Leswi Nga Ku Pfunaka Leswaku U Dyondza Nkarhi Ni Nkarhi
XANA swa ku tikela ku va ni dyondzo ya Bibele ya munhu hi yexe nkarhi ni nkarhi yi tlhela yi va leyi tsakisaka? Hinkwerhu swa hi endlekela mikarhi yin’wana. Kambe ehleketa hi swilo swin’wana leswi hi swi endlaka nkarhi ni nkarhi swo fana ni ku hlamba. Hi titwa hi phyuphyile endzhaku ko hlamba hambileswi swi tekaka nkarhi naswona swi lavaka matshalatshala. Ku dyondza Bibele swi phyuphyisa ku fana ni ku ‘hlamba hi mati [u] tirhisa rito.’ (Efe. 5:26) Xiya swin’wana swa swiringanyeto leswi nga ku pfunaka:
Endla xiyimiso. Dyondzo ya Bibele ya munhu hi yexe i yin’wana ya “swilo leswi nga swa nkoka swinene” leswi Mukreste a nga fanelangiki a swi honisa. (Filp. 1:10) Leswaku u kota ku namarhela xiyimiso xa wena, xi veke laha u nga ta kota ku xi vona hi ku olova, ku nga ha va efirijini kumbe endhawini yin’wana. Swi nga ha ku pfuna ku seta alamu efonini leswaku yi ku tsundzuxa loko nkarhi wo dyondza wu fika.
Hlawula nkarhi lowu nga ta ku tirhela. Xana swa ku olovela ku dyondza nkarhi wo leha kume lowutsongo? Hi wena u swi tivaka kahle swiyimo swa wena. Wu hlele kahle nkarhi wa wena wo dyondza. Loko nkarhi wa wena wo dyondza wu fika kambe u titwa u loloha, swi nga va njhani u dyondza timinete ta khume? Hi ku dyondza timinete toleto titsongo, u ta va u fikelele swo tala ku tlula loko a wu lo tshika. Loko wo kala u sungula, u ta navela ku ya emahlweni u dyondza.—Filp. 2:13.
Hlawula leswi u lavaka ku swi dyondza ka ha ri emahlweni. Loko wa ha lava ku rhanga hi ku ehleketa hileswi u nga ta swi dyondza, u ta va u nga wu ‘tirhisa kahle nkarhi wa wena.’ (Efe. 5:16) Ringeta ku ti tsala ehansi tinhlokomhaka leti u tsakelaka ku dyondza ha tona. Loko u va ni xivutiso, xi tsale ehansi. Endzhaku ka dyondzo, u nga ha engetela swin’wana eka nxaxamelo wa wena wa leswi u tsakelaka ku dyondza ha swona.
Fambisana ni swiyimo. Cincacinca nkarhi lowu u nga ta dyondza ha wona kumbe tinhlokomhaka leti u tsakelaka ku dyondza ha tona. Lexi nga xa nkoka ngopfu, i ku va u dyondza nkarhi ni nkarhi ku nga ri leswaku u dyondza yini, rini kumbe nkarhi wo tanihi kwihi.
Ha vuyeriwa swinene loko hi dyondza nkarhi ni nkarhi. Hi tshinela ekusuhi na Yehovha, hi dyondza ku endla swilo hi vutlhari naswona swa hi phyuphyisa.—Yox. 1:8.
