1. Ntsumi yi vule yini naswona sweswo swi vula yini eka hina?

 LOKO ntsumi a yi lava ku vulavula na wena, xana a wu ta yi yingisela? Namuntlha ntsumi yi le ku vulavuleni ni “matiko hinkwawo, tinyimba hinkwato, tindzimi hinkwato ni vanhu hinkwavo.” Xana yi ri yini? Yi ri: “Chavani Xikwembu mi xi vangamisa . . . Gandzelani Loyi a endleke tilo ni misava.” (Nhlav. 14:​6, 7) Yehovha i Xikwembu xi ri xin’we xa ntiyiso lexi hinkwerhu hi faneleke hi xi gandzela. Ha n’wi khensa swinene leswi a hi nyikeke nkateko wa risima swinene wo n’wi gandzela etempeleni yakwe leyikulu yo fanekisela!

2. Xana i yini tempele yo fanekisela ya Yehovha? (Nakambe vona bokisi leri nge, “ Leswi Yi Nga Riki Swona.”)

² Kahlekahle i yini tempele leyikulu yo fanekisela naswona hi nga byi kuma kwihi vuxokoxoko lebyi yi hlamuselaka? Tempele leyi, a hi muako lowu tolovelekeke. Kambe i lunghiselelo ra Yehovha ro n’wi gandzela hi ndlela leyi a yi amukelaka hi ku ya hi xitlhavelo xa nkutsulo xa Yesu. Muapostola Pawulo u hlamusele lunghiselelo leri eka papila leri a ri tsaleleke Vakreste vo sungula va Vaheveru lava a va tshama eYudiya. b

3-4. Hikwalahokayini Pawulo a tsalele Vakreste va Vaheveru va le Yudiya papila naswona u va pfune njhani?

³ Hikwalahokayini Pawulo a tsalele Vakreste va Vaheveru lava a va tshama eYudiya papila? Kumbexana u endle tano hikwalaho ka  swivangelo swimbirhi. Xo sungula, a a lava ku va khutaza. Vo tala va vona a va kulele evukhongerini bya Xiyuda. Swi nga endleka khale ka varhangeri va vona va le vukhongerini bya Xiyuda a va va sandza hikwalaho ka leswi va veke Vakreste. Hikwalahokayini? Hikuva Vakreste a va nga ri na tempele leyi a va gandzela eka yona, a va nga ri na alitari ya xiviri leyi a va endlela Xikwembu magandzelo eka yona naswona a va nga ri na Vaprista lava a va va rhangela. Leswi a swi ta va swi va hete matimba vadyondzisiwa va Kreste ni ku tlhela swi tsanisa ripfumelo ra vona. (Hev. 2:1; 3:​12, 14) Kumbexana van’wana va vona va ehlekete ni ku tlhelela evukhongerini bya vona bya khale bya Xiyuda.

⁴ Xa vumbirhi, Pawulo u byele Vakreste va Vaheveru leswaku a va nga tikarhateli ku twisisa tidyondzo letintshwa kumbe leti dzikeke, ku nga “swakudya leswi tiyeke” leswi kumekaka eRitweni ra Xikwembu. (Hev. 5:​11-14) Swi vonaka onge van’wana va vona a va nga tiyimiselanga ku tshika ku landzela Nawu wa Muxe. Pawulo u hlamusele leswaku magandzelo lawa Nawu a wu lava leswaku va ma nyikela, a ma nga ta endla leswaku va rivaleriwa swidyoho swa vona hi ku helela. Hikwalaho ka xivangelo xexo, Nawu wu “herisiwile.” Kutani Pawulo u ye emahlweni a va dyondzisa tidyondzo leti enteke. U tsundzuxe Vakrestekulobye hi “ntshembo wo antswa” lowu sekeriweke eka gandzelo ra Yesu lowu a wu ta va pfuna leswaku va “tshinela eka Xikwembu.”—Hev. 7:​18, 19.

5. I yini leswi hi faneleke hi swi twisisa hi buku ya Bibele ya Vaheveru naswona hikwalahokayini?

⁵ Pawulo u hlamusele vamakwavo va Vaheveru xivangelo lexi endlaka ndlela leyi va gandzelaka Yehovha hayona sweswi yi tlakuke ngopfu ku tlula ndlela leyi a va n’wi gandzela hayona khale. Ndlela leyi Vayuda a va gandzela hayona hi ku ya hi nawu a ku ri “ndzhuti wa swilo leswi nga ta ta, kambe nchumu wa xiviri i Kreste.” (Kol. 2:17) Ndzhuti i xivumbeko xa nchumu wo karhi lowu nga wa xiviri. Hikwalaho, ndlela leyi Vayuda a va gandzela hayona a ku ri ndzhuti wa swilo swa xiviri leswi swa ha taka. Hi fanele hi twisisa lunghiselelo leri Yehovha a hi vekeleke rona ra leswaku hi rivaleriwa swidyoho leswaku hi ta kota ku n’wi gandzela hi ndlela leyi a yi amukelaka. A hi fananise “ndzhuti” (ku nga ndlela leyi Vayuda a va gandzela hayona) ni “nchumu wa xiviri” (ku nga ndlela leyi Vakreste va gandzelaka hayona), hilaha swi hlamuseriweke hakona ebukwini ya Vaheveru. Loko hi endla tano, hi ta kota ku yi twisisa ku antswa tempele yo fanekisela ni ndlela leyi hina hi katsekaka hayona.

6. Xana tabernakela a yi ri njhani?

⁶ Ndlela leyi Vayuda a va gandzela hayona. Pawulo u sekele bulo rakwe eka tabernakela leyi a yi endliwe hi Muxe hi 1512 B.C.E. (Vona chati leyi nge, “Ndlela Leyi Vayuda A Va Gandzela Hayona—Ndlela Leyi Vakreste Va Gandzelaka Hayona.”) Tabernakela a yi endliwe ku fana ni tende naswona Vaisrayele a va yi rhwala loko va suka endhawini yin’wana va rhurhela eka yin’wana. Va yi rhwale malembe ya kwalomu ka 500 ku fikela loko ku akiwa tempele eYerusalema. (Eks. 25:​8, 9; Tinhl. 9:22) Ndhawu leyi Vaisrayele a va hlengeletana eka yona leswaku va gandzela Xikwembu ni ku nyikela magandzelo, a yi vitaniwa “tende ra nhlengeletano.” (Eks. 29:​43-46) Hambiswiritano, tabernakela a yi yimela nchumu wun’wana wa nkoka lowukulu lowu a wa ha ta eka Vakreste.

7. Xana tempele yo fanekisela yi sungule ku va kona rini?

⁷ Ndlela leyi Vakreste va gandzelaka hayona. Tabernakela ya khale a yi ri “ndzhuti wa swilo swa le tilweni” naswona a yi yimela tempele leyikulu ya Yehovha yo fanekisela. Pawulo u vule leswaku “tabernakela leyi yi yimela nkarhi wa sweswi.” (Hev. 8:5; 9:9) Kutani hi nkarhi lowu a tsaleleke Vaheveru, tempele yo fanekisela se a yi ri kona. Yi sungule ku va kona hi 29 C.E. Hi lembe rero, Yesu u khuvuriwile kutani a hlawuriwa hi moya lowo kwetsima naswona u sungule ku tirha tanihi “muprista lonkulu swinene” wa Yehovha eka tempele yo fanekisela. c—Hev. 4:14; Mit. 10:​37, 38.

8-9. Hi ku ya hi Vaheveru 7:​23-27, hi kwihi ku hambana lokukulu exikarhi ka vaprista lavakulu va le Israyele na Yesu Kreste Muprista Lonkulu?

⁸ Ndlela leyi Vayuda a va gandzela hayona. Muprista lonkulu a a hlawuriwile leswaku a yimela vanhu emahlweni ka Xikwembu. Muprista wo sungula lonkulu wa Muisrayele ku nga Aroni, a a vekiwe hi Yehovha hi ku kongoma loko tabernakela yi nyiketeriwa. Hambiswiritano, hilaha Pawulo a hlamuseleke hakona, “vo tala va boheke ku va vaprista hi ku tlhandlamana hikuva rifu ri va sivele ku tshama va ri vaprista.” d (Hlaya Vaheveru 7:​23-27.) Nakambe tanihi leswi vaprista lavakulu a va velekiwe ni xidyoho, a va fanele va tlhela va nyikela ni magandzelo ya leswaku va rivaleriwa swidyoho swa vona vini. Laha hi kota ku vona ku hambana lokukulu loku nga kona exikarhi ka vaprista lavakulu va le Israyele ni Muprista Lonkulu Yesu Kreste.

⁹ Ndlela leyi Vakreste va gandzelaka hayona. Tanihi Muprista wa hina Lonkulu, Yesu Kreste “i nandza . . . wa tabernakela ya ntiyiso leyi yimisiweke hi Yehovha, ku nga ri hi munhu.” (Hev. 8:​1, 2) Pawulo u hlamusele leswaku “leswi [Yesu] a hanyaka hilaha ku nga heriki, a nga tlhandlamiwi hi munhu eka ntirho wakwe wa vuprista.” Pawulo u tlhele a vula leswaku leswi Yesu “a nga nyamangiki, loyi a hambaneke ni vadyohi” naswona a nga faniki ni vaprista lavakulu va le Israyele, “a swi bohi leswaku a nyikela magandzelo siku ni siku” leswaku a rivaleriwa swidyoho. Sweswi a hi kambisiseni ku hambana loku nga kona exikarhi ka tialitari ni magandzelo lawa a ma nyikeriwa hi Vaisrayele va khale ni lawa a ma nyikeriwa hi Vakreste.

10. Magandzelo ya le alitarini ya koporo a ma fanekisela yini?

¹⁰ Ndlela leyi Vayuda a va gandzela hayona. Ehandle ka nyangwa ya tabernakela, a ku ri ni alitari ya koporo leyi a ku nyikeriwa Yehovha magandzelo ya swiharhi. (Eks. 27:​1, 2; 40:29) Hambiswiritano, magandzelo wolawo a ma nga swi herisi hi ku helela swidyoho swa vanhu. (Hev. 10:​1-4) Ku va Vaisrayele va ya emahlweni va nyikela magandzelo hi swiharhi etabernakeleni, a swi kombisa gandzelo rin’we leri a ra ha ta leri a ri ta  endla leswaku vanhu va rivaleriwa swidyoho hi ku helela.

11. Xana Yesu u tinyiketele eka alitari yihi leswaku a va gandzelo? (Vaheveru 10:​5-7, 10)

¹¹ Ndlela leyi Vakreste va gandzelaka hayona. Yesu a a swi tiva leswaku Yehovha u n’wi rhume emisaveni ku ta nyikela hi vutomi byakwe leswaku byi va gandzelo ra nkutsulo eka vanhu. (Mat. 20:28) Hikwalaho loko a khuvuriwa, Yesu u tinyiketele ku endla hinkwaswo leswi Yehovha a a swi lava. (Yoh. 6:38; Gal. 1:4) Ku “rhandza” ka Xikwembu a ku ri leswaku Yesu a nyikela hi vutomi byakwe lebyi nga riki na xidyoho eka alitari yo fanekisela. Yesu u nyikele hi vutomi byakwe “kan’we swi helela kwalaho” leswaku lava kombisaka ripfumelo eka yena va ta rivaleriwa swidyoho hilaha ku heleleke. (Hlaya Vaheveru 10:​5-7, 10.) Sweswi a hi kambisiseni leswaku leswi a swi ri endzeni ka tabernakela a swi yimela yini.

12. I mani loyi a a nghena eka makamara hinkwawo ya le tabernakeleni?

¹² Ndlela leyi Vayuda a va gandzela hayona. Tabernakela ni titempele leti hi ku famba ka nkarhi ti akiweke eYerusalema a ti fana endzeni. Endzeni a ku ri ni makamara mambirhi, ku nga “Kamara Ro Kwetsima” ni “Kamara Ro Kwetsima Ngopfu” lawa a ma hambanisiwa hi khetheni ro saseka. (Hev. 9:​2-5; Eks. 26:​31-33) Endzeni ka Kamara Ro Kwetsima a ku ri ni xo tlhoma timboni xa nsuku, alitari yo hisela murhi wo nuhela ni tafula ra xinkwa xo kwetsima. Endzeni ka Kamara Ro Kwetsima, a ku nghena ntsena ‘vaprista lava vekiweke’ leswaku va ya endla ntirho wa vona wo kwetsima. (Tinhl. 3:​3, 7, 10) Endzeni ka Kamara Ro Kwetsima Ngopfu a ku ri ni areka ya ntwanano ya nsuku leyi a yi yimela vukona bya Yehovha. (Eks.  25:​21, 22) A ku ri muprista lonkulu ntsena loyi a a pfumeleriwa ku hundza hi le khethenini a ya eNdhawini yo Kwetsima Ngopfu hi Siku Ra Ku Kombela Ku Rivaleriwa leri a ri va kona kan’we hi lembe. (Lev. 16:​2, 17) Lembe ni lembe, a a nghena ni ngati ya swifuwo leswaku a ya kombelela yena ni tiko hinkwaro ku rivaleriwa. Hi ku famba ka nkarhi, Yehovha hi ku tirhisa moya wakwe lowo kwetsima u endle leswaku swi twisiseka ku leswi a swi endliwa etabernakeleni a swi yimela yini.—Hev. 9:​6-8. e

13. Kamara Ro Kwetsima ni ro Kwetsima Ngopfu ya le tabernakeleni ma fanekiseriwa hi yini namuntlha eka ndlela leyi Vakreste va gandzelaka hayona?

¹³ Ndlela leyi Vakreste va gandzelaka hayona. Nhlayo yi nga ri yingani ya vadyondzisiwa va Yesu yi hlawuriwe hi moya lowo kwetsima naswona va tiphina hi vuxaka byo hlawuleka na Yehovha. Vahlawuriwa lava va 144 000, va ta va vaprista swin’we na Yesu etilweni. (Nhlav. 1:6; 14:1) Kamara Ro Kwetsima ra le tabernakeleni, ri yimela ku hlawuriwa ka vona hi moya lowo kwetsima tanihi vana va Xikwembu loko va ha ri laha misaveni. (Rhom. 8:​15-17) Kamara Ro Kwetsima Ngopfu ra le tabernakeleni ri yimela matilo, laha Yehovha a tshamaka kona. “Khetheni” leri a ri hambanisa Kamara Ro Kwetsima eka lero Kwetsima Ngopfu, ri yimela miri wa Yesu wa laha misaveni lowu loko a ha ri na wona a wu ta n’wi sivela ku nghena etilweni tanihi Muprista Lonkulu wa tempele ya Xikwembu yo fanekisela. Loko Yesu a nyikela hi vutomi byakwe bya laha misaveni byi va xitlhavelo eka vanhu, u pfulele vahlawuriwa ndlela yo ya hanya etilweni. Hilaha ku fanaka, na vona va fanele va siya mimiri ya vona ya laha misaveni leswaku va kota ku amukela hakelo ya le tilweni. (Hev. 10:​19, 20; 1 Kor. 15:50) Endzhaku ka loko Yesu a pfuxiwile, u nghene eKamareni Ro Kwetsima Ngopfu ra tempele yo fanekisela, laha eku heteleleni vahlawuriwa hinkwavo va nga ta va na yena.

14. Hi ku ya hi Vaheveru 9:​12, 24-26, i yini lexi endlaka leswaku lunghiselelo ra Yehovha ra tempele yo fanekisela ri va leri tlakukeke?

¹⁴ Laha hi kota ku yi vona kahle ndlela leyi lunghiselelo ra vugandzeri lebyi tengeke bya Yehovha ri tlakukeke hayona hi ku ya hi gandzelo ra nkutsulo ni vuprista bya Yesu Kreste. Muprista lonkulu wa le Israyele a a nghena eKamareni Ro Kwetsima Ngopfu leri endliweke hi vanhu ni ngati ya swifuwo leyi a a endla magandzelo hi yona kambe Yesu u nghene “etilweni hi koxe” ku nga endhawini yo kwetsima ngopfu ku tlula hinkwato leswaku a yima emahlweni ka Yehovha. Kwalaho u nyikele hi vutomi byakwe lebyi nga riki na xidyoho hikwalaho ka hina leswaku “a susa xidyoho hi ku tiendla gandzelo.” (Hlaya Vaheveru 9:​12, 24-26.) Gandzelo ra Yesu i gandzelo ro hetelela leri endlaka hi rivaleriwa swidyoho hilaha ku nga heriki. Hilaha hi nga ta dyondza hakona sweswi, swi nga ri na mhaka leswaku ntshembo wa hina i wa ku hanya etilweni kumbe laha misaveni, hinkwerhu hi nga swi kota ku gandzela Yehovha eka tempele yakwe yo fanekisela.

15. I vamani lava a va tirha exivaveni xa le tabernakeleni?

¹⁵ Ndlela leyi Vayuda a va gandzela hayona. Tabernakela a yi ri ni xivava xin’we, ku nga ndhawu leyi biyeleriweke leyi nga rivala leri vaprista a va endla mitirho ya vona. Alitari leyikulu ya koporo yo hisela magandzelo a yi ri exivaveni, swin’we ni xihlambelo xa koporo lexi vaprista a va xi tirhisela ku tibasisa va nga si endla mitirho ya vona yo kwetsima. (Eks. 30:​17-20; 40:​6-8) Hambiswiritano, titempele leti akiweke endzhaku a ti ri ni xivava xa le handle laha vanhu lava nga riki vaprista a va kota ku yima kona va gandzela Xikwembu.

16. I vamani lava tirhaka eka swivava hinkwaswo swa le tempeleni yo fanekisela?

¹⁶ Ndlela leyi Vakreste va gandzelaka hayona. Loko vamakwavo va Yesu lava ha saleke laha misaveni va nga si va vaprista na Yesu etilweni, va tirha hi ku tshembeka exivaveni xa le ndzeni xa laha  misaveni xa tempele yo fanekisela. Leswi etabernakeleni ni le titempeleni a ku vekiwe xihlambelo lexikulu xa mati, a ku ri xitsundzuxo xa nkoka swinene eka vona hilaha swi nga hakona eka Vakreste hinkwavo leswaku va tshama va basile emahanyelweni ni ku ka va nga tithyakisi hi ku gandzela swikwembu swin’wana. Kutani xana lava “ntshungu lowukulu” lava seketelaka vamakwavo va Kreste hi ku tshembeka, va gandzela Yehovha kwihi? Muapostola Yohane u va vone va yime “emahlweni ka xiluvelo . . . va [endlela Xikwembu] ntirho wo kwetsima vusiku ni nhlikanhi.” Ntshungu lowukulu wu endla leswi laha misaveni exivaveni xa le handle xa tempele yo fanekisela. (Nhlav. 7:​9, 13-15) Ha swi tlangela leswi Yehovha a hi nyikeke ndhawu ya risima yo va hi n’wi gandzela etempeleni yakwe leyikulu!

17. Hi ni nkateko wo nyikelela Yehovha magandzelo wahi?

¹⁷ Vakreste hinkwavo namuntlha va ni nkateko lowukulu wo endlela Yehovha magandzelo hi ku va va tirhisa nkarhi, matimba ni swilo swa vona leswaku va n’wi gandzela. Hilaha muapostola Pawulo a byeleke Vakreste va Vaheveru hakona, hi nga nyikela “Xikwembu gandzelo ra ku dzunisa nkarhi hinkwawo ha Kreste, ku nga marito lama humaka emilon’wini ya hina lawa hi twarisaka vito ra xona ha wona.” (Hev. 13:15) Hi nga kombisa leswaku ha wu tlangela nkateko lowu hi nga na wona wo gandzela Yehovha, hi ku va hi n’wi endlela magandzelo ya xiyimo xa le henhla.

18. Hi ku ya hi Vaheveru 10:​22-25, i yini leswi hi nga fanelangiki hi swi honisa ni leswi hi nga fanelangiki hi swi rivala?

¹⁸ Hlaya Vaheveru 10:​22-25. Loko Pawulo a gimeta papila rakwe leri a ri tsaleleke Vaheveru, u boxa swilo swo hlayanyana leswi khumbaka vugandzeri bya hina leswi hi nga fanelangiki hi swi honisa. Leswi swi katsa ku va hi khongela eka Yehovha, hi byela van’wana hi ntshembo wa hina, hi hlangana tanihi vandlha ni ku khutazana “ngopfungopfu leswi hi vonaka siku [ra Yehovha] ri tshinela.” Loko buku ya Nhlavutelo yi gimeta, ntsumi ya Yehovha yi vula marito lama landzelaka kambirhi leswaku yi kandziyisa nkoka wa kona: “Gandzela Xikwembu!” (Nhlav. 19:10; 22:9) Onge hi nga tshama hi ri karhi hi tsundzuka swilo hinkwaswo leswi enteke leswi hi dyondzeke ha swona mayelana ni tempele ya Yehovha leyikulu yo fanekisela, ku katsa ni nkateko lowu hi nga na wona wo gandzela Xikwembu xa hina lexikulu!