XANA ndza khensa loko ndzi endleriwa swo karhi? Hinkwerhu hi fanele hi tivutisa xivutiso lexi. Bibele yi profete leswaku enkarhini wa hina, vanhu vo tala va ta va lava nga “nkhensiki.” (2 Tim. 3:2) Swi nga endleka u tiva vanhu vo karhi lava tibyelaka leswaku swilo leswi va endleriweke swona a swi boha leswaku va endleriwa. Va tibyela leswaku a swi bohi ku khensa. Swi le rivaleni leswaku a wu nge swi tsakeli ku va exikarhi ka vanhu vo tano.

Ku hambana ni sweswo, malandza ya Yehovha ma khutaziwa leswi: “Tikombeni mi ri ni ku nkhensa.” Hi fanele hi “[khensa] mayelana ni hinkwaswo.” (Kol. 3:15; 1 Tes. 5:18) Swi kahle ku va ni moya wo khensa. Ku ni swivangelo swo tala leswi endlaka hi vula tano.

Xivangelo xin’wana lexi endlaka hi va ni moya wo khensa hileswi hi lavaka ku tshama hi tsakile. Munhu loyi a khensaka u tshama a tsakile ni munhu loyi a khensiwaka na yena wa tsaka. Hikwalaho ka yini? Hi xikombiso, loko van’wana va ku endlela swo karhi, va ku endlela swona hileswi va vonaka swi fanerile. Va khathala hi wena. A swi kanakanisi leswaku wa tsaka loko u vona ndlela leyi va khathalaka ha yona hi wena. Endzhaku ka loko Bowasi a kombe Rhuti malwandla, swi le rivaleni leswaku Rhuti u tsakile hileswi a ku ri ni munhu loyi a a khathala hi yena.—Rhu. 2:10-13.

Swa fanela leswaku hi khensa Xikwembu. A swi kanakanisi leswaku mikarhi yin’wana u pfa u ehleketa hi swilo swo tala leswi xi ku endleleke swona nileswi xa ha yaka emahlweni xi ku endlela swona. (Det. 8:17, 18; Mint. 14:17) U fanele u anakanyisisa ngopfu hi swilo swo tala leswi Xikwembu xi ku endleleke swona swin’we ni maxaka ya wena. Loko u endla tano, u ta ya u n’wi tlangela swinene Muvumbi wa wena naswona u ta xiya ndlela leyi a ku rhandzaka ha yona.—1 Yoh. 4:9.

Hi fanele hi anakanyisisa hi swilo hinkwaswo leswi Yehovha a hi endlelaka swona, hi tlhela hi n’wi khensa hikwalaho ka vunene byakwe. (Ps. 100:4, 5) Ku vuriwa leswaku “ku khensa swi hoxa xandla swinene eku endleni ka leswaku vanhu va tsaka.”

Xivangelo xin’wana lexi endlaka ku khensa swi va swa nkoka hileswi swi tiyisaka vunghana. Hinkwerhu ha swi lava ku khensiwa. Loko u khensa munhu wo karhi hi leswi a ku endleleke swilo leswinene, swi endla leswaku vunghana bya n’wina byi tiya. (Rhom. 16:3, 4) Ku engetela kwalaho, vanhu lava khensaka hakanyingi va rhandza ku pfuna van’wana. Va swi vona loko van’wana va va endlela swilo leswinene naswona sweswo swi endla va titwa va susumeteleka ku endla leswi fanaka. Hakunene, ku pfuna van’wana swi tisa ntsako. Swi fambisana kahle ni leswi Yesu a swi vuleke loko a ku: “Ku nyika swi tisa ntsako lowukulu ku tlula ku amukela.”—Mint. 20:35.

Eka ndzavisiso lowu a wu endleke, Robert Emmons, un’wana wa va kongomisinkulu eYunivhesiti ya California, u te: “Leswaku hi va lava khensaka hi fanele hi tiva leswaku hi titshege hi vanhu van’wana. Mikarhi yin’wana ha nyika kasi mikarhi yin’wana ha amukela.” Leswaku hi kota ku hanya ni ku tsakela vutomi hi titshege hi vanhu van’wana. Hi xikombiso, va nga hi pfuna hi swakudya kumbe swa vutshunguri. (1 Kor. 12:21) Munhu loyi a tlangelaka wa swi khensa leswi van’wana va n’wi endlelaka swona. Xana swi le ngatini ku khensa loko u endleriwa swo karhi?

Xivangelo xin’wana, ku khensa swi endla leswaku u va ni langutelo lerinene. Hi ndlela yo karhi, miehleketo ya wena yi tirha ku fana ni sefo.  Yi endla u kota ku sefa swilo leswi u swi nghenisaka emianakanyweni ya wena. Leswi swi ta ku pfuna leswaku u nga ehleketi ngopfu hi swiphiqo swa wena kambe u ehleketisisa hi swilo leswinene. Loko u ri ni moya wo khensa, swi endla u va ni langutelo lerinene hi swilo. Nakambe sweswo swi ta ku pfuna u endla leswi vuriweke hi muapostola Pawulo loko a ku: “Nkarhi hinkwawo tsakani eHosini.”—Filp. 4:4.

Ku khensa swi endla u nga ehleketi ngopfu hi swilo swo biha. A swi koteki ku va ni moya wo khensa hi hala tlhelo u ri ni mavondzo, mahlundzu kumbe xikhomela. Nakambe vanhu lava khensaka a va rhandzi rifuwo. Mikarhi hinkwayo va eneriseka hi leswi va nga na swona.—Filp. 4:12.

Leswi u nga Mukreste, wa swi xiya ku Sathana u lava leswaku maxangu lawa u langutanaka na wona emasikwini lawa yo hetelela ma ku heta matimba. U ta tsaka loko u ngheniwa hi moya wo gungula. Loko u ri ni moya wo tano, vanhu a va nge swi tsakeli ku ku yingisela loko u va chumayela. Ku khensa swi fambisana ni mihandzu ya moya wa Xikwembu, ku katsa ni ku tsaka hikwalaho ka swilo leswinene leswi Xikwembu xi ku endleleke swona ni ku va ni ripfumelo eka switshembiso swa xona hinkwaswo.—Gal. 5:22, 23.

Leswi u nga Mbhoni ya Yehovha, a swi kanakanisi leswaku u pfumelelana na swona leswi vuriweke eka nhlokomhaka leyi mayelana ni ku khensa. Hambiswiritano, wa swi xiya leswaku ku va ni moya wo khensa ni langutelo lerinene a swi olovi. Kambe u nga swi pfumeleli sweswo swi ku heta matimba. U nga swi kota ku va loyi a khensaka ni ku va ni langutelo lerinene. Njhani? Siku ni siku ehleketa hi swilo leswi endlekaka evuton’wini bya wena leswi u nga swi khensaka. Loko u endla tano, ku khensa swi ta nghena engatini hakatsongotsongo. Sweswo swi ta endla u tsaka ku tlula vanhu lava tshamelaka ku ehleketa hi swiphiqo. Ehleketa hi swilo leswinene leswi Xikwembu ni vanhu van’wana va ku endlelaka swona leswi endlaka u tsaka. Loko swi koteka u nga tikumela xibukwana, lexi eka xona u nga ta tsala swilo swimbirhi kumbe swinharhu leswi u swi khensaka siku ni siku.

Valavisisi va vula leswaku “loko nkarhi ni nkarhi hi khensa van’wana, swi nga endla leswaku misiha ya byongo bya hina yi tirha kahle naswona swi ta endla hi tiphina hi vutomi.” Munhu loyi a khensaka u tshama a tsakile. Hikokwalaho, khensa mikateko leyi u yi kumaka, u va ni langutelo lerinene hi swilo leswi endlekaka evuton’wini bya wena naswona u tikarhatela ku va la khensaka! Ematshan’weni yo tekela swilo ehansi, “[khensa] Yehovha, hikuva hi lonene.” Ina, “[khensa] mayelana ni hinkwaswo.”—1 Tikr. 16:34; 1 Tes. 5:18.