Xana u nga swi kota ku hlamula swivutiso leswi, leswi tekiweke eka Xihondzo xo Rindza xa 2019?

Xi vula yini xitshembiso xa Xikwembu lexi nge: “Tlhari rihi ni rihi leri nga ta endleriwa ku ku hlasela a ri nge humeleli”? (Esa. 54:17)

Hi nga tiyiseka leswaku Xikwembu xi ta hi sirhelela eka “vukarhi bya lava tihanyi.” (Esa. 25:4, 5) Valala va hina a va nge swi koti ku hi xanisa hilaha ku nga heriki.—w19.01, matl. 5-7.

Ndlela leyi Xikwembu xi tirhisaneke ha yona ni Vakanana ni Vaisrayele lava xandzukeke yi byi kombise njhani vululami bya xona?

Xikwembu xi avanyise vanhu lava a va xanisa vavasati ni vana hi swa masangu. Xi katekise vanhu lava a va xi yingisa naswona a va khoma vanhu van’wana hi ndlela ya vululami.—w19.02, matl. 22-24.

Hi fanele hi endla yini loko ku khongela munhu loyi a nga riki Mbhoni?

Hi fanele hi miyela hi kombisa ku xixima kambe a hi fanelanga hi vula hi ku “amen” kumbe hi khomana hi mavoko ni vanhu van’wana loko ku khongeriwa. Hi nga khongela hi mbilu.—w19.03, matl. 30-31.

Swi bihe ku fikela kwihi ku xanisa vana?

Loko u xanisa vana u va u dyohela n’wana, vandlha, mfumo ni Xikwembu. Ematikweni lawa mfumo wu lavaka leswaku mhaka ya ku xanisiwa ka vana yi vikiwa, vakulu va fanele va landzela nawu.—w19.05, matl. 8-11.

Hi Nga Yi Hundzula Njhani Mianakanyo Ya Hina?

Swilo swa nkoka hileswi: Khongela eka Yehovha. Anakanyisisa hi xikongomelo xo tikambisisa. Hlawula vanghana hi vutlhari.—w19.06, tl. 11.

Hi nga endla yini sweswi leswaku hi lunghekela nxaniso?

Hi fanele hi tiyisa vuxaka bya hina na Yehovha. Ha tiyiseka leswaku wa hi rhandza naswona a nge hi fularheli. Hlaya Bibele siku ni siku naswona u khongela mikarhi hinkwayo. Tiyiseka leswaku switshembiso leswi Xikwembu xi hi tshembisaka swona swi ta hetiseka. Tiva Matsalwa ni tinsimu leti u tirhandzaka hi nhloko.—w19.07, matl. 2-5.

I yini leswi hi nga swi endlaka leswaku hi pfuna maxaka ya hina ma ponisiwa?

I swa nkoka leswaku hi va ni ntwelavusiwana, a hi vekeni xikombiso lexinene hi mahanyelo ya hina naswona hi lehisa mbilu ni ku va ni vuxiyaxiya.—w19.08, matl. 14-17.

I yini lexi endlaka hi phyuphya hilaha Yesu a hi tshembiseke hakona eka Matewu 11:28?

Hi ni valanguteri lavanene, hi ni vanghana lavanene ni ntirho wa nkoka ngopfu.—w19.09, tl. 23.

Yehovha u ta hi nyika matimba ya ku rhandza ni ku endla hi ndlela yihi? (Filp. 2:13)

Loko hi hlaya Rito ra Xikwembu ni ku anakanyisisa hi rona, Xikwembu xi ta hi nyika matimba yo rhandza ni ku endla. Moya wa xona wu ta hi pfuna hi antswisa vuswikoti bya hina.—w19.10, tl. 21.

Hi wahi magoza ya vutlhari lawa hi faneleke hi ma teka hi nga si endla xiboho?

Hi lawa magoza ya ntlhanu: Endla ndzavisiso. Khongela u kombela vutlhari. Kambisisa swikongomelo swa wena. Veka siku kumbe nkarhi. Ringanisela.—w19.11, matl. 27-29.

Xana mhaka ya leswaku moya a wu fi yi sungule eka marito lawa Sathana a ma byeleke Evha?

Doo! Sathana u byele Evha leswaku a nge fi, ku nga ri leswaku u ta vonaka a file kasi entiyisweni a hanya. Tidyondzo hinkwato ta mavunwa a ti ta va ti herisiwe hi nkarhi wa Ndhambi. Swi nga endleka dyondzo ya leswaku moya a wu fi yi sungule emahlweni ko va Xikwembu xi pfilunganya vanhu lava a va aka xihondzo xa Babele.—w19.12, tl. 15.