“LOKO ndzi tsundzuka maxangu lawa ndzi tshameke ndzi langutana na wona, ndza swi xiya leswaku a ndzi nga ta swi kota ku ma tiyisela hi matimba ya mina.” Xana u tshame u vula marito yo fana ni lawa? Vo tala va hina hi tshame hi ma vula. Kumbexana u ma vule endzhaku ko tiyisela vuvabyi lebyi nga ni khombo kumbe ko loveriwa hi xaka. Loko u swi tsundzuka, wa swi xiya leswaku u kote ku tiyisela hikwalaho ka leswi moya lowo kwetsima wa Yehovha wu ku nyikeke “matimba lama tlulaka lama tolovelekeke.”—2 Kor. 4:7-9.

1-2. (a) I yini lexi hi pfunaka hi kota ku tiyisela? Hlamusela. (b) Hi ta bula hi yini eka nhlokomhaka leyi?

² Nakambe hi titshenge hi moya lowo kwetsima leswaku hi kota ku lwisana ni nkucetelo wo homboloka wa misava leyi. (1 Yoh. 5:19) Ku engetela kwalaho, hi fanele hi lwisana ni “mavandla lama hombolokeke ya moya.” (Efe. 6:12) Hi ri ni mhaka leyi emiehleketweni, hi ta bula hi tindlela timbirhi leti moya lowo kwetsima wu hi pfunaka ha tona. Endzhaku hi ta bula hi leswi hi nga swi endlaka leswaku hi vuyeriwa eka wona.

3. Yehovha u hi pfuna njhani leswaku hi kota ku tiyisela miringo?

³ Moya lowo kwetsima wa Yehovha wu hi pfuna hi ku hi nyika matimba yo kota ku hetisisa vutihlamuleri bya hina hambiloko hi langutana ni miringo. Muapostola Pawulo u xiye leswaku u kote ku ya emahlweni a tirha hambiloko a langutane ni miringo hileswi a titshege hi “matimba ya Kreste.” (2 Kor. 12:9) Loko Pawulo a ri eriendzweni rakwe ra vumbirhi ra vurhumiwa, u tirhe hi matimba entirhweni wo chumayela ni ku khathalela swilaveko swakwe. A a tshama eKorinto ekaya ra Akhwila na Prisila, lava a va ri va endli va matende. Leswi na yena a endla ntirho lowu fanaka, a  tirha na vona mikarhi yin’wana. (Mint. 18:1-4) Moya lowo kwetsima wu nyike Pawulo matimba yo endla ntirho wo tihanyisa ni wo chumayela.

4. Hi ku ya hi 2 Vakorinto 12:7b-9, Pawulo a a karhatiwa hi yini?

⁴ Hlaya 2 Vakorinto 12:7b-9. Eka tindzimana leti, Pawulo a vula yini loko a ku u karhatiwa hi “mutwa enyameni”? Loko u tlhaviwe hi mutwa, a wu dyi byi rhelela. Laha Pawulo a vula leswaku u langutane ni ndzingo wo tika swinene. U vule leswaku ndzingo wolowo a wu ri “ntsumi ya Sathana,” leyi a yi tshamela ku n’wi “makala.” Swi nga endleka Sathana kumbe tintsumi takwe ku nga ri tona leti vangeleke Pawulo miringo leyi a langutane na yona kumbe ku n’wi tlhava hi mutwa enyameni. Kambe swi nga endleka leswaku loko tintsumi teto to homboloka ti vona “mutwa” wolowo, ti wu jeketerile wu nghena endzeni hi ndlela yo fanekisela leswaku Pawulo a ta twa ku vava swinene. Xana Pawulo u endle yini?

5. Yehovha u swi hlamule njhani swikhongelo swa Pawulo?

⁵ Eku sunguleni, Pawulo a lava leswaku “mutwa” wolowo wu susiwa. U te: “Ndzi kombele Hosi [Yehovha] kanharhu leswaku wu suka eka mina.” Hambileswi Pawulo a khongeleke, mutwa a wu sukanga enyameni yakwe. Xana leswi swi vula leswaku Yehovha a nga swi hlamulanga swikhongelo swa Pawulo? Doo! U swi hlamurile. Yehovha a nga wu susanga ndzingo lowu Pawulo a langutane na wona kambe u n’wi nyike matimba yo wu tiyisela. Yehovha u te: “Matimba ya mina ma endliwa lama hetisekeke eku tsaneni.” (2 Kor. 12:8, 9) Hikwalaho ko pfuniwa hi Xikwembu, Pawulo u kume ntsako ni ku rhula ka miehleketo!—Filp. 4:4-7.

6. (a) Yehovha a nga swi hlamula njhani swikhongelo swa hina? (b) Eka matsalwa lama kombisiweke eka ndzimana leyi, hi rihi leri ku tiyisaka nhlana?

⁶ Ku fana na Pawulo, xana u tshame u kombela Yehovha leswaku a susa ndzingo lowu a wu langutane na wona? Loko ndzingo wa kona wu nga suki kumbe wu ya wu nyanya, xana u vilerile u tibyela leswaku Yehovha a nga ku rhandzi? Loko swi ri tano, tsundzuka leswi endlekeke eka Pawulo. Yehovha u swi hlamurile swikhongelo swakwe, ni swa wena u ta swi hlamula! Swi nga endleka Yehovha nga wu susi ndzingo lowu ku karhataka. Kambe a ku nyika matimba yo kota ku wu tiyisela hi ku tirhisa moya lowo kwetsima. (Ps. 61:3, 4) U nga ha “tlatlalatiwa ehansi” kambe Yehovha a nge ku tshiki.—2 Kor. 4:8, 9; Filp. 4:13.

7-8. (a) Moya lowo kwetsima wu fana ni rimoyana hi ndlela yihi? (b) Petro u yi hlamusele njhani ndlela leyi moya lowo kwetsima wu tirhaka ha yona?

⁷ Hi yihi ndlela yin’wana leyi moya lowo kwetsima wu hi pfunaka hi yona? Ku fana ni rimoyana ro tenga leri hungaka elwandle leri kariheke, moya lowo kwetsima wu ta hi pfuna hi kota ku tiyisela miringo ku kondza hi fika emisaveni leyintshwa leyi Xikwembu xi hi tshembisaka yona.

⁸ Leswi muapostola Petro a ri muphasi wa tihlampfi, a swi tiva kahle ku tluta. Swa twisiseka leswi a tirhiseke xiga lexi fambisanaka ni ku tluta loko a hlamusela ndlela leyi moya lowo kwetsima wu tirhaka hi yona. U tsale a ku: “Vuprofeta a byi si tisiwa hi ku rhandza ka munhu hambi ku ri rini, kambe vanhu a va vulavula leswi humaka eka Xikwembu va ri karhi va susumetiwa hi moya lowo kwetsima.” Rito ra Xigriki leri hundzuluxeriweke ri va “susumetiwa,” ri nga ha tlhela ri vula ku dlidlimbetiwa.—2 Pet. 1:21.

9. Petro a lava hi twisisa yini loko a tirhisa xiga lexi nge “susumetiwa”?

⁹ Petro a lava hi twisisa yini loko a tirhisa xiga lexi nge “susumetiwa”? Luka mutsari wa buku ya Mintirho, u tirhise xiga lexi fanaka xa Xigriki loko a hlamusela xikepe lexi ‘susumetiwaka’ hi moya. (Mint. 27:15) Xidyondzi xin’wana xa  Bibele xi vula leswaku loko Petro a tsala leswaku vatsari va Bibele a va “susumetiwa,” u tirhise “xithathelo lexi fambisanaka ni ku tluta lexi kokaka rinoko.” Petro a vula leswaku ku fana ni ndlela leyi moya wu susumetaka xikepe ha yona leswaku xi kota ku famba, moya lowo kwetsima wu susumete vatsari va Bibele ku endla ntirho wa vona. Xidyondzi xexo xi tlhele xi ku: “Vaprofeta a va vambe ngoma.” Yehovha u endle ntirho wakwe. U va nyike rimoyana kumbe moya lowo kwetsima. Vatsari va Bibele va endle ntirho wa vona. Va tirhisane kahle ni moya lowo kwetsima.

10-11. Hi wahi magoza mambirhi lawa hi faneleke hi ma teka ku kombisa leswaku hi kongomisiwa hi moya lowo kwetsima? Kombisa.

¹⁰ Nkarhi wa leswaku vanhu va huhuteriwa ku tsala tibuku wu hundzile. Hambiswiritano, ninamuntlha moya lowo kwetsima wa ha nyika vanhu va Xikwembu matimba. Yehovha wa ha endla ntirho wakwe. Hi nga vuyeriwa njhani eka moya lowo kwetsima wa Xikwembu? Hi ku ya emahlweni hi endla ntirho wa hina. Hi nga swi endla njhani sweswo?

¹¹ Ehleketa hi xikombiso lexi. Leswaku mutluti a kota ku vuyeriwa eka moya, u fanele a endla swilo swimbirhi. Xo sungula, u fanele a veka xikepe xakwe laha moya wu hungelaka kona. Tsundzuka, xikepe a xi nge fambi loko mutluti a tshame ekule ehlalukweni laha ku nga hungiki moya. Xa vumbirhi, u fanele a phurumula maseyila yakwe ma helela. Hambiloko ku ri ni moya, xikepe xi ta kota ku famba ntsena loko maseyila ma khoma moya. Hilaha ku fanaka, hi ta kota ku tiyisela entirhweni wa Yehovha ntsena loko hi pfuniwa hi moya lowo kwetsima. Leswaku hi vuyeriwa eka moya wolowo, hi fanele hi teka magoza mambirhi. Ro sungula, hi fanele hi pfumela ku kongomisiwa hi moya wa Xikwembu hi ku endla swilo leswi xi hi lerisaka swona. Ra vumbirhi, hi fanele hi phurumula maseyila ya hina, ku nga ku endla hinkwaswo leswi hi nga swi kotaka entirhweni wa Yehovha. (Ps. 119:32) Loko hi teka magoza lawa, moya lowo kwetsima wu ta hi  nyika matimba yo tiyisela maxangu ni miringo naswona wu ta hi pfuna hi kota ku tiyisela kukondza ku fika misava leyintshwa leyi Xikwembu xi hi tshembisaka yona.

12. Hi ta bula hi yini sweswi?

¹² Ku ta fikela sweswi, hi bule hi tindlela timbirhi leti moya lowo kwetsima wu hi pfunaka ha tona. Wu hi nyika matimba ni ku hi pfuna leswaku hi tshama hi tshembekile loko hi weriwa hi miringo. Wu tlhela wu hi pfuna leswaku hi kota ku ya emahlweni hi tirhela Yehovha ni ku tshama endleleni leyi yisaka evuton’wini lebyi nga heriki. Sweswi hi ta bula hi swilo swa mune leswi hi faneleke hi swi endla leswaku hi ta vuyeriwa hi xitalo eka moya lowo kwetsima.

13. Hi ku ya hi 2 Timotiya 3:16, 17, Matsalwa ma nga hi pfuna njhani naswona hi fanele hi endla yini?

¹³ Xo sungula, dyondza Rito ra Xikwembu. (Hlaya 2 Timotiya 3:16, 17.) Xiga xa Xigriki lexi hundzuluxeriweke xi va “huhuteriwe hi Xikwembu,” xi vula ku “hefemulela hi Xikwembu.” Xikwembu xi tirhise moya wa xona leswaku xi “hefemulela” mianakanyo ya xona emianakanyweni ya vatsari va Bibele. Loko hi hlaya Bibele ni ku anakanyisisa hi leswi hi swi hlayeke, nkongomiso wa Xikwembu wu nghena emianakanyweni ni le timbilwini ta hina. Marito wolawo lama huhuteriweke, ma endla hi hanya hi ndlela leyi tsakisaka Xikwembu. (Hev. 4:12) Leswaku hi vuyeriwa hi xitalo eka moya lowo kwetsima, hi fanele hi tivekela nkarhi wo dyondza Bibele nkarhi ni nkarhi hi tlhela hi anakanyisisa hi leswi hi swi hlayeke. Sweswo, swi ta endla hi hanya hi ku pfumelelana ni Rito ra Xikwembu.

14. (a) Hikwalaho ka yini hi vula leswaku etinhlengeletanweni ta hina ta Vukreste ku “hunga rimoyana ro tenga”? (b) Hi nga swi kombisa njhani leswaku hi lava ku vuyeriwa hi xitalo eka moya lowo kwetsima loko hi ri etinhlengeletanweni ta hina?

¹⁴ Xa vumbirhi, gandzelani Xikwembu swin’we. (Ps. 22:22) Etinhlengeletanweni ta hina ta Vukreste, hi kona laha “rimoyana ro tenga ri hungaka” kona. Etinhlengeletanweni ta hina ku ni moya wa Yehovha. (Nhlav. 2:29) Hikwalaho ka yini hi vula tano? Hikuva loko hi hlengeletanile ni Vakrestekulorhi, ha khongela hi kombela moya lowo kwetsima, hi yimbelela tinsimu ta Mfumo leti sekeriweke eRitweni ra Xikwembu ni ku yingisela mimbulavulo leyi andlariwaka hi vamakwerhu lava hlawuriweke hi moya lowo kwetsima. Nakambe, moya lowo kwetsima wu pfuna vamakwerhu vaxisati leswaku va hetisisa swiavelo swa vona. Leswaku hi vuyeriwa hi xitalo eka moya lowo kwetsima, hi fanele hi ta etinhlengeletanweni ta hina hi lunghekele ku hlamula. Loko hi endla tano, hi kombisa leswaku hi lava ku vuyeriwa hi xitalo eka moya lowo kwetsima.

15. Moya lowo kwetsima wu hi pfuna hi ndlela yihi loko hi ri ensin’wini?

¹⁵ Xa vunharhu, vana kona entirhweni wo chumayela. Loko hi tirhisa Bibele loko hi chumayela ni loko hi dyondzisa, hi pfumelela moya lowo kwetsima leswaku wu hi pfuna. (Rhom. 15:18, 19) Leswaku u vuyeriwa hi xitalo eka moya wa Xikwembu, u fanele u va kona ensin’wini nkarhi ni nkarhi u tlhela u tirhisa Bibele. Xin’wana lexi nga ku pfunaka, i ku tirhisa swiringanyeto swo sungula mabulo leswi nga eka Xiyimiso Xa Mahanyelo Ni Ntirho Wa Hina Wo Chumayela.

16. Hi yihi ndlela leyi kongomeke yo kombela moya lowo kwetsima?

¹⁶ Xa vumune, khongela eka Yehovha. (Mat. 7:7-11; Luka 11:13) Ndlela leyi kongomeke yo kombela moya lowo kwetsima i ku khongela eka Yehovha. A xi kona lexi nga endlaka Yehovha a nga swi twi swikhongelo swa hina kumbe ku sivela nyiko leyinene ya moya wa Xikwembu leswaku yi nga fiki eka hina, hambi ku ri makhumbi ya jele kumbe Sathana a nge swi koti ku endla tano. (Yak. 1:17) Hi fanele hi khongela njhani leswaku hi ta vuyeriwa hi xitalo eka moya lowo kwetsima? Leswaku hi kuma nhlamulo, a  hi kambisiseni mhaka ya xikhongelo hi vuenti hi ku bula hi xifaniso lexi kumekaka eka Evhangeli ya Luka ntsena. *

17. Hi dyondza yini mayelana ni xikhongelo eka xifaniso xa Yesu lexi nga eka Luka 11:5-9, 13?

¹⁷ Hlaya Luka 11:5-9, 13. Xifaniso xa Yesu xi kombisa ndlela leyi hi faneleke hi khongela ha yona loko hi kombela moya lowo kwetsima. Exifanisweni lexi, wanuna loyi u kume leswi a swi lava “hikwalaho ka ku phikelela kakwe ka vurhena.” A nga chavanga ku kombela mpfuno eka munghana wakwe hambileswi a ku ri vusiku. Yesu u xi tirhise njhani xifaniso lexi eka xikhongelo? U te: “Hambetani mi kombela, mi ta nyikiwa; hambetani mi lava, mi ta swi kuma; hambetani mi gongondza, mi ta pfuleriwa.” Hi dyondza yini emhakeni leyi? Leswaku hi kuma moya lowo kwetsima, hi fanele hi khongela hi wu kombela hi ku phikelela.

18. Hi ku ya hi xifaniso xa Yesu, hikwalaho ka yini hi tiyiseka leswaku Yehovha u ta hi nyika moya wakwe lowo kwetsima?

¹⁸ Xifaniso xa Yesu xi tlhela xi hi pfuna ku twisisa xivangelo lexi endlaka Yehovha a hi nyika moya lowo kwetsima. Wanuna loyi wa le xifanisweni a a lava ku amukela muendzi wakwe hi mandla mambirhi. A titwa a boheka ku phamela muendzi wakwe loyi a fikeke ni vusiku kambe a nga ri na nchumu. Yesu u vule leswaku muakelani wakwe u n’wi pfunile hikwalaho ko phikelela a kombela xinkwa. Xana Yesu a kandziyisa yini laha? Loko munhu loyi a nga hetisekangiki a kota ku pfuna muakelani wakwe loyi a kombelaka hi ku phikelela, swi vula leswaku Tata wa hina wa le tilweni a nge tsandzeki nikatsongo ku pfuna lava kombelaka moya lowo kwetsima hi ku phikelela! Hikwalaho, hi nga tiyiseka leswaku loko hi khongela hi kombela moya lowo kwetsima, Yehovha u ta swi hlamula swikhongelo swa hina.—Ps. 10:17; 66:19.

19. Hikwalaho ka yini hi tiyiseka leswaku hi ta hlula?

¹⁹ Hi nga tiyiseka leswaku hi ta hlula hambiloko Sathana a ya emahlweni a endla matshalatshala yo hi hlasela. Hikwalaho ka yini? Hikuva moya lowo kwetsima wu hi pfuna hi tindlela timbirhi. Yo sungula, wu hi nyika matimba yo tiyisela miringo. Ya vumbirhi, wu hi pfuna hi kota ku ya emahlweni hi tirhela Yehovha hi ri ni ntshembo wo ya hanya emisaveni leyintshwa leyi Xikwembu xi hi tshembisaka yona. Onge hi nga tiyimisela ku vuyeriwa hi xitalo eka moya lowo kwetsima!