1-2. Eklesiasta 11:6, yi fambisana njhani ni ntirho wo chumayela mahungu lamanene ya Mfumo?

 EMATIKWENI man’wana, vanhu va angula kahle loko va chumayeriwa mahungu lamanene. I khale va lava ku twa mahungu wolawo! Kasi ematikweni man’wana, vanhu a va lavi ku twa nchumu hi Xikwembu kumbe Bibele. Xana vanhu va le ndhawini ya ka n’wina va angula njhani loko va chumayeriwa? Swi nga ri na mhaka leswaku va angula njhani kambe Yehovha u lava hi ya emahlweni hi chumayela ku fikela loko a ku swi ringene.

² Ntirho wo chumayela wu ta fika emakumu hi nkarhi lowu Yehovha a wu vekeke kutani hi kona “makumu ma nga ta fika.” (Mat. 24:14, 36) Loko ha ha yimele nkarhi wolowo, hi nga ma yingisa njhani marito lama nge “u nga wisi”? *—Hlaya Eklesiasta 11:6.

3. Hi ta bula hi yini eka nhlokomhaka leyi?

³ Nhlokomhaka leyi hundzeke yi hlamusele swilo swa mune leswi hi faneleke hi swi endla leswaku hi va “vaphasi va vanhu” lava nga ni vutshila. (Mat. 4:19) Nhlokomhaka leyi, yi ta hlamusela tindlela tinharhu leti nga ta hi pfuna leswaku hi kota ku ya emahlweni hi chumayela hambiloko hi langutana ni swiphiqo. Hi ta dyondza leswaku hikwalahokayini swi ri swa nkoka ku (1) rhangisa ntirho wo chumayela, (2) ku lehisa mbilu, (3) ni ku va ni ripfumelo leri tiyeke.

4. Hikwalahokayini hi fanele hi rhangisa ntirho lowu Yehovha a hi nyikeke wona?

⁴ Yesu u vulavule hi swiendlakalo ni swiyimo leswi a swi ta kombisa mikarhi ya makumu naswona a swi ta kavanyeta valandzeri vakwe entirhweni wo chumayela. U tsundzuxe vadyondzisiwa  vakwe leswaku va ‘tshama va rindzile.’ (Mat. 24:42) Namuntlha, hi langutana ni swikavanyeto swo fana ni leswi endleke leswaku vanhu va le nkarhini wa Nowa va nga ri yingisi rungula ra vuavanyisi leri Nowa a a ri chumayela. (Mat. 24:37-39; 2 Pet. 2:5) Hikwalaho, hi lava ku rhangisa ntirho lowu Yehovha a hi nyikeke wona.

5. Mitirho 1:6-8, yi vula leswaku ntirho wo chumayela wu ta endliwa ku fikela kwihi?

⁵ Namuntlha, hi fanele hi rhangisa ntirho wo chumayela hi Mfumo wa Xikwembu evuton’wini bya hina. Yesu u vule leswaku ntirho lowu a wu ta endliwa etindhawini to tala naswona a wu ta ya emahlweni ni loko se a file. (Yoh. 14:12) Loko Yesu a file, van’wana va vadyondzisiwa vakwe va tlhelele entirhweni wo phasa tihlampfi. Loko Yesu a pfuxiwile, hi singita u pfune van’wana va vadyondzisiwa vakwe leswaku va phasa tinhlampfi to tala. U tirhise nkarhi wolowo, ku va komba leswaku ntirho wo chumayela i wa nkoka ku tlula mitirho hinkwayo. (Yoh. 21:15-17) Loko se a ri ekusuhi ni ku tlhandlukela etilweni, u byele vadyondzisiwa leswaku ntirho wo chumayela lowu a wu sunguleke, a wu nga ta endliwa eIsrayele ntsena kambe a wu ta endliwa ni le matikweni man’wana. (Hlaya Mitirho 1:6-8.) Endzhaku ka malembe, Yesu u kombe muapostola Yohane xivono xa leswi nga ta endleka hi ‘siku ra Hosi.’ * Eka xivono xexo xo hlamarisa, Yohane u vone ntsumi leyi a “yi ri ni mahungu lamanene lama nga heriki” lawa a ma chumayeriwa eka “matiko hinkwawo, tinyimba hinkwato, tindzimi hinkwato ni vanhu hinkwavo.” (Nhlav. 1:10; 14:6) Swi lo tlangandla, leswaku Yehovha u lava hi hoxa xandla entirhweni lowu ku fikela loko a ku swi ringene.

6. I yini lexi nga ta hi pfuna leswaku hi rhangisa ntirho wo chumayela evuton’wini bya hina?

⁶ Lexi nga ta hi pfuna leswaku hi rhangisa  ntirho wo chumayela, i ku ehleketa hi ndlela leyi Yehovha a hi pfunaka hayona. Hi xikombiso, u hi nyika tibuku leti kandziyisiweke ni rungula ro tala leri kumekaka eka Inthanete, ku nga ha va tibuku, rungula leri yingiseriwaka, tivhidiyo ni vuhaxi bya JW. Ehleketa hi mhaka leyi, website ya hina yi kumeka hi tindzimi leti tlulaka 1 000! (Mat. 24:45-47) Hambileswi tipolitiki, vukhongeri ni ikhonomi swi vangaka ku avana emisaveni leyi kambe malandza ya Xikwembu yo tlula nhungu wa timiliyoni ma ni vun’we emisaveni hinkwayo. Hi xikombiso, hi Wavuntlhanu, April 19, 2019, Timbhoni emisaveni hinkwayo a ti hlalele vhidiyo ya ndzimana ya siku. Hi madyambu wolawo, vanhu va 20 919 041, a va hlengeletanile leswaku va Tsundzuka rifu ra Yesu. Loko hi ehleketa hi nkateko lowu hi nga na wona wo vona swiendlakalo leswi swo tsakisa ni ku va xiphemu xa swona, swi endla hi tikarhatela ku chumayela hi Mfumo wa Xikwembu.

7. Ku tekelela Yesu swi nga hi pfuna njhani leswaku hi rhangisa ntirho wo chumayela?

⁷ Xin’wana lexi nga hi pfunaka leswaku hi rhangisa ntirho wo chumayela i ku tekelela Yesu. A nga pfumelelanga nchumu ni wun’we wu n’wi kavanyeta entirhweni wakwe wo chumayela. (Yoh. 18:37) A nga pfumelanga ku hluriwa hi ndzingo loko Sathana a n’wi nyika “mifumo hinkwayo ya misava ni ku vangama ka yona”; kumbe loko van’wana va lava ku n’wi endla hosi. (Mat. 4:8, 9; Yoh. 6:15) Yesu a nga pfumelanga leswaku rifuwo kumbe valala vakwe va n’wi kavanyeta entirhweni wakwe. (Luka 9:58; Yoh. 8:59) Xitsundzuxo xa muapostola Pawulo, xi ta hi pfuna leswaku na hina loko hi langutana ni miringo, hi nga yi pfumeleli yi hi kavanyeta. U tsundzuxe Vakreste leswaku va tekelela Yesu ‘va nga karhali naswona va nga heli matimba.’—Hev. 12:3.

8. Swi vula yini ku lehisa mbilu naswona hikwalahokayini swi ri swa nkoka ngopfu namuntlha?

⁸ Ku lehisa mbilu swi vula ku rindza u rhulile leswaku xiyimo xo karhi xi cinca. Hi fanele hi lehisa mbilu swi nga ri na mhaka leswaku hi rindzele xiyimo xo karhi lexi nga tsakisiki leswaku xi hundza kumbe hi rindzele ku hetiseka ka xitshembiso xo karhi lexi ku nga khale hi xi languterile. Muprofeta Habakuku a a lava leswaku madzolonga lawa a ma endleka eYuda ma hela. (Hab. 1:2) Vadyondzisiwa va Yesu a va lava leswaku Mfumo wu “ta hi ku hatlisa,” wu ta va tshunxa eka mfumo wa Rhoma. (Luka 19:11) Hi ri langutele hi mahlongati siku leri Mfumo wa Xikwembu wu nga ta herisa vubihi hinkwabyo kutani wu tisa misava leyintshwa ya ku lulama. (2 Pet. 3:13) Kambe hi fanele hi lehisa mbilu hi rindzela nkarhi lowu Yehovha a wu vekeke. Xiya tindlela tin’wana leti Yehovha a ti tirhisaka leswaku a hi dyondzisa ku lehisa mbilu.

9. Yehovha u swi kombise njhani leswaku u lehisa mbilu?

⁹ Yehovha u hi vekele xikombiso lexinene ngopfu loko swi ta emhakeni ya ku lehisa mbilu. U nyike Nowa nkarhi lowu ringaneke wo aka ngalava ni wa ku va “muchumayeri wa leswo lulama.” (2 Pet. 2:5; 1 Pet. 3:20) Yehovha u yingisile loko Abrahama a n’wi hoxetela hi swivutiso mayelana ni xiboho Xakwe xo lovisa vaaki va miti ya Sodoma na Gomora leyi a yi hombolokile. (Gen. 18:20-33) Nakambe, u lehisele Vaisrayele lava nga tshembekangiki mbilu ku ringana malembe yo tala. (Neh. 9:30, 31) Namuntlha ha swi vona leswaku Yehovha u lehisa mbilu hileswi a nyikaka vanhu lava a va kokaka nkarhi wo “hundzuka.” (2 Pet. 3:9; Yoh. 6:44; 1 Tim. 2:3, 4) Ku lehisa mbilu ka Yehovha ku endla leswaku na hina hi lehisa mbilu loko hi ri karhi hi chumayela ni ku dyondzisa van’wana. U tlhela a hi dyondzisa ku lehisa  mbilu hi xifaniso lexi a xi tirhiseke eRitweni rakwe.

10. Hi dyondza yini eka murimi loyi ku vulavuriwaka ha yena eka Yakobo 5:7, 8?

¹⁰ Hlaya Yakobo 5:7, 8. Hi dyondza ku lehisa mbilu eka murimi loyi a byalaka swimilana. I ntiyiso leswaku swimilana swin’wana swi kula hi ku hatlisa. Kambe swimilana swo tala, ngopfungopfu leswi tswalaka mihandzu swa hlwela ku kula. EIsrayele, mihandzu a yi sungula ku tshoveriwa endzhaku ka tin’hweti ta tsevu. Murimi a a byala mbewu yakwe hi xixikana loko ku sungula timpfula kutani a tshovela hi ximun’wana. (Mar. 4:28) Onge na hina hi nga lehisa mbilu ku fana ni murimi! Kambe leswaku hi kota ku endla tano, swi lava ku tikarhata swinene.

11. Ku lehisa mbilu swi ta hi pfuna njhani entirhweni wo chumayela?

¹¹ Hakanyingi vanhu va lava ku hatla va vona vuyelo bya ntirho wa vona. Loko hi lava leswaku nsimu ya hina yi humesa ntshovelo lowunene, hi fanele hi yi khathalela nkarhi ni nkarhi, hi yi rima, hi byala, hi yi hlakula ni ku yi cheleta. Ntirho wo endla vadyondzisiwa na wona wu lava matshalatshala. Swi lava nkarhi ku pfuna vanhu lava hi va dyondzisaka leswaku va tshika xihlawuhlawu. Ku lehisa mbilu swi ta hi pfuna leswaku hi nga heli matimba loko vanhu va nga hi yingisi. Hambiloko vanhu lava hi va chumayelaka va hi yingisa, hi fanele hi lehisa mbilu. A hi nge va sindzisi vanhu lava hi va dyondzisaka Bibele leswaku va va ni ripfumelo. Hambi ku ri vadyondzisiwa va Yesu, mikarhi yin’wana a va hlwela ku twisisa leswi a a va dyondzisa swona. (Yoh. 14:9) A hi tsundzukeni leswaku hina ho byala ni ku cheleta kambe i Xikwembu lexi swi kurisaka.—1 Kor. 3:6.

12. Hi nga yi lehisa njhani mbilu loko hi chumayela maxaka ya hina?

¹² Loko hi chumayela maxaka ya hina, swi nga hi tikela ku lehisa mbilu. Kambe nsinya wa nawu lowu nga eka Eklesiasta 3:1, 7, wu nga hi pfuna. Wu ri: “[Ku] ni nkarhi wa ku miyela ni  nkarhi wa ku vulavula.” Hi nga va chumayela hi matikhomelo ya hina lamanene handle ko vulavula kambe loko hi pfulekeriwa hi nkarhi wo vulavula, a hi wu tirhiseni hi vutlhari. (1 Pet. 3:1, 2) Loko hi chumayela, hi lehisela vanhu hinkwavo mbilu, ku katsa ni maxaka ya hina.

13-14. I vamani van’wana lava lehiseke mbilu lava hi nga va tekelelaka?

¹³ Hi nga dyondza ku lehisa mbilu eka vanhu vo tshembeka lava kumekaka eBibeleni ni le ka vanhu va manguva lawa. Habakuku a a langutele ku herisiwa ka vuhomboloki hi mahlongati kambe leswi a a lehisa mbilu u te: “Ndzi ta tshama ndzi yimile endhawini ya mina yo rindza.” (Hab. 2:1) Muapostola Pawulo, a a lava ku “heta” ntirho wakwe hi mbilu hinkwayo. Kambe leswi a a lehisa mbilu, u ye emahlweni a “nyikela vumbhoni lebyi heleleke bya mahungu lamanene.”—Mit. 20:24.

¹⁴ Twana leswi endliweke hi vatekani van’wana lava thwaseke exikolweni xa Giliyadi, lava komberiweke ku ya chumayela etikweni leri a ri nga ri na Timbhoni to tala naswona a ri taleriwe hi vukhongeri lebyi nga riki bya Vukreste. Vanhu vo tala va le tikweni rero a va nga swi tsakeli ku dyondza Bibele. Hi hala tlhelo, vamakwerhu lava yeke na vona eGiliyadi, a va va rhumela marungula va va byela hi ta nhluvuko lowu endliwaka hi swichudeni swa vona swo tala swa Bibele. Hambileswi vanhu a va nga va yingisi, vatekani volavo va lehise mbilu va ya emahlweni va chumayela. Endzhaku ko heta malembe ya nhungu va chumayela ensin’wini leyi nga vekiki mihandzu, va tsake ngopfu loko eku heteleleni xin’wana xa swichudeni swa vona xi khuvuriwa. Hi dyondza yini eka vanhu va le Bibeleni ni va manguva lawa lava ku vulavuriweke ha vona laha? Vanhu lava hinkwavo a va tshikanga ku ya emahlweni ni ntirho wa vona naswona Yehovha u va katekisile hikwalaho ka leswi va lehiseke mbilu. Onge hi nga “tekelela lava dyaka ndzhaka ya switshembiso hikwalaho ka ripfumelo ni ku lehisa mbilu.”—Hev. 6:10-12.

15. Ripfumelo ri nga hi pfuna njhani leswaku hi nga tshiki ku chumayela?

¹⁵ Ha ri kholwa rungula leri hi ri chumayelaka hikwalaho hi lava ku ri byela van’wana hilaha hi nga kotaka hakona. Ha swi tshemba switshembiso leswi nga eRitweni ra Xikwembu. (Ps. 119:42; Esa. 40:8) Hi ku vonile ku hetiseka ka vuprofeta bya le Bibeleni namuntlha. Hi vone vanhu vo tala va cinca mahanyelo ya vona endzhaku ka loko va sungule ku hanya hi milawu ya le Bibeleni. Leswi hinkwaswo swi endla hi tiyiseka leswaku hakunene vanhu va ma lava mahungu lamanene ya Mfumo wa Xikwembu.

16. Hi ku ya hi Pisalema 46:1-3, ku va ni ripfumelo eka Yehovha na Yesu swi hi pfuna njhani leswaku hi ya emahlweni hi chumayela?

¹⁶ Nakambe, hi ni ripfumelo eka Yehovha, loyi mahungu lamanene lawa hi ma chumayelaka ma humaka eka yena ni le ka Hosi ya Mfumo wa Xikwembu, ku nga Yesu. (Yoh. 14:1) Yehovha u ta tshama a ri vutumbelo bya hina naswona u ta hi nyika matimba, ku nga khathariseki leswaku hi langutana na yini. (Hlaya Pisalema 46:1-3.) Ku engetela kwalaho, ha tiyiseka leswaku Yesu u tirhisa matimba ni vulawuri lebyi Yehovha a n’wi nyikeke byona leswaku a kongomisa ntirho wo chumayela a ri etilweni.—Mat. 28:18-20.

17. Vula xikombiso lexi endlaka hi nga tshiki ku chumayela.

¹⁷ Ripfumelo ri endla hi tiyiseka leswaku Yehovha u ta katekisa matshalatshala ya hina, mikarhi yin’wana u ta ma katekisa hi tindlela leti a hi nga ti rindzelanga. (Ekl. 11:6) Hi  xikombiso, siku ni siku vanhu vo tala va vona swigolonyana leswi nga ni tibuku ta hina. Xana ndlela leyi yo chumayela yi veka mihandzu? Ina! Vutirheli Bya Hina Bya Mfumo bya November 2014, byi vulavule hi muntshwa un’wana wa le yunivhesiti loyi a a lava ku tsala xitsalwana hi Timbhoni ta Yehovha. A a nga ku tivi eHolweni ya Timbhoni kambe u kume rungula leri a a ri lava eka xigolonyana lexi a xi ri ni tibuku ta hina kwale yunivhesiti. U hetelele a ve Mbhoni leyi khuvuriweke naswona sweswi i phayona. Mitokoto yo fana ni leyi, yi endla leswaku hi ya emahlweni hi chumayela hikuva swa tikomba leswaku ka ha ri ni vanhu lava nga ni torha ra mahungu lamanene ya Mfumo wa Xikwembu.

18. Hikwalahokayini hi tiyiseka leswaku ntirho wo chumayela hi Mfumo wa Xikwembu wu ta hela hi nkarhi lowu Yehovha a wu lavaka?

¹⁸ Ha tiyiseka leswaku ntirho wo chumayela wu ta hela hi nkarhi lowu faneleke. Xiya leswi endlekeke enkarhini wa Nowa. Yehovha u kombise leswaku mikarhi hinkwayo u endla swilo hi nkarhi lowu faneleke. Yehovha u veke nkarhi lowu Ndhambi a yi ta sungula ha wona ka ha sale malembe ya kwalomu ka 120. Endzhaku ka malembe yo tala, Yehovha u lerise Nowa leswaku a aka ngalava. Kumbexana Nowa u sungule ntirho wakwe ka ha sale malembe ya 40 kumbe 50 leswaku ku va na Ndhambi. Hambileswi vanhu a va nga n’wi yingisi loko a chumayela kambe u ye emahlweni a chumayela ku fikela loko Yehovha a n’wi byela leswaku a nghenisa swiharhi engalaveni. Kutani hi nkarhi lowu faneleke “Yehovha [u pfale] nyangwa.”—Gen. 6:3; 7:1, 2, 16.

19. I yini leswi hi nga swi langutelaka loko hi nga wisi?

¹⁹ Ku nga ri khale Yehovha u ta yimisa ntirho wo chumayela; u ta lovisa misava ya Sathana kutani a tisa misava yo lulama. Loko ha ha rindzele sweswo, a hi tikarhateleni ku tekelela Nowa, Habakuku ni van’wana lava nga wisangiki. Onge hi nga ka hi nga pfumeli ku kavanyetiwa entirhweni wa hina, hi lehisa mbilu, hi tlhela hi va ni ripfumelo leri tiyeke eka switshembiso leswi Yehovha a hi tshembisaka swona!