NAWU WA BIBELE: “Tshikani ku vilela hi mimoya-xiviri ya n’wina.”—Matewu 6:25.

Xana leswi swi vula yini? Yesu u vule marito wolawo eka Dyondzo yakwe ya le Ntshaveni. Hi ku ya hi xihlamuselamarito xin’wana xa Bibele, riendli ra Xigriki leri hundzuluxeriweke ri va “ku vilela” ri nga vula “ndlela leyi munhu a angulaka ha yona loko ku ri ni vusweti, ndlala ni swiphiqo leswi a langutanaka na swona siku ni siku.” Hakanyingi ku vilela swi katsa ku karhateka hi swilo leswi nga ta humelela enkarhini lowu taka. Swi tolovelekile naswona swi fanerile ku karhateka hi swilaveko swa nyama ni vuhlayiseki bya vanhu lava hi va rhandzaka. (Vafilipiya 2:20) Kambe loko Yesu a ku, “mi nga tshuki mi vilela,” a a khutaza valandzeri vakwe ku papalata ku vilela swi nga fanelanga—ku chavisiwa hi swilo swa mundzuku swi nga endla leswaku hi hanya hi nga tsakanga.—Matewu 6:31, 34.

Xana swa pfuna namuntlha? Hi ta va hi tlharihile loko hi yingisa ndzayo ya Yesu. Ha yini? Tibuku tin’wana ti ringanyeta leswaku loko vanhu va vilela ngopfu, fambiselo ra misiha ra switwi ri sungula ku ka ri nga ha tirhi naswona sweswo “swi fambisana ni swiphiqo swa rihanyo leswi katsaka ku va ni swilondza ekhwirini, vuvabyi bya mbilu ni phika.”

Yesu u vule leswaku ku vilela ngopfu: A swi pfuni nchumu. U vutise a ku: “I mani eka n’wina loyi a nga engetelaka xisungunu xin’we eka mpimo wakwe wa vutomi hikwalaho ka ku vilela?” (Matewu 6:27) Loko hi tshamela ku vilela a hi nge hanyi nkarhi wo leha. A hi minkarhi hinkwayo swilo swi nga ta va hi ndlela leyi hi anakanyaka ha yona. Xidyondzi xin’wana xi te: “Ku vilela hi vumundzuku a swi pfuni nchumu naswona vumundzuku bya xiviri bya antswa ku tlula ndlela leyi hi anakanyaka ha yona.”

Hi nga swi papalata njhani ku vilela? Xo sungula, tshemba Xikwembu. Loko Xikwembu xi nyika swinyanyana swakudya ni ku endla swiluva swi saseka, xana vanhu lava rhangisaka ku gandzela Xikwembu evuton’wini, a xi nge va nyiki swilaveko swa vona leswaku va kota ku hanya? (Matewu 6:25, 26, 28-30) Xa vumbirhi, u nga anakanyi hi swa mundzuku. Yesu u te: “Mi nga tshuki mi vilela hi siku leri tlhandlamaka, hikuva siku leri tlhandlamaka ri ta va ni mivilelo ya rona.” Xana a wu pfumelelani na swona leswaku “vubihi bya siku rin’wana ni rin’wana byi enele rona”?—Matewu 6:34.

Loko hi yingisa ndzayo ya Yesu ya vutlhari, a hi nge twi ku vava. Ku tlula kwalaho, hi ta va ni ku rhula ka mianakanyo—loku Bibele yi ku vitanaka “ku rhula ka Xikwembu.”—Vafilipiya 4:6, 7.