Tihosi Leti Lwisanaka eNkarhini Wa Makumu
Vuprofeta lebyi ku vulavuriwaka ha byona eka chati leyi byi endleke hi nkarhi wun’we. Byi swi kombisa hi tindlela to tala leswaku hi hanya “enkarhini wa makumu.”—Dan. 12:4.
(Ma)Tsalwa Nhlav. 11:7; 12:13, 17; 13:1-8, 12
Vuprofeta “Xivandzana” xi fume emisaveni ku ringana madzana yo tala ya malembe. Enkarhini wa makumu, nhloko ya xona ya vunkombo yi vavisiwile. Hi ku famba ka nkarhi yi horile kutani “misava hinkwayo” yi landzela xivandzana. Sathana u tirhisa xivandzana xolexo ku “lwa nyimpi ni lava saleke.”
Ku hetiseka Endzhaku ka Ndhambi ku tumbuluke mifumo ya vanhu leyi a yi lwisana na Yehovha. Endzhaku ka madzana yo tala ya malembe, hi nkarhi wa Nyimpi yo Sungula ya Misava, Mfumo wa Britain wu hele matimba swinene. Wu tlhele wu kuma matimba loko wu hlangana ni tiko ra United States. Ngopfungopfu enkarhini lowu wa makumu, Sathana u tirhisa mifumo ya tipolitiki leswaku a xanisa vanhu va Xikwembu.
(Ma)Tsalwa Dan. 11:25-45
Vuprofeta Hosi ya le n’walungwini ni hosi ya le dzongeni ti lwela ku fuma enkarhini wa makumu
Ku hetiseka Tiko ra Jarimani ri lwa ni Mfumo wa Manghezi ni Maamerika. Hi 1945 Soviet Union ni matiko lawa a ma tirhisana na yona ma va hosi ya le n’walungwini. Hi 1991, mfumo wa Soviet Union wu wa kutani hi ku famba ka nkarhi Rhaxiya ni matiko lama tirhisanaka na yona ma va hosi ya le n’walungwini.
(Ma)Tsalwa Esa. 61:1; Mal. 3:1; Luka 4:18
Vuprofeta Yehovha a rhumela “murhumiwa” wakwe leswaku a “basisa ndlela” Mfumo wa Mesiya wu nga si simekiwa. Ntlawa lowu wu sungule ku “vula mahungu lamanene eka lavo rhula.”
Ku hetiseka Ku sukela hi 1870, C. T. Russell ni vanghana vakwe va we va pfuka leswaku va hlamusela ntiyiso lowu Bibele yi wu dyondzisaka. Hi va-1880, va sungule ku vula leswaku malandza ya Xikwembu ma fanele ma chumayela. Va kandziyise tinhlokomhaka to tanihi leyi nge “Ku Laveka Vachumayeri va 1 000” ni leyi nge “Ku Toteriwa Ku Chumayela.”
(Ma)Tsalwa Mat. 13:24-30, 36-43
Vuprofeta Nala a haxa mfava ensin’wini leyi ku byariweke koroni kutani mfava wu pfumeleriwa ku kula wu tlula koroni kukondza ku fika nkarhi wa ntshovelo; kutani mfava wu hambanisiwa ni koroni.
Ku hetiseka Ku sukela eku heleni ka va-1800, Vakreste va ntiyiso va sungule ku hambanisiwa eka Vakreste va mavunwa. Enkarhini wa makumu, Vakreste va ntiyiso va hlengeletiwa kutani va hambanisiwa ni Vakreste va mavunwa.
(Ma)Tsalwa Dan. 2:31-33, 41-43
Vuprofeta Mikondzo ya nsimbi ni vumba i ya xifaniso lexi endliweke hi mintsopfu yo hambanahambana.
Ku hetiseka Vumba byi fanekisela vanhu lava fumiwaka hi Mfumo wa Misava wa Manghezi ni Maamerika lava pfukelaka mfumo wolowo. Vanhu lava va endla leswaku mfumo lowu wa misava wu nga swi koti ku ma tirhisa hi ku helela matimba ya wona lama fanaka ni nsimbi.
(Ma)Tsalwa Mat. 13:30; 24:14, 45; 28:19, 20
Vuprofeta “Koroni” yi hlengeletiwa “exitlatini” naswona “hlonga ro tshembeka ni ro tlhariha” ri vekiwile ehenhla ka “va yindlu.” “Mahungu lamanene . . . ya mfumo” ma sungule ku chumayeriwa “emisaveni hinkwayo leyi akiweke.”
Ku hetiseka Hi 1919 hlonga ro tshembeka ri vekiwile ehenhla ka vanhu va Xikwembu. Ku sukela hi nkarhi wolowo ku ya emahlweni, Swichudeni swa Bibele swi ye swi chumayela swinene. Namuntlha, Timbhoni ta Yehovha ti chumayela ematikweni yo tlula 200 naswona ti kandziyisa mikandziyiso leyi sekeriweke eBibeleni hi tindzimi to tlula 1 000.
(Ma)Tsalwa Dan. 12:11; Nhlav. 13:11, 14, 15
Vuprofeta Xivandzana xa timhondzo timbirhi xi rhangela eku endliweni ka “xifaniso xa xivandzana” kutani xi nghenisa “ku hefemula exifanisweni.”
Ku hetiseka Mfumo wa Misava wa Manghezi ni Maamerika wu rhangela eku simekiweni ka Ntwanano wa Matiko. Nhlangano lowu wu seketeriwe hi matiko man’wana. Eku heteleleni, hosi ya le n’walungwini na yona yi joyine Ntwanano wa Matiko, ku sukela hi 1926 ku ya eka 1933 ntsena. A ku tshembiwa leswaku Ntwanano wa Matiko wu ta tisa ku rhula emisaveni, hilaha va tshembaka Nhlangano wa Matiko hakona, ku nga swilo leswi swi nga endliwaka hi Mfumo wa Xikwembu ntsena.
(Ma)Tsalwa Dan. 8:23, 24
Vuprofeta Hosi leyi nga ni nghohe ya tihanyi yi vanga “ku onhaka hi ndlela yo hlamarisa.”
Ku hetiseka Mfumo wa Misava wa Manghezi ni Maamerika wu vange ku onhaka lokukulu. Hi xikombiso, hi nkarhi wa Nyimpi ya Vumbirhi ya Misava, tiko ra United States ri vange ku onhaka lokukulu swinene loko ri lahlela tibomo timbirhi ta athomo etikweni leri a ri ri nala wa mfumo wolowo.
(Ma)Tsalwa Dan. 11:31; Nhlav. 17:3, 7-11
Vuprofeta Xivandzana “xa muvala wa ribungu” lexi nga ni timhondzo ta khume xi huma ekheleni ro enta naswona i hosi ya vunhungu. Buku ya Daniyele yi vula leswaku hosi leyi i “nchumu lowu nyenyetsaka lowu onhetelaka.”
Ku hetiseka Ntwanano wa Matiko wu hela hi xitshuketa hi nkarhi wa Nyimpi ya Vumbirhi ya Misava. Endzhaku ka nyimpi, Nhlangano wa Matiko wa ‘vekiwa.’ Ku fana ni Ntwanano wa Matiko, a ku tshembiwa leswaku Nhlangano wa Matiko wu ta tisa ku rhula emisaveni, ku nga swilo leswi swi nga endliwaka hi Mfumo wa Xikwembu ntsena. Nhlangano wa Matiko wu ta hlasela vukhongeri.
(Ma)Tsalwa 1 Tes. 5:3; Nhlav. 17:16
Vuprofeta Matiko ma endla xitiviso xa “ku rhula ni nsirhelelo” naswona “timhondzo ta khume” ni “xivandzana” swi hlasela “nghwavava” swi yi hlakata. Endzhaku ka sweswo, matiko ma lovisiwa.
Ku hetiseka Matiko ma ta vula leswaku ma tise ku rhula ni nsirhelelo. Endzhaku ka sweswo, matiko lama seketelaka Nhlangano wa Matiko ma ta lovisa mihlangano ya vukhongeri bya mavunwa. Wolawo ku ta va ku ri masungulo ya nhlomulo lowukulu. Nhlomulo wolowo wu ta gimeta hi ku lovisiwa ka mafambiselo hinkwawo ya misava eArmagedoni.
(Ma)Tsalwa Ezek. 38:11, 14-17; Mat. 24:31
Vuprofeta Gogo a hlasela tiko ra vanhu va Xikwembu. Kutani tintsumi ti hlengeleta “vahlawuriwa.”
Ku hetiseka Hosi ya le n’walungwini ni mifumo leyin’wana ya misava va ta hlasela vanhu va Xikwembu. Endzhaku ka loko ku sungule nhlaselo wolowo, masalela ya vatotiwa ma ta hlengeleteriwa etilweni.
(Ma)Tsalwa Ezek. 38:18-23; Dan. 2:34, 35, 44, 45; Nhlav. 6:2; 16:14, 16; 17:14; 19:20
Vuprofeta ‘Loyi a a tshame ehenhla’ ka “hanci yo basa” a hetisa “ku hlula ka yena” hi ku lovisa Gogo ni vuthu rakwe. “Xivandzana” xi “lahleriwa etiveni ra ndzilo” ni xifaniso lexikulu xi lovisiwa.
Ku hetiseka Yesu, Hosi leyi fumaka ya Mfumo wa Xikwembu, a kutsula vanhu va Xikwembu. Yena swin’we ni lava nga ta fuma na yena va 144 000 ni tintsumi, va ta lovisa matiko lama hlanganeke, ku nga mifumo ya tipolitiki ya misava ya Sathana.
