Anakanya ndlela leyi misava a yi ta va ha yona loko a ku nga ri na dyambu. Dyambu ri nyika misinya matimba yo humesa matluka, swiluva, mihandzu, timanga ni mbewu, ri tlhela ri endla leswaku nsinya wu tswonga mati emisaveni hi ku tirhisa timitsu kutani mati ma ya emakambeni ivi ma va nkahelo.

Mpfula i nyiko ya risima leyi humaka eka Xikwembu leyi endlaka leswaku misava yi hi humesela swakudya. Xikwembu xi nisa mpfula xi tlhela xi endla leswaku ku va ni tinguva, xi hi enerisa hi swakudya ni ku tata timbilu ta hina hi ntsako.

Vatatana vo tala va karhateka ngopfu hi leswaku mindyangu ya vona yi ta dya yini kumbe yi ta ambala yini. Xiya leswi Matsalwa ma swi vulaka: “Xiyisisani swinene tinyenyana ta tilo, hikuva a ti byali mbewu, a ti tshoveli, a ti hlengeleti eswitlatini; kambe, Tata wa n’wina wa le tilweni wa ti wundla. Xana a mi ti tluli hi risima?”—Matewu 6:25, 26.

“Dyondzani eka makhon’wa ya nhova leswi ma kurisaka xiswona . . . ; kambe ndza mi byela leswaku hambi ku ri [Hosi] Solomoni eku vangameni kakwe hinkwako a nga ambalanga ku fana ni rin’we ra wona. Kutani, loko Xikwembu xi xi ambexa hi ndlela yoleyo ximila xa nhova . . . , xana a xi nge mi ambexi ngopfu, n’wina?”—Matewu 6:28-30.

Leswi Xikwembu xi hi nyikaka swakudya ni swiambalo, a swi kanakanisi leswaku xi ta tlhela xi hi pfuna hi swin’wana leswi hi swi lavaka. Loko hi rhangisa ku rhandza ka Xikwembu, xi ta katekisa matshalatshala ya hina yo kuma swakudya ni ku hi pfuna hi kuma ntirho leswaku hi ta xava leswi hi swi lavaka.—Matewu 6:32, 33.

I ntiyiso leswaku hi na swivangelo leswi twalaka swo va hi rhandza Xikwembu loko hi ehleketa hi dyambu, mpfula, swinyenyana ni swiluva. Xihloko lexi landzelaka xi ta bula hi ndlela leyi Muvumbi wa hina a vulavurisaneke ha yona ni vanhu.