SOCHA ra Munazi ri byele ntlawa wa Timbhoni ta Yehovha hi nkarhi wa Nyimpi ya Vumbirhi ya Misava ri ku: “Loko un’wana wa n’wina o ala ku lwa ni tiko ra Furwa kumbe ra Nghilandhi, hinkwenu ka n’wina mi ta dlayiwa.” A nga kona ni un’we wa vamakwerhu loyi a yeke evusocheni. Hakunene sweswo a swi lava xivindzi! Xikombiso lexi xi ri kombisa kahle langutelo leri hina Timbhoni ta Yehovha hi nga na rona: Ha ala ku lwa tinyimpi ta misava leyi. A hi katseki eka tinyimpi ta misava leyi hambiloko hi xungetiwa ku dlayiwa.

1. VANHU VA XIKWEMBU A VA RI VA TIKO RIN’WE

Enkarhini lowu hundzeke, Yehovha u hlengelete vanhu vakwe leswaku va vumba tiko rin’we, ku nga ra Israyele. U vitane Vaisrayele “nhundzu [yakwe] yo hlawuleka exikarhi ka vanhu hinkwavo.” (Eks. 19:5) Xikwembu xi tlhele xi va nyika tiko ra vona. Kutani loko Xikwembu xi lerisa Vaisrayele leswaku va ya lwa ni matiko man’wana, a va nga lwi ni vagandzerikulobye kumbe va dlayana hi xivona. *

Namuntlha, vagandzeri va ntiyiso va huma eka “matiko hinkwawo ni tinyimba hinkwato ni vanhu hinkwavo ni tindzimi hinkwato.” (Nhlav. 7:9) Loko vanhu va Xikwembu vo ya enyimpini, swi ta fana ni loko va lwa ni vagandzerikulobye hambi ku ri ku dlayana.

 2. YEHOVHA U LERISE VAISRAYELE LESWAKU VA YA ENYIMPINI

Enkarhini lowu hundzeke, Yehovha hi yena a a endla xiboho xa leswaku hikwalahokayini Vaisrayele va fanele va ya enyimpini naswona rini. Hi xikombiso, Xikwembu xi lerise Vaisrayele leswaku va lwa ni Vakanana lava a va dume hi ku gandzela madimona, va tikhoma ku biha hi swa masangu ni ku endla magandzelo hi vana. Yehovha a a lerise Vaisrayele leswaku va lovisa vanhu vo biha lava a va endla swilo swo nyenyetsa etikweni leri a va tshembiseke rona. (Lev. 18:24, 25) Endzhaku ka loko Vaisrayele va tshame eTikweni leri Tshembisiweke, mikarhi yin’wana Xikwembu xi va pfumelele leswaku va tilwela eka valala va vona lava a va va tshikilela. (2 Sam. 5:17-25) Hambiswiritano, a ku si tshama ku va ni nkarhi lowu Yehovha a pfumeleleke Vaisrayele leswaku va tiendlela xiboho xo ya enyimpini. Loko va tiendlela xiboho xo ya enyimpini, a ku va ni vuyelo byo biha swinene.—Tinhl. 14:41-45; 2 Tikr. 35:20-24.

Namuntlha, Yehovha a nga va nyikanga vanhu mpfumelelo wo ya enyimpini. Matiko ma lwa hileswi ma lavaka ku tivuyerisa ku nga ri ku endla ku rhandza ka Xikwembu. Ma sungula tinyimpi hileswi ma lwelaka ku va ni ndhawu leyikulu, mali yo tala kumbe hikwalaho ka swa tipolitiki. Kambe ku vuriwa yini hi lava vulaka leswaku va lwela vito ra Xikwembu leswaku va sirhelela vugandzeri bya xona kumbe va dlaya valala va xona? Yehovha u ta sirhelela vagandzeri vakwe va ntiyiso ni ku lovisa valala vakwe eka nyimpi leyi nga ta va kona ku nga ri khale, ku nga nyimpi ya Armagedoni. (Nhlav. 16:14, 16) Eka nyimpi yoleyo, ku ta lwa ntsena mavuthu ya Xikwembu ya le tilweni, ku nga ri vagandzeri va xona va laha misaveni.—Nhlav. 19:11-15.

3. VAISRAYELE A VA NGA VA DLAYI LAVA A VA RI NI RIPFUMELO

Enkarhini lowu hundzeke, Mavuthu ya Vaisrayele mikarhi yo tala a ma va tsetselela lava a va kombisa ripfumelo eka Xikwembu ivi ma dlaya ntsena lava Yehovha a va avanyiseke tanihi lava faneriwaka hi ku dlayiwa. Xiya swikombiso swimbirhi. Hambileswi Yehovha a leriseke leswaku muti wa Yeriko wu lovisiwa, Vaisrayele a va n’wi dlayanga  Rahava ni ndyangu wa ka vona hileswi a a ri ni ripfumelo. (Yox. 2:9-16; 6:16, 17) Hi ku famba ka nkarhi, muti hinkwawo wa Vagibiyoni a wu dlayiwanga endzhaku ka loko va kombise leswaku va xi chava Xikwembu.—Yox. 9:3-9, 17-19.

Namuntlha, loko matiko ma lwa ma dlaya ni lava nga ni ripfumelo. Mikarhi yin’wana, vaakatiko lava nga riki na nandzu va dlayiwa loko matiko yo karhi ma lwa.

4. VAISRAYELE A VA BOHEKA KU YINGISA MILAWU YA XIKWEMBU LOKO VA LWA NYIMPI

Enkarhini lowu hundzeke, Yehovha a a lava leswaku masocha ya Vaisrayele ma yingisa nkongomiso wakwe loko ma ya enyimpini. Hi xikombiso, mikarhi yin’wana Xikwembu a xi lava leswaku va rhanga va “endla ku rhula” ni muti lowu va lavaka ku lwa na wona. (Det. 20:10) Nakambe Yehovha a a lava leswaku masocha ya Vaisrayele ma tshama ma basile emahanyelweni ni le mirini ku katsa ni le matendeni ya wona. (Det. 23:9-14) Hambileswi masocha ya matiko lawa nga ekusuhi na wona hi ntolovelo a ma pfinya vavasati loko ma hlurile, Yehovha a a nga va pfumeleli Vaisrayele ku endla tano. Loko va lava ku teka wansati loyi a humaka emutini lowu va wu hluleke, a va fanele va rindza n’hweti.—Det. 21:10-13.

Namuntlha, matiko yo tala ma endle ntwanano wa ku landzelela milawu yo karhi loko ma lwa nyimpi. Hambileswi milawu leyi yi endleriweke ku sirhelela vaakatiko, lexi twisaka ku vava hileswaku mikarhi yo tala ya tluriwa.

5. XIKWEMBU A XI LWELA TIKO RA XONA

Enkarhini lowu hundzeke, Yehovha a a lwela Vaisrayele naswona mikarhi yo tala a a endla leswaku va hlula hi singita. Hi xikombiso, Yehovha u va pfune njhani Vaisrayele leswaku va hlula muti wa Yeriko? Hi ku kongomisiwa hi Yehovha, loko Vaisrayele “va be hungwe lerikulu ra nyimpi, khumbi ri wel[e] ehansi” leswi endleke leswaku va hlula muti hi ku olova. (Yox. 6:20) Xana va va hlule njhani Vaamori? “Yehovha [u] va nisel[e] xihangu lexikulu . . . Kahlekahle lava dlayiweke hi xihangu a va tele ku tlula lava dlayiweke hi banga ra Vaisrayele.”—Yox. 10:6-11.

VAKRESTE VA NTIYISO VA NI KU RHULA NI VANHU VAN’WANA

Hilaha hi swi voneke hakona, xiyimo xa hina namuntlha xi hambane swinene ni xa Vaisrayele va khale. Hambiswiritano, sweswo a hi swona ntsena swivangelo leswi endlaka hi nga yi enyimpini. Ku ni swin’wana. Hi xikombiso, Xikwembu xi vule leswaku emasikwini yo hetelela, lava dyondzisiwaka hi xona “a va nge he dyondzi nyimpi” hambi ku ri ku katseka eka yona. (Esa. 2:2-4) Nakambe, Kreste u vule leswaku vadyondzisiwa vakwe a va nga ta va “xiphemu xa misava”; a va nga ta katseka eka swa tipolitiki ni minjhekanjhekisano ya misava leyi.—Yoh. 15:19.

Kreste u tlhele a byela valandzeri vakwe leswaku va endla ni swin’wana. U va lerise leswaku va papalata swilo leswi nga ta endla va va ni xikhomela, va hlundzuka ni tinyimpi. (Mat. 5:21, 22) Nakambe u lerise valandzeri vakwe leswaku va “kondletela ku rhula” ni ku rhandza valala va vona.—Mat. 5:9, 44.

Ku vuriwa yini hi hina? Swi nga endleka hi nga swi lavi ku lwa enyimpini kambe xana etimbilwini ta hina hi ni rivengonyana leri endlaka hi nga twani ni vamakwerhu kumbe ri endla leswaku ku va ni ku avana evandlheni? A hi tikarhateleni ku tsuvula swilo swo tano etimbilwini ta hina.—Yak. 4:1, 11.

Ematshan’weni yo katseka etinyimpini ta matiko, hi kondletela ku rhula ni van’wana ni ku tlhela hi va rhandza. (Yoh. 13:34, 35) A hi tiyimiseleni ku nga katseki eka tinyimpi ni swa tipolitiki ivi hi ri langutela emahlweni siku leri Yehovha a nga ta ti herisela makumu tinyimpi.—Ps. 46:9.