Lembe ni lembe ku vuyiseriwa vamakwerhu vo tala evandlheni ra Vukreste. Ehleketa ‘ntsako lowu vaka kona etilweni’ loko mudyohi un’we a hundzuka! (Luka 15:7, 10) Loko wa ha ku vuyiseriwa evandlheni tiyiseka leswaku Yesu, tintsumi na Yehovha va tsaka swinene. Kambe loko u ri karhi u tiyisa vuxaka bya wena na Yehovha, u ta langutana ni mitlhontlho. Hi yihi mitlhontlho ya kona naswona i yini lexi nga ku pfunaka u yi hlula?

Vo tala va ha titwa nandzu hambiloko va tlhelele evandlheni. Kumbexana wa yi tiva ndlela leyi Hosi Davhida a titweke hayona. Hambiloko a rivaleriwe swidyoho swakwe, u te: “Swidyoho swa mina swo tala swa ndzi hlangahlanganisa.” (Ps. 40:12; 65:3) Van’wana hambiloko va tlhelele eka Yehovha, va nga ha titwa nandzu kumbe va khomiwa hi tingana ku ringana malembe yo tala. Isabelle a a susiwile evandlheni ku tlula malembe ya 20. * U ri: “Swa ndzi tikela ku tshemba leswaku Yehovha u ndzi rivalerile.” Ku titwa hi ndlela yoleyo swi nga ha tlhela swi onha vuxaka bya wena na Yehovha. (Swiv. 24:10) U nga pfumeli ku titwa tano.

Van’wana va nga ha vilerisiwa hileswaku a va nge he swi koti ku tlhela va aka vuxaka bya vona na Yehovha byi tiya hilaha a swi ri hakona eku sunguleni. Endzhaku ka loko a vuyiseriwile, Antoine u te: “A ndzi rivale leswi a ndzi hanyisa xiswona loko ndzi nga si susiwa.” Ku titwa ko tano ku endla leswaku van’wana va nga ha tikarhati eka mitirho ya Yehovha.

Hi xikombiso, a hi nge xidzedze lexi nga ni matimba xi onha kaya leri munhu a ri rhandzaka swinene, a nga ha hela matimba loko a ehleketa hi nkarhi ni matimba lawa a faneleke a ma heta a ri karhi a ri lunghisa. Hilaha ku fanaka loko u endle xidyoho lexikulu lexi onheke vuxaka bya wena na Yehovha, u nga ha vona onge swi ta tika swinene ku tlhela u byi pfuxeta. Kambe ku ni leswi nga ku pfunaka.

Yehovha wa hi rhamba, u ri: “Tanani hi ta lulamisa timhaka.” (Esa. 1:18) Se u endle matshalatshala  leswaku u “lulamisa timhaka.” Yehovha wa ku rhandza hileswi u endleke tano. Ehleketa hi mhaka leyi: Se u nyike Yehovha xivangelo lexi twalaka xo hlamula Sathana loyi a n’wi tlhontlhaka!—Swiv. 27:11.

Loko u tlhelele eka Yehovha, swi kombisa leswaku se u tshinele eka yena naswona na yena wa ku tshembisa leswaku u ta tshinela eka wena. (Yak. 4:8) Swa tsakisa loko vamakwerhu va tiva leswaku se u vuyiseriwile evandlheni kambe ku ni swin’wana leswi u faneleke u swi endla. U fanele u ya emahlweni u tiyisa vuxaka bya wena na Yehovha, ku nga Tatana tlhelo Munghana wa wena. U nga swi endla njhani sweswo?

Ringeta ku tivekela leswi u nga swi fikelelaka. Tsundzuka, leswi u swi dyondzeke hi Yehovha ni switshembiso swakwe hi vumundzuku swa ha ri tano. Kambe u fanele u tlhela u endla leswi Vakreste va faneleke va swi endla swo tanihi ku chumayela, ku ya etinhlengeletan’weni ta vandlha nkarhi ni nkarhi ni ku va ni vuxaka lebyinene ni vamakwerhu. A hi xiye swin’wana leswi u nga swi fikelelaka.

Vulavula na Yehovha nkarhi ni nkarhi. Tata wa wena wa le tilweni wa swi tiva leswaku ku titwa nandzu swi nga endla swi ku tikela ku khongela eka yena. (Rhom. 8:26) Hikwalaho, “phikelela exikhongelweni” u byela Yehovha ndlela leyi u swi tsakelaka hayona ku va munghana wakwe. (Rhom. 12:12) Andrej u ri: “A ndzi tivona nandzu ni ku khomiwa hi tingana. Kambe mikarhi hinkwayo loko ndzi heta ku khongela, a ndzi titwa ndzi antswa. A ndzi titwa ndzi ri ni ku rhula ka miehleketo.” Loko u nga swi tivi leswi u nga swi khongelelaka kambisisa xikhongelo xa ku hundzuka ka Hosi Davhida lexi kumekaka eka Pisalema 51 na 65.

Hlaya Bibele nkarhi ni nkarhi. Swi ta ku pfuna u tiyisa vuxaka bya wena na Yehovha ni ndlela leyi u n’wi rhandzaka hayona. (Ps. 19:7-11) Felipe u te: “Ku ka ndzi nga tinyiki nkarhi wo tiyisa vuxaka bya mina na Yehovha swi endle leswaku byi tsana naswona ndzi n’wi khomise tingana. Leswi a ndzi nga swi lavi ku tlhela ndzi endla xihoxo lexi fanaka, ndzi teke xiboho xo tiyisa vuxaka bya mina na Yehovha ni ku tlhela ndzi byi sirhelela.” Na wena u nga endla tano. Loko ku ri hileswaku swa ku tikela ku dyondza hi Yehovha nkarhi ni nkarhi, kombela makwerhu loyi a nga ni ntokoto a ku pfuna.

Tiyisa vuxaka bya wena ni vamakwerhu. Van’wana lava ha ku vuyelaka evandlheni va karhatiwa hileswaku vamakwerhu va nga ha va languta hi tihlo rin’wana. Larissa u ri: “A ndzi khomiwa hi tingana. A ndzi vona onge ndzi khomise vandlha tingana. Ndzi titwe tano ku ringana nkarhi wo leha.” Tiyiseka leswaku vakulu ni vamakwerhu va lava ku ku pfuna leswaku u tlhela u tiyisa vuxaka bya wena na Yehovha. (Vona bokisi leri nge, “ Leswi Vakulu Va Nga Swi Endlaka.”) Va tsaka leswi u tlheleleke eka Yehovha naswona va lava ku ku pfuna!—Swiv. 17:17.

I yini lexi nga ku pfunaka leswaku u va ni vuxaka lebyinene ni vamakwerhu? Katseka eka leswi vamakwerhu va swi endlaka, hi ku va kona etinhlengeletanweni ta vandlha ni ku chumayela nkarhi ni nkarhi. Sweswo swi ta ku pfuna njhani? Felix u te: “Vamakwerhu a va swi langutele hi mahlo ngati leswaku ndzi vuya. Ndzi titwe ndzi ri wa nkoka. Va ndzi pfune leswaku ndzi titwa ndzi ri ekaya, ndzi rivaleriwile ni ku ya emahlweni ndzi tirhela Yehovha.”—Vona bokisi leri nge, “ Leswi U Nga Swi Endlaka.”

Sathana u ta ya emahlweni a ku tisela swiphiqo leswi nga ku hetaka matimba loko u ri karhi u tikarhatela ku tlhela u aka vuxaka bya wena na Yehovha. (Luka 4:13) Tiyimisele ku tiyisa vuxaka bya wena na Yehovha sweswi.

Yehovha u tshembisa tinyimpfu takwe leswi: “Leyi lahlekeke ndzi ta yi lavisisa, leyi hambukeke ndzi ta yi vuyisa, leyi vavisekeke ndzi ta yi bohelela, leyi tsaneke ndzi ta yi tiyisa.” (Ezek. 34:16) Yehovha u pfune vanhu vo tala leswaku va tlhela va va ni vuxaka lebyinene na yena. Tiyiseka leswaku u lava ku ku pfuna u ya emahlweni u tiyisa vuxaka bya wena na yena.