1-2. Hi nga ha tivutisa yini mayelana ni swikhongelo swa hina?

 XANA u tshame u tivutisa loko Yehovha a hlamula swikhongelo swa wena? Loko swi ri tano, a hi wena ntsena. Vamakwerhu vo hlayanyana va tshame va titwa tano ngopfungopfu loko swilo swi va fambela ximatsi. Loko hi ri eku xanisekeni, na hina swi nga hi tikela ku vona ndlela leyi Yehovha a swi hlamulaka hayona swikhongelo swa hina.

² A hi kambisiseni leswaku i yini leswi nga endlaka hi tshemba leswaku Yehovha u hlamula swikhongelo swa vagandzeri vakwe. (1 Yoh. 5:15) Hi ta tlhela hi kambisisa swivutiso leswi: Hikwalahokayini mikarhi yin’wana swi vonaka onge Yehovha a nga swi hlamuli swikhongelo swa hina? Xana Yehovha u swi hlamula hi tindlela tihi swikhongelo namuntlha?

3. Hikwalahokayini Yehovha a lava leswaku hi khongela eka yena?

³ Matsalwa ma hi tiyisekisa leswaku Yehovha u hi rhandza swinene ni leswaku hi va nkoka eka yena. (Hag. 2:7; 1 Yoh. 4:10) Hi yona mhaka a lavaka leswaku hi kombela mpfuno eka yena hi xikhongelo. (1 Pet. 5:6, 7) U lava ku hi pfuna hi tshama hi ri ni vuxaka lebyinene na yena ni leswaku hi tiyisela swiyimo swo tika hi nga heli matimba.

4. Hi swi tivisa ku yini leswaku Yehovha u hlamula swikhongelo swa vagandzeri vakwe? (Nakambe vona xifaniso.)

⁴ EBibeleni mikarhi yo tala hi hlaya leswaku Yehovha u hlamula swikhongelo swa vagandzeri vakwe. Xana ku ta mani emiehleketweni  ya wena? Un’wana wa vona i Hosi Davhida. A a ri ni valala vo tala lava nga ni khombo naswona mikarhi yo tala a a khongela eka Yehovha leswaku a n’wi pfuna. Siku rin’wana u khongerile a ku: “Yehovha Xikwembu xanga, yingisa xikhongelo xa mina; yingisa loko ndzi kombela ku pfuniwa. Ndzi hlamule hikuva u tshembekile naswona u lulamile.” (Ps. 143:1) Yehovha u hlamule xikhongelo xa Davhida xa leswaku a n’wi ponisa. (1 Sam. 19:10, 18-20; 2 Sam. 5:17-25) Davhida u vule a nga kanakani a ku: “Yehovha u le kusuhi ni hinkwavo lava n’wi vitanaka.” Na hina hi nga tiyiseka hi sweswo.—Ps. 145:18.

5. Xana mikarhi hinkwayo swikhongelo swa vagandzeri va Yehovha va le nkarhini lowu nga hundza a swi hlamuriwa hi ndlela leyi a va langutele hayona? Vula xikombiso. (Nakambe vona xifaniso.)

⁵ Yehovha a nga ha hlamula swikhongelo swa hina hi ndlela leyi a hi nga yi langutelanga. Swi ve tano eka muapostola Pawulo. U kombele Xikwembu leswaku xi n’wi susa “mutwa enyameni.” Kanharhu loku, Pawulo u khongele hi xiphiqo xakwe. Xana Yehovha u swi hlamurile swikhongelo sweswo? Ina, kambe ku nga ri hi ndlela leyi Pawulo a a langutele hayona. Ematshan’weni yo susa xiphiqo xexo, Yehovha u n’wi nyike matimba lama a a ma lava leswaku a ya emahlweni a N’wi tirhela hi ku tshembeka.—2 Kor. 12:7-10.

6. Hikwalahokayini mikarhi yin’wana swi vonaka onge Yehovha a nga swi hlamuli swikhongelo swa hina?

⁶ Na hina mikarhi yin’wana hi nga ha kuma nhlamulo leyi hambaneke ni leswi hi swi rindzeleke. Hi nga tiyiseka leswaku Yehovha u yi tiva kahle ndlela yo hi pfuna. A nga tlhela a “endla swo tala swinene ku tlula leswi hi swi kombelaka kumbe leswi hi swi ehleketaka.” (Efe. 3:20) Hikwalaho ka sweswo, a nga hlamula swikhongelo swa hina hi nkarhi kumbe hi ndlela leyi a hi nga yi langutelanga.

7. Hikwalahokayini swi nga ha lavaka leswaku hi cinca leswi hi swi khongelelaka? Vula xikombiso.

⁷ Swi nga ha lava leswaku hi cinca leswi hi swi khongelelaka loko hi ya hi twisisa ku rhandza ka Yehovha. Xiya xikombiso xa Martin Poetzinger. Endzhaku ka loko a ha ku cata, Makwerhu Poetzinger u pfaleriwe ekampeni ya nxaniso eNazi. Eku sunguleni, u kombele Yehovha leswaku a n’wi humesa ekampeni ya nxaniso leswaku a ta khathalela nsati wakwe ni ku tlhela a ya emahlweni a chumayela. Hambiswiritano, endzhaku ka mavhiki mambirhi u swi vonile leswaku a ku nga ri na leswi a swi kombisa leswaku Yehovha a a ta endla leswaku a tshunxiwa. Kutani u sungule ku khongela a ku: “Yehovha, ndzi kombela u ndzi komba leswi u lavaka ndzi swi endla.” U sungule ku ehleketa hi leswi vamakwerhu van’wana a va langutana na swona. Vo tala va vona a  va vilerisiwa hileswi va siyeke vasati va vona ni vana. Makwerhu Poetzinger u tlhele a khongela a ku: “Ndza khensa Yehovha hikwalaho ka xiavelo xa mina lexintshwa. Ndzi pfune ndzi tiyisa ni ku khutaza vamakwerhu.” U hete malembe ya kaye a ri ekampeni a ri karhi a endla sweswo!

8. Hi wihi nchumu wa nkoka lowu hi faneleke hi wu tsundzuka loko hi khongela?

⁸ Hi fanele hi tsundzuka leswaku Yehovha u ni xikongomelo naswona u ta xi hetisisa hi nkarhi lowu a wu vekeke. Xikongomelo xexo xi katsa ku swi herisela makumu swiphiqo hinkwaswo leswi kayakayisaka vanhu namuntlha, ku nga timhangu ta ntumbuluko, mavabyi ni rifu. Yehovha u ta tirhisa Mfumo wakwe ku hetisisa xikongomelo xakwe. (Dan. 2:44; Nhlav. 21:3, 4) Hambiswiritano, kukondza ku fika nkarhi wolowo, Yehovha u pfumelela Sathana leswaku a fuma misava. b (Yoh. 12:31; Nhlav. 12:9) Loko Yehovha o tlhantlha swiphiqo swa vanhu sweswi, swi nga vonaka onge Sathana u fuma kahle. Hikwalaho loko ha ha rindzele Yehovha leswaku a hetisisa switshembiso swakwe, sweswo a swi vuli swona leswaku a nga hi pfuni. A hi kambisiseni tindlela tin’wana leti Yehovha a hi pfunaka ha tona.

9. Yehovha a nga hi pfuna njhani loko hi lava ku endla swiboho? Kombisa.

⁹ Yehovha u hi nyika vutlhari. Yehovha u tshembisa ku hi nyika vutlhari lebyi hi byi lavaka leswaku hi endla swiboho leswinene. Hi lava vutlhari lebyi humaka eka Xikwembu, ngopfungopfu loko hi endla swiboho swa vutomi hinkwabyo swo fana ni ku nghenela vukati kumbe ku nga byi ngheneli. (Yak. 1:5) Xiya ntokoto wa makwerhu waxisati la vuriwaka Maria loyi a nga tekiwangiki. c A a tiphina hi ku tirha tanihi phayona ra nkarhi hinkwawo loko a hlangana ni makwerhu wo karhi. U ri: “Loko hi ri karhi hi tivana, hi sungule ku rhandzana. A ndzi swi tiva leswaku ndzi fanele ndzi endla xiboho. Ndzi khongele swinene hi mhaka leyi. A ndzi lava leswaku Yehovha a ndzi kongomisa kambe a ndzi swi tiva leswaku Yehovha a a nga ta ndzi endlela xiboho.” U swi vonile leswaku Yehovha u hlamule swikhongelo swakwe swo kombela vutlhari. Njhani? Loko a ri karhi a endla ndzavisiso eka mikandziyiso ya hina, u kume tinhlokomhaka to karhi leti n’wi pfuneke a kuma tinhlamulo ta swivutiso leswi a a ri na swona. U tlhele a yingisa xitsundzuxo xa vutlhari lexi a nyikiweke xona hi mhani wakwe wo tshembeka. Xitsundzuxo xexo xi pfune Maria a kambisisa ndlela leyi a titwaka hayona. Eku heteleleni u kote ku endla xiboho xa vutlhari.

10. Hi ku ya hi Vafilipiya 4:13, Yehovha u ta endla yini leswaku a pfuna vagandzeri vakwe? Vula xikombiso. (Nakambe vona xifaniso.)

¹⁰ Yehovha u hi nyika matimba leswaku hi tiyisela. Yehovha u ta hi nyika matimba lama hi ma  lavaka leswaku hi kota ku tiyisela miringo hilaha a nyikeke muapostola Pawulo. (Hlaya Vafilipiya 4:13.) Xiya ndlela leyi Yehovha a pfuneke makwerhu la vuriwaka Benjamin leswaku a tiyisela swiyimo swo tika. Loko a ha ri muntshwa, Benjamin ni ndyangu wa ka vona a va tshama ekampeni ya vahlapfa eAfrika. Benjamin u ri: “Mikarhi hinkwayo a ndzi khongela eka Yehovha ndzi n’wi kombela leswaku a ndzi nyika matimba yo endla leswi n’wi tsakisaka. Yehovha u hlamule swikhongelo swa mina hi ku ndzi nyika ku rhula ka mianakanyo, xivindzi xo chumayela ni mikandziyiso leyi ndzi pfuneke ndzi tshama ndzi ri ni vuxaka lebyinene na yena.” U ya emahlweni a ku: “Ku hlaya hi mitokoto ya vamakwerhu ni ku vona ndlela leyi Yehovha a va pfuneke hayona leswaku va tiyisela swi ndzi pfunile leswaku ndzi tshama ndzi tshembekile.”

11-12. Yehovha a nga ha va tirhisa njhani vamakwerhu ku hlamula swikhongelo swa hina? (Nakambe vona xifaniso.)

¹¹ Yehovha u tirhisa vamakwerhu. Hi vusiku byo hetelela a nga si nyikela vutomi byakwe, Yesu u khongele hi ku hiteka. U kombele Yehovha leswaku a n’wi sivela leswaku a nga tekiwi a ri munhu la rhukanaka Xikwembu. Ematshan’weni yo hlamula xikombelo xexo, Yehovha u pfune Yesu hi ku rhumela yin’wana ya tintsumi takwe leswaku yi n’wi tiyisa. (Luka 22:42, 43) Yehovha a nga hi pfuna hi ku tirhisa makwerhu un’wana leswaku a hi khutaza hi ku hi fonela kumbe hi ku hi endzela. Hinkwerhu hi nga lava tindlela to vula “rito lerinene” eka vamakwerhu.—Swiv. 12:25.

¹² Xiya ntokoto wa makwerhu waxisati loyi a vuriwaka Miriam. Endzhaku ka mavhiki ma nga ri mangani nuna wakwe a ha ku lova, Miriam a a ri ni xivundza, a a hele matimba naswona a a tshikilelekile. A a tshamela ku rila naswona a a lava munhu wo vulavula na yena. U ri: “A ndzi nga ri na matimba yo fonela munhu kutani ndzi khongele eka Yehovha. Loko ndzi ri karhi ndzi rila ni ku khongela, ku nghene riqingho. A ku foyina nkulu tlhelo munghana la khathalaka.” Nkulu yoloye ni nsati wakwe va chavelele Miriam. Miriam wa tiyiseka leswaku i Yehovha la endleke leswaku makwerhu loyi a n’wi fonela.

13. Vula xikombiso xa ndlela leyi Yehovha a nga tirhisaka vanhu lava nga n’wi gandzeriki leswaku a hlamula swikhongelo swa hina.

¹³ Yehovha a nga ha tirhisa vanhu lava nga n’wi gandzeriki. (Swiv. 21:1) Mikarhi yin’wana  Yehovha u hlamula swikhongelo swa vanhu vakwe hi ku tirhisa vanhu lava nga n’wi gandzeriki leswaku va va pfuna. Hi xikombiso, u endle leswaku Hosi Atazekiseki a pfumelela Nehemiya leswaku a tlhelela eYerusalema leswaku a ya pfuneta ku pfuxeta muti. (Neh. 2:3-6) Hilaha ku fanaka, namuntlha Yehovha a nga endla leswaku hambi ku ri vanhu lava nga n’wi gandzeriki va hi pfuna loko hi lava mpfuno.

14. Ntokoto wa Soo Hing wu ku khutaza njhani? (Nakambe vona xifaniso.)

¹⁴ Yehovha u pfune makwerhu waxisati Soo Hing hi ku tirhisa dokodela rakwe. N’wana wakwe u karhatiwa hi mavabyi yo hlayanyana ya miehleketo. Loko n’wana wa vona a ta va a humeleriwe hi nghozi yo chavisa, Soo Hing ni nuna wakwe va tshike mitirho leswaku va n’wi khathalela. Sweswo swi endle leswaku va va ni swiphiqo swa timali. Soo Hing u vule leswaku se a a nga ha tivi ta yena. U phofulele Yehovha ta le mbilwini, a kombela leswaku a n’wi pfuna. Dokodela leri va yeke eka rona ri lave tindlela to va pfuna. Leswi swi endle leswaku mfumo wu nghenelela ku va pfuna naswona va kume ndhawu yo tshama leyi nga durhiki. Endzhaku ka sweswo, Soo Hing u ri: “Hi vone ndlela leyi Yehovha a hi pfuneke hayona emhakeni leyi. I ntiyiso leswaku i ‘Mutwi wa xikhongelo.’”—Ps. 65:2.

15. I yini leswi pfuneke makwerhu waxisati a xiya leswaku swikhongelo swakwe a swi hlamuriwa?

¹⁵ Hi ntolovelo swikhongelo swa hina a swi hlamuriwi hi tindlela to hlawuleka. Kambe tinhlamulo leti hi ti kumaka hi tona leti hi ti lavaka leswaku hi tshama hi tshembekile eka Tata wa hina wa le tilweni. Hikwalaho tshama u rindzele ku vona tinhlamulo ta swikhongelo swa wena. Makwerhu waxisati la vuriwaka Yoko a a vona onge Yehovha a nga swi hlamuli swikhongelo swakwe kambe u sungule ku swi tsala ehansi leswi a a swi kombela eka Yehovha. Hi ku famba ka nkarhi, loko a kambisisa leswi a swi tsaleke ebukwini yakwe, u kume leswaku Yehovha u hlamule swikhongelo swakwe swo tala hambi ni leswi se a a swi rivele. Nkarhi ni nkarhi, hi fanele hi tinyika nkarhi ni ku tlhela hi ehleketisisa hi ndlela leyi Yehovha a swi hlamulaka hayona swikhongelo swa hina.—Ps. 66:19, 20.

16. Hi nga swi kombisa njhani leswaku hi ni ripfumelo loko swi ta eka xikhongelo? (Vaheveru 11:6)

¹⁶ Hi kombisa leswaku hi na ripfumelo ku nga ri hi ku khongela eka Yehovha ntsena kambe ni ku tlhela hi amukela ndlela leyi a swi hlamulaka hayona swikhongelo swa hina swi nga ri na mhaka leswaku u swi hlamula njhani. (Hlaya Vaheveru 11:6.) Xiya xikombiso xa Mike ni nsati wakwe  Chrissy. A va lava ku tirha eBethele. Mike u ri: “Hi ni malembe yo tala hi ri karhi hi endla xikombelo xo tirha eBethele tanihi vatekani naswona hi khongele eka Yehovha mikarhi yo tala hi mhaka leyi kambe a hi hlamuriwanga.” Mike na Chrissy va tshame va ri karhi va tiyiseka leswaku Yehovha a a yi tiva ndlela leyinene yo va tirhisa entirhweni wakwe. Va ye emahlweni va endla leswi va nga swi kotaka va tirha tanihi maphayona laha ku nga ni xilaveko ni ku seketela tiprojeke to aka miako ya nhlangano wa Yehovha. Namuntlha Mike i mulanguteri wa muganga. U ri: “A hi mikarhi hinkwayo Yehovha a a hlamula swikhongelo swa hina hi ndlela leyi a hi swi langutele hayona kambe u swi hlamurile naswona hi tindlela letinene ngopfu ku tlula leti a hi ti languterile.”

17-18. Hi ku ya hi Pisalema 86:6, 7, i yini leswi hi nga tiyisekaka ha swona?

¹⁷ Hlaya Pisalema 86:6, 7. Mupisalema Davhida a a tiyiseka leswaku Yehovha wa swi yingisa ni ku tlhela a hlamula swikhongelo swakwe. Na wena u nga tiyiseka. Swikombiso leswi hi buleke ha swona eka nhlokomhaka leyi, swa hi tiyisekisa leswaku Yehovha a nga hi nyika vutlhari ni matimba lama hi ma lavaka leswaku hi tiyisela. A nga ha tirhisa vamakwerhu kumbe vanhu lava nga n’wi gandzeriki sweswi leswaku va hi pfuna hi ndlela yo karhi.

¹⁸ Hambileswi mikarhi yin’wana Yehovha a nga swi hlamuriki swikhongelo swa hina hi ndlela leyi a hi langutele hayona, ha swi tiva leswaku u ta swi hlamula. U ta hi nyika leswi hi swi lavaka naswona hi nkarhi lowu hi swi lavaka ha wona. Yana emahlweni u khongela, u va ni ripfumelo ni ku tiyiseka leswaku Yehovha u ta ku khathalela sweswi naswona emisaveni leyintshwa u ta “enerisa ku navela ka swivumbiwa hinkwaswo leswi hanyaka.”—Ps. 145:16.