1. Hikwalaho ka yini hi fanele hi lunghekela ku xanisiwa?

HI VUSIKU lebyi Hosi ya hina Yesu a a ta dlayiwa ha byona, u vule leswaku hinkwavo lava hlawulaka ku va vadyondzisiwa vakwe va ta vengiwa. (Yoh. 17:14) Ku sukela nkarhi wolowo ku ta fikela namuntlha, Vakreste lava tshembekaka lava nga Timbhoni ta Yehovha va xanisiwe hi vanhu lava nga gandzeliki Yehovha. (2 Tim. 3:12) Leswi makumu ma tshinelaka, valala va hina va ta ya va hi venga swinene.—Mat. 24:9.

2-3. (a) I yini leswi hi faneleke hi swi tiva hi ku chava vanhu? (b) I yini leswi hi nga ta bula ha swona exihlokweni lexi?

² I yini leswi hi nga swi endlaka sweswi leswaku hi ta kota ku tiyisela loko hi xanisiwa? A swi kali swi lava leswaku hi ringeta ku ehleketa hi swilo hinkwaswo swo biha leswi nga hi humelelaka. Loko hi ehleketa hi swilo hinkwaswo swo biha leswi nga hi humelelaka, hi nga ha khomiwa hi rhumbyana kutani hi tshika ku tirhela Yehovha hambiloko hi nga si weriwa hi maxangu. (Swiv. 12:25; 17:22) Ku chava vanhu i tlhari lerikulu leri “xirha xa [hina], Diyavulosi” a ringetaka ku hi hlasela ha rona. (1 Pet. 5:8, 9) I yini leswi hi faneleke hi swi endla sweswi leswaku hi kota ku tiyisela loko hi xanisiwa?

³ Exihlokweni lexi, hi ta dyondza ndlela leyi hi nga tiyisaka vuxaka bya hina na Yehovha ha yona ni leswaku hikwalaho ka yini swi ri swa nkoka leswaku hi endla tano sweswi. Hi ta tlhela hi dyondza leswi hi nga swi endlaka leswaku hi va ni xivindzi. Hi ta gimeta hi ku kambisisa leswi hi nga swi endlaka loko vanhu va hi venga.

4. Vaheveru 13:5, 6 yi hi byela yini naswona hikwalaho ka yini sweswo swi ri swa nkoka?

⁴ Swi tive leswaku Yehovha wa ku rhandza naswona a nga ka a nga ku fularheli. (Hlaya Vaheveru 13:5, 6.) Xihondzo xo Rindza xi tshame xi ku: “Munhu loyi a xi tivaka kahle Xikwembu u ta xi tshemba swinene loko ku fika nxaniso.” Wolowo i ntiyiso! Leswaku hi kota ku tiyisela ku xanisiwa hi fanele hi rhandza Yehovha hi mbilu hinkwayo hi tlhela hi n’wi tshemba naswona hi nga kanakani nikatsongo leswaku Yehovha wa hi rhandza.—Mat. 22:36-38; Yak. 5:11.

5. I yini leswi nga ku pfunaka leswaku u titwa u rhandziwa hi Yehovha?

⁵ Hlaya Bibele siku ni siku hi xikongomelo xa leswaku u tshinela eka Yehovha. (Yak. 4:8) Loko u ri karhi u yi hlaya, xiya leswaku Xikwembu xi njhani. Loko u ri karhi u hlaya swilo leswi Yehovha a swi vuleke ni ku swi endla ringeta ku twisisa ndlela leyi a ku rhandzaka ha yona. (Eks. 34:6) Van’wana swi nga ha va tikela ku tshemba leswaku Xikwembu xa va rhandza hikwalaho ka leswi va nga si tshamaka va kombiwa rirhandzu. Loko u titwa hi ndlela yoleyo, ringeta ku tsala tindlela leti Yehovha a ku kombaka tintswalo ni musa wa yena ha tona siku na siku. (Ps. 78:38, 39; Rhom. 8:32) Loko u ri karhi u xiya swilo leswi Xikwembu xi ku endleleke swona ku komba leswaku xa ku rhandza ni ku anakanyisisa hi leswi u swi hlayaka eBibeleni, u ta tsundzuka swilo swo tala leswi xi ku endleleke swona evuton’wini. Loko u tlangela leswi Yehovha a ku endlelaka swona, vuxaka bya wena na yena byi ta ya byi tiya.—Ps. 116:1, 2.

6. Hi ku ya hi Pisalema 94:17-19, xikhongelo lexi humaka embilwini xi nga ku pfuna njhani?

⁶ Khongela siku ni siku. Ehleketa hi xifanyatana lexi xi angarhiweke hi tata wa xona. Xi titwa xi ntshunxekile naswona a xi chavi ku phofulela tata wa xona leswinene ni leswo biha leswi xi humeleleke siku rero. Na wena u nga tiphina hi vuxaka byo tano loko u khongela eka Yehovha siku ni siku. (Hlaya Pisalema 94:17-19) Loko u ri karhi u khongela eka Yehovha, “chulula mbilu ya wena . . . ku fana ni mati,” u byela Tata wa wena hinkwaswo leswi ku chavisaka ni leswi ku karhataka. (Swir. 2:19) Ku ta humelela yini? U ta vona leswi eBibeleni swi vuriwaka “ku rhula ka Xikwembu loku tlulaka miehleketo hinkwayo.” (Filp. 4:6, 7) Loko u khongela hi ndlela leyi u ta titwa u ri ekusuhi na Yehovha.—Rhom. 8:38, 39.

7. Hi swi tiva njhani leswaku leswi Xikwembu xi hi tshembisaka swona hi Mfumo wa xona swi ta endleka hakunene?

⁷ Swi tive leswaku hinkwaswo leswi Mfumo wa Xikwembu wu hi tshembisaka swona swi ta endleka. (Tinhl. 23:19) Loko u nga swi tshembi kahle switshembiso sweswo, Sathana ni vanhu vakwe va ta ku chavisa hi ku olova. (Swiv. 24:10; Hev. 2:15) I yini leswi nga ku pfunaka leswaku u tshemba Mfumo wa Xikwembu? Tinyike nkarhi wo dyondza ni ku kambisisa switshembiso swa Xikwembu mayelana ni Mfumo wa xona ni leswaku hikwalaho ka yini u tshemba leswaku swi ta  humelela. Sweswo swi ta ku pfuna njhani? Xiya xikombiso xa Stanley Jones, loyi a a pfaleriwe ekhotsweni malembe ya nkombo hikwalaho ka ripfumelo ra yena. * I yini leswi n’wi pfuneke leswaku a tiyisela hi ku tshembeka? U te: “Leswi a ndzi swi tiva kahle switshembiso swa Mfumo wa Xikwembu ni ku swi tshemba naswona ndzi nga swi kanakani nikatsongo, a ku nga ri na lexi nga ta ndzi tsekatsekisa.” Loko u ri ni ripfumelo leri tiyeke eka switshembiso swa Xikwembu, u ta tshinela eka Yehovha naswona a wu nge chavi nchumu.—Swiv. 3:25, 26.

8. Ndlela leyi hi yi tekaka ha yona minhlangano yi hi pfuna njhani ku tikambisisa leswaku hi yi rhandza ku fikela kwihi? Hlamusela.

⁸ U nga xwi eminhlanganweni ya Vukreste. Minhlangano yi ta hi pfuna leswaku hi tshinela eka Yehovha. Ndlela leyi hi yi tekaka ha yona minhlangano yi kombisa leswi hi nga ta swi endla loko ku fika nxaniso. (Hev. 10:24, 25) Hikwalaho ka yini hi vula tano? Loko sweswi hi xwa eminhlanganweni hikwalaho ka swiphiqonyana, ku ta endleka yini enkarhini lowu taka loko hi boheka ku veka vutomi bya hina ekhombyeni leswaku hi ya hlangana ni vamakwerhu? Hi hala tlhelo, loko hi tiyimisela ku va kona eminhlanganweni, a hi nge tshiki loko valala va ringeta ku hi sivela ku hlangana ni vamakwerhu. Lowu i nkarhi wa leswaku hi rhandza minhlangano ya hina. Loko hi rhandza minhlangano, hambiloko hi kanetiwa kumbe mfumo wu sivela ntirho wa hina, hi ta ya emahlweni hi yingisa Xikwembu ku tlula vanhu.—Mint. 5:29.

9. Hikwalaho ka yini ku nhlokohata matsalwa ku ri ndlela leyinene yo lunghekela nkarhi wa ku xanisiwa?

⁹ Nhlokohata matsalwa lawa u ma rhandzaka. (Mat. 13:52) Hambileswi u rivalaka, kambe Yehovha a nga tirhisa moya wakwe wo kwetsima lowu nga ni matimba swinene leswaku wu ku tsundzuxa matsalwa wolawo. (Yoh. 14:26) Xiya leswi vuriweke hi makwerhu un’wana loyi a a pfaleriwe a ri yexe ejele le Jarimani Vuxa, u te: “A ndzi tsakile hikuva hi nkarhi wolowo a ndzi tiva matsalwa yo tala hi nhloko! Leswi a ndzi ri swanga, a ndzi anakanyisisa ngopfu hi rungula ro tala ra le Bibeleni.” Matsalwa wolawo ma pfune makwerhu leswaku a tshama a ri ekusuhi na Yehovha naswona a kota ku tiyisela a tshembekile.

10. Hikwalaho ka yini hi fanele hi nhlokohata tinsimu?

¹⁰ Yimbelela tinsimu leti dzunisaka Yehovha u tlhela u ti nhlokohata. Loko Pawulo na Silasi va ri ekhotsweni eFilipiya va yimbelele tinsimu to dzunisa Yehovha leti a va ti nhlokohatile. (Mint.  16:25) Hilaha ku fanaka, vamakwerhu va le khale ka Soviet Union loko va ri eSiberia, va ri tiyise njhani ripfumelo ra vona? Makwerhu wa xisati Mariya Fedun u ri: “Hi yimbelele tinsimu hinkwato leti a hi ti tiva leti a ti ri ebukwini ya tinsimu.” U vule leswaku tinsimu teto leti khutazaka ti va pfunile hinkwavo ka vona leswaku va tshinela ekusuhi na Yehovha. Xana u titwa u khutazeka loko u yimbelela tinsimu ta Mfumo leti u ti rhandzaka ngopfu? U nga ha yimayimi, nhlokohata tinsimu teto!—Vona bokisi leri nge “ Ndzi Nyike Xivindzi.”

11-12. (a) Hi ku ya hi 1 Samuwele 17:37, 45-47, hikwalaho ka yini Davhida a a ri ni xivindzi? (b) I yini leswi hi swi dyondzaka eka xikombiso xa Davhida?

¹¹ U fanele u va ni xivindzi leswaku u ta kota ku tiyisela nxaniso. U nga endla yini loko u titwa onge a wu na xona xivindzi? Tsundzuka leswaku ku va ni xivindzi a swi yi hi malembe, matimba ni vuswikoti bya wena. Tsundzuka leswi Davhida a swi endleke a ha ri ntsongo loko a lwa na Goliyadi. Loko hi n’wi pimanisa ni xihontlovila xexo, Davhida a a ri ntsongo, a nga ri na matimba naswona a a nga ri na swo tisirhelela ha swona. Davhida a a pfumala hambi ku ri tlhari. Kambe a ri ni xivindzi swinene. Davhida u ve ni xivindzi xo ya lwa ni xihontlovila xexo lexi tikukumuxaka.   

¹² Swi tise ku yini leswaku Davhida a va ni xivindzi xo tano? A a swi tiva leswaku Yehovha u na yena. (Hlaya 1 Samuwele 17:37, 45-47.) Davhida a nga ri na mhaka ni leswaku Goliyadi i xihontlovila. Ematshan’weni ya sweswo, a a vona Goliyadi a tifanela ni njiya loko a pimanisiwa na Yehovha. Hi dyondza yini emhakeni leyi? Hi ta titwa hi ri ni xivindzi loko hi tshemba leswaku Yehovha u na hina, niloko hi swi tiva leswaku valala va hina va tifanela ni tinjiya loko va pimanisiwa na Yehovha Xikwembu xa Matimba Hinkwawo. (2 Tikr. 20:15; Ps. 16:8) I yini leswi hi nga swi endlaka sweswi leswaku hi va ni xivindzi, ku nga si fika nkarhi wa nxaniso?

13. Hi nga endla yini leswaku hi va ni xivindzi? Hlamusela.

¹³ Hi nga va ni xivindzi loko hi chumayela van’wana mahungu lamanene ya Mfumo wa Xikwembu. Hikwalaho ka yini? Hikuva loko hi chumayela, hi dyondza ku titshega hi Yehovha ni ku va hi nga chavi vanhu. (Swiv. 29:25) Leswi ku endla vutiolori swi hi tiyisaka miri, ku chumayela hi yindlu ni yindlu, etindhawini ta mani na mani, hi xitshuketa ni le tindhawini ta mabindzu swi endla leswaku hi va ni xivindzi. Loko sweswi hi ri ni xivindzi xo chumayela, hi ta va hi lunghekile loko ntirho wa hina wu siveriwa.—1 Tes. 2:1, 2.

14-15. Hi nga dyondza yini eka Nancy Yuen na Valentina Garnovskaya?

 ¹⁴ Hi nga dyondza swo tala eka vamakwerhu lavambirhi vaxisati lava a va ri ni xivindzi hi ndlela leyi hlamarisaka. Nancy Yuen a komile, a a ri 1,5 wa timitara kambe a ri ni xivindzi swinene. * U arile ku tshika ku chumayela mahungu lamanene ya Mfumo wa Xikwembu. Hikwalaho ka sweswo, u pfaleriwe ekhotsweni malembe ya 20 eChina. Valawuri lava a va n’wi konanisa va vule leswaku u “ome nhloko ku tlula vanhu hinkwavo” etikweni.

¹⁵ Hilaha ku fanaka Valentina Garnovskaya u khomiwe kanharhu a pfaleriwa ekhotsweni le khale ka Soviet Union, loko hi hlanganisa nkarhi lowu a wu heteke ekhotsweni i malembe ya 21. * Hikwalaho ka yini? Hikuva a tiyimisele ku ya emahlweni a chumayela, lerova valawuri va kale va n’wi vula “xigevenga lexi nga ni khombo swinene.” I yini lexi endleke leswaku vavasati lavambirhi vo tshembeka va va ni xivindzi xonghasi? A va swi tiva leswaku Yehovha u na vona.

16. Hi nga endla yini leswaku hi va ni xivindzi?

¹⁶ Hilaha hi dyondzeke ha kona, leswaku hi va ni xivindzi a hi fanelanga hi tshemba matimba ni vuswikoti bya hina vini. Kambe hi fanele hi tshemba leswaku Yehovha u na hina naswona hi yena loyi a hi lwelaka. (Det. 1:29, 30; Zak. 4:6) Sweswo hi swona swi hi endlaka hi va ni xivindzi.

17-18. Hilaha swi tsariweke hakona eka Yohane 15:18-21, hi xihi xilemukiso lexi Yesu a hi nyikeke xona? Hlamusela.

¹⁷ Swa hi tsakisa loko vanhu va hi xixima, kambe loko va hi venga a hi fanelanga hi titwa hi ri swikangalafula. Yesu u te: “Ma tsaka n’wina loko vanhu va mi venga, niloko va mi hlongola ni ku mi rhukana ni ku bakanya vito ra n’wina tanihi leri hombolokeke hikwalaho ka N’wana wa munhu.” (Luka 6:22) Xana Yesu a vula yini?

¹⁸ Yesu a nga vuli swona leswaku Vakreste va ta tsaka loko va vengiwa. Kambe a hi lemukisa hi leswi a a swi tiva leswaku swi ta hi humelela. Hina a hi xiphemu xa misava leyi. Hi hanya hi leswi Yesu a swi dyondziseke naswona hi chumayela  rungula leri a ri chumayeleke. Hikwalaho ka swona, misava ya hi venga. (Hlaya Yohane 15:18-21.) Hi lava ku tsakisa Yehovha. A hi khomiwi hi tingana loko vanhu va hi venga hikwalaho ka leswi hi rhandzaka Yehovha.

19. Hi nga va tekelela njhani vaapostola?

¹⁹ U nga pfumeleli swilo leswi vanhu va swi vulaka kumbe va swi endlaka swi ku endla u khomiwa hi tingana hileswi u nga Mbhoni ya Yehovha. (Mik. 4:5) Loko hi anakanyisisa hi leswi endliweke hi vaapostola lava a va ri eYerusalema endzhakunyana ka loko Yesu a dlayiwile, hi ta tshika ku chava vanhu. A va swi tiva leswaku varhangeri va vukhongeri bya Vayuda a va va venga swinene. (Mint. 5:17, 18, 27, 28) Hambiswiritano, siku ni siku a va ya etempeleni va ya chumayela va kombisa leswaku i vadyondzisiwa va Yesu. (Mint. 5:42) A a va nga ri matoya. Na hina hi nga tshika ku chava vanhu, loko hi nga titumbeti leswaku hi Timbhoni ta Yehovha laha hi tirhaka kona, exikolweni kumbe emugangeni wa ka hina.—Mint. 4:29; Rhom. 1:16.

20. Hikwalaho ka yini vaapostola a va tsakile hambileswi a va vengiwa?

²⁰ Hikwalaho ka yini vaapostola a va tsakile? Hikuva a va xi tiva xivangelo xa ku vengiwa ka vona naswona a va swi teka ku ri lunghelo ku xanisiwa hikwalaho ko endla ku rhandza ka Yehovha. (Luka 6:23; Mint. 5:41) Endzhakunyana muapostola Petro u tsale a ku: “Hambiloko mi xaniseka hikwalaho ka ku lulama, ma tsaka.” (1 Pet. 2:19-21; 3:14) Loko hi swi twisisa leswaku hi vengiwa hikwalaho ko endla leswinene a hi nge tshiki ku tirhela Yehovha hikwalaho ko vengiwa vanhu.

21-22. (a) U ehlekete ku endla yini leswaku u lunghekela nxaniso? (b) I yini leswi hi nga ta bula ha swona eka xihloko lexi landzelaka?

²¹ A hi swi tivi leswaku nxaniso wu ta fika rini kumbe leswaku mfumo wu ta wu sivela rini ntirho wa hina wo chumayela. Lexi hi xi tivaka hi leswaku hi fanele hi lungheka sweswi, hi ku tiyisa vuxaka bya hina na Yehovha, hi ku va ni xivindzi ni hi ku dyondza ku tiyisela ku vengiwa hi vanhu. Loko hi tshama hi lunghekile sweswi, hi ta kota ku ya emahlweni hi tirhela Yehovha hambi ko ba lexi dumaka!

²² Kambe loko vugandzeri bya hina byi yirisiwile, hi ta endla yini? Exihlokweni lexi landzelaka hi ta bula hi misinya ya milawu ya Bibele leyi nga ta hi pfuna ku ya emahlweni hi tirhela Yehovha hambiloko hi yirisiwile.