Loko hi ri karhi hi tilunghiselela ku dyondza, hi nga tivutisa leswi, ‘Xana ndzi langutele ku dyondza yini?’ Hambiswiritano, hi fanele hi tivonela leswaku hambiloko hi ehleketa leswaku hi ta dyondza hi swilo swo karhi, swi nga endleka ku ri ni swilo leswintshwa leswi Yehovha a lavaka hi swi dyondza. I yini leswi nga hi pfunaka hi vuyeriwa loko hi dyondza?

Khongelela ku kuma vutlhari. Kombela Yehovha a ku pfuna u twisisa leswi a lavaka u swi dyondza sweswi. (Yak. 1:5) U nga titshegi hi ku twisisa ka wena.—Swiv. 3:​5, 6.

Pfumelela matimba ya Bibele ma tirha evuton’wini bya wena. “Rito ra Xikwembu ra hanya.” (Hev. 4:12) Nkarhi ni nkarhi “Rito” ra Xikwembu leri hanyaka ri nga hi khumba hi tindlela to hambanahambana loko hi ri hlaya, kambe loko ntsena hi ri pfumelela leswaku ri hi vuyerisa loko hi ri hlaya.

U nga hlawuli swakudya leswi Yehovha a hi nyikaka swona swa le Bibeleni. Swakudya sweswo swi fana ni “nkhuvo wa swakudya swo nona.” (Esa. 25:6) Papalata ku nga swi dyi “swakudya” leswi u ehleketaka leswaku u nge swi rhandzi. U ta vuyeriwa ni ku tlhela u tsaka swinene hileswi Xikwembu xi hi nyikaka swona!