1. Yehovha u hi pfumelela ku endla yini?

YEHOVHA u hi pfumelela leswaku hi tihlawulela ndlela leyi hi lavaka ku hanya ha yona. U hi dyondzisa ndlela yo endla swiboho leswinene naswona wa hi seketela loko hi endla swiboho leswi n’wi tsakisaka. (Ps. 119:173) Vutlhari lebyi hi byi kumaka eRitweni ra Xikwembu, byi ta hi pfuna hi kota ku endla swiboho leswinene.—Hev. 5:14.

2. Hi wihi ntlhontlho lowu hi nga langutanaka na wona endzhaku ka loko hi endle xiboho?

² Hambiloko hi endla swiboho leswinene kambe swi nga hi tikela ku hetisisa leswi hi swi sunguleke. Xiya swikombiso leswi landzelaka: Makwerhu un’wana loyi a ha riki muntshwa u endle xiboho xo hlaya Bibele hinkwayo. U yi hlayile mavhiki ma nga ri mangani kambe u yime mpfhukeni. Makwerhu un’wana wa xisati u teke xiboho xo va phayona ra nkarhi hinkwawo kambe a tshamela ku tlhentlhisa siku ro sungula. Huvo ya vakulu yi teke xiboho xo endla maendzo ya vurisi eka vamakwerhu va le vandlheni kambe ku hundze tin’hweti to tala swinene va nga si sungula. Swiyimo leswi swa hambana kambe ku ni nchumu wun’we lowu swi fanaka ha wona. Swiboho leswi va swi tekeke a va swi hetisisanga. Vakreste va le nkarhini wa vaapostola na vona a va langutane ni ntlhontlho lowu fanaka. Xiya leswi hi nga swi dyondzaka eka vona.

3. Hi xihi xiboho lexi endliweke hi Vakreste va le Korinto naswona ku endleke yini?

³ Kwalomu ka 55 C.E., Vakreste va le Korinto va endle xiboho xa nkoka swinene. Va twe leswaku vamakwavo eYerusalema ni le Yudiya va koka exilogweni naswona mavandlha man’wana a ma hlengeleta mali leswaku ma ya va pfuna. Hikwalaho ka musa ni malwandla, Vakreste va le Korinto va endle xiboho xo ya pfuneta naswona va vutise muapostola Pawulo leswaku va nga pfuneta  njhani. U va rhumele swiletelo a tlhela a hlawula Tito leswaku a pfuneta eku hlengeletiweni ka minyikelo. (1 Kor. 16:1; 2 Kor. 8:6) Endzhaku ka tin’hweti ti nga ri tingani, Pawulo u twe leswaku Vakreste va le Korinto a va nga si xi hetisisa xiboho lexi va xi endleke. Hikwalaho, nyiko ya vona a yi ta va yi nga si lungheka hi nkarhi lowu faneleke hikuva a yi fanele yi yisiwa eYerusalema hi nkarhi wun’we ni minyikelo ya mavandlha laman’wana.—2 Kor. 9:4, 5.

4. Hilaha swi kombisiweke hakona eka 2 Vakorinto 8: 7, 10, 11, Pawulo u khutaze Vakreste va le Korinto ku endla yini?

⁴ Vakreste va le Korinto a va endle xiboho lexinene naswona Pawulo u va bumabumerile hikwalaho ka ripfumelo ra vona ni hi leswi a va ri ni moya wo hanana. Kambe u boheke ku tlhela a va khutaza ku hetisisa leswi va swi sunguleke. (Hlaya 2 Vakorinto 8:7, 10, 11.) Leswi va swi endleke, swi hi dyondzisa leswaku hambi ku ri Vakreste vo tshembeka swi nga va tikela ku hetisisa swiboho leswinene leswi va swi endleke.

5. Hi swihi swivutiso leswi hi nga ta swi hlamula?

⁵ Ku fana ni Vakreste va le Korinto, swi nga hi tikela ku hetisisa swiboho leswi hi swi endlaka. Hikwalaho ka yini? Hikuva a hi hetisekanga naswona hi nga ha va ni xinamu. Kumbe swiyimo leswi nga languteriwangiki swi nga endla swi hi tikela ku hetisisa swiboho leswi hi swi endleke. (Ekl. 9:11; Rhom. 7:18) Hi nga xi kambisisa njhani xiboho lexi hi xi endleke ivi hi vona loko swi ta lava hi xi antswisa? Naswona hi nga swi kota njhani ku hetisisa leswi hi swi sungulaka?

6. Hi rini laha swi nga lavaka hi antswisa xiboho lexi hi xi endleke?

⁶ Swiboho swin’wana swa nkoka leswi hi swi endleke a hi nge swi koti ku swi cinca. Hi xikombiso, a hi nge xi cinci xiboho lexi hi xi endleke xo tirhela Yehovha ni xiboho lexi hi xi endleke xo tshama hi tshembekile eka vanghana va hina va vukati. (Mat. 16:24; 19:6) Kambe swiboho swin’wana swi nga lava ku antswisiwa. Hikwalaho ka yini? Hikuva swiyimo swa cinca. Hi wahi magoza lawa ma nga hi pfunaka hi kota ku endla swiboho leswinene?

7. Hi fanele hi kombela yini loko hi khongela naswona hikwalaho ka yini?

⁷ Khongela u kombela vutlhari. Yehovha u huhutele Yakobo leswaku a tsala a ku: “Loko mani na mani eka n’wina a kayivela vutlhari, a a hambete a kombela eka Xikwembu, hikuva xi nyika hinkwavo hi mbilu yo basa.” (Yak. 1:5) Hi ndlela yo karhi, hinkwerhu hi “kayivela vutlhari.” Hikwalaho, titshege hi Yehovha loko u endla xiboho niloko u antswisa xiboho lexi u xi endleke. Yehovha u ta ku pfuna u kota ku endla swiboho leswinene.

8. Hi wihi ndzavisiso lowu hi faneleke hi wu endla hi nga si endla xiboho?

⁸ Endla ndzavisiso. Hlaya Rito ra Xikwembu ni tibuku leti humesiwaka hi nhlengeletano ya Yehovha, u tlhela u vulavurisana ni vanhu lava u va tshembaka. (Swiv. 20:18) Ku endla ndzavisiso i swa nkoka swinene u nga si endla xiboho xo cinca ntirho, xo rhurha kumbe xo hlawula ntirho lowu u nga wu dyondzelaka lowu nga ta ku pfuna u kota ku tihlayisa loko u ri karhi u tirhela Yehovha.

9. Swi ta hi pfuna hi yini ku tshembeka eka hina vini?

⁹ Kambisisa swikongomelo swa wena. Swikongomelo swa hina i swa nkoka eka Yehovha. (Swiv. 16:2) U lava hi tshembeka eka swilo hinkwaswo. Hikwalaho, na hina loko hi endla swiboho hi lava ku tshembeka eka hina vini ni le ka vanhu van’wana. Loko hi nga tshembeki, swi ta hi tikela ku hetisisa swiboho leswi hi swi endlaka. Hi xikombiso, makwerhu loyi a ha riki muntshwa a nga endla xiboho xo va phayona ra nkarhi hinkwawo. Kambe hi ku famba ka nkarhi, swi sungula ku n’wi tikela ku fikelela tiawara leti lavekaka naswona a nga ha wu tsakeli ntirho wakwe. Swi nga endleka a a tibyela leswaku xikongomelo xakwe xo phayona a ku ri  ku tsakisa Yehovha. Kambe u kuma leswaku entiyisweni, a a lava ku tsakisa vatswari vakwe kumbe munhu un’wana.

10. Ku laveka yini leswaku munhu a kota ku hundzuka?

¹⁰ Ehleketa hi munhu loyi a dyondzeriwaka Bibele naswona a endlaka xiboho xo tshika ku dzaha. Swa n’wi tikela loko a ha sungula, hi ku famba ka nkarhi u kota ku heta vhiki kumbe mavhiki mambirhi a nga dzahanga, siku rin’wana a tlhela a dzaha. Kambe eku heteleleni a ku swi thya, hi ku helela! Ndlela leyi a rhandzaka Yehovha ha yona ni ku tiyimisela kakwe ku n’wi tsakisa hi swona leswi endleke a kota ku tshika ku dzaha.—Kol. 1:10; 3:23.

11. Hikwalaho ka yini hi fanele hi veka siku kumbe nkarhi?

¹¹ Veka siku kumbe nkarhi. Loko u tiva siku kumbe nkarhi, swi ta ku olovela ku hetisisa leswi u swi sungulaka. Hi xikombiso, u nga endla xiboho xo hlaya Bibele nkarhi ni nkarhi. Kambe loko u nga vekanga nkarhi lowu u nga ta yi hlaya ha wona, a wu nge swi koti ku fikelela xikongomelo xa wena. * Kumbe vakulu va nga endla xiboho xo endla maendzo ya vurisi kambe ku hela tin’wheti to tala va nga si xi hetisisa xiboho xa vona. Leswaku va kota ku hetisisa leswi va swi sunguleke, va fanele va tivutisa swivutiso swo tanihi leswi: “Xana se ha va tiva vamakwerhu lava hi faneleke hi va endzela? Xana se hi ri vekile siku ni nkarhi lowu hi nga ta va endzela ha wona?”

12. I yini leswi hi nga swi endlaka naswona hikwalaho ka yini?

¹² Ringanisela. A nga kona munhu loyi a nga ni nkarhi, switirhisiwa ni matimba yo endla swilo hinkwaswo leswi a swi lavaka. Hikwalaho, u fanele u ringanisela. Loko swi fanela, u nga boheka ku cinca xiboho lexi u xi endleke lexi u nga ta ka u nga swi koti ku xi hetisisa. (Ekl. 3:6) A hi nge u xi kambisisile xiboho xa wena u tlhela u xi antswisa naswona se u vona onge u ta swi kota ku xi hetisisa. Xiya magoza ya ntlhanu lama nga ku pfunaka u kota ku hetisisa leswi u swi sungulaka.

13. U nga ma kuma njhani matimba ya ku hetisisa xiboho lexi u xi endleke?

¹³ Khongela u kombela matimba ya ku endla. Xikwembu xi ta ku nyika “matimba ya ku . . . endla” ni ya ku hetisisa xiboho lexi u xi endleke. (Filp. 2:13) Hikwalaho, kombela Yehovha a ku nyika matimba hi ku tirhisa moya wakwe lowo kwetsima. U nga tshiki ku khongela hambiloko u vona onge nhlamulo ya xikhongelo xa wena ya hlwela. Yesu u te: “Hambetani mi kombela, [moya lowo kwetsima] mi ta nyikiwa.”—Luka 11:9, 13.

14. Nsinya wa nawu lowu nga eka Swivuriso 21:5, wu nga ku pfuna njhani u kota ku hetisisa xiboho xa wena?

¹⁴ Hlela kahle. (Hlaya Swivuriso 21:5.) Leswaku u kota ku heta ntirho wun’wana ni wun’wana lowu u wu sungulaka, u fanele u hlela kahle. Kutani u endla hilaha u hleleke hakona. Hilaha ku fanaka, loko u endla xiboho, xaxameta swilo leswi u faneleke u swi endla leswaku u ta kota ku hetisisa xiboho xa wena. Ku ava mitirho leyikulu hi swiphemuphemu swi ta ku pfuna u kota ku vona ndzima leyi u yi boxaka. Pawulo u khutaze Vakreste va le Korinto leswaku va tivekela swo karhi etlhelo, leswi va nga ta nyikela ha swona “siku rin’wana ni rin’wana ro sungula evhikini” ematshan’weni ya ku yima va ta yi humesa hi siku leri a nga ta fika ha rona. (1 Kor. 16:2) Nakambe ku ava mitirho leyikulu hi swiphemuphemu swi ta ku hungutela ntshikilelo.

15. Loko u heta ku hlela, u fanele u endla yini?

¹⁵ Loko leswi u swi hleleke u swi tsala ehansi, swi ta ku olovela ku hetisisa leswi u swi sunguleke. (1 Kor. 14:40) Hi xikombiso, nkongomiso wu lava leswaku tihuvo ta vakulu ti hlawula  nkulu loyi a nga ta tsala swiboho leswi ti swi endlaka ku katsa ni loyi a nga ta tiyiseka leswaku leswi kunguhatiweke swa endliwa ni ku veka siku leri swi nga ta endliwa ha rona. Vakulu lava landzelaka nkongomiso lowu, swi ta va olovela ku fikelela swiboho leswi va swi endlaka. (1 Kor. 9:26) Na wena loko u endla hilaha ku fanaka, u ta vuyeriwa swinene. Hi xikombiso, u nga xaxameta swilo leswi u swi endlaka siku ni siku hi ku ya hi ndlela leyi u nga ta swi endla ha yona. Hi ku endla tano, u ta kota ku hetisisa leswi u swi sungulaka ka ha ri ni nkarhi.

16. Hi wihi nchumu wa nkoka lowu lavekaka leswaku hi kota ku fikelela swiboho leswi hi swi endlaka naswona Varhoma 12:11 yi yi seketela njhani mhaka leyi?

¹⁶ Tinyiketele. Swi lava matshalatshala ni ku hlela kahle leswaku u kota ku hetisisa leswi u swi sungulaka. (Hlaya Varhoma 12:11.) Pawulo u byele Timotiya leswaku a ya “emahlweni [a] tinyiketela” ni ku ‘tikarhatela’ ku va mudyondzisi lonene. Xitsundzuxo xexo xi tirha etimhakeni hinkwato leti khumbaka vuxaka bya hina na Yehovha.—1 Tim. 4:13, 16.

17. Hi nga yi tirhisa njhani Vaefesa 5:15, 16 leswaku hi kota ku hetisisa swiboho leswi hi swi endleke?

¹⁷ Tirhisa nkarhi wa wena hi vutlhari. (Hlaya Vaefesa 5:15, 16.) Veka nkarhi lowu u nga ta xi hetisisa ha wona xiboho lexi u xi endlaka u tlhela u wu namarhela. U nga yimeli nkarhi lowu faneleke hikuva nkarhi lowu faneleke a wu nge pfuki wu fikile. (Ekl. 11:4) Tivonele leswaku u nga pfumeleli swilo leswi nga riki swa nkoka swi ku dyela nkarhi ni ku ku siya u karhele lerova u nga ha swi koti ku endla swilo swa nkoka swinene. (Filp. 1:10) Loko swi koteka, hlawula nkarhi lowu u nga taka u nga kavanyetiwi hi nchumu loko u endla mitirho ya wena. Byela van’wana leswaku hi nkarhi wo nge, a wu lavi ku kavanyetiwa. Swi kahle ku tima foni naswona tiimeyili kumbe social media u ta swi vona endzhaku. *

18-19. I yini lexi nga ta ku pfuna leswaku u nga heli matimba yo hetisisa swiboho swa wena loko u langutana ni mintlhontlho?

¹⁸ Ehleketisisa hi vuyelo. Vuyelo bya swiboho swa wena byi fana ni ndhawu leyi u yaka eka yona. Loko hakunene u lava ku fika endhawini yoleyo, a wu nge tlheli hambiloko gondzo ra kona ri pfariwile naswona u nga ha hlawula ku famba hi gondzo rin’wana. Hilaha ku fanaka, loko hi ehleketisisa hi vuyelo bya swiboho swa hina, a hi nge heli matimba hambiloko hi langutana ni mintlhontlho kumbe swikavanyeto.—Gal. 6:9.

¹⁹ Swa tika ku endla swiboho leswinene naswona ku swi hetisisa a hi matlangwana. Kambe hikwalaho ko pfuniwa hi Yehovha, u ta kuma vutlhari ni matimba yo hetisisa leswi u swi sungulaka.