1. Muapostola Petro u huhuteriwe ku endla yini loko a ri ekusuhi ni ku fa?

 MUAPOSTOLA Petro a a swi tiva leswaku a ta fa ku nga ri khale. Eka malembe yo tala lawa a ma heteke a tirhela Yehovha hi ku tshembeka, u landzele Yesu, a chumayela vanhu va matiko lava a va nga si tshama va chumayeriwa ni ku tlhela a va xirho xa huvo leyi fumaka. Kambe xiavelo xakwe a xi nga si hela. Exikarhi ka 62 na 64 C.E., u huhuteriwe ku tsala mapapila mambirhi ku nga tibuku ta Bibele leti vitaniwaka Petro wo sungula ni wa vumbirhi. Petro a a lava leswaku mapapila yakwe ma sala ma pfuna Vakreste endzhaku ka loko a file.—2 Pet. 1:​12-15.

2. Hikwalahokayini mapapila ya Petro a ma fike hi nkarhi?

² Petro u tsale mapapila yakwe hi nkarhi lowu vapfumerikulobye a va “weriw[e] hi miringo yo hambanahambana.” (1 Pet. 1:6) Vavanuna vo homboloka a va ringeta ku dyondzisa tidyondzo ta mavunwa evandlheni ni ku kucetela vanhu ku tikhoma ku biha. (2 Pet. 2:​1, 2, 14) Vakreste lava a va tshama eYerusalema ku nga ri khale a va ta langutana ni “makumu ya swilo hinkwaswo,” ku nga ku lovisiwa ka muti wolowo ni tempele ya wona hi masocha ya Varhoma. (1 Pet. 4:7) A swi kanakanisi leswaku mapapila ya Petro ma pfune Vakreste, leswaku va vona leswi va nga swi endlaka ku tiyisela miringo leyi a va langutane na yona hi nkarhi wolowo, ni leyi a va ta langutana na yona enkarhini lowu taka. b

3. Hikwalahokayini hi fanele hi kambisisa mapapila ya Petro?

 ³ Hambileswi Petro a a tsalela Vakreste va le nkarhini wakwe mapapila wolawo, Yehovha u endle leswaku ma katsiwa eRitweni Rakwe. Na hina ma hi pfuna mapapila wolawo. (Rhom. 15:4) Leswi hi hanyaka ni vanhu lava tekaka ku tikhoma ku biha swi nga ri nchumu, na hina hi langutana ni miringo leyi nga endlaka swi hi tikela ku gandzela Yehovha. Ku engetela kwalaho, ku nga ri khale hi ta langutana ni nhlomulo lowukulu lowu tlulaka ni lowu Vayuda va langutaneke na wona. Hi kuma switsundzuxo swin’wana swa nkoka eka mapapila ya Petro mambirhi. Switsundzuxo leswi swi ta hi pfuna leswaku hi tshama hi langutele siku ra Yehovha, hi tshika ku chava vanhu ni ku ya hi rhandzana swinene. Switsundzuxo swoleswo swi nga tlhela swi pfuna vakulu va vona ndlela leyi va nga pfunaka vamakwerhu va tshama va ri ni vuxaka lebyinene na Yehovha.

4. Hilaha swi kombisiweke hakona eka 2 Petro 3:​3, 4, i yini leswi nga tsanisaka ripfumelo ra hina?

⁴ Hi hanya ni vanhu lava nga byi tshembiki vuprofeta bya Bibele. Vahlekuri va nga hi hleka hileswi hi nga ni malembe yo tala hi rindzele makumu. Vanhu van’wana va nga vula leswaku a ma nge pfuki ma fikile. (Hlaya 2 Petro 3:​3, 4.) Loko hi twa vanhu lava hi va chumayelaka, lava hi tirhaka na vona kumbe swirho swa ndyangu swi hi byela sweswo, ripfumelo ra hina ri nga ha tsekatseka. Petro u hlamusele leswi nga hi pfunaka.

5. I yini leswi nga ta hi pfuna hi va ni langutelo lerinene loko ha ha rindzele makumu ya misava leyi? (2 Petro 3:​8, 9)

⁵ Vanhu van’wana va nga vona onge Yehovha wa hlwela ku lovisa misava leyi yo homboloka. Marito ya Petro ma nga hi pfuna leswaku hi va ni langutelo lerinene, hi ku hi tsundzuxa leswaku ndlela leyi Yehovha a hlayelaka nkarhi hayona yi hambane swinene ni ya vanhu. (Hlaya 2 Petro 3:​8, 9.) Eka Yehovha malembe ya 1 000 ma fana ni siku rin’we. Yehovha u lehisa mbilu naswona a nga lavi leswaku ku lova ni un’we. Kambe loko siku rakwe ri fika, vanhu vo homboloka va ta lovisiwa. Mawaku nkateko lowu hi nga na wona wo tirhisa nkarhi lowu saleke leswaku hi chumayela vanhu va matiko hinkwawo.

6. Hi tshama hi ri karhi hi “anakanyisisa” hi siku ra Yehovha hi ndlela yihi? (2 Petro 3:​11, 12)

⁶ Petro u hi khutaza leswaku hi “anakanyisisa” hi siku ra Yehovha. (Hlaya 2 Petro 3:​11, 12.) Njhani? Hi endla kahle ku anakanyisisa, loko swi koteka masiku hinkwawo hi mikateko leyi hi nga ta yi kuma emisaveni leyintshwa. Tivone u ri karhi u hefemula moya wo tenga, u dya swakudya leswi nga ni rihanyo, u amukela maxaka ya wena lama pfuxiweke ni ku dyondzisa vanhu lava hanyeke khale swinene hi vuprofeta bya Bibele lebyi hetisekeke. Ku endla tano, swi ta ku pfuna leswaku u tshama u rindzile ni leswaku u tiyiseka ku makumu ma kwala nyongeni. “Leswi [hi] tiveke mhaka leyi ka ha ri emahlweni” mayelana ni vumundzuku bya hina, a hi nge ‘hambukisiwi’ hi vadyondzisi va mavunwa.—2 Pet. 3:17.

7. Ku chava vanhu ku nga hi sivela ku endla yini?

⁷ Leswi hi swi tivaka leswaku siku ra Yehovha ri le ku teni, hi lava ku endla hinkwaswo leswi hi nga swi kotaka leswaku hi chumayela vanhu mahungu lamanene. Nilokoswiritano, eka swiyimo swin’wana hi nga chava ku chumayela. Hikwalahokayini? Hikuva mikarhi yin’wana hi nga chava vanhu. Sweswo swi endlekile eka Petro. Hi vusiku lebyi Yesu a tengisiweke ha byona, Petro u chavile ku byela vanhu leswaku na yena i mudyondzisiwa wa Yesu naswona hi ku phindhaphindha u n’wi landzurile. (Mat. 26:​69-75) Hambiswiritano, hi ku famba ka nkarhi  muapostola loyi u vule leswi handle ko tipfinyinga: “Mi nga swi chavi leswi va swi chavaka kumbe mi karhateka.” (1 Pet. 3:14) Marito ya Petro ma hi tiyisekisa leswaku hi nga swi kota ku tshika ku chava vanhu.

8. I yini leswi nga hi pfunaka hi tshika ku chava vanhu? (1 Petro 3:15)

⁸ I yini leswi nga hi pfunaka leswaku hi tshika ku chava vanhu? Petro u hi byela leswi: “Dzunisani Kreste tanihi loyi a kwetsimaka etimbilwini ta n’wina.” (Hlaya 1 Petro 3:15.) Leswi swi katsa ku anakanyisisa hi xikhundlha ni matimba lawa Yesu Kreste, Hosi ya hina a nga na wona. Loko u khomiwa hi rhumbyana kumbe u chava loko u pfulekeriwa hi nkarhi wo chumayela vanhu mahungu lamanene, ehleketa hi Hosi ya hina. Yi vone hi tihlo ra miehleketo yi ri karhi yi fuma etilweni yi rhendzeriwe hi tintsumi ta ntsandzavahlayi. Tsundzuka leswaku yi na “matimba yo lawula swilo hinkwaswo etilweni ni le misaveni” nileswaku yi ta va na wena “mikarhi hinkwayo kukondza makumu ma fika.” (Mat. 28:​18-20) Petro u hi khutaza leswaku hi “tshama [hi] lunghekele” ku yimela ripfumelo ra hina. Xana wa swi lava ku chumayela entirhweni, exikolweni kumbe kun’wana ni kun’wana hi xitshuketa? Ehleketisisa hileswaku u ta swi endla rini sweswo kutani u lunghiselela leswi u nga ta swi vula. Khongelela ku va ni xivindzi, u tshemba leswaku Yehovha u ta ku pfuna u nga va chavi vanhu.—Mit. 4:29.

9. Hi rini laha Petro a tsandzekeke ku kombisa van’wana rirhandzu? (Nakambe vona xifaniso.)

⁹ Petro u dyondze ku rhandza vanhu. A a ri kona loko Yesu a va byela leswi: “Ndzi mi nyika nawu lowuntshwa wa leswaku mi rhandzana; tanihi leswi ndzi mi rhandzeke, rhandzanani na n’wina.” (Yoh. 13:34) Hambiswiritano, hi ku famba ka nkarhi Petro u chavile ni ku tlhela a ala ku dya ni vamakwerhu lava humaka eka matiko man’wana. Muapostola Pawulo u vule leswaku leswi Petro a swi endleke i “vukanganyisi.” (Gal. 2:​11-14) Petro u amukele ndzayo yoleyo naswona u dyondze eka yona. Eka mapapila yakwe mambirhi, Petro u kandziyise leswaku a hi fanelanga hi rhandza vamakwerhu swi helela kwalaho kambe hi fanele hi va komba leswaku ha va rhandza.

10. I yini leswi nga hi pfunaka hi kombisa “rirhandzu leri nga riki na vukanganyisi”? Hlamusela. (1 Petro 1:22)

¹⁰ Petro u vula leswaku hi fanele hi komba vagandzerikulorhi “rirhandzu leri nga riki na vukanganyisi.” (Hlaya 1 Petro 1:22.) Hi kota ku va ni rirhandzu ro tano hileswi hi “yingisa[ka] ntiyiso.” Ntiyiso wolowo wu katsa dyondzo ya leswaku “Xikwembu a xi na xihlawuhlawu.” (Mit. 10:​34, 35) A hi nge swi koti ku yingisa xileriso xa Yesu xa leswaku hi rhandzana loko evandlheni hi rhandza vamakwerhu vo karhi ntsena. Ku fana na Yesu, i ntiyiso leswaku a hi nge swi koti ku va vanghana lavakulu va vamakwerhu hinkwavo. (Yoh. 13:23; 20:2) Kambe Petro u hi tsundzuxa leswaku hi fanele hi tikarhatela ‘ku rhandza’ vamakwerhu hikuva i xiphemu xa ndyangu wa hina.—1 Pet. 2:17.

11. Swi vula yini ku rhandza van’wana “hi mbilu hinkwayo”?

¹¹ Petro u hi khutaze leswaku hi ‘rhandzana hi mbilu hinkwayo.’ Eka mongo lowu, ku rhandza “hi mbilu hinkwayo” swi vula ku rhandza munhu hambiloko swi hi tikela ku n’wi rhandza. Hi xikombiso, a hi nge makwerhu u hi khunguvanyisile kumbe u hi twise ku vava hi ndlela yo karhi. Hi nga ha titwa hi lava ku rihisela ematshan’weni yo n’wi kombisa rirhandzu. Hambiswiritano, Petro u dyondze eka Yesu leswaku Xikwembu a xi tsaki loko hi rihisela. (Yoh. 18:​10, 11) Petro u tsale a ku: “Mi nga tlheriseli swo biha hi swo biha kumbe mi rhukana loyi a mi rhukanaka kambe tlheriselani hi ku n’wi katekisa.” (1 Pet. 3:9) Pfumelela rirhandzu ri ku endla u va ni musa ni ku anakanyela ni lava ku twiseke ku vava.

12. (a) Ku rhandza vanhu swinene swi ta endla leswaku hi lava ku endla yini? (b) Xana u tiyimisele ku endla yini hilaha swi kombisiweke ha kona eka vhidiyo leyi nge, Hlayisa Nyiko Ya Risima Ku Nga Vun’we?

¹² Eka papila rakwe ro sungula, Petro u tirhise xiga lexi nge “rhandzanani swinene.” Rirhandzu ro tano ri funengeta “swidyoho swo tala” ku nga ri swidyoho swi nga ri swingani. (1 Pet. 4:8) Kumbexana Petro u tsundzuke dyondzo leyi Yesu a n’wi dyondziseke yona mayelana ni ku rivalela. Hi nkarhi wolowo, kumbexana Petro a a tibyela leswaku u ni musa loko a vula leswaku a a ta rivalela makwavo “ka nkombo.” Kambe Yesu u dyondzise Petro ku katsa na hina leswaku hi rivalela “ka 77,” leswi vulaka leswaku hi rivalela mikarhi hinkwayo. (Mat. 18:​21, 22) Loko swi ku tikela ku tirhisa ndzayo leyi, u nga heli matimba! Malandza hinkwawo ya Yehovha mikarhi yin’wana swa ma tikela ku rivalela. Nchumu wa nkoka lowu u nga wu endlaka sweswi i ku endla leswi u nga swi kotaka leswaku u rivalela makwenu ni ku endla ku rhula na yena. c

13. I yini leswi nga endlaka swi tika leswaku vakulu va khathalela vamakwerhu?

¹³ A swi kanakanisi leswaku Petro a nga swi rivalanga leswi Yesu a n’wi byeleke swona  endzhaku ka loko a pfuxiwile, u te: “Risa swinyimpfana swa mina.” (Yoh. 21:16) Loko u ri nkulu, wa swi tiva leswaku xileriso lexi xa tirha ni le ka wena. Hambiswiritano, swi nga ha n’wi tikela nkulu ku kuma nkarhi wo endla xiavelo lexi xa nkoka. Vakulu va fanele va rhanga va tiyiseka leswaku mindyangu ya vona yi na leswi yi swi pfumalaka, yi titwa yi rhandziwa naswona yi ni vuxaka lebyinene na Yehovha. Nakambe va rhangela entirhweni wo chumayela ni ku tlhela va lunghiselela ni ku nyikela mimbulavulo etidyondzweni, etinhlengeletanweni ta muganga ni ta xifundzha. Vakulu van’wana i swirho swa Tikomiti to Vulavurisana ni Swibedlhele kasi van’wana va pfuneta eka Ndzawulo Yo Pulana Ni Ku Aka. Hakunene vakulu va ni swo tala swo swi endla!

14. I yini leswi nga khutazaka vakulu va risa ntlhambi? (1 Petro 5:​1-4)

¹⁴ Petro u byele vakulukulobye a ku: “Risani ntlhambi wa Xikwembu.” (Hlaya 1 Petro 5:​1-4.) Loko u ri nkulu, ha swi tiva leswaku wa va rhandza vamakwerhu naswona u lava ku va khathalela. Hambiswiritano, mikarhi yin’wana u nga twa u karhele ngopfu kumbe u taleriwe hi swilo lerova a wu swi koti ni ku endla xiavelo xa wena. Xana u nga endla yini? Byela Yehovha leswi ku vilerisaka. Petro u tsale a ku: “Loko un’wana a tirhela van’wana, a a tirhe a titshege hi matimba lama humaka eka Xikwembu.” (1 Pet. 4:11) Vamakwerhu va nga ha va va langutane ni swiphiqo leswi nga taka swi nga lulamiseki hi ku helela emisaveni leyi. Kambe tsundzuka leswaku Yesu Kreste loyi a nga “murisi lonkulu,” u ta va pfuna ku tlula ndlela leyi a wu ta va pfuna hayona. U ta va pfuna sweswi ni le misaveni leyintshwa. Xikwembu xi lava leswaku vakulu va rhandza vamakwerhu, va va khathalela ni ku va “swikombiso entlhambini.”

15. Nkulu un’wana u wu risa njhani ntlhambi? (Nakambe vona xifaniso.)

¹⁵ William loyi a nga ni malembe yo tala a ri nkulu wa swi twisisa leswaku hikwalahokayini swi ri swa nkoka ku khathalela vamakwerhu. Loko ku sungula ntungu wa COVID-19, yena ni vakulukulobye va rhangise mhaka ya ku fonela muhuweleri un’wana ni un’wana loyi a nga le ka ntlawa wa vona vhiki ni vhiki. U hlamusela xivangelo lexi endleke va endla sweswo, u ri: “Vamakwerhu vo tala a va pfaleleke emakaya va ri voxe naswona sweswo a swi ta endla va sungula ku heleriwa hi ntsako.” Loko makwerhu  a ri ni swiphiqo, William u n’wi yingisela hi vukheta leswaku a ta tiva leswi a swi lavaka. Kutani u lava swilo leswi nga pfunaka makwerhu, mikarhi yo tala u kuma tivhidiyo eka website ya hina leti nga n’wi khutazaka. U ri: “Ku khathalela vamakwerhu i swa nkoka swinene sweswi. Leswi hi endlaka matshalatshala lamakulu leswaku hi pfuna vanhu va dyondza hi Yehovha; hi fanele hi endla hilaha ku fanaka leswaku hi risa ntlhambi, hi pfuna tinyimpfu ta Yehovha ti nga hambuki entiyisweni.”

16. Hi nga swi tirhisa njhani leswi hi swi dyondzeke eka mapapila ya Petro?

¹⁶ Hi lo bula hi tidyondzo ti nga ri tingani leti hi ti kumaka eka mapapila mambirhi ya Petro. Kumbexana u swi xiyile leswaku ku ni laha u faneleke u antswisa kona. Hi xikombiso, xana u lava ku ya u anakanyisisa hi mikateko leyi hi nga ta yi kuma emisaveni leyintshwa? Xana u tiyimisele ku chumayela entirhweni, exikolweni kumbe kun’wana ni kun’wana hi xitshuketa? Xana ku ni tindlela leti u nga ti tirhisaka ku kombisa leswaku u va rhandza swinene vamakwerhu? Vakulu, xana mi tiyimiserile ku risa tinyimpfu ta Yehovha hi ku swi rhandza na hi ku tiyimisela? Loko wo tikambisisa kahle, u nga ha vona laha u faneleke u antswisa kona kambe u nga heli matimba. “Hosi yi ni musa” naswona yi ta ku pfuna leswaku u antswisa. (1 Pet. 2:3) Petro u hi tiyisekisa leswi: “Xikwembu . . . xi ta hetisa ku leteriwa ka n’wina. Xi ta mi tiyisa, xi mi nyika matimba, xi ta endla leswaku mi nga tsekatseki.”—1 Pet. 5:10.

17. Loko hi nga tshiki ku tirhela Yehovha ni ku n’wi pfumelela leswaku a hi letela, hi ta kuma vuyelo byihi?

¹⁷ Petro u tshame a titwa a nga faneleki ku va ekusuhi ni N’wana wa Xikwembu. (Luka 5:8) Kambe hi ku pfuniwa hi Yehovha na Yesu, Petro u landzele Yesu hi ku tshembeka. Kutani Petro u nyikiwe mpfumelelo wa “ku nghena eMfun’weni lowu nga ta va kona hilaha ku nga heriki wa Hosi tlhelo Muponisi wa hina Yesu Kreste.” (2 Pet. 1:11) Mawaku nkateko wonghasi! Loko u nga tshiki ku gandzela Yehovha ku fana na Petro ni ku pfumelela Yehovha a ku letela, na wena u ta kuma vutomi lebyi nga heriki. U ta ‘fikelela xikongomelo xa ripfumelo ra wena, ku nga ku ponisiwa ka wena.’—1 Pet. 1:9.