VAMAKWERHU vo tala lava enkarhini lowu hundzeke a va rhurhe etikweni ra rikwavo leswaku va ya lava madyelo ya rihlaza ematikweni man’wana, se va tlhelele etikweni ra rikwavo. Hikwalaho ka leswi va rhandzaka Yehovha ni vanhu, va rhurhele etindhawini leti ku nga ni xilaveko xa vachumayeri va mahungu lamanene. (Mat. 22:37-39) Va titsone yini naswona hi yihi mikateko leyi va yi kumeke? Leswaku hi kuma nhlamulo, a hi buleni hi tiko ra Cameroon leri nga evupeladyambu bya Afrika.

Hi 1998 makwerhu Onésime u rhurhe eCameroon kutani a ya tshama etikweni rin’wana ku ringana malembe ya 14. Siku rin’wana enhlengeletanweni ya vandlha, u twe ku vulavuriwa hi xifaniso xa ntirho wo chumayela. Xivulavuri xi te: “Loko vanghana vambirhi va phasa tihlampfi etindhawini timbirhi leti hambaneke kutani lowun’wana a phasa tihlampfi to tala ku tlula lowun’wana, xana munghana loyi a phasaka tihlampfi titsongo a nge yi laha munghana wa yena a phasaka tihlampfi to tala?”

Xifaniso xexo xi endle Onésime a ehleketa hi ku tlhelela eCameroon laha vanhu vo tala a va ri ni torha ra mahungu lamanene. Kambe ku na leswi a swi n’wi karhata. Xana a a ta swi kota ku tlhela a tolovela vutomi bya le ka rikwavo endzhaku ko heta malembe yo tala a tshama etikweni rin’wana? Ku vona loko a ta swi kota, Onésime u endzele eCameroon ku ringana tin’hweti ta tsevu. Kutani hi 2012, u teke xiboho xo tlhelela eka rikwavo.

Onésime u ri: “Ndzi boheke ku tlhela ndzi tolovela maxelo yo hisa ni vutomi bya kona. Loko ndzi ri enhlengeletanweni ya vandlha, ndzi boheke ku tlhela ndzi tolovela ku tshama emabencini. Kambe loko ndzi yingiserisisa nongonoko,” a vula a ri karhi a n’wayitela, “a ndzi ya ndzi rivala hi switulu swa ntofontofo.”

Hi 2013, Onésime u teke Géraldine, loyi a tlheleleke eCameroon endzhaku ko tshama eFurwa malembe ya kaye. Yehovha u va katekise njhani vatekani lava hikwalaho ko rhangisa ku endla ku rhandza ka yena evuton’wini? Onésime u ri: “Hi ye eXikolweni xa Vachumayeri va Mfumo swin’we hi tlhela hi tirha eBethele. Lembe leri nga hundza, ku khuvuriwe swichudeni swa Bibele swa 20 evandlheni ra ka hina. Sweswi ndza swi vona leswaku ndzi le ndhawini leyi faneleke yo ‘phasa tihlampfi.’” (Mar. 1:17, 18) Géraldine u ri: “Ndzi kume mikateko yo tala swinene leyi nga pimanisiwiki na nchumu.”

Judith a a rhurhele eUnited States kambe a a navela ku tirhela Yehovha hilaha ku engetelekeke. U ri: “Loko se ndzi fanele ndzi famba endzhaku ko endzela eCameroon, a ndzi rila hikuva a ndzi fanele ndzi siya vanhu vo hlayanyana lava a ndzi sungule  ku va dyondzisa Bibele.” Hambiswiritano, Judith a a kanakana ku tlhelela eCameroon. A a tirha ntirho lowu a wu n’wi holela swi nyawula lowu a wu endla a kota ku hakelela bava wakwe vutshunguri lebyi a a byi lava eCameroon. Kambe Judith u tshembe Yehovha kutani u tlhelele eka rikwavo. Wa pfumela leswaku wa swi tsundzuka swilo swin’wana swa xiyimo xa le henhla leswi a a tiphina ha swona loko a ha tshama eUnited States. U khongele eka Yehovha leswaku a n’wi pfuna a tlhela a tolovela vutomi bya le ka rikwavo naswona u tlhele a pfuna hi xikhutazo lexi a xi kumeke eka mulanguteri wa muganga ni nsati wakwe.

Loko Judith a tsundzuka ndlela leyi swilo a swi ri hayona loko a tlhelela eCameroon u ri: “Ku nga si hela malembe manharhu, ndzi pfune vanhu va mune leswaku va khuvuriwa.” Judith u hlawuriwe ku va phayona ro hlawuleka. Namuntlha u tirha ni nuna wakwe, Sam-Castel, va endzela mavandlha. Kambe ku humelele yini hi bava wa Judith? Yena ni ndyangu wakwe va kote ku kuma xibedlhele etikweni rin’wana lexi a xi tiyimiserile ku hakelela vuhandzuri bya bava wakwe. Lexi tsakisaka, vuhandzuri byi fambe kahle.

Makwerhu Victor u rhurhele eCanada. Endzhaku ko hlaya nhlokomhaka leyi vulavulaka hi dyondzo leyi tlakukeke eka Xihondzo xo Rindza, u ehleketisise hi tidyondzo takwe. U tshike ku nghena eyunivhesiti kutani a dyondza tidyondzo leti a ti nga ta n’wi tekela nkarhi wo leha. U ri: “Ndzi kote ku hatla ndzi kuma ntirho ni ku endla ntirho lowu a ku ri khale ndzi lava ku wu endla, ku nga ku phayona.” Hi ku famba ka nkarhi, Victor u teke Caroline, kutani vatekani lava va endzele eCameroon. Loko va ri kwalaho, va endzele erhavini laha va fikeke va khutaziwa leswaku va ehleketa hi ku vuya va ta chumayela eCameroon. Victor u ri: “A hi nga ri na xivangelo xo ala naswona leswi se a hi hanya vutomi byo olova hi xi amukerile xirhambo xexo.” Hambileswi Caroline a a ri ni swiphiqo swa rihanyo, va endle xiboho xo rhurha.

Victor na Caroline va ve maphayona ya nkarhi hinkwawo leswaku va pfuna vanhu hinkwavo lava a va tsakela ku dyondza Bibele. A va veke mali leyi ringaneke leswaku va nga boheki ku tirha eku sunguleni. Endzhaku ka sweswo, va tlhele va ya tirha eCanada ku ringana tin’hweti ti nga ri tingani, leswi va pfuneke leswaku va kota ku tlhelela eCameroon va ya emahlweni va phayona. Hi yihi mikateko leyi va yi kumeke? Va ye eXikolweni xa Vachumayeri va Mfumo, va ve maphayona yo hlawuleka naswona sweswi va tirha ku aka. Victor u ri: “Leswi hi tshikeke vutomi bya hina bya vulovolovo, hi boheke ku titshega hi Yehovha naswona u hi khathalerile.”

Hi 2002, Alain, loyi a a dyondza eyunivhesiti eJarimani, u hlaye xiphephana lexi nge, Vantshwa—Xana Mi Ta Endla Yini Hi Vutomi Bya N’wina? Leswi a swi hlayeke swi endle a cinca milorho yakwe. Hi 2006, u ye eXikolweni xa Ndzetelo wa Vutirheli kutani u komberiwe ku ya chumayela eka rikwavo eCameroon.

Le Cameroon, Alain u kume xikoropo xa masiku yo karhi. Hi ku famba ka nkarhi, u kume ntirho lowu holelaka ku antswa kambe a a karhateka hi leswaku a nge hi kumi nkarhi lowu eneleke wo chumayela ni ku dyondzisa van’wana Bibele. Hikwalaho, loko a komberiwe ku va phayona ro hlawulelaka, u amukele xikombelo xexo hi mandla mambirhi. Muthori wakwe u n’wi tshembise muholo wo tala, kambe Alain a nga wu amukelanga ntirho wolowo, u hlawule ku phayona. Hi ku famba ka nkarhi, Alain u teke Stéphanie, loyi a a ri ni malembe a tshama eFurwa. Hi swihi swiphiqo leswi a veke na swona endzhaku ko rhurhela eCameroon?

 Stéphanie u ri: “Ndzi ve ni swiphiqo switsongo swa rihanyo, kambe ndzi kote ku kuma vutshunguri bya nkarhi ni nkarhi naswona bya ndzi pfuna.” Vatekani lava va vuyeriwile hikwalaho ka ku tiyisela ka vona. Alain u ri: “Loko hi ye hi ya chumayela eximutanini lexi nga le tlhelo lexi vuriwaka Katé, hi kume vanhu vo hlayanyana lava a va lava ku dyondza Bibele. Hi ku famba ka nkarhi, hi kote ku fambisa tidyondzo ta Bibele na vona hi riqingho. Swichudeni swa hina swimbirhi, swi khuvuriwile naswona ku vumbiwe ntlawa wa vahuweleri.” Stéphanie u tlhele a ku: “Swa tsakisa swinene ku pfuna vanhu va kala va tinyiketela eka Yehovha. Ku ta chumayela laha, swi endle leswaku hi kuma ntsako lowukulu swinene.” Namuntlha, Alain na Stéphanie va endzela mavandlha.

Gisèle u khuvuriwe loko a ha ri exikolweni xo dyondzela vutshunguri eItaly. U tsakisiwe hi vutomi byo olova bya vatekani lava nga maphayona lava a va n’wi dyondzisa Bibele naswona a a lava ku tirhela Yehovha hilaha ku engetelekeke. Hikwalaho, Gisèle u sungule ku va phayona ra nkarhi hinkwawo loko a hetisa xikolo.

Gisèle a a navela ku tlhelela eCameroon leswaku a ta tirhela Yehovha hilaha ku engetelekeke, kambe a ku ri na leswi a swi n’wi vilerisa. U ri: “A ndzi ta boheka ku lahlekeriwa hi mfanelo ya mina yo va muakatiko wa le Italy naswona a ndzi ta hambana ni vanghana ni ndyangu wa ka hina lowu a wu tshama eItaly.” Hambiswiritano, hi May 2016, Gisèle u tlhelele eCameroon. Hi ku famba ka nkarhi, u tekane na Léonce naswona rhavi ra le Cameroon ri kombele vatekani lava leswaku va rhurhela eAyos, ku nga doroba leri nga ni xilaveko lexikulu xa vachumayeri va mahungu lamanene.

Vutomi a byi ri njhani eAyos? Gisèle u ri: “Hakanyingi gezi a ri va ri nga ri kona ku ringana mavhiki yo hlaya naswona a hi nga swi koti ku chaja tiselfoni ta hina. Mikarhi yo tala a ti nga tirhi. Ndzi dyondze ku sweka hi ndzilo wa tihunyi naswona a hi chovha mabarha hi tamele mathoci leswaku hi ya ka mati nivusiku loko ku nga ha ri na vanhu vo tala exihlobyeni.” Vatekani lava va swi kotise ku yini ku tiyisela? Gisèle u ri: “Moya wa Yehovha, nuna loyi a ku seketelaka ni xikhutazo ni nseketelo wa timali wa nkarhi ni nkarhi wa ndyangu ni wa vanghana va hina swi hi pfunile ku tiyisela.”

Xana Gisèle u tsakile leswi a tlheleleke etikweni ra rikwavo? U ri: “Ina! Ndzi tsakile swinene. Eku sunguleni a swi tika naswona a hi titwa hi hela matimba, kambe loko hi kala hi swi hlula, mina ni nuna wa mina hi swi vonile leswaku hi endle leswi a hi lava ku swi endla. Hi tshemba Yehovha naswona hi titwa hi ri ekusuhi na yena.” Léonce na Gisèle va ye eXikolweni va Vachumayeri va Mfumo naswona sweswi i maphayona yo hlawuleka ya nkarhinyana.

Ku fana ni vaphasi va tihlampfi lava kombisaka xivindzi hambiloko va langutana ni swiphiqo leswaku va ta kota ku phasa tihlampfi to tala, lava tlhelelaka eka rikwavo va titsona swo karhi leswaku va pfuna vanhu va timbilu letinene lava amukelaka mahungu lamanene. Handle ko kanakana, Yehovha a nge va rivali vahuweleri lava, lava tirhaka hi matimba lava kombiseke rirhandzu hikwalaho ka vito rakwe. (Neh. 5:19; Hev. 6:10) Loko u rhurhele etikweni rin’wana naswona ku ri ni xilaveko etikweni ra ka n’wina, xana u nga swi kota ku tlhelela? Loko u endla tano, Yehovha u ta ku katekisa.—Swiv. 10:22.