NHLOKOMHAKA LEYI DYONDZIWAKA 39
Loko Munhu Loyi U N’wi Rhandzaka A Tshika Ku Tirhela Yehovha
“Va xi dyohele ko tala emananga . . . va xi twisa ku vava.”—PS. 78:40.
RISIMU 102 “Pfuna Lava Tsaneke”
LESWI HI NGA TA SWI DYONDZA *
1. Loko munhu loyi hi n’wi rhandzaka a susiwa swi nga hi khumba njhani?
XANA ku ni loyi u n’wi rhandzaka loyi a nga susiwa evandlheni? Sweswo swa vava swinene! Makwerhu wa xisati loyi a vuriwaka Hilda u te: “Loko nuna wa mina loyi a hi ri ni malembe ya 41 hi tekanile a lova a ndzi ehleketa leswaku i nchumu wo vava ku tlula hinkwaswo. * Kambe loko n’wana wa mina a tshika ntiyiso a tlhela a siya nsati ni vana swi ndzi vavise ngopfu.”
Yehovha wa ku twisisa ku vava loku u ku twaka loko munhu loyi u n’wi rhandzaka a tshika ku n’wi tirhela (Vona tindzimana 2-3) *
2-3. Hi ku ya hi Pisalema 78:40, 41, Yehovha u titwa njhani loko malandza yakwe ma tshika ku n’wi tirhela?
2 Ehleketa ndlela leyi Yehovha a titweke ha yona loko tintsumi tin’wana etilweni ti n’wi xandzukela! (Yuda 6) Nakambe ehleketa ndlela leyi a tweke ku vava hayona loko Vaisrayele lava a a va rhandza va n’wi xandzukela hi ku phindhaphindha. (Hlaya Pisalema 78:40, 41.) Swi tive leswaku Tata wa hina wa le tilweni na yena u twa ku vava loko munhu loyi u n’wi rhandzaka a tshika ku n’wi tirhela. Wa ri twisisa gome leri u nga na rona. U ta ku kombisa ntwelavusiwana naswona u ta ku khutaza ni ku ku seketela.
3 Eka nhlokomhaka leyi, hi ta bula hi ndlela leyi Yehovha a hi pfunaka hayona loko munhu loyi hi n’wi rhandzaka a tshika ku tirhela Yehovha. Nakambe hi ta tlhela hi bula hi ndlela leyi hi nga va pfunaka hayona vamakwerhu evandlheni lava langutanaka ni xiyimo xo tano. Kambe a hi sunguleni hi bula hi swilo leswi hi faneleke hi papalata ku ehleketa ha swona.
U NGA TIVONI NANDZU
4. Vatswari va titwa njhani loko n’wana wa vona a tshika ku tirhela Yehovha?
4 Loko n’wana wa vona loyi va n’wi rhandzaka a tshika ku tirhela Yehovha swi tolovelekile leswaku va tivutisa ku i yini leswi a va fanele va swi endlile ku pfuna n’wana wa vona leswaku a tshama entiyisweni. Endzhaku ka loko n’wana wakwe a susiwile, makwerhu la vuriwaka Luke u te: “Ndzi titwe nandzu. Sweswo a swi ndzi endla ndzi lorha milorho yo chavisa. Mikarhi yin’wana a ndzi rila swinene naswona mbilu ya mina a yi vava.” Makwerhu loyi a vuriwaka Elizabeth loyi na yena a langutaneke ni xiyimo xo tano u ri: “I yini leswi ndzi nga swi endlangiki tanihi mutswari? Ndzi vona onge ndzi tsandzekile ku dyondzisa n’wana wa mina ntiyiso.”
5. I xihoxo xa mani loko munhu a tshika ku tirhela Yehovha?
5 Hi fanele hi tsundzuka leswaku hinkwerhu Yehovha u hi nyike tshunxeko wo tihlawulela. Sweswo swi vula leswaku hi fanele hi tihlawulela loko hi lava ku n’wi yingisa kumbe hi nga swi lavi. Vantshwa van’wana lava kurisiweke hi vatswari lava nga riki timbhoni va hlawule ku tirhela Yehovha hi ku tshembeka naswona va ha ya emahlweni va endla tano. Van’wana lava vatswari va vona va kululeke va n’watseka leswaku va va kurisa hi milawu ya Bibele, va tshike ku tirhela Yehovha loko se va kurile. Hinkwerhu hi fanele hi tihlawulela loko hi lava ku tirhela Yehovha. (Yox. 24:15) Hikwalaho, vatswari lava vana va n’wina va tshikeke ku tirhela Yehovha, tshikani ku titwa nandzu!
6. Muntshwa a nga titwa njhani loko mutswari wa yena a tshika ku tirhela Xikwembu?
6 Mikarhi yin’wana, mutswari a nga tshika ntiyiso ni ndyangu wakwe. (Ps. 27:10) Sweswo swi nga va heta matimba vana lava a va teka vatswari va vona va ri swikombiso leswinene eka vona. Esther loyi papa wakwe a susiweke u ri: “A ndzi tshamela ku rila hikuva a ndzi swi xiya leswaku a ngo lo susiwa hileswi a endleke xidyoho ntsena. Kambe o ka a nga ha swi lavi ku tirhela Yehovha. Ndza n’wi rhandza swinene papa, hikwalaho loko a susiwile a ndzi tshamela ku vilela hi yena. Sweswo swi ndzi vangele ntshikilelo lowu a wu endla ndzi tshama ndzi chuhile.”
7. Hi yihi ndlela leyi Yehovha a titwaka hayona hi muntshwa loyi mutswari wakwe a susiweke?
7 Vantshwa loko un’wana wa vatswari va n’wina a susiwile, hi rila na n’wina! Swi tiveni leswaku Yehovha na yena wa yi twisisa ndlela leyi mi titwaka ha yona. Wa mi rhandza naswona wa ku tlangela ku tshembeka ka n’wina, swi tano na hi hina vamakwerhu va n’wina. Nakambe tsundzukani leswaku xiboho lexi vatswari va n’wina va xi tekeke a hi xihoxo xa n’wina. Hilaha hi buleke hakona eku sunguleni, Yehovha u nyike un’wana ni un’wana wa hina tshunxeko wo tihlawulela. Nakambe un’wana ni un’wana la tinyiketeleke “u ta rhwala ndzhwalo wakwe.”—Gal. 6:5.
8. Xana loko ku ri ni loyi a tshikeke ku tirhela Yehovha ekaya u nga endla yini loko wa ha rindzele leswaku a tlhelela eka Yehovha? (Nakambe vona bokisi leri nge “ Tlhelela Eka Yehovha.”)
8 Loko ku ri ni loyi a tshikeke ku tirhela Yehovha, swa twisiseka ku tshemba leswaku siku rin’wana u tlhelela eka yena. U nga endla yini sweswi? U nga tiyisa vuxaka bya wena na Yehovha. Loko u endla tano, u ta veka xikombiso lexinene eka van’wana endyangwini kumbexana ni le ka loyi a susiweke. U ta tlhela u kuma matimba yo langutana ni xiyimo xa wena xo tika. A hi buleni hi swin’wana leswi u nga swi endlaka.
LESWI U NGA SWI ENDLAKA LESWAKU U TIYISA RIPFUMELO RA WENA
9. I yini leswi u nga swi endlaka leswaku u tshama u ri ni ripfumelo eka Yehovha? (Nakambe vona bokisi leri nge, “ Matsalwa Lama Nga Ku Khutazaka Loko Un’wana Loyi U N’wi Rhandzaka A Tshike Ku Tirhela Yehovha.”)
9 Tshama u ri karhi u tiyisa ripfumelo ra wena. I swa nkoka leswaku u tshama u ri karhi u tiyisa ripfumelo ra wena ni ri lavan’wana endyangwini. U nga swi endla njhani sweswo? Tiyisa ripfumelo ra wena eka Yehovha hi ku tshama u ri karhi u hlaya Rito ra Xikwembu ni ku anakanyisisa hi leswi u swi dyondzeke ni ku va kona etinhlengeletanweni ta vandlha. Joanna loyi papa wakwe ni sesi wakwe va tshikeke ntiyiso u ri: “Ndzi titwa ndzi antswa loko ndzi hlaya hi vanhu va le Bibeleni vo tanihi hi Abigayele, Estere, Yobo, Yosefa na Yesu. Swikombiso swa vona swi endla leswaku ndzi ehleketa hi leswinene naswona swi ndzi thova mbilu. Nakambe tinsimu ta vuhaxi bya jw ta ndzi khutaza swinene.”
10. Pisalema 32:6-8 yi hi pfuna njhani leswaku hi langutana ni swiyimo swo tika?
10 Phofulela Yehovha ndlela leyi u titwaka hayona. Loko u karhateka u nga tshiki ku khongela eka yena. Kombela Yehovha a ku pfuna u vona xiyimo xexo hilaha yena a xi vonaka hakona “ni ku ku dyondzisa ndlela leyi u faneleke u famba ha yona.” (Hlaya Pisalema 32:6-8.) Swi nga ha tika ku byela Yehovha ndlela leyi u titwaka hayona. Kambe Yehovha wa ku twisisa ku vava loku u ku twaka. Wa ku rhandza swinene naswona u lava u tiphofula eka yena.—Eks. 34:6; Ps. 62:7, 8.
11. Hi ku ya hi Vaheveru 12:11, hikwalahokayini hi fanele hi tshemba leswaku ndlela leyi Yehovha a hi tshinyaka ha yona yi kombisa ku wa hi rhandza? (Vona bokisi leri nge, “ Ku Susiwa Ka Mudyohi Swi Kombisa Rirhandzu Ra Yehovha.”)
11 Seketela xiboho xa vakulu. Ku susiwa ka mudyohi i ndlela yin’wana leyi kombisaka rirhandzu ra Yehovha. Ndlela leyi a hi tshinyaka hayona ya rirhandzu yi kombisa leswaku u lava ku pfuna hinkwerhu ku katsa ni mudyohi. (Hlaya Vaheveru 12:11.) Van’wana evandlheni va nga ha vula leswaku xiboho lexi tekiweke hi vakulu xo susa mudyohi evandlheni a xi nga fanelanga kambe va nga swi boxi swilo swo biha leswi a swi endleke. A hi na vuxokoxoko hinkwabyo bya mhaka yoleyo. I vutlhari ku tshemba leswaku xiboho lexi vakulu va xi tekeke i xinene naswona va tikarhata leswaku va landzelela nkongomiso wa Matsalwa ni ku avanyisa hi ndlela ya “Yehovha.”—2 Tikr. 19:6.
12. Van’wana va vuyeriwe njhani hi ku seketela xiboho xa Yehovha xa ku susiwa ka mudyohi?
12 Loko u seketela xiboho xa vakulu xo susiwa ka munhu loyi u n’wi rhandzaka u nga ha n’wi pfuna leswaku a tlhelela eka Yehovha. Elizabeth loyi hi vulavuleke ha yena eku sunguleni u ri: “A swi tika ku va hi nga ha vulavuli ni n’wana wa hina. Kambe endzhaku ka loko a tlhelele ka Yehovha u pfumerile leswaku a swi fanela leswaku a susiwa. Hi ku famba ka nkarhi u vule leswaku wa swi tlangela leswi a swi dyondzeke. Hi dyondza leswaku ndlela leyi Yehovha a hi tshinyaka ha yona yi kombisa leswaku wa hi rhandza.” Nuna wakwe Mark u ri: “Hi ku famba ka nkarhi n’wana wa hina u ndzi byele leswaku xin’wana lexi endleke leswaku a vuya hileswi a hi nga ha tihlanganisi na yena nikatsongo. Ndza tsaka hileswi Yehovha a hi pfuneke leswaku hi yingisa.”
13. I yini lexi nga ku pfunaka u hlula ku vilela?
13 Vulavula ni vanghana lava twisisaka ndlela leyi u titwaka ha yona. Heta nkarhi wo tala ni vamakwerhu lava nga ni ntokoto lava nga ta ku pfuna leswaku u nga heleriwi hi ntshembo. (Swiv. 12:25; 17:17) Joanna, loyi hi vulavuleke ha yena eku sunguleni u ri: “A ndzi titwa ndzi ri ni xivundza. Kambe loko ndzi vulavula ni vanghana va mina lava ndzi va rhandzaka swi endla leswaku ndzi kota ku langutana ni xiyimo lexi.” U ta endla yini loko van’wana evandlheni va vula swilo leswi yaka swi ku vilerisa ngopfu?
14. Hikwalahokayini hi fanele hi ya emahlweni hi “lehiselana mbilu ni ku rivalelana hi ku tshunxeka”?
14 Lehisela vamakwerhu mbilu. A hi vanhu hinkwavo lava nga ta vula swilo leswi hi swi languteleke. (Yak. 3:2) Hinkwerhu hi velekiwe ni xidyoho, kutani u nga hlamali loko van’wana va nga swi tivi leswaku va fanele va vula yini kumbe va vula swilo leswi nga ta ku twisa ku vava va nga tiyimiselanga. Tsundzuka xitsundzuxo xa muapostola Pawulo lexi nge: “Yanani emahlweni mi lehiselana mbilu ni ku rivalelana hi ku tshunxeka hambiloko munhu a ri ni xivangelo xa ku vilerisiwa hi un’wana.” (Kol. 3:13) Makwerhu un’wana loyi xaka rakwe ri susiweke u ri: “Yehovha u ndzi pfunile leswaku ndzi rivalela vamakwerhu lava a va ringeta ku ndzi pfuna hi ndlela leyi ndzi twiseke ku vava.” Vamakwerhu va nga va pfuna njhani vandyangu wa loyi a susiweke?
VAMAKWERHU EVANDLHENI VA NGA PFUNA
15. I yini lexi nga pfunaka vandyangu wa loyi a ha ku susiwaka?
15 Vana ni xinghana eka vandyangu va loyi a susiweke. Makwerhu waxisati loyi a vuriwaka Miriam wa pfumela leswaku a chava ku ya etinhlengeletanweni ta vandlha endzhaku ka loko buti wakwe a susiwile. U ri: “A ndzi chava leswaku vanhu va ta ku yini. Kambe ku ni vamakwerhu lava a va rila na mina naswona va nga vulangiki swo biha hi buti wa mina. Ndza va khensa swinene hikuva a ndzi nga titwi ndzi ri ndzexe.” Makwerhu un’wana wa xisati u ri: “Loko n’wana wa hina a susiwile, vanghana va hina va te ekaya va ta hi chavelela. Van’wana va vule leswaku a va swi tivi ku va ta ku yini. Va rile na mina ni ku ndzi tsalela papila. Leswi va swi endleke swi ndzi pfune ngopfu!”
16. Vamakwerhu evandlheni va nga ya emahlweni va wu seketela njhani ndyangu wa loyi a susiweke?
16 Yana emahlweni u seketela vandyangu wa loyi a susiweke. Va lava rirhandzu ni nseketelo wa wena ngopfungopfu sweswi. (Hev. 10:24, 25) Mikarhi yin’wana van’wana vandyangu wa loyi a susiweke va vona onge vamakwerhu evandlheni a va ha va vulavurisi, onge hi loko na vona va lo susiwa. A hi lavi leswaku va titwa tano nikatsongo! Vantshwa lava vatswari va vona va tshikeke ntiyiso va lava ku bumabumeriwa ni ku khutaziwa. Maria loyi nuna wakwe a susiweke a tlhela a siya ndyangu u ri: “Van’wana va vanghana va mina a va ta ekaya va fika va sweka va tlhela va va na hina eka vugandzeri bya ndyangu. Na vona a swi va twisa ku vava, va tlhele va rila na mina. Va ndzi yimelerile loko van’wana va vulavula ku biha ha mina. Va endle hinkwaswo leswi va nga swi kotaka leswaku va ndzi khutaza!”—Rhom. 12:13, 15.
Vamakwerhu evandlheni va nga kombisa ndyangu wa loyi a tshikeke ku tirhela Yehovha rirhandzu ni nseketelo (Vona ndzimana 17) *
17. Vakulu va nga va seketela njhani vandyangu wa loyi a susiweke?
17 Vakulu tirhisani nkarhi lowu mi wu kumaka leswaku mi tiyisa vandyangu wa loyi a susiweke. I vutihlamuleri bya n’wina ku va mi khutaza vandyangu wa loyi a tshikeke ku tirhela Yehovha. (1 Tes. 5:14) Va khutazeni loko tinhlengeletano ta vandlha ti nga si sungula ni loko se ti herile. Va endzeleni emakaya ni ku khongela na vona. Fambani na vona entirhweni wo chumayela ni ku va rhamba eka vugandzeri bya ndyangu. Varisi va fanele va komba tinyimpfu ta Yehovha leti nga ni gome ntwelavusiwana, rirhandzu ni leswaku va khathala ha tona.—1 Tes. 2:7, 8.
VANA NI TSHEMBO NASWONA U YA EMAHLWENI U TSHEMBA YEHOVHA
18. Hi ku ya 2 Petro 3:9, Xikwembu xi lava leswaku vadyohi va endla yini?
18 Yehovha “a nga naveli leswaku ku lova ni un’we, u lava leswaku vanhu hinkwavo va hundzuka.” (Hlaya 2 Petro 3:9.) Hambiloko munhu o endla xidyoho lexikulu, vutomi byakwe bya ha ri bya nkoka eka Xikwembu. Tsundzuka ku Yehovha u humese nxavo lowukulu, a nyikela hi N’wana wakwe leswaku a fela vadyohi. Hikwalaho ka ntwelavusiwana wakwe Yehovha u lava ku pfuna vadyohi leswaku va tlhelela eka yena. Wa tshemba leswaku va ta hlawula ku endla tano, hilaha hi swi voneke hakona eka xifaniso xa Yesu xa n’wana loyi a a hanya vutomi bya vusopfa. (Luka 15:11-32) Hi ku famba ka nkarhi vo tala lava tshikeke ntiyiso va tlhelele eka Tata wa vona wa rirhandzu wa le tilweni. Vandlha na rona ra va amukela hi mandla mambirhi. Elizabeth loyi hi buleke ha yena eku sunguleni, a a tsake ngopfu loko n’wana wakwe a vuyiseriwa. U ri: “Ndza tsaka swinene leswi vo tala va hi khutazeke leswaku hi nga heleriwi hi ntshembo.”
19. Hikwalahokayini hi fanele hi ya emahlweni hi tshemba Yehovha?
19 Hi fanele hi tshama hi ri karhi hi tshemba Yehovha. Switsundzuxo swakwe a swi nge pfuki swi hi twise ku vava. I Tatana loyi a nga ni malwandla ni ntwelavusiwana, loyi a rhandzaka vana vakwe hinkwavo lava n’wi gandzelaka. Tiyiseka leswaku Yehovha a nge ku tshiki hi nkarhi lowu u nga ni gome. (Hev. 13:5, 6) Mark loyi a boxiweke eku sunguleni u ri: “Yehovha a nga hi tshikanga, a nga vanga ekule na hina hi nkarhi wa maxangu.” Yehovha u ta ya emahlweni a ku nyika “matimba lama tlulaka lama tolovelekeke.” (2 Kor. 4:7) U nga swi kota ku tshama u tshembekile u tlhela u va ni ntshembo loko loyi u n’wi rhandzaka a tshika ku tirhela Yehovha.
RISIMU 44 Xikhongelo Xa Munhu La Titsongahataka
^ par. 5 Swa vava swinene loko munhu loyi hi n’wi rhandzaka a tshika ku tirhela Yehovha! Nhlokomhaka leyi yi vulavula hi ndlela leyi Yehovha a titwaka hayona loko leswi, swi endleka. Yi tlhela yi vulavula hi swilo leswi mindyangu yi nga swi endlaka leswaku yi kota ku tiyisela ni ku tshama yi ri ni vuxaka lebyinene na Yehovha. Nakambe yi ta tlhela yi vulavula hi leswi vamakwerhu evandlheni va nga swi endlaka leswaku va chavelela ni ku seketela mindyangu yoleyo.
^ par. 1 Mavito man’wana ma cinciwile.
