Rivengo Ri Ta Heriseriwa Makumu!
Hambiloko hi tshike rivengo, a hi nge swi koti ku lawula ndlela leyi van’wana va hanyaka hayona. Vanhu lava nga onhangiki nchumu va ya emahlweni va vengiwa. Loko swi ri tano, i mani loyi a nga herisaka rivengo?
I Yehovha Xikwembu ntsena loyi a nga ri heriselaka makumu rivengo leri nga kona namuntlha. Bibele yi tshembisa leswaku u ta endla tano.—Swivuriso 20:22.
XIKWEMBU XI TA HERISA LESWI VANGAKA RIVENGO
-
1. SATHANA DIYAVULOSI. Sathana loyi ku nga ntsumi leyi xandzukeke, hi yena muhlohloteri wa rivengo leri nga kona namuntlha. Xikwembu xi ta n’wi lovisela makumu Sathana ni lava vengaka van’wana.—Pisalema 37:38; Varhoma 16:20.
-
2. MISAVA LEYI TALEKE HI RIVENGO RA SATHANA. Xikwembu xi ta herisa vuhomboloki hinkwabyo lebyi nga kona namuntlha, ku katsa ni van’watipolitiki lava nga ni vukungundzwana ni varhangeri va vukhongeri lava hlohlotelaka rivengo. Xi ta tlhela xi herisa mabindzu lama nga ni vukungundzwana, makwanga ni lava dyelelaka van’wana.—2 Petro 3:13.
-
3. XIDYOHO LEXI VANHU VA VELEKIWEKE NA XONA. Bibele yi vula leswaku xidyoho lexi vanhu va velekiweke na xona xi va endla va ehleketa ni ku endla swilo swo biha. (Varhoma 5:12) Nakambe mbuyelo wun’wana lowu vangiwaka hi xidyoho lexi hi velekiweke na xona, i ku venga van’wana. Xikwembu xi ta pfuna vanhu va hlula mikhuva leyi hlohloteriwaka hi xidyoho leswaku rivengo ri heriseriwa makumu.—Esaya 54:13.
BIBELE YI TSHEMBISA MISAVA LEYI NGA RIKI NA RIVENGO
-
1. KU HAVA LOYI A NGA TA KHOMIWA HI NDLELA LEYI NGA LULAMANGIKI. Mfumo wa Xikwembu wa le tilweni wu ta fuma laha misaveni hilaha ku nga heriki. (Daniyele 2:44) Ku xanisiwa hikwalaho ka ndhawu leyi u humaka eka yona a swi nge he vi kona. Xikwembu xi ta herisa ku pfumala vululami loku vanhu va ku vonaka namuntlha.—Luka 18:7.
-
2. VANHU HINKWAVO VA TA VA NI KU RHULA. A nga kona loyi a nga ta xaniseka hikwalaho ka tinyimpi kumbe madzolonga. (Pisalema 46:9) Misava yi ta tala hi vanhu lava rhandzaka ku rhula naswona va ta va va sirhelelekile.—Pisalema 72:7.
-
3. VANHU HINKWAVO VA TA TIPHINA HI VUTOMI HILAHA KU NGA HERIKI VA NGA RI NA XIDYOHO. Vanhu hinkwavo va ta kombisana rirhandzu ra ntiyiso. (Matewu 22:39) A nga kona loyi a nga ta karhatiwa hi ku ehleketa swilo swo biha leswi endlekeke enkarhini lowu nga hundza. (Esaya 65:17) Hi nkarhi wolowo lowu nga riki na rivengo, vanhu hinkwavo “va ta tsaka swinene hikuva ku ta va ni ku rhula lokukulu.”—Pisalema 37:11.
Xana a wu swi naveli ku hanya emisaveni yo tano? Hambi ku ri sweswi, van’wana va swi kota ku tshika rivengo hi ku hanya hileswi va swi dyondzaka eBibeleni. (Pisalema 37:8) Swi tano hi timiliyoni ta Timbhoni ta Yehovha leti nga kona emisaveni hinkwayo namuntlha. Hambileswi ti humaka eka mindhavuko ni le matikweni lama nga faniki, ti ni vun’we naswona ta rhandzana.—Esaya 2:2-4.
Timbhoni ta Yehovha ti nga tsakela ku dyondza na wena Bibele leswaku ti ku dyondzisa ti ndlela leti ti pfuneke leswaku ti tiyisela ku nga khomiwi kahle ni xihlawuhlawu. Leswi ti nga ta ku dyondzisa swona, swi ta ku pfuna leswaku u tshika rivengo ivi u va ni rirhandzu. Swi ta ku olovela ku khoma vanhu hinkwavo hi rirhandzu ku katsa ni lava nga khensiki kumbe lava nga ni rivengo. Sweswo swi ta ku pfuna leswaku u tshama u tsakile sweswi naswona u ta va ni vuxaka lebyinene ni vanhu van’wana. Nakambe lexi tsakisaka, u ta dyondza leswi u nga swi endlaka leswaku u hanya ehansi ka Mfumo wa Xikwembu laha rivengo ri nga ta ka ri nga ha ri kona.—Pisalema 37:29.
U Nga Ha Tsakela
XIHONDZO XO RINDZA
I Yini Leswi Mfumo Wa Xikwembu Wu Nga Ta Swi Endla?
Yesu a a swi tiva leswaku Mfumo wa Xikwembu hi wona ntsena lowu nga herisaka swiphiqo swa vanhu laha misaveni. I yini leswi Mfumo wolowo se wu swi endleke leswaku wu tiyisa ntshembo wa hina?
XALAMUKA!
Xihlawuhlawu—Lexi Nga Pfunaka Ku Hlula Xihlawuhlawu
Hi swihi swilo swa mune leswi Mfumo wa Xikwembu wu nga ta swi endla leswaku wu herisa xihlawuhlawu?
