa ndzi tshunxekile ku khongela eka Yehovha naswona ndzi n’wi teka tanihi Tatana la nga ni rirhandzu.” Vatswari tsundzukani leswaku ndlela leyi mi rhandzaka Yehovha hayona yi nga pfuna vana va n’wina leswaku na vona va n’wi rhandza.

⁹ Twana leswi endlekeleke Emma. Loko bava wa yena a famba a va siya, u siye mhani wakwe ni swikweleti swo tala. Emma u ri: “Mikarhi yo tala Mhani a swi n’wi tikela swa timali kambe mikarhi hinkwayo a a vulavula hi ndlela leyi Yehovha a wundlaka malandza yakwe hayona. A ndzi swi vona hi ndlela leyi a a hanya hayona leswaku wa swi tshemba sweswo. Mhani a a hanya hileswi a a ndzi dyondzisa swona.” Hi dyondza yini? Vatswari va nga dyondzisa vana va vona hi swiendlo hambiloko swiyimo swi tika.—Gal. 6:9.

10. Vatswari vo tala lava nga Vaisrayele a va pfulekeriwa hi nkarhi wihi wa ku vulavurisana ni vana va vona? (Deteronoma 6:6, 7)

¹⁰ Nsinya wa nawu wa vunharhu: Tshama u ri karhi u vulavurisana ni vana va wena. Yehovha u lerise Vaisrayele leswaku va dyondzisa vana va vona hi yena nkarhi ni nkarhi. (Hlaya Deteronoma 6:6, 7.) Vatswari lava a va pfulekeriwa hi nkarhi wo tala esikwini wo vulavula ni vana va vona ni ku va pfuna va rhandza Yehovha hi mbilu hinkwayo. Hi xikombiso, xifanyetana xa Muisrayele a xi heta nkarhi wo tala xi pfuna tata wa xona ku byala kumbe ku vuya ni ntshovelo ekaya. Kasi sesi wa xona a ta heta nkarhi wo tala a pfuna mhani wa yena ku rhunga ni ku endla mitirho yin’wana ya le kaya. Loko va ri karhi va tirha swin’we, vatswari ni vana a va kota ku vulavurisana hi timhaka to tala ta nkoka. Hi xikombiso, a va kota ku vulavula hi vunene bya Yehovha ni ndlela leyi a va pfunaka hayona tanihi ndyangu.

11. Hi wihi nkarhi lowu pfulekeleke vatswari lava nga Vakreste ku burisana ni vana va vona?

¹¹ Swilo a swa ha fani ni khale. Ematikweni yo tala, vatswari a va wu kumi nkarhi wa ku va ni vana va vona. Vatswari va va va ri emitirhweni kasi vana va va va ri eswikolweni. Hikwalaho ka sweswo, vatswari va fanele va tinyika nkarhi wa ku bula ni vana va vona. (Efe. 5: 15, 16; Filp. 1:10) Vatswari va nga tirhisa nkarhi wa vugandzeri bya ndyangu ku bula ni vana va vona. Makwerhu Alexander la ha riki muntshwa u ri: “Mikarhi hinkwayo bava wa tiyiseka leswaku hi khoma vugandzeri bya ndyangu naswona a nga pfumeleli nchumu xi hi kavanyeta. Loko hi heta ku dyondza, hi khoma leti na letiya.”

12. I yini leswi nhloko ya ndyangu yi faneleke yi swi tekela enhlokweni hi nkarhi wa vugandzeri bya ndyangu?

¹² Loko u ri nhloko ya ndyangu, u nga endla yini leswaku vana va wena va tiphina hi vugandzeri bya ndyangu? Swi nga va njhani u dyondza ni vana va wena mi tirhisa buku ya hina leyintshwa leyinene leyi nge, Tiphine Hi Vutomi Hilaha Ku Nga Heriki! Yi ta mi pfuna leswaku mi kota ku burisana mi tshunxekile. Leswaku vana va wena va kota ku ku phofulela ta le mbilwini, u nga tirhisi nkarhi wa vugandzeri bya ndyangu ku va byeletela kumbe ku va holovela. U nga hlundzuki loko vana va wena va ku byela vonelo ra vona leri nga fambisaniki ni Matsalwa. Ematshan’weni ya sweswo, khensa leswi va nga ku tumbeteliki ndlela leyi va titwaka hayona naswona va khutaze leswaku va tshunxeka ku vulavula na wena. U ta kota ku pfuna vana va wena ntsena loko u tiva ndlela leyi va titwaka hayona.

13. Hi yihi mikarhi yin’wana leyi pfulekelaka vatswari ku pfuna vana va vona va tshinela eka Yehovha?

¹³ Vatswari tirhisani nkarhi wun’wana ni wun’wana lowu mi pfulekelaka kwala sikwini ku pfuna vana va n’wina va tshinela eka Yehovha. A swi lavi leswaku mi yimela nkarhi lowu mi dyondzaka ha wona Bibele ntsena leswaku mi ta va dyondzisa hi Xikwembu xa hina lexi nga ni rirhandzu. Twana leswi manana loyi a vuriwaka Lisa a swi vulaka: “Hi pfune vana va hina leswaku va dyondza hi Yehovha hi ku tirhisa ntumbuluko. Hi xikombiso, loko mbyana ya hina yi endla leswi hlekisaka vana va hina, a hi va hlamusela leswaku sweswo swi kombisa leswaku Muvumbi wa hina i Xikwembu lexi tsakeke naswona u rhandza vutomi ku fana na hina.”

14. Hikwalahokayini swi ri swa nkoka leswaku vatswari va pfuna vana va vona ku hlawula vanghana hi vutlhari? (Swivuriso 13:20)

¹⁴ Nsinya wa nawu wa vumune: Pfuna vana va wena va hlawula vanghana lavanene. Rito ra Xikwembu ri swi veka erivaleni leswaku  vanghana va hina va nga hi kucetela ku endla leswinene kumbe swo biha. (Hlaya Swivuriso 13:20.) Vatswari, xana ma va tiva vanghana va vana va n’wina? Xana mi tshame mi hlangana na vona ni ku tinyika nkarhi wa ku va na vona? Mi nga endla yini leswaku mi pfuna vana va n’wina va va ni vanghana lava rhandzaka Yehovha? (1 Kor. 15:33) Mi nga va pfuna ku hlawula vanghana lavanene hi ku rhamba vamakwerhu lava nga ni vuxaka lebyinene ni Xikwembu leswaku va va na n’wina loko mi endla mitirho yo karhi mi ri hi ndyangu.—Ps. 119:63.

15. Vatswari va nga endla yini ku pfuna vana va vona leswaku va hlawula vanghana lavanene?

¹⁵ Xiya ntokoto wa tatana loyi a vuriwaka Tony. U hlamusela leswi yena ni nsati wakwe va swi endleke ku pfuna vana va vona leswaku va hlawula vanghana lavanene, u ri: “Loko hi ri karhi hi kurisa vana va hina, mina ni nsati wa mina a hi rhamba vamakwerhu va malembe ni mindhavuko yo hambanahambana leswaku va hi vhakela ekaya. A hi dya na vona swakudya ni ku tlhela hi va na vona eka vugandzeri bya ndyangu. Leyi i ndlela leyinene ya ku tiva vanhu lava rhandzaka Yehovha ni ku tlhela va n’wi tirhela va tsakile. Hi ve ni nkateko wo endzeriwa hi valanguteri va miganga, varhumiwa ni van’wana ekaya ra hina. Leswi swi va khumbe swinene vana va hina loko va twa hi mitokoto, ku hiseka ni leswi a va titsona swo karhi leswaku va tirhela Xikwembu naswona sweswo swi pfune vana va hina ku tshinela eka Yehovha.” Vatswari, tiyimiseleni ku pfuna vana va n’wina va hlawula vanghana lavanene.

16. U fanele u endla yini loko n’wana wa wena a ku byela leswaku a nga ha swi lavi ku tirhela Yehovha?

¹⁶ Ku vuriwa yini hambiloko u endle hinkwaswo leswi u nga swi kotaka kambe un’wana wa vana va wena a ku byela leswaku a nga ha swi lavi ku tirhela Yehovha? U nga tivoni nandzu. Yehovha u nyike hinkwerhu ka hina nyiko yo kota ku tihlawulela, ku katsa ni n’wana wa wena naswona hi nga kota ku hlawula loko hi lava ku n’wi gandzela kumbe doo! Loko n’wana wa wena a hlawule ku tshika ku tirhela Yehovha, tshama u ri ni ntshembo wa leswaku siku rin’wana u ta tlhelela eka Yena. Tsundzuka xikombiso xa n’wana loyi a a lahlekile. (Luka 15:11-19, 22-24) Jaha rolero a ri hambukile  swinene endleleni ya ku lulama kambe eku heteleleni ri tlhelerile. Van’wana va nga ha ku, “Xexo ko va xitori. Xana sweswo swi nga pfuka swi endlekile?” Ina swi nga endleka! Sweswo swi endlekile eka jaha leri vuriwaka Elie.

17. Ntokoto wa Elie wu ku khutaza njhani?

¹⁷ Elie u vula leswi hi vatswari vakwe: “Va tikarhatele ku ndzi dyondzisa ku rhandza Yehovha ni Rito rakwe, ku nga Bibele. Hambiswiritano, loko ndza ha ri emalembeni ya kondlo-a-ndzi-dyi, ndzi sungule ku xandzuka.” Elie u sungule ku hanya bya lumpfana naswona a nga pfumelanga loko vatswari vakwe va ringeta ku n’wi pfuna leswaku a tlhela a va ni vuxaka lebyinene ni Xikwembu. Loko a ta va a suke ekaya, u sungule ku endla swilo swo biha. Hambiswiritano, a a pfa a bula ni munghana wakwe hi Bibele. Elie u ri: “Loko ndzi ya ndzi ri karhi ndzi vulavula ni munghana wa mina hi Yehovha, a ndzi ya ndzi ehleketa hi Yena. Hakatsongo-tsongo, timbewu ta ntiyiso wa Bibele leti a ti ri embilwini ya mina—leti vatswari va mina va ringeteke hi matimba ku ti byala—ti sungule ku mila.” Hi ku famba ka nkarhi Elie u tlhelerile entiyisweni. * Ehleketa ndlela leyi vatswari vakwe a va tsake hayona hileswi va n’wi dyondziseke ku rhandza Yehovha a ha ri ntsongo.—2 Tim. 3:14, 15.

18. U titwa njhani hi vatswari lava waka va pfuka leswaku va dyondzisa vana va vona ku rhandza Yehovha?

¹⁸ Vatswari, mi ni nkateko lowukulu wo kurisa vagandzeri va Yehovha va mundzuku. (Ps. 78:4-6) Ku endla swoleswo a hi matlangwana naswona ha mi bumabumela hileswi mi tikarhatelaka ku pfuna vana va n’wina. Loko mi ya emahlweni mi endla hinkwaswo leswaku mi pfuna vana va n’wina va rhandza Yehovha ni ku va kurisa hi ku va tshinya hi swileriso swa Yehovha, mi nga tiyiseka leswaku Tata wa hina wa le tilweni la nga ni rirhandzu, u ta tsaka.—Efe. 6:4.