Ndzi velekiwe hi 1983. A ndzi ri n’wana la hanyeke kahle kambe loko ndzi ri ni malembe ya khume miri wa mina hinkwawo wu sungule ku vava swinene. Endzhaku ka malembe ya kwalomu ka mambirhi, siku rin’wana nimpundzu loko ndzi pfuka a ndzi nga ha swi koti ku famba. Hambiloko ndzi ringeta hi matimba ku famba, milenge ya mina a yi nga pfumeli. Ku sukela siku rero, a ndza ha swi kotanga ku famba. Vuvabyi byebyo byi tlhele byi endla leswaku ndzi nga ha kuli. Ninamuntlha, ndza ha ringana ni n’wana.

Se a ndzi ri ni tin’hweti ti nga ri tingani ndzi nga humi ekaya loko Timbhoni ta Yehovha ti ta ekaya. Loko ku ta vanhu ekaya, hakanyingi a ndzi tumbela kambe siku rero a ndzi tumbelanga ndzi tshike vavasati volavo va ndzi byela leswi va teleke swona. Loko va ri karhi va vulavula hi Paradeyisi, ndzi tsundzuke leswi ndzi tshameke ndzi swi twa loko ndzi ri ni malembe ya kwalomu ka ntlhanu. Hi nkarhi wolowo, Jethro loyi a ri murhumiwa naswona a a tshama eSuriname, a a endzela muganga wa ka hina kan’we hi n’hweti leswaku a ta dyondzisa bava Bibele. Jethro a a ndzi khome kahle ngopfu. A a ndzi n’wi rhandza swinene. Nakambe, vakokwana a va famba na mina eka tin’wana ta tinhlengeletano ta vandlha ta Timbhoni, leti a ti khomeriwa emugangeni wa ka hina. Loko Florence, un’wana wa vavasati volavo lava a va ndzi endzerile a ndzi vutisa leswaku ndza swi tsakela ku twa swo tala hi mhaka yoleyo, ndzi pfumerile.

Loko Florence a vuya, u vuye ni nuna wakwe Justus kutani va sungule ku ndzi dyondzisa Bibele. Endzhaku ka loko va xiye leswaku a ndzi swi koti ku hlaya, va ndzi dyondzise ku hlaya. Hi ku famba ka nkarhi, se a ndzo khuluka kunene loko ndzi hlaya. Siku rin’wana, Florence ni nuna wakwe va ndzi byele leswaku va komberiwe ku ya chumayela eSuriname. Khombo ra kona, a ku nga ha ri na loyi a ta ya emahlweni a ndzi dyondzisa Bibele laha eOrealla. Kambe lexi tsakisaka, Yehovha a nga ndzi rivalanga.

Swi nga si ya kwihi, eOrealla ku fike Floyd loyi a a ri phayona kutani u ndzi kumile loko a ri karhi a chumayela hi yindlu ni yindlu. Loko a ndzi byele hi ta ku dyondza Bibele, ndzi n’wayiterile. U vutisile a ku: “Hikwalahokayini u n’wayitela?” Ndzi n’wi byele leswaku ndzi hetile ku dyondza broxara leyi nge I Yini Leswi Xikwembu Xi Swi Languteleke Eka Hina? naswona se a ndzi sungule ku dyondza buku leyi nge Vutivi Lebyi Yisaka eVuton’wini Lebyi Nga Heriki. * Ndzi n’wi hlamusele lexi endleke dyondzo yi nga ha yanga emahlweni. Floyd u hetise na mina buku  leyi nge Vutivi, kambe na yena u rhumeriwe ku ya chumayela kun’wana. Ndzi tlhele ndzi sala ndzi nga ha ri na munhu loyi a ta ndzi dyondzisa Bibele.

Hambiswiritano, hi 2004, Granville na Joshua, maphayona mambirhi yo hlawuleka va rhumeriwe ku ta chumayela eOrealla. Va ndzi kumile loko va ri karhi va chumayela hi yindlu ni yindlu. Loko va ndzi vutise leswaku ndza swi tsakela ku dyondza Bibele, ndzi n’wayiterile. Ndzi kombele leswaku va ndzi dyondzisa buku leyi nge Vutivi ku sukela eku sunguleni. A a ndzi lava ku vona leswaku a va ta ndzi dyondzisa swilo leswi fanaka ni leswi ndzi dyondzisiweke swona hi Timbhoni leti tshameke ti ndzi dyondzisa. Granville u ndzi byele leswaku tinhlengeletano ta vandlha ta Timbhoni ta khomiwa emugangeni wa ka hina. Hambileswi a ndzi nga si tshama ndzi huma ekaya ku ringana malembe ya kwalomu ka khume, a ndzi swi lava ku ya etinhlengeletanweni. Hikwalaho, Granville u ndzi landzile kutani a ndzi khandziyisa wheelchair a famba na mina enhlengeletanweni ya vandlha ya Timbhoni.

Hi ku famba ka nkarhi, Granville u ndzi khutaze ku tsarisa eXikolweni xa Vutirheli bya le Tilweni. U te: “U lamarile kambe wa swi kota ku vulavula. Siku rin’wana u ta nyikela mbulavulo wa mani na mani. U ta wu nyikela.” Marito yakwe lama khutazaka ma ndzi tiyisile.

Ndzi sungule ku chumayela na Granville. Kambe mapato ya le mugangeni wa ka hina a ma celacelekile lerova wheelchair a yi nga fambi kahle. Kutani ndzi kombele Granville leswaku a ndzi chovha hi barha. Sweswo swi tirhile. Hi April 2005, ndzi khuvuriwile. Endzhaku ka sweswo, vamakwerhu va ndzi letele ku khathalela tibuku ta vandlha ni ku tirha eka swa mpfumawulo eHolweni.

khombo ra kona, hi 2007 bava u lovile eka nghozi ya xikepe. Ndyangu wa ka hina a wu tsemeke nhlana. Granville u khongele na hina a tlhela a hi hlayela tindzimana leti chavelelaka ta le Bibeleni. Endzhaku ka malembe mambirhi, hi tlhele hi weriwa hi papa ra ntima, Granville u lovile eka nghozi ya xikepe.

Vandlha ra ka hina leri a ri tshoveke timbilu, se a ri nga ha ri na vakulu a ro va ni nandza un’we wa vutirheli. Rifu ra Granville ri ndzi twise ku vava swinene; a a ri munghana wa mina lonkulu. U ndzi pfunile hi tindlela hinkwato. Eka nhlengeletano ya vandlha leyi landzeleke, a ndzi averiwe ku hlaya tindzimana eka Dyondzo ya Xihondzo xo Rindza. Ndzi kote ku hlaya tindzimana timbirhi to sungula, endzhaku ka sweswo ndzi sungule ku rila mihloti yi xiririka kunene. Ndzi boheke ku suka exitejini.

Ndzi sungule ku antswa loko vamakwerhu lava humaka evandlheni rin’wana va tile va ta hi pfuna eOrealla. Nakambe rhavi ri rhumele Kojo, loyi a ri phayona ro hlawuleka. Lexi ndzi tsakiseke, manana ni ndzisana ya mina ya xinuna va sungule ku dyondza Bibele kutani va khuvuriwa. Hi March 2015, ndzi ve nandza wa vutirheli. Hi ku famba ka nkarhi, ndzi nyikele mbulavulo wa mina wa mani na mani wo sungula. Hi siku rero, ndzi n’wayiterile ndzi tlhela ndzi rila loko ndzi tsundzuka leswi Granville a tshameke a ndzi byela swona a ku: “Siku rin’wana u ta nyikela mbulavulo wa mani na mani. U ta wu nyikela.”

Eka minongonoko ya Vuhaxi bya JW, ndzi dyondze hi Timbhoni tin’wana leti nga exiyin’weni xo fana ni xa mina. Kambe hambileswi ti lamaleke ti tirhela Yehovha ti tsakile. Na mina ndza ha ya emahlweni ndzi tirhela Yehovha. Leswi a ndzi navela ku endla leswi engetelekeke entirhweni wa Yehovha, ndzi teke vuphayona bya nkarhi hinkwawo. Hi September 2019, ndzi kume mahungu yo tsakisa lawa a ndzi nga ma langutelanga! Ndzi bumabumeriwe ku va nkulu evandlheni leri a ri ri ni vahuweleri va kwalomu ka 40.

Ndza va khensa swinene vamakwerhu lava va ndzi dyondziseke Bibele va tlhela va ndzi pfuna ndzi tirhela Yehovha. Xa nkoka swinene, ndza khensa leswi Yehovha a nga ndzi rivalangiki.