Leswinene Ni Leswi Hoxeke: Nkongomiso Lowu Tirhaka
Kambisisa tindhawu ta mune ta vutomi leti eka tona timiliyoni ti dyondzeke leswaku nkongomiso wa Bibele wa tirha naswona wu nga tshembiwa.
1. Vukati
Vanhu va ni mavonelo yo hambanahambana hi vukati ni leswi swi lavekaka leswaku byi va vukati lebyi tsakisaka.
BIBELE YI RI:“Un’wana ni un’wana wa n’wina u fanele a rhandza nsati wakwe hilaha a tirhandzaka hakona; hi hala tlhelo, wansati u fanele a va ni xichavo xo enta eka nuna wakwe.”—Vaefesa 5:33.
NHLAMUSELO:Vukati i lunghiselelo leri sunguriweke hi Xikwembu, kutani xa swi tiva leswaku i yini leswi lavekaka leswaku vatekani va tshama va tsakile. (Marka 10:6-9) Ntsako wu tisiwa hi loko vatekani va nga dziki eka leswi va nyikiwaka swona, kambe va dzika eka leswi un’wana ni un’wana wa vona a nyikelaka ha swona leswaku va tiyisa vukati bya vona. Wanuna loyi a rhandzaka nsati wakwe u ta swi kombisa hi ndlela leyi a n’wi khomaka hayona ni ku tlhela a n’wi khathalela. Naswona wansati loyi a xiximaka nuna wa yena u ta swi kombisa hi ndlela leyi a vulavulaka ni ku endla swilo hayona.
NKONGOMISO WA BIBELE WA TIRHA: Quang na Thi lava humaka eVietnam a va twa onge a swi koteki ku va ni vukati lebyi tsakisaka. Hakanyingi Quang a holova. U ri: “A ndzi nga ri na mhaka ni ndlela leyi Thi a titwa hayona naswona mikarhi yo tala a ndzi n’wi khomisa tingana.” Thi a a lava ku dlaya vukati. U te: “Ndzi titwe swi ndzi tikela ku tshemba ni ku xixima nuna wa mina.”
Hi ku famba ka nkarhi, Quang na Thi va dyondze leswi Bibele yi swi dyondzisaka ni ndlela yo tirhisa Vaefesa 5:33 evukatini bya vona. Quang u ri: “Ndzimana leyi yi ndzi pfune leswaku ndzi vona xilaveko xa ku va ni musa ni ku endla leswaku Thi a titwa a rhandziwa ni ku khathaleriwa hi swilo swa nyama, emirini ni le mitlhavekweni. Loko ndzi endla sweswo wa ndzi rhandza ni ku ndzi xixima.” Thi u ri: “Loko ndzi tirhisa Vaefesa 5:33 kutani ndzi kombisa nuna wa mina xichavo, u ya emahlweni a ndzi endla ndzi titwa ndzi rhandziwa, ndzi sirhelelekile naswona ndzi ri ni ku rhula.”
Leswaku u kuma rungula leri engetelekeke hi vukati, hlaya Xalamuka! No. 2 2018, leyi nga ni nhlokomhaka leyi nge, “Swilo Swa 12 Leswi Nga Endlaka Leswaku Mindyangu Yi Tsaka” eka jw.org.
2. Ndlela Yo Hanyisana Ni Van’wana
Hakanyingi vanhu va khoma van’wana hi ndlela yo biha hikwalaho ka muhlovo, rixaka, leswi va langutekisaka xiswona, vukhongeri kumbe rimbewu.
BIBELE YI RI: “Xiximani vanhu va mixaka hinkwayo.”—1 Petro 2:17.
NHLAMUSELO: Bibele a yi xi amukeli xihlawuhlawu, ku vengiwa ka vanhu va rimbewu rin’wana kumbe ku vengiwa ka vahlampfa. Ematshan’wini ya sweswo yi hi khutaza ku xixima vanhu hinkwavo ku nga khathariseki muhlovo, rixaka kumbe xiyimo xa vona xa timali. (Mitirho 10:34) Hambiloko hi nga pfumelelani ni leswi van’wana va pfumelaka eka swona kumbe leswi va swi endlaka, hi nga va kombisa musa hi tlhela hi va xixima.—Matewu 7:12.
NKONGOMISO WA BIBELE WA TIRHA: Daniel u dyondzisiwe ku languta vanhu lava humaka eAsia va ri nxungeto etikweni ra ka vona. U sungule ku venga un’wana ni un’wana loyi a humaka eAsia naswona a tlhela a va rhuketela exikarhi ka vanhu. Daniel u ri: “Ndzi yimelele swiendlo swa mina hi leswi a ndzi ehleketa leswaku ndzi kombisa ku rhandza tiko ra rikwerhu. A ndzi nga ehleketi leswaku ndlela leyi a ndzi endla swilo hayona a yi hoxile.”
Eku heteleleni, Daniel u dyondze leswi Bibele yi dyondzisaka swona. Daniel u ri: “Ndzi boheke ku cinca ndlela leyi a ndzi anakanya hayona hi ku helela. A ndzi fanele ndzi teka vanhu hi ndlela leyi Xikwembu xi va tekaka hayona, leswaku hikwerhu ha fana ku nga khathariseki laha hi humaka kona.” Daniel u hlamusela ndlela leyi a titwaka hayona sweswi loko a hlangana ni vanhu. U ri: “Hakanyingi a ndzi ehleketi hi ndhawu leyi va humaka eka yona. Sweswi ndzi rhandza vanhu va tinxaka hinkwato naswona ndzi ni vanghana emisaveni hinkwayo.”
Leswaku u kuma rungula leri engetelekeke hlaya Xalamuka! No. 3 2020, leyi nga ni nhlokomhaka leyi nge, “I Yini Lexi Nga Herisaka Xihlawuhlawu?” eka jw.org.
3. Mali
Vanhu vo tala va rhangisa rifuwo leswaku va ta tsaka ni ku va ni vumundzuku lebyinene.
BIBELE YI RI: “Vutlhari i xisirhelelo ku fana nileswi mali yi nga xisirhelelo, kambe vutivi byi pfuna hi leswi: Vutlhari byi hlayisa vutomi bya n’wini wa byona.”—Eklesiasta 7:12.
NHLAMUSELO: Ha yi lava mali, kambe a hi tiyiseki leswaku yi ta hi nyika ntsako ni vumundzuku lebyinene. (Swivuriso 18:11; 23:4, 5) Ntsako wa xiviri ni vumundzuku lebyi sirhelelekeke swi titshege hi ku tirhisa vutlhari bya Xikwembu lebyi kumekaka eBibeleni.—1 Timotiya 6:17-19.
NKONGOMISO WA BIBELE WA TIRHA: Cardo ku nga wanuna wa le Indonesia, a a hlongorisa rifuwo. U te: “Ndzi tiphine hi swilo leswi vanhu vo tala a va lava ku va na swona. A ndzi kota ku teka maendzo ni ku xava nhundzu, timovha ni tiyindlu swa manyunyu.” Kambe rifuwo rero a ri tlhaveriwanga hi dyambu. Cardo u ri: “Ndzi kanganyisiwile naswona mali leyi ndzi yi tirheleke hi matimba malembe lawa hinkwawo yi fambe hi ku copeta ka tihlo. Ndzi tirhe hi matimba ku ringana malembe yo tala leswaku ndzi hlongorisa rifuwo kambe eku heteleleni ndzi hele matimba hileswi a ndzi nga ha ri na nchumu, a ndzi titwa ndzi nga pfuni nchumu.”
Cardo u sungule ku tirhisa leswi Bibele yi swi vulaka hi mali. A nga ha tirhisi matimba yakwe hinkwawo leswaku a tihlengeletela rifuwo kambe u hlawula ku hanya vutomi byo olova. U ri: “Ndzi twa ndzi ri ni rifuwo ra xiviri hikuva ndzi ni vuxaka lebyinene ni Xikwembu. Ndzi kota ku etlela kahle nivusiku naswona ndzi tsakile.”
Leswaku u vona leswi Bibele yi swi vulaka hi mali, hlaya nhlokomhaka leyi nge, “Xana Ku Dyondzeka Ni Ku Va Ni Mali Swi Nga Endla U Hanya Vutomi Byo Antswa?” leyi nga eka Xihondzo xo Rindza No. 3 2021 eka jw.org.
4. Timhaka Ta Masangu
Vanhu va ni mavonelo yo hambanahambana loko swi ta eka leswi amukelekaka hi tlhelo ra rimbewu.
BIBELE YI RI: “Mi papalata ku tikhoma ko biha hi swa masangu. Un’wana ni un’wana wa n’wina u fanele a tiva ndlela yo lawula miri wakwe hi ku kwetsima ni ku xiximeka, ku nga ri hi ku navela ka timhaka ta masangu loku nga lawulekiki ni loku nga enerisekiki, loku fanaka ni loku vanhu lava nga xi tiviki Xikwembu va nga na kona.”—1 Vatesalonika 4:3-5.
NHLAMUSELO:Bibele yi lawula ndlela leyi hi faneleke hi hetisisa ku navela ka hina timhaka ta masangu hayona. Xiga lexi nge “ku tikhoma ko biha hi swa masangu” xi katsa vuoswi, ku xavisa miri, ku va vanhu lava nga tekanangiki va endla timhaka ta masangu, ku va vanhu va rimbewu leri fanaka va endla timhaka ta masangu ni ku va vanhu va endla timhaka ta masungu ni swiharhi. (1 Vakorinto 6:9, 10) Timhaka ta masungu i nyiko leyi humaka eka Xikwembu leyi endleriweke wanuna ni wansati lava tekaneke ntsena.—Swivuriso 5:18, 19.
NKONGOMISO WA BIBELE WA TIRHA: Wansati wa le Australia loyi a vuriwaka Kylie u ri: “Leswi ndzi nga nghenelangiki vukati a ndzi ehleketa leswaku ku endla timhaka ta masangu swi ta endla ndzi titwa ndzi rhandziwa naswona ndzi sirhelelekile. Kambe a swi vanga tano. A ndzi titwa ndzi nga sirhelelekanga ndzi tlhela ndzi va ni gome.”
Endzhakunyana Kylie u dyondzile a tlhela a tirhisa leswi Bibele yi swi dyondzisaka hi swa masangu. U ri: “Ndza swi xiya leswaku milawu ya Xikwembu yi endleriwe leswaku hi sirheleleka naswona hi nga vaviseki. Sweswi ndzi twa ndzi sirhelelekile ni ku rhandziwa hileswi ndzi endlaka swilo hilaha Yehovha a lavaka hi endla ha kona. Ku tirhisa nkongomiso wa Bibele swi ndzi pfunile leswaku ndzi nga twisiwi ku vava.”
Leswaku u kuma rungula leri engetelekeke hlaya nhlokomhaka leyi nge, “Bibele Yi Ri Yini Hi Wanuna Ni Wansati Lava Tshamaka Swin’we Va Nga Tekananga Hi Nawu?” eka jw.org.
Muvumbi wa hina u hi pfuna ku tiva leswinene ni leswi hoxeke. Hambileswi ku yingisa switsundzuxo swakwe swa mahanyelo swi nga oloviki kambe swa pfuna. Hi nga tiyiseka leswaku mikarhi hinkwayo swi ta hi tisela ntsako lowu nga heriki.
