Xana wa swi lava ku vuyeriwa swinene loko u endla dyondzo ya munhu hi yexe? U nga ringeta ku tirhisa swiringanyeto leswi landzelaka swo kuma ndhawu leyinene yo dyondzela eka yona.

• Hlawula ndhawu leyinene. Loko swi koteka, hlawula ndhawu leyi nga hlangahlanganangiki ni leyi u nga ta kota ku vona kahle. U nga tshama edesikeni, etafuleni kumbe u hlawula ndhawu ya le handle laha u nga ta tshama kahle.

• Kuma ndhawu leyi u nga ta va wexe. Yesu u hlawule ku khongela “endhawini leyi nga riki na vanhu.” (Mar. 1:35) Loko swi nga koteki leswaku u va wexe, u nga byela swirho swa ndyangu kumbe lava u tshamaka na vona leswaku u dyondza rini ivi u va kombela leswaku va nga ku kavanyeti.

• U nga kavanyeteki. Papalata swikavanyeto. Loko u tirhisa foni kumbe tablet leswaku u dyondza, yi titivate kumbe u yi veka eka airplane leswaku u nga kavanyeteki. Nakambe loko u tsundzuka leswaku ku ni nchumu wo karhi lowu u faneleke u wu endla, wu tsale ehansi leswaku u ta wu endla loko u heta. Loko miehleketo ya wena yi pfa yi tsendzeleka, wisanyana ivi u tiolola.