1. Yehovha u hi nyike ntshembo wihi?

 YEHOVHA u hi nyike ntshembo wo tsakisa ku nga vutomi lebyi nga heriki. Van’wana va ni ntshembo wo hanya etilweni hilaha ku nga heriki va ri ni miri ya moya naswona va nga ha fi. (1 Kor. 15:50, 53) Hambiswiritano, vo tala va ta hanya laha misaveni hilaha ku nga heriki va nga ha vabyi naswona va tsakile. (Nhlav. 21:3, 4) Swi nga ri na mhaka leswaku hi ta hanya hilaha ku nga heriki etilweni kumbe emisaveni, ntshembo wa hina i wa risima swinene.

2. I mani loyi a hi nyikaka ntshembo naswona hikwalahokayini hi vula tano?

² Ndlela leyi rito “ntshembo” ri tirhisiweke hayona eBibeleni, ri nga vula “ku langutela leswaku ku ta endleka nchumu lowunene.” Ntshembo wa hina wu tiyile hikuva wu huma eka Yehovha. (Rhom. 15:13) Ha swi tiva leswi a swi tshembiseke naswona ha swi tiva leswaku wa swi endla leswi a swi tshembiseke. (Tinhl. 23:19) Ha tiyiseka leswaku Yehovha wa swi lava naswona u ni matimba ya ku endla swilo hinkwaswo leswi a swi tshembiseke. Ntshembo wa hina a hi milorho naswona hi na wona hileswi ku nga ni vumbhoni lebyi khomekaka.

3. Hi ta bula hi yini eka nhlokomhaka leyi? (Pisalema 27:14)

³ Tata wa hina la nge matilweni wa hi rhandza naswona u lava hi n’wi tshemba. (Hlaya Pisalema 27:14.) Loko hi tshemba Yehovha hilaha ku heleleke, hi ta kota ku tiyisela miringo ni ku va ni xivindzi ni ntsako hambiloko ko endleka yini. A hi voneni leswaku ntshembo wa hina wu hi sirhelela njhani. Hi ta rhanga hi kambisisa leswaku ntshembo wu fana njhani ni nsoma ni xihuku. Nakambe hi ta tlhela hi bula hi leswaku hi nga endla yini leswaku hi va ni ntshembo lowu tiyeke.

4. Ntshembo wu fana njhani ni nsoma? (Vaheveru 6:19)

⁴ Eka papila leri muapostola Pawulo a ri tsaleleke Vaheveru, u fanise ntshembo wa hina ni nsoma. (Hlaya Vaheveru 6:19.) Pawulo a a pfa a famba hi xikepe kutani a a swi tiva leswaku nsoma wu endla leswaku xikepe xi nga suki endhawini leyi xi yimeke eka yona. Siku rin’wana a a ri exikepeni loko ku va ni xidzedze xa matimba swinene. Kutani u vone vatluti va lahlela minsoma ematini leswaku xikepe xi nga yi xi ya hima maribye lama nga ni khombo. (Mit. 27:29, 39-41) Tanihi leswi nsoma wu endlaka leswaku xikepe xi nga suki endhawini leyi xi nga eka yona, ntshembo wa hina wu hi pfuna leswaku hi nga hambuki hi ya ekule na Yehovha loko hi langutana ni maxangu. Ntshembo wa hina lowu tiyeke wu hi pfuna ku langutana ni miringo leyi fanaka ni xidzedze hikuva ha tshemba leswaku swilo swi ta antswa. Tsundzuka leswaku Yesu u hi lemukisile leswaku hi ta xanisiwa. (Yoh. 15:20) Loko hi anakanyisisa hi switshembiso leswi nga ta endleka enkarhini lowu taka, swi ta endla leswaku hi khomelela eka ndlela leyi hi yi tekeke ya ku hanya tanihi Vakreste.

5. Ntshembo wu n’wi tiyise njhani Yesu loko a langutane ni rifu?

⁵ Xiya ndlela leyi ntshembo wu n’wi tiyiseke hayona Yesu hambileswi a a swi tiva leswaku u ta dlayiwa hi ndlela ya tihanyi. Hi siku ra Pentekosta ya 33 C.E., muapostola Petro u tshahe vuprofeta lebyi nga ebukwini ya Tipisalema lebyi hlamuselaka ndlela leyi Yesu a a rhule ni ku tiyiseka hayona, byi te: “Ndzi ta tshama ndzi ri ni ntshembo; hikuva a wu nge ndzi tshiki eSirheni naswona a wu nge pfumeli leswaku miri wa nandza wa wena la tshembekaka wu bola. . . . U ta endla leswaku ndzi tsaka swinene emahlweni ka wena.” (Mit. 2:25-28; Ps. 16:8-11) Hambileswi Yesu a a swi tiva leswaku a ta fa, a a tshemba leswaku Xikwembu xi ta n’wi pfuxa ni leswaku a a ta va ni ntsako wo tlhela a va swin’we ni Tata wakwe wa le tilweni.—Hev. 12:2, 3. 

6. Makwerhu un’wana u ri yini hi ntshembo?

⁶ Ntshembo wa hina wu pfune vamakwerhu vo tala leswaku va tiyisela. Xiya leswi pfuneke makwerhu wo tshembeka Leonard Chinn loyi a a tshama eNghilandhi. Hi nkarhi wa Nyimpi yo Sungula ya Misava, u khomiwile hileswi a aleke ku ya evusocheni. U pfaleriwe ejele tin’hweti timbirhi a ri yexe ivi endzhaku ka sweswo a tirhisiwa ku vava. Hi ku famba ka nkarhi u tsale leswi: “Ntokoto wa mina wu ndzi dyondzise leswaku ntshembo i wa nkoka swinene ni leswaku hi wona wu hi pfunaka hi kota ku tiyisela. Hi ni switshembiso swa risima eBibeleni, xikombiso xa Yesu, vaapostola ni vaprofeta. Hinkwaswo leswi swi hi nyika ntshembo hi leswi nga ta endleka enkarhini lowu taka ni ku hi pfuna hi tiyisela.” Ntshembo a wu fana ni nsoma eka Leonard naswona wu nga va tano ni le ka hina.

7. Miringo yi hi pfuna njhani leswaku hi va ni ntshembo lowu tiyeke? (Varhoma 5:3-5; Yakobo 1:12)

⁷ Ntshembo wa hina wa tiya loko hi tiyisela miringo ni ku vona ndlela leyi Yehovha a hi pfunaka hayona ni ku hi amukela. (Hlaya Varhoma 5:3-5; Yakobo 1:12.) Ntshembo lowu hi nga na wona wu tiye ku tlula ntshembo lowu a hi ri na wona loko hi amukela mahungu lamanene. Sathana u lava leswaku miringo yi hi heta matimba kambe Yehovha u ta hi pfuna leswaku hi yi hlula.

8. Ntshembo wu fana njhani ni xihuku? (1 Vatesalonika 5:8)

⁸ Bibele yi tlhela yi fanisa ntshembo wa hina ni xihuku. (Hlaya 1 Vatesalonika 5:8.) Socha ri ambala xihuku leswaku valala va nga ri vavisi nhloko. Eka nyimpi leyi hi yi lwaka na Sathana, hi fanele hi sirhelela miehleketo ya hina eka mihlaselo yakwe. U tirhisa swilo swo hambanahambana leswaku a hi ringa ni ku hi  onha miehleketo. Ku fana ni leswi xihuku xi sirhelelaka nhloko ya socha, ntshembo wa hina wu sirhelela miehleketo ya hina leswaku hi tshama hi tshembekile eka Yehovha.

9. Ku endleka yini loko vanhu va nga ri na ntshembo?

⁹ Ntshembo lowu hi nga na wona wo kuma vutomi lebyi nga heriki wu ta hi pfuna leswaku hi endla swilo hi vutlhari. Hi hala tlhelo, loko ho heleriwa hi ntshembo ivi hi sungula ku ehleketa ku fana ni vanhu lava nga gandzeriki Yehovha, hi nga ha rivala ntshembo wa hina wo hanya hilaha ku nga heriki. Ehleketa leswi endlekeleke Vakreste van’wana va le Korinto. A va nga ha xi tshembi xitshembiso xa nkoka xa Xikwembu xa leswaku vafi va ta pfuxiwa. (1 Kor. 15:12) Pawulo u vule leswaku vanhu lava nga riki na ntshembo va hanyela bya namuntlha ntsena. (1 Kor. 15:32) Vanhu vo tala namuntlha lava nga swi tshembiki switshembiso swa Xikwembu va hanyela bya namuntlha ntsena, va endla swin’wana ni swin’wana leswi va tsakisaka. Hambiswiritano, hina ha swi tshemba switshembiso swa Xikwembu. Ntshembo wa hina wu fana ni xihuku xo fanekisela lexi sirhelelaka miehleketo ya hina leswaku hi nga hanyi ku fana ni vanhu va misava leyi ivi hi onha vuxaka bya hina na Yehovha.—1 Kor. 15:33, 34.

10. Ntshembo wu nga hi sirhelela njhani eka miehleketo ya mavunwa?

¹⁰ Ntshembo wa hina wu nga tlhela wu hi pfuna hi papalata ku tibyela leswaku a hi nge pfuki hi swi kotile ku tsakisa Yehovha. Hi xikombiso, van’wana va nga ha ku: ‘A ndzi nge pfuki ndzi ve un’wana wa lava nga ta hanya hilaha ku nga heriki. A ndzi faneleki. A ndzi nge pfuki ndzi swi kotile ku hanya hi milawu ya Xikwembu.’ Tsundzuka leswaku Elifazi munghana wa Yobo wo biha u byele Yobo leswi fanaka. Elifazi u te: “Xana munhu wo va yini lerova a nga va la baseke?” U tlhele a vula leswi hi Xikwembu: “Waswivo! A xi va tshembi vakwetsimi va xona, hambi ku ri matilo a ma basanga ematihlweni ya xona.” (Yobo 15:14, 15) Wolawo i mavunwa! Tsundzuka leswaku i Sathana loyi a lavaka u ehleketa tano. Wa swi tiva leswaku loko wo tshika miehleketo yo tano yi dzima timitsu, u ta heleriwa hi ntshembo. Ematshan’weni ya sweswo, papalata mavunwa wolawo ivi u ehleketisisa hi switshembiso swa Yehovha. U nga swi kanakani leswaku Yehovha u lava u hanya hilaha ku nga heriki naswona u ta ku pfuna leswaku u swi fikelela sweswo.—1 Tim. 2:3, 4.

11. Hikwalahokayini hi fanele hi lehisa mbilu loko ha ha rindzele leswi Yehovha a hi tshembiseke swona?

¹¹ Mikarhi yin’wana swa tika ku tshama hi ri ni ntshembo lowu tiyeke. Hi nga ha hela mbilu loko ha ha rindzele Xikwembu. Hambiswiritano, Yehovha i wa hilaha ku nga heriki naswona ndlela leyi a langutaka nkarhi ha yona yi hambanile ni ya hina. (2 Pet. 3:8, 9) U ta hetisisa swikongomelo swakwe hi ndlela leyinene ngopfu kambe hi nkarhi wakwe ku nga ri wa hina. I yini leswi nga hi pfunaka leswaku hi tshama hi ri ni ntshembo lowu tiyeke loko ha ha rindzele Xikwembu leswaku xi hetisisa switshembiso swa xona?—Yak. 5:7, 8.

12. Hi ku ya hi Vaheveru 11:1, 6, ntshembo ni ripfumelo swi fambisana njhani?

¹² Hi ta ya emahlweni hi va ni ntshembo lowu tiyeke loko ho tshama hi ri ni vuxaka lebyinene na Yehovha loyi a nga ta endla leswaku ntshembo wa hina wu hetiseka. Entiyisweni Bibele yi hlamusela leswaku ntshembo ni ripfumelo ra leswaku Yehovha u kona swa fambisana naswona hi yena a “hakelaka lava [n’wi] lavaka hi mbilu hinkwayo.” (Hlaya Vaheveru 11:1, 6.) Loko Yehovha a ya a va wa xiviri eka hina, hi ta ya hi tshemba leswaku u ta hetisisa hinkwaswo leswi a swi tshembiseke. A hi kambisiseni tindlela leti nga hi pfunaka leswaku hi tiyisa vuxaka bya hina na Yehovha naswona hi tshama hi ri ni ntshembo lowu tiyeke.

13. Hi nga tshinela njhani eka Xikwembu?

 ¹³ Khongela eka Yehovha, u tlhela u hlaya Rito rakwe. Hambileswi hi nga swi koteki ku vona Yehovha, hi nga tshinela eka yena. Hi nga vulavula na yena hi xikhongelo hi nga kanakani leswaku u ta hi yingisa. (Yer. 29:11, 12) Hi nga yingisa Xikwembu hi ku hlaya Rito ra xona ni ku tlhela hi anakanyisisa hi rona. Loko hi hlaya hi ndlela leyi Yehovha a khathaleleke lava a va tshembekile eka yena enkarhini lowu hundzeke, ntshembo wa hina wu ta ya wu tiya swinene. Hinkwaswo leswi tsariweke eRitweni ra Xikwembu “swi tsaleriwe ku letela hina, leswaku hi ta va ni ntshembo hikwalaho ka ku tiyisela ka hina ni hikwalaho ka nchavelelo lowu humaka eMatsalweni.”—Rhom. 15:4.

14. Hikwalahokayini u fanele u ehleketisisa hi leswi Yehovha a swi endleleke van’wana?

¹⁴ Anakanyisisa hi ndlela leyi Yehovha a swi endleke hayona leswi a swi tshembiseke. Ehleketa hi leswi Xikwembu xi swi endleleke Abrahama na Sara. Leswi se a va kurile, a va nga ha ta swi kota ku va ni vana. Kambe Xikwembu xi va tshembise leswaku a va ta kuma n’wana. (Gen. 18:10) Xana Abrahama u angule njhani? Bibele yi ri: “Hikwalaho ka ripfumelo a a ri ni ntshembo wa leswaku a a ta va tata wa matiko yo tala.” (Rhom. 4:18) Hambileswi hi ku ya hi langutelo ra vanhu a swi vonaka onge a swi nge koteki, Abrahama a a tshemba leswaku Yehovha u ta swi endla leswi A swi tshembiseke. Wanuna yoloye wo tshembeka a nga khomisiwanga tingana. (Rhom. 4:19-21) Mitokoto yo tano yi hi dyondzisa leswaku hi nga n’wi tshemba Yehovha mikarhi hinkwayo leswaku u ta hetisisa switshembiso swakwe hambiloko hi vona onge a swi nge koteki.

15. Hikwalahokayini hi fanele hi ehleketisisa hi leswi Xikwembu xi hi endleleke swona?

¹⁵ Ehleketa hi leswi Yehovha a ku endleleke swona. Ehleketa hi ndlela leyi se u vuyeriweke hayona loko switshembiso leswi nga eRitweni ra Xikwembu swi ri karhi swi hetiseka. Hi xikombiso, Yesu  u tshembise leswaku Tata wakwe u ta ku nyika swilo leswi lavekaka leswaku u kota ku hanya. (Mat. 6:32, 33) Yesu u tlhele a ku tiyisekisa leswaku Yehovha u ta ku nyika moya lowo kwetsima loko u wu kombela. (Luka 11:13) Yehovha se u swi endlile swilo sweswo a swi tshembiseke. A swi kanakanisi leswaku ku ni switshembiso swin’wana leswi u nga ehleketaka ha swona leswi a ku endleleke swona. Hi xikombiso, u tshembisa ku ku rivalela, ku ku chavelela ni ku ku nyika leswi nga ta ku pfuna leswaku u tiyisa vuxaka bya wena na yena. (Mat. 6:14; 24:45; 2 Kor. 1:3) Loko u anakanyisisa hi leswi Xikwembu xi ku endleleke swona, u ta ya u swi tshemba swinene leswi a nga ta ku endlela swona enkarhini lowu taka.

16. Hikwalahokayini ntshembo ku ri nyiko ya nkoka?

¹⁶ Ntshembo lowu hi nga na wona wo hanya hilaha ku nga heriki i nyiko ya risima leyi humaka eka Xikwembu. Hi wu languterile nkarhi wolowo wo tsakisa lowu hi nga tiyisekaka leswaku wu ta fika. Ntshembo wa hina wu fana ni nsoma, lowu hi tiyisaka leswaku hi kota ku tiyisela miringo, ku xanisiwa hambi ku ri rifu. Wu fana ni xihuku, lexi sirhelelaka miehleketo ya hina leswaku hi papalata swilo swo biha ivi hi namarhela leswinene. Ntshembo wa hina lowu humaka eBibeleni, wu endla leswaku hi tshinela eka Xikwembu naswona wu kombisa ndlela leyi xi hi rhandzaka hayona. Ha vuyeriwa swinene loko hi tshama hi ri ni ntshembo lowu tiyeke.

17. Hikwalahokayini ntshembo lowu hi nga na wona wu endla hi tsaka?

¹⁷ Eka papila rakwe, muapostola Pawulo u khutaze Varhoma leswaku va “[tsaka] hikwalaho ka ntshembo.” (Rhom. 12:12) Pawulo a a tsaka hileswi a a tiyiseka leswaku loko o tshama a tshembekile, a a ta kuma vutomi lebyi nga heriki etilweni. Hilaha ku fanaka, hi nga tsaka hi ntshembo wa hina hikuva ha tiyiseka leswaku Yehovha u ta hetisisa switshembiso swakwe. Mupisalema u tsale a ku, “Wa tsaka loyi a . . . tshembaka Yehovha Xikwembu xakwe, . . . Loyi a tshamaka a tshembekile.”—Ps. 146:5, 6.