1. Hi xihi xiboho xa nkoka lexi vanhu hinkwavo va faneleke va xi endla?

 NAMUNTLHA vanhu hinkwavo va fanele va endla xiboho xa nkoka. Xana va ta seketela Yehovha Xikwembu tanihi Mufumi loyi a faneleke wa vuako hinkwabyo, kumbe va ta seketela Sathana Diyavulosi, nala wa tihanyi wa Xikwembu? A swi koteki ku seketela matlhelo mambirhi hi nkarhi wun’we. Xiboho xin’wana ni xin’wana lexi va xi endlaka xi ta khumba vumundzuku bya vona. (Mat. 25:31-33, 46) Hi nkarhi wa ‘nhlomulo lowukulu,’ va ta fungheriwa ku pona kumbe ku lovisiwa.—Nhlav. 7:14; 14:9-11; Ezek. 9:4, 6.

2. (a) Vaheveru 10:35-39 yi hi khutaza ku endla yini? (b) Buku ya Nhlavutelo yi nga hi pfuna njhani?

² Hlaya Vaheveru 10:35-39. Loko u hlawule ku seketela vuhosi bya Yehovha u endle xiboho xa vutlhari. Sweswi u lava ku pfuna van’wana va endla leswi fanaka. U nga tirhisa rungula leri nga ebukwini ya Nhlavutelo leswaku u va pfuna. Buku yoleyo yo hlamarisa yi hi byela leswi nga ta endleka eka lava va lwisanaka na Yehovha, kambe yi tlhela yi hi byela mikateko leyi nga ta kumiwa hi lava va seketelaka vuhosi byakwe hi ku tshembeka. I swinene ku yi kambisisa kahle mhaka leyi ya nkoka. Loko hi endla tano, hi ta ya emahlweni hi tiyimisela ku tirhela Yehovha. Ku engetela kwalaho, hi nga tirhisa leswi hi swi dyondzeke ku pfuna van’wana va hlawula ku tirhela Yehovha ni ku tshama va tshembekile.

3. Hi ta kambisisa yini eka nhlokomhaka leyi?

³ Eka nhlokomhaka leyi hi ta bula hi swivutiso leswi landzelaka: Lava seketelaka vuhosi bya Xikwembu va ta kuma yini?  Nakambe, ku ta humelela yini hi lava seketelaka xivandzana xo tshwuka lexi hlamuseriweke ebukwini ya Nhlavutelo?

4. Hi wihi ntlawa lowu muapostola Yohane a wu voneke wu ri na Yesu etilweni?

⁴ Eka xivono, muapostola Yohane u vone mitlawa yimbirhi leyi seketelaka vuhosi bya Yehovha ivi yi katekisiwa hi vutomi lebyi nga heriki. Lava nga eka ntlawa wo sungula nhlayo ya vona i 144 000. (Nhlav. 7:4) Va hlawuriwe laha misaveni leswaku va ya vumba Mfumo swin’we na Yesu etilweni. Va fuma misava swin’we na yena. (Nhlav. 5:9, 10; 14:3, 4) Eka xivono Yohane u va vona va yime swin’we na Yesu eNtshaveni ya Siyoni ya le tilweni.—Nhlav. 14:1.

5. Ku ta endleka yini ku nga ri khale hi vahlawuriwa lava saleke va 144 000?

⁵ Ku sukela emikarhini ya Vakreste va le Bibeleni ku ta fikela sweswi, magidi ma hlawuriwile leswaku ma va xiphemu xa lava 144 000. (Luka 12:32; Rhom. 8:17) Yohane u byeriwe leswaku a ku ta va ku ri ni vahlawuriwa vatsongo ntsena lava hanyaka emisaveni emasikwini yo hetelela. “Lava saleke” va ta amukela ‘mfungho’ wo hetelela wa ku amukeriwa hi Yehovha ku nga si tlhekeka nhlomulo lowukulu. (Nhlav. 7:2, 3; 12:17) Hikwalaho, hi nkarhi wa nhlomulo lowukulu, lava saleke va ta yisiwa etilweni leswaku va ya va ni lavan’wana va 144 000, lava feke va tshembekile. Va ta fuma swin’we na Yesu eMfun’weni wa Xikwembu.—Mat. 24:31; Nhlav. 5:9, 10.

6-7. (a) Hi wihi ntlawa wun’wana lowu Yohane a wu voneke naswona hi dyondza yini hi wona? (b) Hikwalahokayini vahlawuriwa lava saleke ni va “ntshungu lowukulu” va fanele va yi tekela enhlokweni Nhlavutelo ndzima 7?

⁶ Endzhaku ko vona ntlawa wa le tilweni, Yohane u vone “ntshungu lowukulu.” Ku hambana ni lava 144 000, ntlawa lowu i ntsandzavahlayi. (Nhlav. 7:9, 10) Hi dyondza yini hi wona? Yohane u byeriwe leswi: “Vanhu lava va huma enhlomulweni lowukulu naswona va hlantswe swiambalo swa vona swo leha va swi endla swo basa hi ngati ya Xinyimpfana.” (Nhlav. 7:14) Endzhaku ko pona nhlomulo lowukulu, “ntshungu lowukulu” wu ta hanya laha misaveni naswona wu ta tiphina hi mikateko yo tsakisa.—Ps. 37:9-11, 27-29; Swiv. 2:21, 22; Nhlav. 7:16, 17.

⁷ Hambi hi hlawuriwe ku ya hanya etilweni kumbe laha misaveni, xana ha tivona hi ri eka nhlamuselo leyi tsariweke eka Nhlavutelo ndzima 7? Hi fanele hi tivona hi ri kwalaho. Mayana nkarhi wo tsakisa lowu malandza ya Xikwembu ya mitlawa leyi yimbirhi ma nga ta tiphina ha wona! Hi ta khapakhapa hi ntsako hi leswi hi hlawuleke ku seketela vuhosi bya Yehovha. Hi swihi swin’wana leswi buku ya Nhlavutelo yi hi byelaka swona hi nhlomulo lowukulu?—Mat. 24:21.

8. Nhlomulo lowukulu wu ta sungula njhani naswona vanhu vo tala va ta endla yini?

⁸ Hilaha hi dyondzeke hakona eka nhlokomhaka leyi nga hundza, ku nga ri khale mifumo ya misava leyi ya tipolitiki yi ta hlasela Babilona Lonkulu, ku nga mfumo wa misava wa vukhongeri bya mavunwa. (Nhlav. 17:16, 17) Wolawo ku ta va masungulo ya nhlomulo lowukulu. Xana leswi swi ta endla leswaku vanhu vo tala va sungula ku gandzela Yehovha? Nikatsongo. Ematshan’weni ya sweswo, Nhlavutelo ndzima 6 yi kombisa leswaku hi nkarhi wolowo wa nkoka, vanhu lava nga tirheliki Yehovha va ta lava ku sirheleriwa hi tipolitiki na hi mabindzu ya misava leyi, leswi fanisiwaka ni tintshava. Leswi vanhu volavo va nga taka va nga wu seketeli Mfumo wa Xikwembu, Yehovha  u ta va teka va ri vakaneti vakwe.—Luka 11:23; Nhlav. 6:15-17.

9. Vanhu va Xikwembu va ta hambana njhani ni vanhu van’wana hi nkarhi wa nhlomulo lowukulu naswona ku ta humelela yini hi vona?

⁹ Hakunene malandza ya Yehovha yo tshembeka ma ta va ma nga fani ni vanhu van’wana enkarhini wolowo wa maxangu wa nhlomulo lowukulu. Ku ta va ku ri vona ntsena ntlawa wa vanhu laha misaveni lava tirhelaka Yehovha Xikwembu naswona va alaka ku seketela “xivandzana.” (Nhlav. 13:14-17) Sweswo swi ta hlundzukisa lava kanetaka Yehovha. Hikwalaho ka sweswo, matiko lama hlanganeke ma ta hlasela vanhu va Xikwembu emisaveni hinkwayo. Xiendlo xexo xa nsele wa lunya Bibele yi xi hlamusela tanihi nhlaselo wa Gogo wa Magogo.—Ezek. 38:14-16.

10. Hilaha swi hlamuseriweke hakona eka Nhlavutelo 19:19-21, Yehovha u ta endla yini loko vanhu vakwe va hlaseriwa?

¹⁰ Yehovha u ta endla yini loko vanhu vakwe va hlaseriwa hi tihanyi? U ri: “Ndzi ta kariha swinene.” (Ezek. 38:18, 21-23) Nhlavutelo ndzima 19 yi hlamusela leswi nga ta endleka. Yehovha u ta rhumela N’wana Wakwe leswaku a ya sirhelela vanhu Vakwe ni leswaku a hlula valala va vona. Yesu u ta joyiniwa hi “mavuthu ya le tilweni” ku nga tintsumi to tshembeka swin’we ni lava 144 000. (Nhlav. 17:14; 19:11-15) Yi ta hela njhani nyimpi leyi? Ku ta herisiwa vanhu ni mihlangano leyi kanetaka Yehovha.—Hlaya Nhlavutelo 19:19-21.

11. Hi xihi xiendlakalo xa nkoka lexi hlamuseriwaka ebukwini ya Nhlavutelo?

¹¹ Ehleketa ndlela leyi vanhu lava tshembekaka laha misaveni va nga ta titwa hayona loko va pona ku heriseriwa makumu ka valala va Xikwembu! Mayana nkarhi wolowo wo tsakisa! Hambileswi ku nga ta va ni ntsako lowukulu etilweni loko Babilona Lonkulu a lovisiwa, kambe ku ni nchumu wun’wana lowu nga ta endla leswaku ku biwa mikulungwana. (Nhlav. 19:1-3) “Mucato wa Xinyimpfana” i xiendlakalo xa nkoka ebukwini ya Nhlavutelo.—Nhlav. 19:6-9.

12. Hilaha swi hlamuseriweke hakona eka Nhlavutelo 21:1, 2, mucato wa Xinyimpfana wu ta endleka rini?

¹² Xana mucato lowu wu ta endleka rini? Loko ku nga si tlhekeka nyimpi ya Armagedoni hinkwavo lava 144 000 va ta va va ri etilweni. Hambiswiritano, wolowo wu ta va wu nga ri nkarhi wa mucato wa Xinyimpfana. (Hlaya Nhlavutelo 21:1, 2.) Mucato wa Xinyimpfana wu ta endleka endzhaku ka nyimpi ya Armagedoni naswona valala hinkwavo va Xikwembu va ta va va lovisiwile.—Ps. 45:3, 4, 13-17.

13. Ku ta endleka yini emicatweni wa Xinyimpfana?

¹³ Ku ta endleka yini emucatweni wa Xinyimpfana? Leswi mucato wu hlanganisaka wanuna na wansati, hilaha ku fanaka mucato lowu wo fanekisela wa Xinyimpfana wu ta hlanganisa Hosi Yesu Kreste ni “mutekiwa” ku nga lava 144 000. Xiendlakalo xexo xa nkoka xi ta simeka mfumo lowuntshwa lowu nga ta fuma misava hinkwayo ku ringana malembe ya 1 000.—Nhlav. 20:6.

14-15. Lava 144 000 va fanisiwa na yini ebukwini ya Nhlavutelo ndzima 21? (Vona xifaniso xa xifunengeto.)

¹⁴ Nhlavutelo ndzima 21 yi fanisa lava 144 000 ni muti wo xonga swinene lowu vitaniwaka “Yerusalema Lowuntshwa.” (Nhlav. 21:2, 9) Muti lowu wu akiwe ehenhla ka maribye ya 12 lama tsariweke “mavito ya 12 ya vaapostola va 12 va Xinyimpfana.” Hikwalahokayini sweswo swi tsakise Yohane? Hikuva u vone vito rakwe ri tsariwile eka rin’wana ra maribye  wolawo. Mayana nkateko wonghasi!—Nhlav. 21:10-14; Efe. 2:20.

¹⁵ Muti lowu wo fanekisela a wu kona wo fana na wona. Wu ni ndlela leyikulu leyi endliweke hi nsuku wo tenga, tigede ta 12 leti endliweke hi tiperela, makhumbi lama akiweke ehenhla ka maribye ya risima naswona wu ni mimpimo leyi ringanaka. (Nhlav. 21:15-21) Kambe Yohane u xiye leswaku ku kayivela nchumu wun’wana! U ri: “A ndzi vonanga tempele endzeni ka muti, hikuva Yehovha Xikwembu xa Matimba Hinkwawo ni Xinyimpfana i tempele ya wona. Muti lowu a wu lavi dyambu kumbe n’weti leswaku wu voningeriwa, hikuva ku vangama ka Xikwembu ka wu voningela naswona rivoni ra wona i Xinyimpfana.” (Nhlav. 21:22, 23) Lava vumbaka Yerusalema Lowuntshwa va ta va na Yehovha hi xiviri. (Hev. 7:27; Nhlav. 22:3, 4) Hikwalaho, Yehovha na Yesu hi vona tempele ya muti wolowo.

16. Ku ta humelela yini hi vanhu hi nkarhi Mfumo wa Xikwembu wa Gidi ra Malembe?

¹⁶ Vahlawuriwa va tsaka swinene loko va ehleketa hi muti lowu. Hambiswiritano, lava nga ni ntshembo wo hanya laha misaveni na vona va fanele va wu tekela enhlokweni muti lowu. Hi nkarhi wa Mfumo wa Xikwembu wa Gidi ra Malembe, Yerusalema Lowuntshwa wu ta tisa mikateko yo tala swinene. Yohane u vone mikateko leyi yi khuluka ku fana ni “nambu wa mati ya vutomi.” Ematlhelo ka nambu a ku ri ni “mirhi ya vutomi” leyi humesaka matluka lama “hanyisa[ka] matiko.” (Nhlav. 22:1, 2) Vanhu hinkwavo lava nga ta va va hanya hi nkarhi wolowo va ta tiphina hi mikateko leyi. Hakatsongotsongo, vanhu hinkwavo lava yingisaka va ta va va nga ha ri na xidyoho. A ku nge he vi na mavabyi, switlhavi ni mihloti ya swirilo.—Nhlav. 21:3-5.

17. Hilaha swi kombisiweke hakona eka Nhlavutelo 20:11-13, i vamani lava nga ta vuyeriwa eka Mfumo wa Gidi ra Malembe?

¹⁷ I vamani lava nga ta kuma mikateko leyi? Ntshungu lowukulu lowu poneke Armagedoni swin’we ni vana lava nga ha tswariwaka emisaveni leyintshwa hi vona lava nga ta rhanga va kuma mikateko leyi. Kambe Nhlavutelo ndzima 20 yi tlhela yi tshembisa leswaku vafi va ta pfuxiwa. (Hlaya Nhlavutelo 20:11-13.) Vanhu lava “lulameke” vo tshembeka lava feke enkarhini lowu nga hundza swin’we ni “lava nga lulamangiki” lava nga kumangiki nkarhi wo dyondza hi Yehovha va ta pfuxeriwa kona kwala misaveni. (Mit. 24:15; Yoh. 5:28, 29)  Xana leswi swi vula leswaku munhu un’wana ni un’wana u ta pfuxeriwa ku hanya laha misaveni hi nkarhi wa Mfumo wa Gidi ra Malembe? Doo! Vanhu vo homboloka lava aleke ku tirhela Yehovha loko va ha hanya a va nge pfuxiwi. A va ri na wona nkarhi kambe va swi kombisile leswaku a va faneleki ku hanya eParadeyisini laha misaveni.—Mat. 25:46; 2 Tes. 1:9; Nhlav. 17:8; 20:15.

18. Xiyimo xi ta va xi ri njhani laha misaveni eku heleni ka malembe ya 1 000?

¹⁸ Eku heleni ka malembe ya 1 000, hinkwavo lava nga ta va va ri karhi va hanya laha misaveni va ta va va nga ha ri na xidyoho. A nga kona ni un’we loyi a nga ta va a ri ni xidyoho lexi hi xi kumeke eka Adamu. (Rhom. 5:12) Ndzhukano lowu a wu vangiwe hi xidyoho xa Adamu wu ta va wu susiwe hi ku helela. Hi ndlela yoleyo, lava nga emisaveni va ta “hanya” tanihi vanhu lava nga riki na xidyoho eku heleni ka malembe ya 1 000.—Nhlav. 20:5.

19. Hikwalahokayini ku fanele ku va na ndzingo wo hetelela?

¹⁹ Ha swi tiva leswaku Yesu u tshame a tshembekile eka Xikwembu hambiloko Sathana a n’wi ringa. U tshame a tshembekile loko a ringiwa. Kambe xana vanhu hinkwavo lava nga riki na xidyoho va ta tiyimisela ku endla tano loko Sathana a nyikiwe nkarhi wo va ringa? Un’wana ni un’wana u ta tihlamulela xivutiso lexi loko Sathana a ntshunxiwile ekheleni ro enta eku heleni ka malembe ya 1 000. (Nhlav. 20:7) Lava nga ta tshama va tshembekile hi nkarhi wa ndzingo wo hetelela va ta kuma vutomi lebyi nga heriki naswona va ta ntshunxeka hilaha ku heleleke. (Rhom. 8:21) Lava nga ta xandzuka va ta loviseriwa makumu swin’we na Diyavulosi ni madimona yakwe.—Nhlav. 20:8-10.

20. U titwa njhani hi vuprofeta byo tsakisa lebyi nga ebukwini ya Nhlavutelo?

²⁰ U titwa njhani endzhaku ko kambisisa buku ya Nhlavutelo? Xana a swi ku tsakisi ku tivona eka vuprofeta lebyi byo hlamarisa? Xana a swi ku endli u lava ku rhamba van’wana leswaku va ta gandzela Xikwembu swin’we na hina hi ndlela yo tenga? (Nhlav. 22:17) Leswi timbilu ni miehleketo ya hina swi khumbekeke hi leswi nga ta endleka enkarhini lowu taka, hi titwa hi lava ku vula marito ya muapostola Yohane loko a ku: “Amen! Tana, Hosi Yesu.”—Nhlav. 22:20.