NHLOKOMHAKA LEYI DYONDZIWAKA 26
“Tlhelelani Eka Mina”
“Tlhelelani eka mina, kutani mina ndzi ta tlhelela eka n’wina.”—MAL. 3:7.
RISIMU 102 “Pfuna Lava Tsaneke”
LESWI HI NGA TA SWI DYONDZA *
1. Yehovha u titwa njhani loko munhu loyi a tshike ku n’wi tirhela a tlhelela eka yena?
HILAHA hi buleke hakona eka nhlokomhaka leyi hundzeke, Yehovha u tifanisa ni murisi lonene loyi a khathalaka hi tinyimpfu takwe. Loko ku ri na leyi lahlekeke u famba a yi lava. Yehovha u byele Vaisrayele lava a va tshike ku n’wi tirhela a ku: “Tlhelelani eka mina, kutani mina ndzi ta tlhelela eka n’wina.” Ninamuntlha wa ha titwa hi ndlela leyi fanaka hikuva u ri: “A ndzi hundzukanga.” (Mal. 3:6, 7) Yesu u vule leswaku Yehovha wa tsaka swinene swin’we ni tintsumi loko nandza wa Yena loyi a tshike ku n’wi tirhela a tlhelela eka Yena.—Luka 15:10, 32.
2. Hi ta bula hi yini eka nhlokomhaka leyi?
2 A hi buleni hi swifaniso swinharhu swa Yesu leswi vulavulaka hi ku pfuna vanhu lava tshikeke ku tirhela Yehovha. Hi ta bula hi timfanelo leti hi faneleke hi va na tona leswaku hi ta kota ku pfuna vanhu lava tshikeke ku tirhela Yehovha va tlhelela eka yena. Hi ta tlhela hi vona leswaku hikwalahokayini swi ri swa nkoka ku pfuna lava tsaneke.
KU LAVISISA DRAKMA YA NSIMBI LEYI LAHLEKEKE
3-4. Hikwalahokayini wansati loyi ku vulavuriwaka hi yena eka Luka 15:8-10, a yi lavisise hi vukheta drakma yakwe leyi lahlekeke?
3 Hi fanele hi endla matshalatshala yo lavisisa vanhu lava lavaka ku tlhelela eka Yehovha. Eka xifaniso lexi a xi tirhiseke lexi kumekaka eka Evhangeli ya Luka, Yesu u vulavula hi wansati loyi a lavisisaka nchumu wa risima lowu n’wi lahlekeleke, ku nga drakma ya nsimbi. Xifaniso lexi xi hi pfuna ku vona leswi swi vulaka swona ku lavisisa.—Hlaya Luka 15:8-10.
4 Yesu u hlamusela ndlela leyi wansati loyi a lahlekeriwe hi drakma ya nsimbi a ti tweke hayona loko a yi kuma. Enkarhini wa Yesu, vamanana van’wana a va nyika n’wana wa nhwana tidrakma ta khume hi siku leri a cataka ha rona. Swi nga endleka drakma yoleyo ya nsimbi a yi ri yin’wana ya leta khume. Wansati yoloye a a tibyela leswaku drakma yakwe yi wele ehansi. U lumeke rivoni kutani a sungula ku yi lava kambe a ko fana ni kwala. Rivoni rakwe leri a ri tirhisa mafurha, a ri nga voningi kahle lerova a nga kota ku kuma drakma yakwe leyitsongo ya silivhere. Eku heteleleni, u kukule yindlu hinkwayo hi vukheta. Loko a tshineta rivoni rakwe eka thyaka leri a ri hlengeleteke, u kume drakma yakwe ya risima. A nga ha tikoti hi ku tsaka! U vitane vanghana ni vaakelani a va byela mahungu wolawo yo tsakisa.
5. I yini lexi nga endlaka swi tika ku kuma vanhu lava tshikeke ku tirhela Yehovha?
5 Hilaha hi swi voneke hakona eka xifaniso lexi Yesu a xi tirhiseke, swi lava matshalatshala ku lava nchumu lowu lahlekeke. Hilaha ku fanaka, swi lava matshalatshala ku lava vanhu lava tshikeke ku tirhela Yehovha. Swi nga endleka se ku hundze malembe yo tala va tshikile ku tirhela Yehovha. Kumbexana se va rhurhele endhawini leyi vamakwerhu va nga va tiviki. Kambe ha tiyiseka leswaku van’wana se va swi lava ku tlhelela eka Yehovha. Va lava ku tirhela Yehovha va ri endyangwini wa vagandzeri vakwe va ntiyiso kambe hi hina hi faneleke hi va pfuna.
6. Vandlha hinkwaro ri nga hoxa xandla hi ndlela yihi eku lavisiseni ka vanhu lava tshikeke ku tirhela Yehovha?
6 I vamani lava nga hoxaka xandla eku lavisiseni ka vanhu lava tshikeke ku tirhela Yehovha? Hi hina hinkwerhu, vakulu, maphayona, swirho swa ndyangu ni vahuweleri hinkwavo. Xana u ni munghana kumbe xaka leri tshikeke ku tirhela Yehovha? Xana u tshame u hlangana ni munhu loyi a tshikeke ku tirhela Yehovha loko u ri ensin’wini? Hlamusela munhu yoloye leswaku loko a swi tsakela ku endzeriwa, u nga tsakela ku nyika vakulu va le ndhawini ya ka vona vuxokoxoko byakwe.
7. U dyondza yini eka leswi vuriweke hi nkulu loyi a vuriwaka Thomas?
7 Hi swihi leswi vakulu va nga swi endlaka loko swi ta emhakeni ya ku lava vanhu lava lavaka ku tlhelela eka Yehovha? Twana leswi nkulu loyi a vuriwaka Thomas, * wa le Spain a swi vulaka. U pfune Timbhoni to tlula 40 leswaku ti tlhelela evandlheni. U ri: “Ndzi sungula hi ku vutisa vamakwerhu vo hambanahambana loko va tiva laha vanhu lava tshikeke ku tirhela Yehovha va tshamaka kona. Kumbe ndzi vutisa vahuweleri loko va tiva munhu wo karhi loyi a tshikeke ku ta etinhlengeletanweni ta vandlha. Vo tala evandlheni va angula kahle tanihileswi va swi xiyaka leswaku va katseka eku lavisiseni. Loko ndzi endzela vamakwerhu lava tshikeke ku tirhela Yehovha, ndzi va vutisa hi vana ni maxaka ya vona leswaku va njhani. Van’wana a va ta ni vana va vona etinhlengeletanweni ta vandlha naswona van’wana va vana volavo va tshame va va vahuweleri. Na vona va lava ku pfuniwa leswaku va tlhelela eka Yehovha.”
VUYISA VANA VA YEHOVHA LAVA LAHLEKEKE
8. Eka xifaniso xa n’wana loyi a lahlekeke lexi kumekaka eka Luka 15:17-24, tatana u n’wi khome njhani n’wana wakwe loyi a hundzukeke?
8 Hi tihi timfanelo leti hi faneleke hi va na tona leswaku hi ta kota ku pfuna vanhu va tlhelela eka Yehovha? Xiya leswi hi nga swi dyondzaka eka xifaniso lexi Yesu a xi tirhiseke xa n’wana loyi a rhurhe ekaya. (Hlaya Luka 15:17-24.) Yesu u hlamusela ndlela leyi n’wana yoloye a swi xiyeke hayona leswaku u endle xihoxo kutani a teka xiboho xo tlhelela ekaya. Tatana u hlanganise n’wana wakwe a fika a n’wi angarha, ku kombisa leswaku wa n’wi rhandza. N’wana u kingindziwe hi ripfalo lerova a a tivona a nga faneleki ku vuriwa n’wana. Tata wakwe u n’wi twele vusiwana endzhaku ka loko a tiphofurile. Leswi se a hundzukile tatana u n’wi tiyisekisile leswaku u amukelekile ekaya tanihi xirho xa ndyangu, ku nga ri mutirhi. U endle nkhuvo kutani a n’wi nyika nguvu leyinene.
9. Hi rihi langutelo leri hi faneleke hi va na rona leswaku hi ta kota ku pfuna vanhu lava tshikeke ku tirhela Yehovha va tlhelela eka yena? (Vona bokisi leri nge “ Ndlela Yo Pfuna Vanhu Lava Lavaka Ku Tlhelela Eka Yehovha.”)
9 Yehovha u fana ni tatana wa le xifanisweni lexiya. Wa va rhandza vamakwerhu lava tshikeke ku n’wi tirhela naswona u lava va tlhelela eka yena. Loko hi tekelela Yehovha, hi nga swi kota ku va pfuna va tlhelela eka yena. Kambe, hi fanele hi lehisa mbilu, hi va ni ntwelavusiwana ni rirhandzu. Hikwalahokayini hi fanele hi kombisa timfanelo leti naswona hi nga ti kombisa njhani?
10. Ku lehisa mbilu swi pfuna hi ndlela yihi eku pfuneni ka munhu leswaku a tlhelela eka Yehovha?
10 Hi fanele hi lehisa mbilu hikuva swi teka nkarhi ku va munhu a lulamisa vuxaka byakwe na Yehovha. Vo tala lava tshameke va tshika ku tirhela Yehovha, va vula leswaku va tlhelele endzhaku ko pfuniwa ko tala hi vakulu ni van’wana evandlheni. Makwerhu wa xisati Nancy, loyi a tshamaka eDzongavuxa bya Asia, u ri: “Munghana wa mina wa le vandlheni u ndzi pfune ko tala. A a ndzi rhandza ku fana ni sesi wakwe. U ndzi tsundzuxe hi swilo swo tsakisa leswi hi tshameke hi tiphina ha swona. Loko ndzi n’wi hlamusela ndlela leyi ndzi titwaka hayona, u ndzi yingisele hi vurhon’wana naswona a nga tsutsumelanga ku ndzi nyika switsundzuxo. U ve munghana wa ntiyiso, loyi a a tiyimisele ku ndzi pfuna mikarhi hinkwayo.”
11. Hikwalahokayini hi fanele hi kombisa ntwelavusiwana loko hi pfuna munhu loyi a khunguvanyekeke?
11 Ntwelavusiwana wu fana ni murhi lowu nga ni matimba; wu nga vohlisa ku khunguvanyeka. Van’wana lava tshikeke ku tirhela Yehovha, se swi endla malembe va hlundzukile hikwalaho ko khunguvanyisiwa hi munhu wo karhi evandlheni. Sweswo hi swona leswi endlaka va nga tlheleli eka Yehovha. Van’wana va nga tibyela leswaku a va khomiwe hi ndlela yo biha. Vanhu vo tano, va lava munhu loyi a nga ta va yingisela a tlhela a twisisa ndlela leyi va titwaka hayona. (Yak. 1:19) María, loyi a tshameke a tshika ku tirhela Yehovha, u ri: “A ndzi lava munhu loyi a ta ndzi yingisela, loko ndzi n’wi phofulela leswi a swi ndzi karhata ni loyi a a ta ndzi nyika switsundzuxo.”
12. Hlamusela ndlela leyi rirhandzu ra Yehovha ri va kokaka hayona vanhu lava va tshikeke ku n’wi tirhela.
12 Bibele yi fanisa rirhandzu leri Yehovha a nga na rona eka vanhu vakwe ni mapindza kumbe ntambhu. Rirhandzu ra Xikwembu ri fana ni mapindza hi ndlela yihi? Ehleketa hi xikombiso lexi: A hi nge u le ku nweleni elwandle leri kariheke kutani munhu un’wana a ku nyiketa xikhwehle lexi endlaka leswaku munhu a nga nweli. Swi le rivaleni leswaku u ta wu tlangela mpfuno wakwe. Kambe xikhwehle lexi endlaka leswaku munhu a nga nweli xi to ku pfuna swa xinkarhana. Phela mati ma titimela naswona u nga fa loko wo ka u nga kumi xikepe lexi nga ku ponisaka. Ku laveka munhu loyi a nga ta ku nyiketa ntambhu kutani a ku kokela exikepeni. Loko Yehovha a vulavula hi Vaisrayele lava a va tshike ku n’wi tirhela, u te: ‘Ndzi hambete ndzi va koka hi tintambhu ta rirhandzu.’ (Hos. 11:4) Yehovha u titwa hi ndlela leyi fanaka hi vanhu lava tshikeke ku n’wi tirhela ni lava va langutanaka ni swiphiqo. U lava va swi tiva leswaku wa va rhandza naswona u lava ku va pfuna va tlhelela eka yena. Yehovha a nga tirhisa wena ku va komba ndlela leyi a va rhandzaka hayona.
13. Vula ntokoto lowu kombisaka ndlela leyi ku rhandzana tanihi vamakwerhu swi pfunaka hayona.
13 Tiyisekisa vanhu lava tshikeke ku tirhela Yehovha leswaku Yehovha wa va rhandza na hina ha va rhandza. Pablo, loyi ku vulavuriweke hi yena eka nhlokomhaka leyi hundzeke, a ri ni malembe yo tlula 30 a tshike ku tirhela Yehovha. U ri: “Siku rin’wana nimpundzu loko ndzi huma ekaya, ndzi hlangane ni makwerhu un’wana wa xisati loyi a ri ni musa. U vulavule na mina hi ndlela ya rirhandzu. Ndzi sungule ku rila kutani ndzi n’wi byele leswaku swi tikomba onge u rhumele hi Yehovha eka mina. Hi nkarhi wolowo, ndzi endle xiboho xo tlhelela eka Yehovha.”
SEKETELANI LAVA TSANEKE
14. Hi ku ya hi xifaniso lexi nga eka Luka 15:4, 5, murisi u endle yini endzhaku ka loko a kume nyimpfu leyi a yi lahlekile?
14 Vanhu lava tshikeke ku tirhela Yehovha va lava nseketelo wa hina. Ku fana ni n’wana loyi a lahlekile wa le xifanisweni xa Yesu, swi nga endleka va ha vavisekile emoyeni. Kumbexana vuxaka bya vona na Yehovha byi tsanile hikwalaho ka swilo leswi va hlangavetanaka na swona emisaveni leyi ya Sathana. Hi fanele hi va pfuna va pfuxeta vuxaka bya vona na Yehovha. Eka xifaniso xa nyimpfu leyi lahlekeke, Yesu u hlamusela ndlela ya rirhandzu leyi murisi a yi tlakuleke hayona nyimpfu yoleyo kutani a yi tlherisela entlhambini. Murisi u tirhise matimba ni nkarhi wakwe wo tala a lavana ni nyimpfu leyi lahlekeke. Kambe u swi xiyile leswaku a swi ta lava a yi tlakula a yi tlherisela entlhambini hikuva a yi nga ha ri na matimba yo tifambela.—Hlaya Luka 15:4, 5.
15. Hi nga va seketela njhani vanhu lava tshikeke ku tirhela Yehovha naswona va lavaka ku tlhelela eka yena? (Vona bokisi leri nge “ Xitirhisiwa Xa Nkoka Swinene.”)
15 Swi lava matshalatshala ku pfuna vanhu lava tshikeke ku tirhela Yehovha. Kambe hi ku pfuniwa hi moya wa Yehovha, Rito rakwe ni mikandziyiso leyi sekeriweke eBibeleni, hi nga swi kota ku va pfuna. (Rhom. 15:1) Hi nga swi endla njhani leswi? Makwerhu un’wana loyi ku nga khale a ri nkulu, u ri: “Vanhu vo tala lava tshikeke ku tirhela Yehovha, va fanele va dyondzisiwa Bibele loko se va endle xiboho xo tlhelela eka Yehovha.” * Loko u komberiwa ku dyondzisa munhu wo tano Bibele, wu amukele hi mandla mambirhi nkateko wolowo! Nkulu yoloye u tlhele a ku: “Muhuweleri loyi a fambisaka dyondzo u fanele a va munghana lonene, loyi munhu loyi a tshikeke ku tirhela Yehovha a nga kotaka ku tiphofula eka yena handle ko chava.”
KA TSAKIWA ETILWENI NI LAHA MISAVENI
16. Hi swi tiva njhani leswaku tintsumi ti ta hi pfuna?
16 Mitokoto yo tala yi kombisa leswaku tintsumi ta hi pfuna eku lavisiseni ka vanhu lava tshikeke ku tirhela Yehovha naswona va lavaka ku tlhelela eka yena. (Nhlav. 14:6) Hi xikombiso, Silvio wa le Ecuador, loyi a tshike ku tirhela Yehovha, u kombele Yehovha hi xikhongelo leswaku a n’wi pfuna a tlhelela evandlheni. Loko a ha ri eku khongeleni, u twe ku gongondziwa enyangweni wa yindlu yakwe. A ku ri vakulu vambirhi. Loko va fika, va n’wi nyike mpfuno lowu a wu lava.
17. Hi titwa njhani endzhaku ko pfuna munhu leswaku a tlhelela eka Yehovha?
17 Hi ta tsaka swinene loko hi pfuna munhu leswaku a tlhelela eka Yehovha. Twana leswi Salvador, loyi a nga phayona naswona a tikarhatelaka ku pfuna vanhu leswaku va tlhelela eka Yehovha a swi vulaka, u ri: “Mikarhi yin’wana, ndzi xiririka mihloti hikwalaho ko tsaka. Ndza tsaka swinene loko Yehovha a ndzi pfumelela ndzi tirhisana na yena eku pfuneni ka munhu loyi a tshike ku n’wi tirhela leswaku a tlhelela eka yena.”—Mint. 20:35.
18. Loko u tshike ku tirhela Yehovha, i yini leswi u nga tiyisekaka ha swona?
18 Loko u tshike ku tirhela Yehovha, tiyiseka leswaku Yehovha wa ha ku rhandza. U lava leswaku u tlhelela eka yena. U fanele u endla matshalatshala yo vuyela eka yena. Ku fana ni tatana wa le xifanisweni xa Yesu, Yehovha u ku rindzile leswaku u tlhelela eka yena naswona u ta ku amukela hi mandla mambirhi.
RISIMU 103 Varisi I Tinyiko Leti Nga Vanhu
^ par. 5 Yehovha u lava leswaku vanhu lava tshikeke ku ta etinhlengeletanweni ta vandlha va tlhelela eka yena. Hi nga swi kota ku khutaza vanhu lava tiyimiseleke ku amukela xirhambo xa Yehovha lexi nge: “Tlhelelani eka mina.” Eka nhlokomhaka leyi, hi ta bula hi ndlela leyi hi nga va pfunaka ha yona ku endla tano.
^ par. 7 Mavito man’wana ma cinciwile.
^ par. 15 Van’wana lava tshikeke ku tirhela Yehovha va nga pfuniwa hi ku dyondzisiwa tindzima to karhi ta buku leyi nge, Tihlayiseni eRirhandzwini Ra Xikwembu kasi van’wanyana va pfuniwe hi ku dyondza tindzima to karhi ta buku leyi nge Tshinela Eka Yehovha. Komiti ya Ntirho ya Vandlha hi yona leyi nga ta hlawula lava fanelekaka ku dyondzisa vanhu vo tano Bibele.
^ par. 68 NHLAMUSELO YA SWIFANISO: Vamakwerhu vanharhu vo hambana va pfuna makwerhu loyi a lavaka ku tlhelela eka Yehovha. Va endla tano hi ku n’wi tsalela marungula hi foni, hi ku n’wi tiyisekisa leswaku wa rhandziwa ni hi ku n’wi yingisela hi vurhon’wana.
