1-2. Hi yihi ndlela yin’wana ya nkoka yo hlaya ni ku dyondza Bibele? Kombisa.

 A HI nge u lava ku endla xiboho xa ku xava yindlu. Xana a wu ta lava ku vona yini loko u nga si endla xiboho xa wena? Xana a wu ta lava ku vona xifaniso xa le mahlweni ka yindlu ntsena? A swi kanakanisi leswaku a wu ta ya u ya vona yindlu yoleyo hi xiviri leswaku u ta fambafamba eka yona, u nghena emakamareni ya yona ni ku kambisisa swilo hinkwaswo leswi nga endlwini yoleyo. U nga ha lava ni ku kambisisa pulani ya yindlu yoleyo leswaku u vona ndlela leyi yi akiweke hayona. Swi le rivaleni, leswaku a wu ta byi kambisisa hi vukheta vuxokoxoko bya yindlu leyi u lavaka ku yi xava.

² Loko hi hlaya ni ku dyondza Bibele hi nga endla leswi fanaka. Mutsari un’wana u vule leswaku “Bibele yi fana ni yindlu leyikulu leyi akiweke yi leha yi tlhela yi va ni masungulo lama enteke.” Kutani hi nga swi tiva njhani swilo hinkwaswo leswi nga eBibeleni? Loko u yi hlaya hi ku tsutsuma, u nga ha dyondza swilo swi nga ri swingani, ku nga “swilo swo sungula leswi [hi] swi dyondz [aka] eritweni ra Xikwembu.” (Hev. 5:12) Tanihi leswi u faneleke u “nghena” endlwini leswaku u ta tiva vuxokoxoko bya kona kahle, hilaha ku fanaka u fanele u kambisisa Bibele hi vukheta leswaku u yi twisisa kahle. Ndlela yin’wana ya kahle ya ku dyondza Bibele, i ku vona ndlela leyi timhaka to karhi leti nga faniki ti fambisanaka hayona. Ringeta ku yi twisisa kahle mhaka leyi u yi tshembaka ni swivangelo leswi ku endlaka u yi tshemba.

3. Muapostola Pawulo u khutaze Vakrestekulobye leswaku va endla yini naswona hikwalahokayini? (Vaefesa 3:​14-19)

³ Leswaku hi ri twisisa kahle Rito ra Xikwembu, hi fanele hi dyondza ntiyiso wa le Bibeleni lowu enteke. Muapostola Pawulo u khutaze  vamakwavo lava nga Vakreste leswaku va dyondza Rito ra Xikwembu hi vukheta leswaku va ta kota ku “twisisa ku anama ni ku leha ni ku tlakuka ni ku enta” ka ntiyiso. Sweswo a swi ta va pfuna leswaku va ya emahlweni va “dzima timitsu” eripfumelweni ra vona. (Hlaya Vaefesa 3:​14-19.) Na hina hi fanele hi endla hilaha ku fanaka. A hi voneni ndlela leyi ku hlaya Rito ra Xikwembu hi vuenti swi nga hi pfunaka hayona leswaku hi kuma mongo wa swilo leswi ri hi dyondzisaka swona.

4. I yini leswi hi nga swi endlaka leswaku hi tshinela eka Yehovha? Nyika xikombiso.

⁴ Tanihi Vakreste, a hi lavi ku twisisa tidyondzo ta masungulo ntsena. Hi ku pfuniwa hi moya lowo kwetsima wa Xikwembu, hi lava ku dyondza “hambi ku ri swilo leswi enteke swa Xikwembu.” (1 Kor. 2:​9, 10) Hikwalahokayini u nga sunguli hi ku va ni dyondzo ya munhu hi yexe leyi nga ta endla leswaku u tshinela ekusuhi na Yehovha? Hi xikombiso, u nga ha kambisisa ndlela leyi a ma kombiseke hayona malandza yakwe ya khale leswaku wa ma rhandza, ni ndlela leyi a swi kombisaka hayona leswaku wa ku rhandza. U nga ha tlhela u dyondza hi ndlela leyi Yehovha a a gandzeriwa hayona eIsrayele ivi u yi ringanisa ni ndlela leyi Vakreste namuntlha va gandzelaka hayona. Kumbe u nga byi kambisisa hi vuenti vuprofeta bya Yesu lebyi hetisekeke loko a ha ri laha misaveni ni hi nkarhi lowu a a endla ntirho wo chumayela.

5. Xana yi kona mhaka leyi u lavaka ku yi kambisisa hi vuenti eka dyondzo ya wena ya munhu hi yexe?

⁵ Vanhu van’wana lava rhandzaka ku dyondza Bibele hi vuenti, va vule leswaku ku ni tidyondzo tin’wana leti va tsakelaka ku ti kambisisa hi vuenti eRitweni ra Xikwembu. U nga vona swin’wana swa swilo leswi va swi vuleke eka bokisi leri nge, “ Swiringanyeto Swo Dyondza Bibele Hi Vuenti.” Swi nga ha ku tsakisa ku dyondza hi tinhlokomhaka to tano hi ku pfuniwa hi Watch Tower Publications Index kumbe hi Nkongomiso Wo Endla Ndzavisiso Wa Timbhoni Ta Yehovha. Ku kambisisa Bibele swi nga tiyisa ripfumelo ra wena ni ku ku pfuna u “va ni vutivi hi Xikwembu.” (Swiv. 2:​4, 5) Sweswi a hi kambisiseni tidyondzo tin’wana leti dzikeke ta le Bibeleni leti hi faneleke ku ti kambisisa hi vuenti.

6. (a) Hi kwihi ku hambana loku nga kona exikarhi ka pulani ni xikongomelo? (b) Hikwalahokayini hi nga vulaka leswaku xikongomelo xa Yehovha hi vanhu ni misava i xa hilaha ku nga “heriki”? (Vaefesa 3:11)

⁶ Hi xikombiso, xiya leswi Bibele yi swi vulaka hi xikongomelo xa Xikwembu. Ku ni ku hambana exikarhi ka ku pulana ni ku va ni xikongomelo. Hi nga fanisa ku pulana ni gondzo leri ku yisaka endhawini yo karhi leyi u lavaka ku fika eka yona. Kambe loko ko va ni nchumu wo karhi lowu pfaleke gondzo leri u fambaka ha rona, a wu nge swi koti ku fika laha u yaka kona. Hi hala tlhelo u nga fanisa xikongomelo ni ndhawu leyi u lavaka ku fika eka yona. Hi yi tiva kahle ndhawu leyi hi lavaka ku ya eka yona kambe leswaku hi kota ku fika, hi nga tirhisa tindlela tin’wana leti yaka kona. Loko ndlela yin’wana yi pfariwile hi nga tirhisa yin’wana. Lexi tsakisaka, hakatsongotsongo Yehovha u hi byele ‘xikongomelo xakwe lexi nga heriki’ lexi kumekaka eBibeleni. (Efe. 3:11) Yehovha a nga hlawula tindlela to hambanahambana leswaku a hetisisa xikongomelo xakwe ni ku tlhela a “endl[a] swilo hinkwaswo hikwalaho ka xikongomelo xakwe.” (Swiv. 16:4) Nakambe vuyelo bya leswi Yehovha a nga ta swi endla byi ta tshama hilaha ku nga heriki. I yini xikongomelo xa Yehovha naswona hi kwihi ku cinca loku a ku endleke leswaku a xi hetisisa?

7. Endzhaku ka loko vanhu vo sungula va xandzukile, Yehovha u yi cince njhani ndlela leyi xikongomelo xakwe a xi ta hetiseka hayona? (Matewu 25:34)

⁷ Xikwembu xi byele vanhu vo sungula hi xikongomelo xa xona mayelana na vona. A va fanele va ‘tswalana va andza va tata misava, va fuma hinkwaswo leswi fambafambaka’ emisaveni. (Gen. 1:28) Loko Adamu na Evha va xandzukile ni ku endla leswaku xidyoho xi tlulela vanhu hinkwavo, sweswo a swi sivelanga xikongomelo xa Yehovha leswaku xi nga hetiseki. U cince ndlela leyi a xi ta hetiseka hayona. Hi ku hatlisa, u kunguhate ku veka Mfumo etilweni lowu a wu ta hetisisisa xikongomelo xakwe xo sungula hi vanhu ni hi misava. (Hlaya Matewu 25:34.) Hi nkarhi lowu a wu vekeke, hi ku swi rhandza Yehovha u rhumele N’wana wakwe wa mativula leswaku a ta emisaveni a ta dyondzisa vanhu hi Mfumo ni ku nyikela vutomi byakwe leswaku a hi kutsula eka xidyoho ni rifu. Endzhaku ka sweswo, Yesu u pfuxiwile a tlhelela etilweni leswaku a ya fuma tanihi Hosi ya Mfumo wa Xikwembu. Kambe ku ni swo tala swo swi dyondza hi xikongomelo xa Xikwembu.

8. (a) Hi yihi mhaka ya nkoka leyi nga eBibeleni? (b) Hilaha swi hlamuseriweke hakona eka Vaefesa 1:​8-11, hi xihi xikongomelo xa Yehovha lexikulu? (Vona xifaniso lexi nga eka xifunengeto.)

⁸ Mhaka ya nkoka leyi kumekaka eBibeleni hi leswaku vito ra Yehovha ri ta tlhela ri vangamisiwa loko a hetisisa xikongomelo xakwe hi ku tirhisa Mfumo wakwe lowu Kreste a nga ta va hosi ya wona. Xikongomelo xa Yehovha a xi nge cinci. U hi tshembisa leswaku swilo hinkwaswo swi ta endleka hilaha a vuleke hakona. (Esa. 46:​10, 11; Hev. 6:​17, 18) Ku nga ri khale, misava yi ta va paradeyisi laha vatukulu va Adamu na Evha vo lulama naswona va nga riki na xidyoho va nga ta tiphina hi vutomi “hilaha ku nga heriki.” (Ps. 22:26) Kambe sweswo a hi swona ntsena leswi Yehovha a nga ta swi endla. Xikongomelo xakwe lexikulu hileswaku tintsumi ni vanhu va va ni vun’we. Kutani hinkwavo lava hanyaka etilweni ni laha misaveni va ta yingisa Yehovha hi ku tshembeka tanihi Mufumi wa vona. (Hlaya Vaefesa 1:​8-11.) Xana a yi ku tsakisi ndlela leyi Yehovha a yi tirhiseke leswaku a hetisisa xikongomelo xakwe?

9. Loko hi hlaya Bibele, hi kota ku tiva swiendlakalo swihi leswi nga ta endleka enkarhini lowu taka?

⁹ Xiya vuprofeta lebyi Yehovha a byi vuleke entangeni wa Edeni, lebyi kumekaka eka Genesa 3:15. b Yi vulavule hi swiendlakalo leswi a swi ta hetisisa xikongomelo xakwe, kambe swiendlakalo  sweswo a swi ta endleka endzhaku ka malembe ya gidi. Hi xikombiso, Xikwembu xi byele Abrahama leswaku endzhaku ka switukulwana swo tala leswi a swi ta landzela, un’wana wa vatukulu vakwe a a ta va Kreste. (Gen. 22:​15-18) Kutani hi 33 C.E., Yesu u lumiwe xirhendze hilaha ku profetiweke hakona. (Mit. 3:​13-15) Xiphemu xo hetelela xa vuprofeta byebyo, xa ku pfotlosiwa ka nhloko ya Sathana xi ta endleka endzhaku ka malembe ya 1 000 enkarhini lowu taka. (Nhlav. 20:​7-10) Bibele yi boxa swo tala leswi nga ta endleka loko rivengo leri nga kona exikarhi ka misava ya Sathana ni nhlangano wa Yehovha ri ya eku heleni.

10. (a) Ku ta endleka yini ku nga ri khale? (b) Xana hi nga endla yini leswaku miehleketo ni timbilu ta hina swi lungheka? (Vona nhlamuselo ya le hansi.)

¹⁰ Ehleketa hi swiendlakalo swo hlamarisa leswi Bibele yi vulavulaka ha swona. Xo sungula, matiko ma ta vula leswaku “ku ni ku rhula ni nsirhelelo!” (1 Tes. 5:​2, 3) “Hi xitshuketa” nhlomulo lowukulu wu ta sungula loko matiko ma hlasela vukhongeri hinkwabyo bya mavunwa. (Nhlav. 17:16) Endzhaku ka sweswo, ku nga ha va ni swiendlakalo leswikulu swo hlamarisa leswi kombisaka “N’wana wa munhu a ta a ri emapapeni hi matimba ni ku vangama lokukulu.” (Mat. 24:30) Yesu u ta avanyisa vanhu, a hambanisa tinyimpfu eka timbuti. (Mat. 25:​31-33, 46) Hi nkarhi wolowo, Sathana u ta tirha hi matimba leswaku a lwisana na Yehovha. Hikwalaho ka leswi a vengaka vanhu va Xikwembu swinene, Sathana u ta ya emahlweni a endla leswaku matiko lama hlanganeke lama Bibele yi ma vitanaka Gogo wa tiko ra Magogo ma hlasela vanhu va Xikwembu. (Ezek. 38:​2, 10, 11) Hi hala tlhelo, vahlawuriwa lava saleke va ta hlengeletiwa leswaku va ya va na Kreste etilweni ni mavuthu yakwe ku ya lwa nyimpi ya Armagedoni, leyi nga ta herisa nhlomulo lowukulu. c (Mat. 24:31; Nhlav. 16:​14, 16) Endzhaku ka sweswo, Mfumo Wa Gidi Ra Malembe Wa Kreste wu ta sungula ku fuma.—Nhlav. 20:6

11. Xana mhaka ya ku hanya hilaha ku nga heriki yi vula yini eka wena? (Nakambe vona xifaniso.)

¹¹ Sweswi ehleketa se u hanye malembe yo tlula 1 000. Bibele yi vula leswaku Muvumbi wa hina u “endl[e] leswaku vanhu va navela ku hanya hilaha ku nga heriki.” (Ekl. 3:11) Ehleketa leswi sweswo swi vulaka swona eka vuxaka bya wena na  Yehovha. Buku leyi nge, Tshinela Eka Yehovha, tluka 319 yi vula mhaka leyi yo tsakisa, yi ri: “Loko se hi hanye malembe ya madzana, ya magidi, ya timiliyoni, hambi ku ri ya magidi ya timiliyoni, hi ta va se hi tiva swo tala hi Yehovha Xikwembu ku tlula leswi hi swi tivaka sweswi. Kambe hi ta va ha ha swi vona leswaku swa ha ri swinyingi leswi ha ha faneleke hi swi dyondza. . . . Vutomi lebyi nga heriki byi ta tsakisa swinene naswona ku ta endliwa swilo swo hambana-hambana—naswona ku tshinela eka Yehovha minkarhi hinkwayo hi kona ku nga ta endla leswaku vutomi byebyo byi tsakisa.” Loko hi ya emahlweni hi hlaya Rito ra Xikwembu, i yini leswi hi faneleke hi swi lavisisa?

12. Xana hi nga langutisisa njhani swinene ematilweni? Nyika xikombiso.

¹² Rito ra Xikwembu ri hi hlamusela leswaku swi njhani ku “tshama ematilweni” swin’we na Yehovha. (Esa. 33:5) Bibele yi hi byela swilo swo hlamarisa hi Yehovha ni hi xiphemu xa le tilweni xa nhlangano wakwe. (Esa. 6:​1-4; Dan. 7:​9, 10; Nhlav. 4:​1-6) Hi xikombiso, hi kota ku hlaya hi swilo swo hlamarisa leswi Ezekiyele a swi voneke loko “matilo ma pfulekile . . . [a] sungula ku vona swivono swa Xikwembu.”—Ezek. 1:1.

13. I yini leswi u swi tlangelaka swinene eka leswi Yesu a swi endlaka ematilweni hilaha swi hlamuseriweke hakona eka Vaheveru 4:​14-16?

¹³ Nakambe ehleketa hi leswi Yesu a hi endlelaka swona a ri ematilweni tanihi Hosi ya hina leyi nga ni ntwelavusiwana tlhelo Muprista Lonkulu. Hikwalaho ka yena hi kota ku tshinela eka “xiluvelo xa musa lowukulu” xa Xikwembu hi xikhongelo ni ku kombela tintswalo ni mpfuno. (Hlaya Vaheveru 4:​14-16.) Onge hi nga tiyimisela ku ka hi nga pfumeleli siku ri hundza hi nga ehleketanga hi leswi Yehovha na Yesu va hi endleleke swona ni leswi va ha yaka emahlweni va hi endlela swona sweswi va ri etilweni. Ndlela leyi va hi rhandzaka hayona yi fanele yi hi khumba timbilu swinene, ni ku hi endla hi hisekela vugandzeri bya Yehovha.—2 Kor. 5:​14, 15.

14. Hi wihi nchumu wa nkoka lowu hi nga wu endlaka ku kombisa leswaku ha swi tlangela leswi Yehovha na Yesu va hi endlelaka swona? (Nakambe vona swifaniso.)

 ¹⁴ Ndlela yin’wana ya nkoka leyi hi nga kombisaka leswaku ha swi khensa leswi Xikwembu na Yesu va hi endleleke swona, i ku endla hinkwaswo leswi hi nga swi kotaka leswaku hi pfuna van’wana va va Timbhoni ta Yehovha ni leswaku va va vadyondzisiwa va Yesu. (Mat. 28:​19, 20) Leswi hi leswi muapostola Pawulo a swi endleke leswaku a khensa Xikwembu na Kreste. A a swi tiva leswaku ku rhandza ka Yehovha hi leswaku “vanhu hinkwavo va ponisiwa kutani va wu tiva kahle ntiyiso.” (1 Tim. 2:​3, 4) U tirhe hi matimba entirhweni wo chumayela leswaku a pfuna vanhu vo tala hilaha a nga kotaka hakona leswaku ‘ku va ni lava a va ponisaka hi tindlela hinkwato.’—1 Kor. 9:​22, 23.

15. Hi ku ya hi Pisalema 1:​2, i yini leswi nga endlaka hi tsaka?

¹⁵ Mutsari wa mupisalema u hlamusele leswaku munhu loyi a tsakeke ni loyi swi n’wi fambelaka kahle hi loyi “a rhandza[ka] nawu wa Yehovha” ni loyi a “anakanyisisa[ka] hi nawu Wakwe vusiku ni nhlikanhi.” (Ps. 1:​1-3; nhlamuselo ya le hansi.) Muhundzuluxeri wa Bibele Joseph Rotherham loko a hlamusela hi tsalwa leri eka buku yakwe ya Studies in the Psalms u vule leswaku munhu u fanele a “lava nkongomiso wa Xikwembu swinene lerova a wu lavisisa, a wu dyondza ni ku heta nkarhi wo tala a ri karhi a anakanyisisa ha wona.” U tlhele a vula leswaku “loko siku ri hundza a nga hlayanga Bibele, u tlange hi siku rero.” Loko u ri karhi u hlaya Bibele u nga vuyeriwa eka vuxokoxoko hinkwabyo bya yona, ni ku vona ndlela leyi mhaka yo karhi yi hlanganaka hayona ni mhaka yin’wana. Hakunene swa tsakisa ku hlaya Rito ra Xikwembu u dzika eka rona!

16. Hi ta bula hi yini eka nhlokomhaka leyi landzelaka?

¹⁶ Ntiyiso wa risima lowu Yehovha a hi dyondzisaka wona eRitweni rakwe a wu tiki ku wu twisisa. Eka nhlokomhaka leyi landzelaka, hi ta kambisisa ntiyiso wun’wana lowu dzikeke, ku nga tempele leyikulu yo fanekisela ya Yehovha leyi Pawulo a yi hlamuseleke eka papila rakwe leri yaka eka Vakreste va Vaheveru. Onge swi nga ku tsakisa ku dyondza hi mhaka leyi.