HINKWERHU ha pfumela leswaku Yehovha u kongomisa ni ku pfuna vanhu va yena leswaku va tshama va ri ni vuxaka na yena “emasikwini [lawa] yo hetelela.” (2 Tim. 3:1) Kambe swi titshenge hi ndlela leyi hi angulaka hayona. Xiyimo xa hina hi nga xi fanisa ni xa Vaisrayele loko va ri emananga. A va fanele va teka goza loko ku yimbiwa mhalamhala.

Yehovha u byele Muxe leswaku a endla timhalamhala timbirhi ta silivhere hi hamula ti ta va ta ku “hlengeleta ntshungu ni ku hahlula mixaxa.” (Tinhl. 10:2) Vaprista a va fanele va yimba timhalamhala hi ndlela leyi hambaneke leswaku vanhu va ta tiva leswi a swi laveka hi nkarhi wolowo. (Tinhl. 10:3-8) Namuntlha, vanhu va Xikwembu va kuma nkongomiso hi tindlela to hlayanyana. Xiya tindlela tinharhu leti ti hi tsundzuxaka ndlela leyi mhalamhala a yi yimbiwa hayona khale. Namuntlha vanhu va Xikwembu va rhambiwa leswaku va ta etinhlengeletanweni letikulu, valanguteri va leteriwa naswona ndlela leyi swilo swi fambaka hayona emavandlheni hinkwawo ya antswisiwa.

Loko Yehovha a lava leswaku “ntshungu hinkwawo” wu ya hlengeletana enyangweni lowu nga evuxeni bya tabernakela, vaprista a va yimba timhalamhala hatimbirhi. (Tinhl. 10:3) Tinyimba hinkwato, leti a ti tshama ekusuhi ni tabernakela a titwa mpfumawulo wolowo wo hlawuleka. Lava a va tshama ekusuhi a va fika hi ku hatlisa. Lava a va tshama ekule a swi va tekela nkarhi ku fika naswona a swi ta lava va endla matshalatshala swinene. Swi nga ri na mhaka leswaku va tshama kwihi, Yehovha a lava va hlengeletana hinkwavo leswaku va ta vuyeriwa.

Namuntlha, a hi hlengeletani etabernakeleni kambe ha tivisiwa laha vanhu va Xikwembu va nga ta hlengeletana kona. Leswi swi katsa tinhlengeletano ta swifundzha ni swiendlakalo swin’wana swo hlawuleka, laha hi byeriwaka rungula ra nkoka ni ku nyikiwa nkongomiso. Emisaveni hinkwayo vanhu va Yehovha va kuma rungula ni nkongomiso lowu fanaka. Hinkwavo lava vaka kona etinhlengeletanweni teto va tiphina hi ntsako. Van’wana va suka ekule kasi van’wana va suka ekusuhi. Lava amukelaka xirhambo lexi, va vuyeriwa swinene.

Ku vuriwa yini hi mitlawa leyi nga ekule swinene? Thekinoloji yi endla leswaku vamakwerhu lava nga ekule na vona va kota ku vuyeriwa eka tinhlengeletano teto. Hi xikombiso, loko muyimeri wa ntsindza wa misava hinkwayo a endzele rhavi ra Benini,  rhavi rero ri hlele leswaku nongonoko wu haxiwa ni le dorobeni leri nga ni timayini eSahara Desert le Arlit, eNiger. Vamakwerhu vo ringana 21 ni van’wana lava tsakelaka a va hlengeletanile. Hambileswi a va ri ekule, va titwe va ri ekusuhi ni vamakwerhu lava a va hlengeletanile va 44 131. Makwerhu un’wana u tsale a ku: “Hi ba mandla hi vuyelela leswi mi endleke hi kota ku va xiphemu xa nongonoko lowu. Hi kote ku yi vona kahle ndlela leyi mi hi rhandzaka hayona.”

Loko vaprista va le Israyele va yimba mhalamhala kan’we, “tindhuna tanihi varhangeri va vanhu van’wana ni van’wana va magidi,” hi vona ntsena lava a va fanele va ya hlengeletana entsongeni wa nhlangano. (Tinhl. 10:4) Loko va fika Muxe a va letela ni ku va nyika rungula lerintshwa. Sweswo a swi endla va kota ku hetisisa vutihlamuleri lebyi va nyikiweke byona eka tinyimba leti a va ti rhangela. Loko a wu ri un’wana wa tindhuna teto, xana wu nga ta endla matshalatshala yo va kona leswaku u ta vuyeriwa?

Namuntlha, vakulu a hi “tindhuna” naswona a va wu tikiseli ntlhambi wa Xikwembu lowu va wu khathalelaka. (1 Pet. 5:1-3) Kambe va wa va pfuka leswaku va khathalela ntlhambi lowu va wu risaka. Hikwalaho, loko va rhambiwa eXikolweni xa Vutirheli bya Mfumo leswaku va ya leteriwa, va endla matshalatshala yo va kona. Exikolweni xexo, vakulu va dyondzisiwa ndlela yo khathalela vandlha hi ndlela leyinene. Leswi swi endla leswaku vandlha ri va ni vuxaka lebyinene na Yehovha. Hambiloko u nga si tshama u ya exikolweni lexi, a swi kanakanisi leswaku wa vuyeriwa eka lava va yeke eka xona.

Vaprista va le Israyele mikarhi yin’wana a va yimba mhalamhala yi humesa mipfumawulo leyi nga ringaniki. Leswi a a swi kombisa leswaku Yehovha u lava mixaxa hinkwayo yi suka. (Tinhl. 10:5, 6) Nxaxa a wu fanele wu rhurhisiwa hi ndlela leyi hlelekeke naswona a swi lava leswaku hinkwavo va endla matshalatshala. Swi nga endleka van’wana a va ri ni vonelo leri hambaneke emhakeni yoleyo. Hikwalahokayini?

Swi nga endleka a va vona onge a va tshamela ku tivisiwa hi ta ku rhurha kumbe xitiviso xexo a xo va juma. “Minkarhi yin’wana papa a ri tshama ku sukela nimadyambu kukondza ku va nimixo.” Mikarhi yin’wana “a ri tshama masiku mambirhi kumbe n’hweti kumbe masiku yo tala.” (Tinhl. 9:21, 22) Xana mixaxa yi rhurhisiwe kangani? Tinhlayo ndzima 33, yi boxa tindhawu ta kwalomu ka 40 leti Vaisrayele va dzimeke mixaxa ya vona eka tona.

Mikarhi yin’wana, van’wana a va ndzima mixaxa ya vona laha ku nga ni ndzhuti. A swi tsakisa ku ndzima mixaxa endhawini yo tano emananga “lama chavisaka swinene.” (Det. 1:19) A swi va tikela Vaisrayele ku suka endhawini yo tana hi ku chava leswaku swi nga endleka va nga ha yi kumi yo fana na yona.

Loko tinyimba teto ti sungula ku rhurha, leti saleke a swi ti tikela ku rindza. Hinkwato a ti va ti yi twile mpfumawulo lowu nga ringaniki wa mhalamhala kambe a ti nga ta swi kota ku suka hi nkarhi wun’we. Mpfumawulo wolowo a wu kombisa leswaku tinyimba leti dzimeke mixaxa ya tona hi tlhelo ra le vuxeni, ku nga nyimba ya Yuda, Isakara na Zebuloni, ti fanele ti famba. (Tinhl. 2:3-7; 10:5, 6) Loko se ti fambile, vaprista a va yimba mhalamhala ra vumbirhi, ku kombisa leswaku tinyimba tinharhu leti dzimeke mixaxa ya tona edzongeni ti fanele ti famba. Vaprista a va endla tano ku kondza tinyimba hinkwato ti helela.

Swi nga endleka leswaku na wena a swi ku tikela ku amukela ku cinca ko karhi loku nhlangano wu ku endleke. Kumbexana a wu tibyela leswaku ku cinca ka kona a ku heli. Kumbexana a wu yi rhandza swinene ndlela leyi swilo a swi tshame hayona lerova u navela onge a yi fanele yi nga cinciwanga. Ku nga khathariseki xivangelo xa kona, swi nga endleka swi ku tikerile swinene ku tolovela ku cinca loku endliweke. Kambe loko hi angula hi ndlela leyi faneleke, hi ta swi vona leswaku Xikwembu xa hi katekisa.

Enkarhini wa Muxe, Yehovha u kongomise timiliyoni ta vavanuna ni vavasati, ku katsa ni vana emananga. Loko a va nga kongomisiwanga hi yena, a va ta va va nga ponanga. Namuntlha, vuxaka bya hina na Yehovha byi tiya hikwalaho ka leswi hi kongomisiwaka hi yena. Hikwalaho, onge hinkwerhu hi nga tiyimisela ku angula hilaha Vaisrayele vo tshembeka va anguleke hakona loko va twa mipfumawulo yo hambanahambana ya mhalamhala!