Xikwembu xi byele Adamu xi ku, ‘Siku u nga ta dya [murhi], u ta fa hakunene.’ (Genesa 2:17) Loko Xikwembu a xi vumbe Adamu leswaku a dyuhala a tlhela a fa a xi ta va xi nga n’wi nyikanga xileriso lexi. Adamu a swi tiva leswaku a nga ta fa loko a nga dyanga mbhandzu wa murhi.

A ku nga ri na xivangelo xa leswaku va dya mihandzu ya murhi lowu hikuva a ku ri ni mihandzu yo tala entangeni wa Edeni. (Genesa 2:9) Loko a va nga dyanga mihandzu ya murhi wolowo, vatekani vo sungula a va ta va va kombise leswaku va yingisa Loyi a va nyikeke vutomi. A swi ta tlhela swi kombisa leswaku va swi xiya ku Xikwembu xi ni mfanelo yo va byela leswi va faneleke va swi endla.

Leswaku hi twisisa lexi endleke leswaku Adamu na Evha va fa hi fanele hi kambisisa ndlela leyi swiendlo swa vona swi hi khumbaka ha yona. Sathana u tirhise nyoka leswaku a vula mavunwa ya rihlaza. Rungula ra le Bibeleni ri ri: “Nyoka a yi ri ni vuxiyaxiya ngopfu ku tlula swivandzana hinkwaswo swa nhova leswi Yehovha Xikwembu a swi endleke. Kutani yi ku eka wansati: “Xana hakunene i ntiyiso leswaku Xikwembu xi vule leswaku mi nga tshuki mi dya eka murhi wun’wana ni wun’wana wa ntanga?’”—Genesa 3:1.

Evha u hlamule a ku: “Mbhandzu wa mirhi ya ntanga hi nga dya. Kambe loko ku ri ku dya mbhandzu wa murhi lowu nga exikarhi ka ntanga, Xikwembu xi te, ‘Mi nga tshuki mi dya eka wona, e-e, mi nga tshuki mi wu khumba leswaku mi nga fi.’” Nyoka yi tlhele yi n’wi byela yi ku: “Entiyisweni mi nga ka mi nga fi. Hikuva Xikwembu xi tiva leswaku siku mi nga ta dya eka wona, mahlo ya n’wina ma ta pfuleka kutani mi ta fana ni Xikwembu, mi ta tiva leswinene ni leswo biha.” Sathana u vule leswaku Yehovha i muhembi ku ni leswi a va tumbetelaka swona naswona a nga lavi leswaku va tiphina hi vutomi.—Genesa 3:2-5.

Evha u tshembe leswi a byeriweke swona. U honolele nsinya wolowo. A wu koka mahlo. U khe mbhandzu ivi a sungula ku dya. Kutani Bibele yi ri: “Endzhaku ka sweswo a teka wun’wana a nyika nuna wakwe loko a ri na yena, na yena a dya.”—Genesa 3:6.

Xikwembu xi twe ku vava loko vana va xona lava xi va rhandzaka va hlawula ku nga xi yingisi. Xi endle yini? Yehovha u byele Adamu a ku: “U ta . . . tlhelela emisaveni hikuva u humesiwe eka yona. Hikuva u ntshuri u ta tlhelela entshurini.” (Genesa 3:17-19) Hikwalaho ka leswi, “masiku hinkwawo lawa Adamu a ma hanyeke a ma ri malembe ya  930, kutani a fa.” (Genesa 5:5) Adamu a nga yanga etilweni kumbe a ya hanya exivandleni xin’wana. A nga ri kona loko Yehovha a nga si n’wi vumba hi ntshuri wa misava. Loko a fa a swi fana ni loko a nga si vumbiwa, u tlhele a va tshuri wa misava lowu a vumbiweke hi wona. A nga ha va nga kona. Swi twisa ku vava!

Leswi va hlawuleke ku nga yingisi hi vomu, Adamu na Evha va lahlekeriwe hi vutomi lebyi nga heriki ni ku va lava hetisekeke. Va ve vanhu lava nga hetisekangiki lava nga ni xidyoho. Kambe leswi va dyoheke hi ku tsandzeka ku yingisa Xikwembu a swi onhelanga vona ntsena, va hundzisele xidyoho xa vona eka vatukulu va vona. Varhoma 5:12 yi ri: “Hi yona mhaka leyi, tanihi leswi xidyoho xi ngheneke emisaveni hi munhu un’we [Adamu] ni rifu hikwalaho ka xidyoho, xisweswo rifu ri tlulele vanhu hinkwavo hikuva hinkwavo va dyohile.”

Bibele yi hlamusela xidyoho ni rifu tanihi leswi swi “funengetaka vanhu hinkwavo, ni muluko lowu tsondzelaka matiko hinkwawo.” (Esaya 25:7) Leyi i gamboko leyi funengeteke misava hinkwayo leyi swi nga kotekiki ku yi balekela. Swi le rivaleni leswaku ‘hinkwerhu hi fa hikwalaho ka Adamu.’ (1 Vakorinto 15:22) Xivutiso xa nkoka lexi Pawulo a xi vutiseke hi lexi nge: “I mani loyi a nga ta ndzi ponisa eka miri lowu weriwaka hi rifu leri?” Xana u kona loyi a nga hi ponisaka?—Varhoma 7:24.