Mahungu lamanene ya Mfumo wa Xikwembu ma le ku chumayeriweni emisaveni hinkwayo, hilaha Yesu a profeteke hakona. (Matewu 24:14) Buku ya le Bibeleni ya Daniyele yi hi byela leswaku Mfumo lowu i Mfumo wa Xikwembu. Ndzima 2 ya buku leyi, yi ni nxaxamelo wa mimfumo ya vanhu ku sukela eka wa le Babilona wa khale ku fikela enkarhini lowu wa hina. Ndzimana 44 yi vule leswi nga ta endleka enkarhini lowu taka loko yi ku:

“Xikwembu xa le tilweni xi ta veka mfumo lowu wu nga ta ka wu nga lovisiwi. Mfumo lowu wu nga ka wu nga hundziseriwi eka vanhu van’wana. Wu ta pfotlosa kutani wu herisa mimfumo leyi hinkwayo, kambe wona wu ta tshama hilaha ku nga riki na makumu.”

Vuprofeta lebyi ni vuprofeta byin’wana bya le Bibeleni, byi vula leswaku Mfumo wa Xikwembu wu ta siva mimfumo ya vanhu hinkwayo kutani wu tisa ku rhula emisaveni. Vutomi byi ta va njhani loko ku fuma Mfumo wa Xikwembu? Hi leswi switshembiso swin’wana leswinene leswi nga ta hetiseka ku nga ri khale.

 Sweswo swi vula leswaku vanhu va ta hanya va nga ha fi naswona va ta va va hetisekile emisaveni leyi nga Paradeyisi! Leswi hi leswi Muvumbi wa hina Yehovha Xikwembu a hi tshembisaka swona.

• TINYIMPI A TI NGE HE VI KONA

  Pisalema 46:9: ‘Xikwembu xi ta herisa tinyimpi ku ya fika emakumu ya misava. Vurha xi byi tshova hi le xikarhi naswona xi tshovelela fumu; tigolonyi xi ti hisa endzilweni.’

  Anakanya leswi misava yi nga ta va xiswona loko mali ni swilo leswi tirhisiwaka ku endla swibamu swi tirhiseriwa ku pfuna vanhu, ku nga ri ku va dlaya! Xitshembiso xexo xi ta hetiseka ehansi ka Mfumo wa Xikwembu.

• A KU NGE HE VI NA MAVABYI

  Esaya 33:24: “Ku hava munhu la tshamaka kona la nga ta ku: ‘Ndza vabya.’”

  Ehleketa hi misava leyi vanhu va nga ta ka va nga ha xanisiwi hi vuvabyi bya mbilu, nkhensa, malariya ni vuvabyi byin’wana. A swi nge he bohi leswaku hi va ni swibedlhele na mirhi. Vanhu lava nga ta tshama emisaveni leyintshwa va ta va va ri ni rihanyo lerinene.

• SWAKUDYA A SWI NGE HE KAYIVELI

  Pisalema 72:16: “Ku ta va ni mavele yo tala emisaveni; ma ta khapakhapa etinhlohlorhini ta tintshava.”

  Misava yi ta va na swakudya leswi eneleke vanhu, naswona hinkwavo va ta swi kuma. A ku nge he vi na ndlala ni vuvabyi lebyi vangiwaka hi ku kayivela ka swakudya.

• VANHU A VA NGE HE TWI KU VAVA, SWITLHAVI NASWONA A VA NGE HE FI

  Nhlavutelo 21:4: “[Xikwembu] xi ta sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona. Swilo swo sungula swi hundzile.”

  Sweswo swi vula leswaku vanhu va ta hanya va nga ha fi naswona va ta va va hetisekile emisaveni leyi nga Paradeyisi! Leswi hi leswi Muvumbi wa hina Yehovha Xikwembu a hi tshembisaka swona.

Xana leswi swi twala onge ko va norho ntsena? Hambileswi vo tala va nga pfumelaka leswaku vutomi lebyi nga heriki lebyi Bibele yi vulavulaka ha byona bya tsakisa kambe hikwalaho ka swivangelo swo hlayanyana va nga vona onge a byi nge endleki. Sweswo a swi hlamarisi tanihi hi leswi ku nga riki na munhu loyi a tshameke a kuma vutomi byebyo kutani a hi byela ha byona.

Vanhu va le vuhlongeni bya xidyoho ni rifu, va hanya hi ku twa ku vava, va xaniseka ni ku karhateka naswona se i khale va ri eswiyin’weni swo tika lerova va vona ku ri swa ntumbuluko. Kambe sweswo, swi hambane kule swinene ni xikongomelo xa Muvumbi wa hina Yehovha Xikwembu hi vanhu.

Lexi nga hi pfunaka ku tshemba leswi Xikwembu xi hi tshembiseke swona, hi leswi xi swi vuleke malunghana ni rito ra xona, loko xi ku: “A ri nge tlheleli eka mina ri nga ri na vuyelo, kambe kunene ri ta endla leswi ndzi swi tsakelaka, naswona ri ta humelela hakunene eka leswi ndzi ri rhumeleke swona.”—Esaya 55:11.

EBibeleni, Yehovha u hlamuseriwa tanihi Xikwembu lexi “nga hembiki.” (Tito 1:2) Leswi xi hi tshembiseke swilo leswi hinkwaswo swo tsakisa hi vumundzuku, ku ta va vutlhari ku va hi kambisisa swivutiso leswi: Xana swa koteka hakunene ku va vanhu va hanya hilaha ku nga heriki emisaveni leyi nga Paradeyisi? Hi fanele hi endla yini leswaku hi vuyeriwa eka switshembiso swa Xikwembu? Eka matluka lama landzelaka ya nkandziyiso lowu, u ta kuma rungula leri hlamulaka swivutiso leswi.