1. Hi swi tiva njhani leswaku Yehovha u lava ku va ni vuxaka na hina?

 YEHOVHA wa hi rhamba leswaku hi tshinela eka yena. (Yak. 4:8) U lava ku va Xikwembu, Tatana ni Munghana wa hina. U hlamula swikhongelo swa hina naswona wa hi pfuna hi mikarhi yo tika. Nakambe u tirhisa nhlangano wakwe leswaku a hi dyondzisa ni ku hi sirhelela. Kambe hi fanele hi endla yini leswaku hi tshinela eka Yehovha?

2. Hi nga tshinela njhani eka Yehovha?

² Hi nga tshinela eka Yehovha hi ku khongela eka yena, hi hlaya Rito rakwe ni ku anakanyisisa hi leswi hi swi hlayaka. Loko hi endla tano, hi ya hi n’wi rhandza ni ku n’wi khensa. Hi hlohloteleka ku n’wi yingisa ni ku n’wi dzunisa ku nga leswi ngo n’wi bee! (Nhlav. 4:11) Loko hi ya hi tiva Yehovha hi ta ya hi n’wi tshemba swin’we ni nhlangano wakwe lowu a hi nyikeke wona leswaku wu hi pfuna.

3. Xana Diyavulosi u ringeta njhani ku hi hambanisa na Yehovha, kambe i yini lexi nga ta hi pfuna leswaku hi nga pfuki hi tshike Xikwembu ni nhlangano wa xona? (Pisalema 31:13, 14)

³ Hambiswiritano, Diyavulosi u ringeta ku hi hambanisa na Yehovha ngopfungopfu loko hi langutane ni mitlhontlho. Xana u swi endla njhani sweswo? U ringeta hakatsongotsongo ku hi tshikisa ku tshemba Yehovha ni nhlangano wakwe. Kambe hi nga swi kota ku ala marhengu yakwe. Loko ripfumelo ra hina ri tiyile naswona ndlela leyi hi tshembaka Yehovha hayona yi nga tsekatseki, a hi nge xi tshiki Xikwembu xa hina ni nhlangano wa xona.​—Hlaya Pisalema 31:13, 14.

4. Hi ta bula hi yini eka nhlokomhaka leyi?

 ⁴ Eka nhlokomhaka leyi, hi ta bula hi mitlhontlho yinharhu leyi hi nga langutanaka na yona, leyi nga hi tshikisaka ku tshemba Yehovha ni nhlangano wakwe. Mitlhontlho leyi yi nga hi hambanisa njhani na Yehovha? Hi nga endla yini leswaku hi hlula marhengu ya Sathana?

5. Xana swiphiqo swi nga endla njhani leswaku hi tshika ku tshemba Yehovha ni nhlangano wakwe?

⁵ Mikarhi yin’wana hi langutana ni swiphiqo swo tanihi ku kanetiwa hi maxaka kumbe ku lahlekeriwa hi ntirho. Xana swiphiqo sweswo swi nga hi tshikisa njhani ku tshemba nhlangano wa Yehovha ni ku hi hambanisa na yena? Loko hi langutana ni swiphiqo nkarhi wo leha hi nga hela matimba ni ku titwa hi nga ri na ntshembo. Sathana u tirhisa nkarhi wolowo ku hi endla hi kanakana leswaku Yehovha wa hi rhandza. Diyavulosi u lava hi ehleketa leswaku ha xaniseka hikwalaho ka leswi hi nga na vuxaka ni Yehovha kumbe hileswi hi nga eka nhlangano Wakwe. Swo fana ni sweswo swi endlekile eka Vaisrayele van’wana lava a va ri eEgipta. Loko swa ha sungula a va tshemba leswaku Yehovha u hlawule Muxe na Aroni leswaku va va tshunxa evuhlongeni. (Eks. 4:29-31) Kambe hi ku famba ka nkarhi loko Faro a va tikisela vutomi, va sole Muxe na Aroni hi ku vula va ku: “Mi [endle] leswaku Faro ni malandza yakwe va hi venga naswona mi veke banga evokweni ra vona leswaku va hi dlaya.” (Eks. 5:19-21) Va sole malandza ya Xikwembu yo tshembeka. Ku vava ka swona! Loko ku ve i khale u ri karhi u tiyisela swiphiqo, xana u nga yi tiyisa njhani ndlela leyi u tshembaka Yehovha hayona ni nhlangano wakwe?

6. Hi dyondza yini eka muprofeta Habakuku mayelana ni ndlela yo tiyisela swiphiqo? (Habakuku 3:17-19)

⁶ Chululela Yehovha ta le mbilwini hi xikhongelo naswona lava nseketelo wakwe. Muprofeta Habakuku u langutane ni swiphiqo swo tala. Swi tikomba onge nkarhi wun’wana a a kanakana loko Yehovha a khathala ha yena. U byele Yehovha ndlela leyi a a titwa hayona hi xikhongelo. U te: “Yehovha Xikwembu xanga, xana ndzi ta kombela ku pfuniwa ku fikela rini, kambe u nga ndzi pfuni? . . . Hikwalaho ka yini u tshika vanhu va tshikileriwa?” (Hab. 1:2, 3) Yehovha u xi hlamurile xikhongelo xa nandza wakwe wo tshembeka lexi humaka embilwini. (Hab. 2:2, 3) Endzhaku ko anakanyisisa hi ndlela leyi Yehovha a poniseke vanhu vakwe hayona, Habakuku u tlhele a va ni ntsako. A a tiyiseka leswaku Yehovha wa khathala hi yena nileswaku a a ta n’wi pfuna a tiyisela ndzingo wihi ni wihi. (Hlaya Habakuku 3:17-19.) Hi dyondza yini? Loko ku ri ni leswi ku karhataka, khongela eka Yehovha u n’wi byela ndlela leyi u ti twaka hayona. Kombela leswaku a ku pfuna. Loko u endla tano, u nga tiyiseka leswaku Yehovha u ta ku nyika matimba lama u ma lavaka yo tiyisela. Loko u xiya ndlela leyi Yehovha a ku seketelaka hayona, ripfumelo ra wena eka yena ri ta ya ri tiya swinene.

7. Maxaka ya Shirley a ma ringeta ku swi endla yini naswona u pfuniwe hi yini leswaku ripfumelo rakwe eka Yehovha ri nga heli?

⁷ Tshama u ri karhi u tiyisa vuxaka bya wena ni Xikwembu. A hi xiyeni ndlela leyi sweswo swi pfuneke Shirley makwerhu waxisati wa le Papua New Guinea, loko a langutane ni swiphiqo. b Ndyangu wakwe a wu ri ni vusweti naswona mikarhi yin’wana a swi nga olovi leswaku va kuma swakudya leswi eneleke. Un’wana wa xaka u ringete ku n’wi tshikisa ku tshemba Yehovha. U te: “U ri moya lowo kwetsima wa ku pfuna, kambe wu kwihi mpfuno wa kona? Ni sweswi ma ha ri swisiwana. U tidyela nkarhi hi ku chumayela.” Shirley u ri: “Ndzi ti  vutise ndzi ku: ‘Xana Xikwembu xa khathala hi hina kumbe ee?’ Hi ku hatlisa ndzi khongele eka Yehovha ivi ndzi n’wi byela hinkwaswo leswi a swi ndzi karhata. Ndzi ye emahlweni ndzi hlaya Bibele, tibuku ta hina, ndzi chumayela ni ku ya etinhlengeletanweni ta vandlha.” U sungule ku swi xiya leswaku Yehovha a a khathalela ndyangu wakwe. Ndyangu wakwe a wu nga etleli wu nga dyanga naswona a wu tsakile. U ri: “Ndzi vone Yehovha a hlamula swikhongelo swa mina.” (1 Tim. 6:6-8) Loko u tshama u ri karhi u endla leswi tiyisaka vuxaka bya wena na Yehovha, a wu nge pfumeleli swiphiqo kumbe ku kanakana ku ku hambanisa na Yehovha.

8. Ku nga humelela yini hi vamakwerhu lava rhangelaka eka nhlangano wa Yehovha?

⁸ Hi ku tirhisa swihaxamahungu na Inthanete, valala va hina va haxa mavunwa kumbe ku vula leswi hoxeke hi vamakwerhu lava rhangelaka eka nhlangano wa Yehovha. (Ps. 31:13) Vamakwerhu van’wana va khomiwile ni ku hehliwa tanihi hi swigevenga. Vakreste va le mikarhini ya ku tsariwa ka Bibele va langutane ni swiyimo swo tano loko muapostola Pawulo a hehliwa ni ku khomiwa swi nga fanelanga. Xana va endle yini?

9. Xana Vakreste van’wana va endle yini loko muapostola Pawulo a pfaleriwa ejele?

⁹ Vakreste van’wana emikarhini ya ku tsariwa ka Bibele va tshike ku seketela muapostola Pawulo loko a ri ejele le Rhoma. (2 Tim. 1:8, 15) Hikwalahokayini? Xana Pawulo a a va khomisa tingana hileswi vanhu a va n’wi languta tanihi xigevenga? (2 Tim. 2:8, 9) Kumbe a va khomiwe hi rhumbyana va chava leswaku na vona va nga xanisiwa? Ku nga khathariseki xivangelo xa vona, ehleketa ndlela leyi Pawulo a nga vaka a titwe hayona. U tiyisele maxangu yo tala naswona u veke vutomi byakwe ekhombyeni hikwalaho ka vona. (Mit. 20:18-21; 2 Kor. 1:8) Hi nga tshuki hi fana ni vanhu volavo lava lahleleke Pawulo mavoko hi nkarhi lowu a a lava ku seketeriwa! I yini leswi hi faneleke hi swi tsundzuka loko lava hi rhangelaka va xanisiwa?

10. I yini leswi hi faneleke hi swi tsundzuka loko vamakwerhu lava hi rhangelaka va xanisiwa naswona hikwalahokayini?

 ¹⁰ Tsundzuka leswaku hikwalahokayini hi xanisiwa nileswaku muvangi wa sweswo i mani. Timotiya wa vumbirhi 3:12 yi ri: “Hinkwavo lava navelaka ku hanya hi ku tinyiketela eka Xikwembu hi ku fambisana na Kreste Yesu na vona va ta xanisiwa.” Hikwalaho a hi fanelanga hi hlamala leswi Sathana a hlaselaka ngopfu vamakwerhu lava rhangelaka. Xikongomelo xa minhlaselo leyi i ku endla leswaku va nga ha tshembeki ni ku endla leswaku hi chava.​—1 Pet. 5:8.

11. I yini leswi hi swi dyondzaka hi Onesiforo? (2 Timotiya 1:16-18)

¹¹ Tshama u ri karhi u seketela vamakwenu naswona u nga va lahli. (Hlaya 2 Timotiya 1:16-18.) Mukreste la vuriwaka Onesiforo u seketele muapostola Pawulo loko a pfaleriwe ejele. ‘A a nga khomiwi hi tingana hileswi Pawulo khomiwile.’ Ematshan’weni ya sweswo, Onesiforo u lavalave Pawulo kutani loko a n’wi kumile, u ringete ku n’wi pfuna hi swilo leswi a a swi lava. Hi ku endla tano, Onesiforo u veke vutomi byakwe ekhombyeni. Hi dyondza yini? A hi fanelanga hi pfumelela ku chava vanhu ku hi sivela ku seketela vamakwerhu loko va xanisiwa. A hi va pfuneni ni ku va seketela. (Swiv. 17:17) Ha va rhandza naswona va lava nseketelo wa hina.

12. I yini leswi hi swi dyondzaka eka vamakwerhu va le Russia?

¹² Xiya ndlela leyi vamakwerhu va le Russia va pfuneke vamakwavo lava nga ejele hayona. Vamakwerhu vo tala va ya ekhoto ku ya seketela vamakwavo van’wana lava yaka eku tengisiweni. Hi dyondza yini? Loko vamakwerhu lava rhangelaka va onhiwa vito, va pfaleriwa kumbe va xanisiwa, sweswo swi nga ku chavisi. Va khongelele, pfuna swirho swa mindyangu ya vona naswona lava tindlela tin’wana to va seketela.​—Mit. 12:5; 2 Kor. 1:10, 11.

13. Xana ku hlekuriwa ku nga endla hi tshika ku tshemba Yehovha ni nhlangano wakwe hi ndlela yihi?

¹³ Maxaka lama nga gandzeriki Yehovha, vatirhikulorhi kumbe vadyondzikulorhi va nga hi hlekula loko hi chumayela kumbe hileswi hi hanyaka hi milawu ya Yehovha. (1 Pet. 4:4) Va nga ha ku: “Ndzi rhandza vumunhu bya wena kambe kereke ya wena ya tikisa naswona i ya xikhale.” Van’wana va nga ha xopaxopa ndlela leyi hi khomaka lava susiweke hayona hi ku vula va ku: “Kambe mi ri mi na rirhandzu.” Marito yo tano ma nga byala mbewu ya ku kanakana etimbilwini ta hina. Hi nga sungula ku tivutisa hi ku: ‘Xana Yehovha u tikisa swilo? Xana nhlangano wakwe wu hi tsona ntsako?’ Loko u ri eka xiyimo xo tano, u nga endla yini leswaku u tshama u ri ekusuhi na Yehovha ni nhlangano wakwe?

14. Hi fanele hi endla yini loko van’wana va hi hlekula hileswi hi hanyaka hi milawu ya Yehovha? (Pisalema 119:50-52)

¹⁴ Tiyimisele ku hanya hi milawu ya yehovha. Yobo a a ri wanuna loyi a hanya hi milawu ya Yehovha hambiloko a hlekuriwa. Un’wana wa lava a va tiendla vanghana va Yobo, u kale a ringeta ku endla Yobo a tshemba leswaku Xikwembu a xi na mhaka ni leswaku wa yi yingisa milawu ya xona kumbe ee. (Yobo 4:17, 18; 22:3) Hambiswiritano, Yobo a nga ma pfumelanga mavunwa wolawo. A a swi tiva leswaku milawu ya Yehovha ya leswo lulama ni leswi nga lulamangiki hi leyinene naswona a a tiyimisele ku hanya hayona. A nga va pfumelelanga van’wana va n’wi tshikisa ku tshembeka. (Yobo 27:5, 6) Hi dyondza yini? U nga pfumeli ku hlekuriwa ku endla leswaku u kanakana milawu ya Yehovha. Ehleketa hileswi endlekeke evuton’wini bya wena. Xana a wu si tivonela  hi ya wena leswaku mikarhi hinkwayo milawu ya Yehovha i yinene nileswaku ya ku vuyerisa? Tiyimisele ku seketela nhlangano lowu tirhisaka milawu yoleyo. Loko u endla tano, a wu nge hambani na Yehovha hambiloko wo hlekuriwa hi tindlela to hambanahambana.​—Hlaya Pisalema 119:50-52.

15. Hikwalahokayini Brizit a a hlekuriwa?

¹⁵ Xiya ntokoto wa makwerhu waxisati Brizit wa le India. A a hlekuriwa hi vandyangu hikwalaho ka ripfumelo rakwe. Endzhaku ka loko a khuvuriwile hi 1997, nuna wakwe loyi a a nga ri Mbhoni u heleriwe hi ntirho. Nuna wakwe endle xiboho xa ku va rhurha tanihi ndyangu leswaku va ya tshama ni vingi vakwe lava a va tshama edorobeni rin’wana. Kambe Brizit a ha ta langutana ni mitlhontlho yin’wana leyikulu. Leswi nuna wakwe a a nga tirhi, Brizit a ta boheka ku tirha leswaku a wundla ndyangu wakwe. Nakambe vandlha ra le kusuhi a ri ri kwalomu ka mpfhuka wa 350 wa tikhilomitara. Lexi twisaka ku vava maxaka ya ka va nuna a ma n’wi kaneta hikwalaho ka ripfumelo rakwe. Xiyimo xi ye xi nyanya lerova, Brizit ni ndyangu wakwe va boheke ku rhurhela kun’wana. Nuna wa yena u file va nga swi langutelanga. Hi ku famba ka nkarhi, ntombhi yakwe leyi a yi ri ni malembe ya 12 yi file hikwalaho ka khensa. Xo biha no tlurisa, maxaka yakwe a va n’wi vona nandzu. Va vule leswaku loko a a nga ri Mbhoni ya Yehovha, makhombo lawa hinkwawo a ma ta va ma nga endlekanga. Hambiswiritano u ye emahlweni a tshemba Yehovha ni ku tshama a ri ekusuhi ni nhlangano wakwe.

16. Brizit u katekisiwe hi ndlela yihi hikwalaho ko tshama a ri ekusuhi na Yehovha ni nhlangano wakwe?

¹⁶ Leswi Brizit a tshama ekule swinene ni vandlha, mulanguteri wa muganga u n’wi khutaze leswaku a chumayela laha a tshamaka kona ni ku fambisa tinhlengeletano ta vandlha ekaya rakwe. Eku sunguleni a a vona ku ri ndzhwalo. Hambiswiritano u yingise xiringanyeto xa mulanguteri wa muganga. A a chumayela van’wana mahungu lamanene, a khoma tinhlengeletano ta vandlha ekaya rakwe ni ku endla vugandzeri bya ndyangu ni tintombhi takwe. Ku ve ni vuyelo byihi? Brizit u kote ku sungula  ni ku fambisa tidyondzo to tala ta Bibele naswona swichudeni swakwe swa Bibele swo hlayanyana swi khuvuriwile. Hi 2005 u ve phayona ra nkarhi hinkwawo. Swi n’wi vuyerisile ku tshemba Yehovha ni ku tshama a tshembekile eka nhlangano wakwe. Tintombhi takwe ti tirhela Yehovha hi ku tshembeka naswona se ku ni mavandlha mambirhi endhawini yoleyo! Brizit wa tiyiseka leswaku i Yehovha loyi a n’wi nyikeke matimba ya ku tiyisela maxangu ni ku hlekuriwa hi va ndyangu wakwe.

17. Hi fanele hi tiyimisela ku endla yini?

¹⁷ Sathana u lava hi tshemba leswaku Yehovha a nga na mhaka na hina loko hi ri emaxangwini nileswaku vutomi bya hina byi ta tika loko hi seketela nhlangano wa Yehovha. Sathana u lava hi chava loko vamakwerhu lava rhangelaka, va thyakisiwa vito, va xanisiwa kumbe va pfaleriwa ejele. U lava leswaku hi tshika ku tshemba milawu ya Yehovha swin’we ni nhlangano Wakwe hi ku endla leswaku hi hlekuriwa. Hambiswiritano, a nge hi kanganyisi hikuva ha mativa marhengu yakwe yo homboloka. (2 Kor. 2:11) Tiyimisele ku bakanya mavunwa ya Sathana kutani u tshama u tshembekile eka Yehovha ni nhlangano Wakwe. Tsundzuka leswaku Yehovha a nge ku lahli. (Ps. 28:7) Hikwalaho, u nga pfumeleli nchumu wu ku hambanisa na Yehovha!—Rhom. 8:35-39.

18. I yini leswi hi nga ta swi kambisisa eka nhlokomhaka leyi landzelaka?

¹⁸ Eka nhlokomhaka leyi, hi bule hi mitlhontlho leyi hi nga langutanaka na yona leyi nga humiki evandlheni. Kambe ndlela leyi hi tshembaka Yehovha ni nhlangano wakwe yi nga tlhela yi ringiwa hi mitlhontlho ya le vandlheni. Xana hi nga yi hlula njhani mitlhontlho yo tano? Hi ta bula hi sweswo eka nhlokomhaka leyi landzelaka.