1. Yesu u ta endla yini ku nga ri khale?

 HI HANYA enkarhini lowu ku nga ni ku cinca lokukulu! Ku nga ri khale, Yesu u ta avanyisa vanhu hinkwavo. Yesu u hlamusele leswi a swi ta endleka a nga si avanyisa vanhu hi ku byela vadyondzisiwa vakwe hi “xikombiso” xa ku vuya ka yena loku nga vonakiki ni ku “fika ka makumu.” (Mat. 24:3) Vuprofeta lebyi byi kumeka eka Matewu tindzima 24 na 25 ni le ka Marka ndzima 13 na Luka ndzima 21.

2. Hi ta bula hi yini naswona hikwalahokayini leswi swi ta hi pfuna?

² Yesu u vulavule hi swifaniso swinharhu leswaku a hi lemukisa. U vulavule hi xifaniso xa tinyimpfu ni timbuti, vanhwana vo tlhariha ni va swiphukuphuku ni xa titalenta. Xifaniso ha xin’we xi hi pfuna hi twisisa ndlela leyi mahanyelo ya munhu ma nga ta khumba ndlela leyi a nga ta avanyisiwa hayona. Loko hi ri karhi hi kambisisa swifaniso leswi, a hi voneni leswi hi swi dyondzaka ni ndlela leyi hi nga swi tirhisaka hayona. Xifaniso xo sungula lexi hi nga ta bula ha xona, i xa tinyimpfu ni timbuti.

TINYIMPFU NI TIMBUTI

3. Yesu u ta va avanyisa rini vanhu?

³ Eka xifaniso xa tinyimpfu ni timbuti, Yesu u hlamusele ku avanyisiwa ka vanhu lava kumeke nkarhi wo kombisa leswaku va yingisa mahungu lamanene ni ku tlhela va seketela vamakwavo va Yesu lava hlawuriweke. (Mat. 25:​31-46) Hi nkarhi wa “nhlomulo lowukulu,” u ta avanyisa vanhu loko Armagedoni yi ri ekusuhi ni ku sungula. (Mat. 24:21) Hilaha murisi a hambanisaka tinyimpfu eka timbuti, Yesu u ta hambanisa lava seketelaka valandzeri vakwe lava hlawuriweke hi ku tshembeka eka lava nga va seketeliki.

4. Hi ku ya hi Esaya 11:​3, 4, hikwalahokayini hi tiyiseka leswaku Yesu u ta avanyisa vanhu hi ndlela leyinene? (Nakambe vona xifaniso lexi nga eka .)

 ⁴ Vuprofeta bya Bibele byi kombisa leswaku Yesu loyi a nga Muavanyisi loyi a hlawuriweke hi Yehovha, u ta avanyisa hi ndlela yo lulama. (Hlaya Esaya 11:​3, 4.) U xiyisisa mahanyelo ya vanhu, mavulavulelo ni langutelo ra vona ku katsa ni ndlela leyi va va khomaka hayona vamakwavo vakwe lava hlawuriweke. (Mat. 12:​36, 37; 25:40) Yesu u ta va tiva lava seketeleke vamakwavo vakwe lava hlawuriweke ni ntirho wa vona. a Ndlela yin’wana leyi lava fanaka ni tinyimpfu va seketelaka vamakwavo va Kreste hayona i ku chumayela mahungu lamanene. Lava va seketelaka va ta avanyisiwa tanihi “lavo lulama” naswona va ta va ni ntshembo wo kuma “vutomi lebyi nga heriki” emisaveni. (Mat. 25:46; Nhlav. 7:​16, 17) Mawaku nkateko lowukulu lowu nga ta kumiwa hi lava tshamaka va tshembekile! Loko va tshama va tshembekile hi nkarhi wa nhlomulo lowukulu ni le ndzhaku ka wona, mavito ya vona a ma nge suriwi “ebukwini ya vutomi.”—Nhlav. 20:15.

5. Hi dyondza yini eka xifaniso xa tinyimpfu ni timbuti naswona xi vuyerisa vamani?

⁵ Tshama u tshembekile. Xifaniso xa Yesu xa tinyimpfu ni timbuti xi tirha ngopfu eka lava nga ni ntshembo wo hanya laha misaveni. Va kombisa leswaku va ni ripfumelo hi ku pfuna vamakwavo va Kreste entirhweni wo chumayela ni ku tlhela va yingisa nkongomiso wa ntlawa lowutsongo lowu hlawuriweke hi Yesu. (Mat. 24:45) Ni lava nga ni ntshembo wo hanya etilweni va fanele va yingisa xilemukiso lexi nga eka xifaniso xa tinyimpfu ni timbuti. Hikwalahokayini? Hikuva Yesu u xiyisisa mahanyelo, mavulavulelo ni leswi va swi ehleketaka. Na vona va fanele va tshama va tshembekile. Entiyisweni, Yesu u vulavule hi swifaniso swin’wana swimbirhi leswi lemukisaka vahlawuriwa hi ku kongoma. Nakambe swifaniso leswi swi kumeka eka Matewu ndzima 25. Sweswi, a hi buleni hi xifaniso xa vanhwana vo tlhariha ni va swiphukuphuku.

VANHWANA VO TLHARIHA NI VA SWIPHUKUPHUKU

6. Vanhwana va ntlhanu va swi kombise njhani leswaku va tlharihile? (Matewu 25:​6-10)

⁶ Eka xifaniso xa vanhwana, Yesu u vulavule hi vanhwana va khume lava humeke ku ya hlanganisa muteki. (Mat. 25:​1-4) Hinkwavo a va lava ku heleketa muteki emucatweni wakwe. Yesu u vule leswaku ntlhanu wa vona a va “tlharihile” kasi lavan’wana va ntlhanu a va ri “swiphukuphuku.” Lavo tlhariha a va lunghekile va tlhela va xalamuka. A va lunghekele ku rindzela muteki hambi ko endleka yini hambiloko o fika nivusiku swinene. Xisweswo va te ni timboni leswaku ti ta va voningela nivusiku. Va tlhele va ta ni mafurha lama engetelekeke lawa a va ta ma tirhisa loko muteki o hlwela ku fika. A va lunghekile leswaku timboni ta vona ti tshama ti ri karhi ti pfurha. (Hlaya Matewu 25:​6-10.) Loko muteki a fika, vanhwana vo tlhariha va fambe na yena emucatweni. Hilaha ku fanaka, Vakreste lava hlawuriweke lava kombiseke leswaku va lunghekile hi ku tshama va xalamukile ni ku tshembeka ku fikela loko Kreste a fika, va ta joyina Muteki ku nga Yesu, eMfun’weni wakwe wa le tilweni. b (Nhlav. 7:​1-3) Ku vuriwa yini hi vanhwana va ntlhanu va swiphukuphuku?

7. Ku endleke yini hi vanhwana va ntlhanu va swiphukuphuku naswona hikwalahokayini?

 ⁷ Ku hambana ni vanhwana vo tlhariha, lava ntlhanu va swiphukuphuku a va nga lunghekanga loko muteki a fika. Timboni ta vona a ti lava ku tima naswona a va nga tanga ni mafurha lama engetelekeke. Loko va twa leswaku muteki u le kusuhi ni ku fika, hi kona a va lava ku ya ma xava. Loko muteki a fika a va nga si vuya. Hi nkarhi wolowo, “vanhwana lava a va lunghekile va nghena na yena emucatweni, hiloko nyangwa yi pfariwa.” (Mat. 25:10) Loko vanhwana va swiphukuphuku va vuya naswona va lava ku nghena, muteki u va byele a ku: “A ndzi mi tivi.” (Mat. 25:​11, 12) Vanhwana lava a va nga swi lunghekelanga ku rindzela muteki nkarhi wo leha. I yini leswi vahlawuriwa va swi dyondzaka?

8-9. Vahlawuriwa va dyondza yini eka xifaniso xa vanhwana? (Nakambe vona xifaniso.)

⁸ Lungheka u tlhela u xalamuka. Yesu a a nga vuli swona leswaku ku ta va ni mitlawa yimbirhi ya vahlawuriwa, wun’we ku nga lowu a wu lunghekele ku rindza kukondza misava leyi yi lovisiwa ni lowu a wu ta va wu nga lunghekanga. Ku ri na sweswo, a a hlamusela leswi a swi ta endleka eka vahlawuriwa loko vo ka va nga swi lunghekeli ku tiyisela ku ya fikela emakumu. Loko swo va tano, a va nge yi kumi hakelo ya vona. (Yoh. 14:​3, 4) Mhaka leyi a hi ku tlanga matshopetana! Hambi hi ni ntshembo wo hanya emisaveni kumbe etilweni, hinkwerhu hi fanele hi xi tekela enhlokweni xilemukiso xa xifaniso xa vanhwana. Hinkwerhu hi fanele hi tshama hi rindzile ni ku lunghekela ku tiyisela ku ya fika emakumu.—Mat. 24:13.

⁹ Endzhaku ko vulavula hi xifaniso xa vanhwana ku hlamusela ndlela leyi swi nga swa nkoka hayona ku tshama hi lunghekile ni ku xalamuka, Yesu u vulavule hi xifaniso xa titalenta. Xifaniso xexo xi kombisa ndlela leyi swi nga swa nkoka hayona ku gingiriteka.

TITALENTA

10. Malandza mambirhi ma swi kombise njhani leswaku ma tshembekile? (Matewu 25:​19-23)

¹⁰ Eka xifaniso xa titalenta, Yesu u vulavule hi malandza mambirhi lawa a ma tshembekile  eka n’wini wa wona ni nandza wun’we loyi a a nga tshembekanga. (Mat. 25:​14-18) Malandza mambirhi ma kombise leswaku ma tshembekile hi ku tirha hi matimba leswaku ma bindzula hi titalenta ta n’wini wa wona. Loko n’wini wa wona a nga si endzela etikweni ra le kule, u ma siye ni titalenta, ku nga mali yo tala swinene. Malandza mambirhi yo tshembeka a ma gingiriteka naswona ma yi tirhise kahle mali yoleyo. Ku endleke yini? Loko n’wini wa wona a vuya, u kume leswaku titalenta leti a a ti siye na wona se a ti phindhiwe kambirhi. N’wini wa wona u ma bumabumerile, hiloko ma “tsaka ni n’wini wa [wona].” (Hlaya Matewu 25:​19-23.) Ku endleke yini hi nandza wa vunharhu? Xana u endle yini hi mali ya n’wini wakwe?

11. Ku endleke yini hi nandza loyi a a ‘loloha’ naswona hikwalahokayini?

¹¹ Nandza wa vunharhu u nyikiwe talenta yin’we kambe a a ‘loloha.’ N’wini wakwe a a langutele leswaku a yi tirhisa kahle talenta yoleyo. Ku ri na sweswo, u yi celerile. A nga n’wi nyikanga nchumu n’wini wakwe loko a vuya. Nandza loyi a a delela. Ematshan’weni yo tisola hileswi a nga bindzulangiki hi talenta ya n’wini wakwe, u vule leswaku n’wini wakwe i “munhu loyi a karhataka.” Nandza loyi a nga amukeriwanga hi n’wini wakwe. Ku engetela kwalaho, u tekeriwe talenta leyi a a nyikiwe yona a tlhela a hlongoriwa ekaya ra n’wini wakwe.—Mat. 25:​24, 26-30.

12. Malandza mambirhi yo tshembeka ma yimela vamani namuntlha?

¹² Malandza mambirhi yo tshembeka ma yimela Vakreste vo tshembeka lava hlawuriweke. N’wini wa vona Yesu, u va rhamba leswaku va ‘tsaka na yena.’ Va kuma hakela ya vona ya le tilweni ku nga ku pfuxiwa ko sungula. (Mat. 25:​21, 23; Nhlav. 20:5b) Hi hala tlhelo, xikombiso xo biha xa nandza wo loloha i xilemukiso eka vahlawuriwa. Hi ndlela yihi?

13-14. Vahlawuriwa va dyondza yini eka xifaniso xa titalenta? (Nakambe vona xifaniso.)

¹³ Gingiriteka u tlhela u tiyimisela. Loko Yesu a hlamusela xifaniso xa titalenta hilaha a endleke hakona eka xa vanhwana, a a nga vuli swona leswaku vahlawuriwa a va ta va malolo.  Ku ri na sweswo, a a hlamusela leswi a swi ta endleka loko vo tshika ku hiseka. A va ta tsandzeka ku “tshama [va] ri exikarhi ka lava Xikwembu xi va vitaneke ni ku va hlawula” naswona a va nga ta pfumeleriwa ku nghena eMfun’weni wa le tilweni.—2 Pet. 1:10.

¹⁴ Eka xifaniso lexi Yesu a vulavuleke ha xona xa vanhwana ni xa titalenta, u swi veka erivaleni leswaku Vakreste hinkwavo lava hlawuriweke a va fanele va lungheka ni ku tirha hi matimba, va gingiriteka naswona va tiyimisela. Kambe xana Yesu u vule swin’wana leswi nga xilemukiso eka vahlawuriwa? Ina! Marito ya Yesu lama nga eka Matewu 24:​40, 41 ma fambisana ni ndlela leyi vahlawuriwa a va ta avanyisiwa ro hetelela hayona.

I VAMANI LAVA NGA TA “TEKIWA”?

15-16. Xana Matewu 24:​40, 41 yi va pfuna njhani vahlawuriwa leswaku va swi teka swi ri swa nkoka ku tshama va rindzile?

¹⁵ Loko a nga si hlamusela swifaniso swinharhu, Yesu u rhange a vulavula hi vuavanyisi byo hetelela lebyi a byi ta kombisa leswaku i vahlawuriwa vahi lava Xikwembu xi va amukelaka. U vulavule hi vavanuna vambirhi lava a va tirha emasin’wini ni vavasati vambirhi lava a va tirha ku sila. Eka mitlawa leyimbirhi, swi vonaka onge hinkwavo va endla ntirho lowu fanaka kambe Yesu u vule leswaku un’we a a ta “tekiwa kasi un’wanyana u ta siyiwa.” (Hlaya Matewu 24:​40, 41.) Kutani u lemukise valandzeri vakwe a ku: “Tshamani mi rindzile, hikuva a mi ri tivi siku leri Hosi ya n’wina yi nga ta ta ha rona.” (Mat. 24:42) Yesu u vule leswi fanaka endzhaku ko hlamusela xifaniso xa vanhwana. (Mat. 25:13) Xana swilemukiso leswi swa fambisana? Swi vonaka tano. Ku ta “tekiwa” ntsena vahlawuriwa vo tshembeka naswona va ta amukeriwa hi Yesu eMfun’weni wa le tilweni.—Yoh. 14:3.

¹⁶ Tshama u rindzile. Muhlawuriwa la nga tshamiki a rindzile a nge katseki loko ku hlengeletiwa “vahlawuriwa.” (Mat. 24:31) Vanhu va Xikwembu hinkwavo ku nga khathariseki ntshembo lowu va nga na wona, va fanele va teka marito ya Yesu tanihi xilemukiso leswaku va tshama va rindzile ni ku tshembeka mikarhi hinkwayo.

17. Hikwalahokayini hi nga fanelanga hi vilela loko Yehovha a hlawula van’wana hi moya wakwe wo kwetsima?

¹⁷ Hi n’wi tiva kahle Yehovha naswona hi tshemba ndlela leyi a avanyisaka hayona. A swi hi vilerisi leswi emalembeni ya sweswinyana Yehovha a hlawuleke vanhu vo karhi vo tshembeka leswaku va va vahlawuriwa. c Hi tsundzuka leswi Yesu a swi vuleke hi vatirhi lava sunguleke ku tirha kwalomu ka awara ya 11 eka xifaniso xa yena xa nsimu ya madiriva. (Mat. 20:​1-16) Lava vitaniweke ku tirha ensin’wini ya madiriva loko dyambu ri ya eku peleni, va kume muholo lowu fanaka ni lava sunguleke ku tirha nimixo. Hilaha ku fanaka, vahlawuriwa va ta kuma hakelo ya ku hanya etilweni loko va tshama va tshembekile, swi nga ri na mhaka leswaku va hlawuriwe rini.

YINGISA SWILEMUKISO

18-19. Hi bule hi tidyondzo ni swilemukiso swihi?

¹⁸ Xana hi bule hi yini? Xifaniso xa tinyimpfu ni timbuti xi kombisa ndlela leyi swi nga swa nkoka hayona eka lava nga ni ntshembo wo hanya hilaha ku nga heriki emisaveni, ku tshama va tshembekile eka Yehovha sweswi ni hi nkarhi wa nhlomulo lowukulu lowu taka. Loko nkarhi wolowo wu fika, Yesu u ta avanyisa lava tshembekeke tanihi lava faneriwaka hi ku kuma “vutomi lebyi nga heriki.”—Mat. 25:46.

 ¹⁹ Hi tlhele hi bula hi swifaniso swimbirhi leswi nga xilemukiso eka vahlawuriwa. Eka xifaniso xa Yesu xa vanhwana vo tlhariha ni va swiphukuphuku, va ntlhanu va kombise leswaku va tlharihile. A va lunghekile ni ku xalamuka, va rindzela muteki swi nga ri na mhaka leswaku u teka nkarhi wo leha ku fikela kwihi ku fika. Kambe vanhwana va swiphukuphuku a va nga lunghekanga. Muteki a nga va pfumelelanga leswaku va va kona enkhubyeni wakwe wa vukati. Na hina hi fanele hi lunghekela ku rindza swi nga khathariseki leswaku swi teka nkarhi wo tanihi kwihi ku va Yesu a tisa makumu ya misava leyi. Nakambe eka xifaniso xa Yesu xa titalenta, hi bule hi malandza mambirhi yo tshembeka lawa a ma gingiriteka ni ku tlhela ma tiyimisela. Ma tirhele n’wini wa wona hi matimba naswona u ma amukerile. Hambiswiritano, nandza wa lolo a nga amukeriwanga. Hi dyondza yini? Hi fanele hi tshama hi khomekile entirhweni wa Yehovha ku ya fikela emakumu. Xo hetelela, hi bule hi ndlela leyi vahlawuriwa va faneleke va tshama va rindzile leswaku va ta “tekiwa” hi Yesu leswaku va kuma hakelo ya vona ya le tilweni. Vahlawuriwa volavo va swi langutele emahlweni ku “hlengeletiwa” va va swin’we na Yesu etilweni. Endzhaku ka nyimpi ya Armagedoni, va ta va na Yesu tanihi mutekiwa wakwe emucatweni wa Xinyimpfana.—2 Tes. 2:1; Nhlav. 19:9.

20. Yehovha u ta va endlela yini lava yingisaka swilemukiso swakwe?

²⁰ Hambileswi nkarhi wo avanyisiwa wu tshinelaka hi ku hatlisa, a hi na xona xivangelo xo chava. Loko hi tshama hi tshembekile, Tata wa hina wa le tilweni la nga ni rirhandzu u ta hi nyika “matimba lama tlulaka lama tolovelekeke” leswaku hi ta “kota . . . ku yima emahlweni ka N’wana wa munhu.” (2 Kor. 4:7; Luka 21:36) Hi ta tsakisa Tata wa hina loko hi yingisa swilemukiso leswi nga eka swifaniso swa Yesu hambi hi ni ntshembo wo hanya etilweni kumbe emisaveni. Mavito ya hina ma ta “tsariw[a] ebukwini ya Xikwembu” ya vutomi hikwalaho ka musa lowukulu wa Xikwembu.—Dan. 12:1; Nhlav. 3:5.