1-2. I yini leswi endlaka vagandzeri va Xikwembu va tsaka? (Yakobo 1:​22-25)

 YEHOVHA ni N’wana wakwe la n’wi rhandzaka va lava hi tsaka. Mutsari wa Pisalema 119:2 u ri: “Va tsaka lava yingisaka switsundzuxo swakwe lava n’wi lavaka hi mbilu hinkwayo.” Yesu u tlhele a hi tiyisekisa a ku: “Va tsaka lava twaka rito ra Xikwembu va tlhela va endla leswi ri swi vulaka!”—Luka 11:28.

² Hina vagandzeri va Yehovha hi tshama hi tsakile. Hikwalahokayini? Hi ni swivangelo swo tala kambe xa nkoka swinene hi leswaku hi hlaya Rito ra Xikwembu nkarhi na nkarhi hi tlhela hi tikarhatela ku tirhisa leswi hi swi dyondzaka.—Hlaya Yakobo 1:​22-25.

3. Hi vuyeriwa njhani loko hi tirhisa leswi hi swi dyondzaka eRitweni ra Xikwembu?

³ Ku ni tindlela to hlayanyana leti hi vuyeriwaka hatona loko hi “[va] vaendli va rito.” Ha swi tiva leswaku ku endla tano i ndlela yin’wana yo tsakisa Yehovha. Ku tiva swoleswo swi endla hi tsaka. (Ekl. 12:13) Loko hi tirhisa leswi hi swi dyondzaka eRitweni ra Xikwembu, hi antswisa vuxaka lebyi hi nga na byona ni swirho swa ndyangu ku katsa ni vamakwerhu. Swi nga ha endleka leswaku sweswo swi ve tano evuton’wini bya wena. Ku tlula kwalaho, hi papalata swiphiqo swo tala leswi vanhu lava nga yingisiki swileriso swa Yehovha swi va welaka. Hakunene hi pfumelelana ni leswi Hosi Davhida a swi vuleke. Loko eka risimu rakwe a boxe nawu, swileriso ni swiboho swa Yehovha, u gimete a ku: “Swa vuyerisa swinene ku swi yingisa.”—Ps. 19:​7-11.

4. Hikwalahokayini ku ri ntlhontlho ku va vaendli va Rito ra Xikwembu?

⁴ I ntiyiso leswaku a hi mikarhi hinkwayo swi olovaka ku va vaendli va Rito ra Xikwembu. Hambileswi hi tshamaka hi khomekile, hi fanele hi tivekela nkarhi wo hlaya ni ku dyondza Bibele leswaku hi kota ku twisisa leswi Yehovha a lavaka hi swi endla. Kutani a hi kambisiseni swiringanyeto swin’wana leswi  nga ta hi pfuna hi yi hlaya nkarhi ni nkarhi. Hi ta tlhela hi kambisisa leswi nga ta hi pfuna hi anakanyisisa hileswi hi swi dyondzaka ni ku vona tindlela leti hi nga swi tirhisaka hatona evuton’wini bya hina.

TIVEKELE NKARHI WO HLAYA RITO RA XIKWEMBU

5. I vutihlamuleri byihi lebyi endlaka hi tshama hi khomekile?

⁵ Vanhu va Yehovha vo tala va tshama va ri na swo tala swo swi endla. Hi heta nkarhi wo tala hi ri karhi hi endla mitirho yo hambanahambana ya nkoka. Hi xikombiso, vo tala va hina hi tirha mitirho yo tihanyisa leswaku hi tihlayisa swin’we ni mindyangu ya hina. (1 Tim. 5:8) Vakreste vo tala va khathalela maxaka ya vona lama vabyaka kumbe lama dyuhaleke. Hinkwerhu hi fanele hi khathalela rihanyo ra hina, leswi na swona swi lavaka nkarhi. Ku engetela eka vutihlamuleri lebyi, hi ni swiavelo evandlheni. Xa nkoka swinene hi tirha hi matimba entirhweni wo chumayela. Eka vutihlamuleri hinkwabyo lebyi u nga na byona, u nga wu kuma njhani nkarhi wo hlaya Bibele nkarhi na nkarhi, u anakanyisisa hileswi u swi dyondzaka ni ku tlhela u swi tirhisa?

6. U nga tiyiseka njhani leswaku u rhangisa ku hlaya Bibele evuton’wini bya wena? (Nakambe vona xifaniso.)

⁶ Eka hina Vakreste, ku hlaya Bibele i swin’wana swa “swilo leswi nga swa nkoka swinene” kutani hi fanele hi tiyiseka leswaku ha yi hlaya. (Filp. 1:10) Loko Bibele yi vulavula hi munhu la tsakeke, tindzimana to sungula ta Pisalema ti ri: “[U] rhandza nawu wa Yehovha, naswona [u] hlaya nawu Wakwe hi rito ra le hansi vusiku ni nhlikanhi.” (Ps. 1:​1, 2) Swi le rivaleni leswaku hi fanele hi tinyika nkarhi wo dyondza Bibele. Hi wihi nkarhi lowunene wo yi hlaya? Un’wana ni un’wana a nga ha tihlawulela nkarhi esikwini. Kambe xa nkoka swinene, a ku ve nkarhi lowu u nga ta yi hlaya masiku hinkwawo. Makwerhu la vuriwaka Victor u ri: “Ndzi rhandza ku hlaya Bibele nimixo. Hambileswi swi ndzi tikelaka ku pfuka nimixo, nkarhi lowu a wu na swikavanyeto  swo tala. Miehleketo ya mina yi va yi xalamukile naswona swa ndzi olovela ku twisisa.” Kumbexana swi tano ni le ka wena. Tivutise: ‘Hi wihi nkarhi lowunene eka mina wo va ndzi hlaya Bibele?’

ANAKANYISISA HILESWI U SWI HLAYAKA

7-8. I yini leswi nga hi sivelaka ku vuyeriwa swinene eka leswi hi swi hlayaka? Kombisa.

⁷ Kambe ntiyiso wa mhaka hi leswaku hi nga tshamela ku hlaya rungula ro tala handle ko anakanyisisa hi rona. Xana u tshame u hlaya swo karhi ivi endzhakunyana u nga ha swi tsundzuki leswi u swi hlayeke? Hinkwerhu swi tshame swi hi endlekela. Khombo ra kona, sweswo swi nga hi endlekela loko hi ri karhi hi hlaya Bibele. Kumbexana hi nga ha tiyimisela ku hlaya tindzima to karhi ta Bibele hi siku. Yoleyo i mhaka ya kahle. Hi fanele hi tiendlela xiyimiso ni ku tlhela hi xi namarhela. (1 Kor. 9:26) Hambiswiritano, ku hlaya Bibele ko va masungulo ntsena. Loko hi lava ku vuyeriwa swinene loko hi ri karhi hi yi hlaya, hi fanele hi endla swo tala.

⁸ Ehleketa hi xifaniso lexi: Swimilana swi lava mati ngopfungopfu ya mpfula leswaku swi kota ku hanya. Kambe loko mpfula yo na swinene hi nkarhinyana, misava yi nga ha tala mati. Loko sweswo swi endleka, mpfula yo tala a yi nge pfuni nchumu. Misava yi lava nkarhi leswaku yi kota ku tswonga mati ya mpfula leswaku swimilana swi kota ku kula kahle. Hilaha ku fanaka, hi fanele hi papalata ku hlaya Bibele hi ku tsutsuma lerova hi tsandzeka ku anakanyisisa, ku tsundzuka ni ku tirhisa leswi hi swi hlayeke.—Yak. 1:24.

9. Hi fanele hi endla yini loko hi ri ni mukhuva wo hlaya Bibele hi ku tsutsuma?

⁹ Xana nkarhi wun’wana u tshame u tikuma u ri karhi u hlaya Bibele hi ku tsutsuma? U fanele u endla yini? Hunguta rivilo. Tiyimisele ku anakanyisisa hileswi u swi hlayaka kumbe leswi wa ha ku hlayaka ha swona. Leswi a ku fanelanga ku va nchumu wo tika. U nga tiendlela xiboho xo heta nkarhi wo tala u ri karhi u dyondza leswaku u ta kota ku anakanyisisa. Hi hala tlhelo, u nga hlawula ku hlaya tindzimana ti nga ri tingani ivi u tirhisa nkarhi  lowu saleke ku anakanyisisa hileswi u swi hlayeke. Victor loyi hi buleke hi yena eku sunguleni u ri: “A ndzi yi hlayi nkarhi wo leha Bibele kumbexana ndzi hlaya ndzima yin’we. Leswi ndzi yi hlayaka nimixo, ndzi kota ku anakanyisisa hileswi ndzi swi hlayeke siku hinkwaro.” Swi nga ri na mhaka leswaku u tirhisa endlelo rihi, i swa nkoka ku yi hlaya hi ndlela leyi nga ta ku pfumelela leswaku u vuyeriwa swinene hileswi u swi hlayeke.—Ps. 119:97; vona bokisi leri nge, “ Swivutiso Swo Anakanyisisa Ha Swona.”

10. Kombisa ndlela leyi u nga swi tirhisaka hayona leswi u nga eku swi dyondzeni. (1 Vatesalonika 5:​17, 18)

¹⁰ Swi nga ri na mhaka leswaku u yi hlaya rini Bibele ni leswaku u heta nkarhi wo tanihi kwihi u ri karhi u yi hlaya, tiyiseka leswaku u lava tindlela to tirhisa leswi u swi hlayeke. Loko u ri karhi u hlaya xiyenge xo karhi xa Rito ra Xikwembu, tivutise, ‘Ndzi nga ri tirhisa njhani rungula leri sweswi kumbe enkarhini lowu taka?’ Hi xikombiso, a hi nge u hlaye 1 Vatesalonika 5:​17, 18. (Yi hlaye.) Endzhaku ko hlaya tindzimana toleto timbirhi, u nga yima kutani u tivutisa leswaku u khongela kangani niloko u endla tano hi mbilu hinkwayo. Nakambe u nga anakanyisisa hi swilo leswi u nga na swona naswona u swi tlangelaka. Kumbexana u tiyimisele ku khensa Yehovha hi swilo swinharhu leswi kongomeke. Hi timinete ti nga ri tingani leti u ti tirhiseke leswaku u anakanyisisa hi swilo swoleswo, hi ndlela yo karhi u ta va mutwi ni muendli wa Rito ra Xikwembu. Ehleketa ndlela leyi u nga ta vuyeriwa hayona loko siku ni siku u endla leswi fanaka loko u ri karhi u hlaya Bibele. U ta va mugandzeri lonene wa Yehovha. Kambe ku vuriwa yini loko swi vonaka onge ku ni swilo swo tala leswi u faneleke u tirhela eka swona?

TIVEKELE LESWI U LAVAKA KU SWI ENDLA

11. Hikwalahokayini mikarhi yin’wana u nga ha vonaka swi tika ku tirhisa leswi u swi hlayeke? Vula xikombiso.

¹¹ U nga ha vona swi tika ku hlaya Bibele ni ku lava tindlela to tirhisa leswi yi swi vulaka. Ehleketa hi xiyimo lexi, a hi nge namuntlha u hlaya tindzimana ta Bibele leti vulavulaka hi ku tivonela eka xihlawuhlawu. (Yak. 2:​1-8) Wa swi vona leswaku u fanele u cinca ndlela leyi u va khomaka hayona van’wana kutani u tiyimisela ku endla ku cinca ko karhi. Sweswo i swinene! Kutani mundzuku u hlaya hi tindzimana leti vulavulaka hi ndlela leyi swi nga swa nkoka hayona ku lawula mavulavulelo ya wena. (Yak. 3:​1-12) Wa swi xiya leswaku mikarhi yin’wana mavulavulelo ya wena a hi manene. Kutani u tiyimisela ku va ni mavulavulelo lamanene ni ku tlhela u aka van’wana. Hi siku leri landzelaka, tindzimana leti u ti hlayaka ti vulavula hi ku papalata ku va munghana wa misava. (Yak. 4:​4-12) U xiya leswaku u fanele  u byi hlawula kahle vuhungasi bya wena. Hi siku ra vumune, u nga ha vona onge leswi u faneleke u tirhela eka swona i tlakulavaxurhe.

12. Hikwalahokayini u nga fanelanga u hela matimba loko u xiya leswaku loko u ri karhi u hlaya Bibele ku ni swilo swo karhi leswi u faneleke u swi antswisa? (Nakambe vona nhlamuselo ya le hansi.)

¹² Loko u fanele u cinca swilo swo hlayanyana kumbe u tirhela eka swilo swo karhi, u nga wi mapa. Lebyi i vumbhoni bya leswaku u tiyimisele ku cinca. Munhu loyi a titsongahataka a tlhela a tshembeka u hlaya Matsalwa hi xikongomelo xo vona laha a faneleke a tirhela kona. a Tsundzuka leswaku ku ambala “vumunhu lebyintshwa” a hi nchumu lowu u wu endlaka kan’we swi helela kwalaho. (Kol. 3:10) I yini leswi nga ku pfunaka u ya emahlweni u va muendli wa Rito ra Xikwembu?

13. Hi yihi ndlela leyinene yo tirhisa leswi u swi dyondzeke? (Nakambe vona xifaniso.)

¹³ Ku ri ni ku ringeta ku tirhisa swilo hinkwaswo leswi u swi dyondzeke hi nkarhi wun’we, tivekele swilo swo hlayanyana leswi u lavaka ku swi fikelela. (Swiv. 11:2) Ringeta leswi: Tsala swilo leswi u lavaka ku tirhela eka swona kutani u hlawula xin’we kumbe swimbirhi eka swilo leswi u lavaka ku rhanga u tirhela eka swona, leswin’wana u ta swi endla endzhaku. Hi kwihi laha u faneleke u sungula kona?

14. Hi swihi leswi u tiyimiseleke ku sungula hi swona?

¹⁴ U nga tiendlela xiboho xo sungula hi nchumu lowu nga ta ku olovela ku wu endla. Kumbexana u nga hlawula ku tirhela eka nchumu lowu u vonaka onge u fanele u antswisa swinene eka wona. Loko u xiye laha u faneleke u tirhela kona, endla ndzavisiso eka mikandziyiso ya hina kumbexana hi ku  tirhisa Watch Tower Publications Index kumbe Nkongomiso Wo Endla Ndzavisiso. Khongelela leswi u lavaka ku swi endla, u kombela Yehovha a ku “nyika matimba yo navela ni ku endla swilo hinkwaswo leswi [a] swi lavaka.” (Filp. 2:13) Endzhaku ka sweswo u tirhisa leswi u swi dyondzeke. Loko u kote ku antswisa nchumu wo sungula lowu a wu tirhela eka wona, swi ta ku nyika matimba yo lava ku antswisa lowu landzelaka. Entiyisweni, loko u swi kotile ku va ni vumunhu byo karhi lebyi Vakreste va faneleke va va na byona, swi ta ku olovela ku antswisa ni le ka swin’wana.

PFUMELELA RITO RA XIKWEMBU RI ‘TIRHA EKA WENA’

15. Vanhu va Yehovha va hambane njhani ni vanhu vo tala lava hlayaka Bibele? (1 Vatesalonika 2:13)

¹⁵ Vanhu van’wana va vula leswaku va hlaye Bibele ko tala. Kambe xana hakunene va yi tshemba Bibele? Xana va swi tirhisile leswi va swi dyondzeke eka yona kumbe va yi pfumelela yi lawula vutomi bya vona? Hi ntolovelo a swi tano. Kambe vanhu va Yehovha a va endli tano! Ku fana ni Vakreste vo sungula, hi amukela Bibele “tanihi rito ra Xikwembu.” Ku tlula kwalaho, hi tiyimisela ku tirhisa hinkwaswo leswi Bibele yi swi vulaka evuton’wini bya hina.—Hlaya 1 Vatesalonika 2:13.

16. I yini leswi nga ta hi pfuna hi va vaendli va rito?

¹⁶ A hi mikarhi hinkwayo swi olovaka ku hlaya ni ku tirhisa leswi nga eRitweni ra Xikwembu. Swi nga hi tikela ku kuma nkarhi wo hlaya. Kumbe hi nga yi hlaya hi ku tsutsuma swinene ivi hi nga swi koti ku anakanyisisa hileswi hi swi hlayeke. Kumbe hi nga vona hi ri ni swilo swo tala leswi hi faneleke hi swi antswisa. Swi nga ri na mhaka leswaku u langutane ni tlhontlho wihi, u nga swi kota ku antswisa. U nga wu hlula hi ku pfuniwa hi Yehovha. Onge hi nga tiyimisela ku amukela ku pfuniwa hi yena naswona hi nga vi vatwi lava rivalaka kambe hi va vaendli va Rito. Handle ko kanakana, loko hi ya hi ri hlaya swinene Rito ra Xikwembu hi tlhela hi ri tirhisa evuton’wini bya hina, hi ta tsaka swinene.—Yak. 1:25.