1. Xana ku yimbelela swi hi pfuna ku endla yini?

MUTSARI un’wana wa tinsimu la dumeke u te: “Loko u twa marito yo karhi swi ku endla u anakanyisisa. Loko u twa vuyimbeleri swa ku khumba. Kambe loko u yimbelela, marito ya kona ma khumba mbilu.” Ku vuriwa yini hi tinsimu leti hi ti yimbelelaka leswaku hi dzunisa Yehovha Tata wa hina wa le tilweni ni ku kombisa leswaku ha n’wi rhandza? A swi kanakanisi leswaku vuyimbeleri i bya nkoka evugandzerini bya hina ku nga khathariseki leswaku u yimbelela u ri wexe kumbe ni vamakwerhu.

2, 3. (a) Van’wana va titwa njhani hi ku yimbelelela ehenhla loko va ri evandlheni? (b) Hi ta kambisisa swivutiso swihi exihlokweni lexi?

² Xana u titwa njhani loko u yimbelelela ehenhla loko u ri evandlheni? Xana swi ku khomisa tingana? Eka mindhavuko yin’wana vavanuna va nga ha titwa va nga ntshunxekanga ku yimbelela exikarhi ka vanhu. Langutelo leri ri nga ha khumba vandlha hinkwaro, ngopfungopfu loko vakulu va endla mitirho yo karhi ya vandlha hi nkarhi wo yimbelela.—Ps. 30:12.

³ Loko hakunene hi teka ku yimbelela tanihi xiphemu xa vugandzeri bya hina hi ta fika hi nkarhi eminhlanganweni naswona a hi nge yi ehandle hi nkarhi wo yimbelela. Kutani u n’wana ni un’wana u fanele a tivutisa leswi: ‘Xana ndzi swi teka njhani ku yimbelela eminhlanganweni? Ndzi nga ku hlula njhani ku chava loku nga endlaka leswaku  ndzi nga swi tsakeli ku yimbelela? Naswona ndzi nga endla yini leswaku ndzi tsakela ku yimbelela?

4, 5. Vaisrayele va khale a va byi lunghiselela njhani vuyimbeleri?

⁴ Se i khale vagandzeri va Yehovha va yimbelela leswaku va dzunisa Yehovha. Ku xiyiwe leswaku loko Vaisrayele va khale va hlengeletana leswaku va gandzela Yehovha a va yimbelela. Hi xikombiso, loko Davhida a lunghiselela leswaku ku va ni ntirho wo karhi etempeleni u hlele leswaku Valevhi va 4 000 va dzunisa Yehovha hi ku yimbelela. Eka lava 4 000, va 288 a “va ri ni ntokoto.”—1 Tikr. 23:5; 25:7.

⁵ Loko ku nyiketeriwa tempele vuyimbeleri byi tlange xiphemu xa nkoka swinene. Bibele yi ri: “Hi ku hatlisa loko vayimbi va timhalamhala ni vayimbeleri va hlanganile swin’we ku humesa mpfumawulo wun’we wo dzunisa ni ku nkhensa Yehovha, ni hi ku hatlisa loko va tlakuse mpfumawulo hi timhalamhala ni hi swiphambati ni hi swichayachayana swa risimu ni ku dzunisa Yehovha, . . . ku vangama ka Yehovha a ku tate yindlu ya Xikwembu xa ntiyiso.” A swi kanakanisi leswaku sweswo swi va tiyise ripfumelo.—2 Tikr. 5:13, 14; 7:6.

6. Hlamusela ndlela leyi Nehemiya a lunghiseleleke vuyimbeleri ha yona loko a ri murhangeri eYerusalema.

⁶ Loko Nehemiya a rhangela Vaisrayele vo tshembeka leswaku va pfuxeta makhumbi ya Yerusalema, u tlhele a hlela leswaku ku va ni vayimbeleri va Valevhi lava a va ri ni swichayachayana. Loko makhumbi lawa a ma pfuxetiwa ma nyiketeriwa, ku tlangiwe vuyimbeleri byo hlawuleka lebyi endleke leswaku vanhu va tsaka swinene eka xiendlakalo xexo. Kutani a ku ri ni “mintlawa . . . yimbirhi yo nkhensa.” Loko mintlawa leyimbirhi yi ri karhi yimbelela, wun’wana a wu famba hi tlhelo lerin’wana kasi wun’wana wu famba hi tlhelo lerin’wana kutani yi fika yi hlangana ekusuhi ni laha tempele a yi ri kona leswaku yi endla vuyimbeleri byo saseka lebyi a byi ta twiwa ekule swinene. (Neh. 12:27, 28, 31, 38, 40, 43) Kutani a swi kanakanisi leswaku Yehovha wa tsaka loko a vona vagandzeri vakwe va n’wi dzunisa hi tinsimu.

7. Yesu u wu kandziyise njhani nkoka wo yimbelele evugandzerini bya Vukreste?

⁷ Ni le nkarhini wa Yesu vuyimbeleri byi ye emahlweni byi va xiphemu xa nkoka swinene xa vugandzeri bya ntiyiso. Hi vusiku bya nkoka swinene, endzhaku ka loko Yesu a simeke Xilalelo Xa Hosi, yena ni vadyondzisiwa vakwe va yimbelele tinsimu.—Hlaya Matewu 26:30.

8. Vakreste va le nkarhini wa vaapostola va hi vekele xikombiso xihi loko swi ta emhakeni yo yimbelela?

⁸ Vakreste va le nkarhini wa vaapostola va hi vekele xikombiso lexinene xo dzunisa Xikwembu hi tinsimu. Hambileswi a va hlangana emakaya ya vamakwerhu a swi va sivelanga ku yimbelelela Yehovha hi ntsako. Muapostola Pawulo u tsalele Vakreste va le Kolosa a ku: “Hambetani mi dyondzisana ni ku tsundzuxana hi tipisalema, marito yo dzunisa eka Xikwembu, tinsimu ta moya hi nsovo, mi yimbelelela Yehovha etimbilwini ta n’wina.” (Kol. 3:16) Tinsimu leti nga ebukwini ya hina ya tinsimu i ‘tinsimu ta moya leti hi faneleke hi ti yimbelela swi huma embilwini.’ I ndlela yin’wana leyi “hlonga ro tshembeka ni ro tlhariha” ri hi phamelaka ha yona.—Mat. 24:45.

9. (a) I yini leswi nga sivelaka van’wana leswaku va hlanganyela eka ku yimbelela loko hi ri emahlanganweni ni le tinhlengeletanweni? (b) Hi nga n’wi dzunisa njhani Yehovha hi ku yimbelela tinsimu naswona i vamani lava faneleke va rhangela? (Vona xifaniso lexi nga eku sunguleni ka xihloko lexi.)

⁹ Ku vuriwa yini loko ku ri leswaku ku yimbelela a swi tolovelekanga endyangwini, eka ndhavuko kumbe endhawini leyi u tshamaka eka yona? Hikwalaho ka thekinoloji ya manguva lawa, u nga swi kota ku tiphina hi ku yingisela vuyimbeleri  bya vanhu lava nga ni vuswikoti. Hambiswiritano u nga khomiwa hi tingana loko u pimanisa ndlela leyi u yimbelelaka ha yona ni ya vanhu lava dumeke lava nga ni vuswikoti. Kambe sweswo a swi fanelanga swi ku sivela ku hetisisa vutihlamuleri lebyi u nga na byona byo dzunisa Yehovha hi ku yimbelela. Ematshan’weni ya sweswo, teka buku ya wena ya tinsimu u ololoxa nhloko ivi u yimbelela swi huma embilwini! (Ezra 3:11; hlaya Pisalema 147:1.) Namuntlha, eTiholweni to tala ta Mfumo, marito ya tinsimu ma kombiwa eka swikrini naswona sweswo swi hi pfuna leswaku hi kota ku yimbelela kahle. Swa tsakisa leswi se Xikolo xa Vakulu xi nga ta katsa ni ku yimbelela tinsimu ta Mfumo. Leswi swi kombisa leswaku vakulu va fanele va rhangela eku yimbeleleni ka tinsimu hi nkarhi wa minhlangano.

10. I yini leswi hi faneleke hi swi tsundzuka loko ku chava ku hi sivela ku yimbelela leswaku hi dzunisa Yehovha?

¹⁰ Lexi endlaka van’wana va nga humesi mpfumawulo loko va yimbelela i ku chava. Van’wana va chava leswaku ku ta twala vona ntsena kumbe ku chava ku tungula van’wana. Hambiswiritano, hi fanele hi tsundzuka leswaku loko hi vulavula “hinkwerhu hi ni swihoxo leswo tala.” (Yakobo 3:2, Bibele Mahungu Lamanene) Hambiswiritano, sweswo a swi hi tshikisi ku vulavula. Kutani hikwalaho ka yini hi fanele hi pfumelela swihoxo leswi hi nga swi endlaka loko hi yimbelela swi hi tshikisa ku dzunisa Yehovha hi tinsimu?

11, 12. Hi swihi swiringanyeto swin’wana leswi nga hi pfunaka ku antswisa ndlela leyi hi yimbelelaka ha yona?

¹¹ Kumbexana hi chava ku yimbelela hikwalaho ka leswi hi ehleketaka leswaku a hi swi koti ku yimbelela. Hambiswiritano hi nga antswisa ndlela leyi hi yimbelelaka ha yona hi ku tirhisa swiringanyeto leswi hi nga ta swi kambisisa. *

¹² Ku hefemula kahle swi nga ku pfuna leswaku u kota ku yimbelela hi ku hiseka ni hi rito leri twalaka kahle.Tanihi leswi gezi ri endlaka leswaku rivoni ri lumeka, ku hefemula swi nyika rito ra  wena matimba loko u vulavula kumbe u yimbelela. U fanele u yimbelela swi twakala kumbexana ku tlula ni ndlela leyi u vulavulaka ha yona. (Vona swiringanyeto leswi kumekaka eka Buku leyi nge Vuyeriwa Eka Vuleteri Bya Xikolo Xa Vutirheli Bya Le Tilweni, eka tluka 181 ku ya eka 184, ehansi ka xihlokwana lexi nge “Hefemula Hi Mfanelo.”) Mikarhi yin’wana Bibele yi hi byela ku “Huwelela hi ku tsaka” loko hi yimbelela tinsimu to dzunisa.—Ps. 33:1-3.

13. Hlamusela leswi nga hi pfunaka leswaku hi antswisa ndlela leyi hi yimbelelaka yona.

¹³ Hi nkarhi wa vugandzeri bya ndyangu kumbe loko u ri wexe ringeta leswi landzelaka: Hlawula risimu leri u ri rhandzaka ebukwini ya hina ya tinsimu. Sungula hi ku hlaya marito ya rona hi rito ra le henhla. Kutani u koka moya ivi u hlaya xivulwa xin’we xa risimu rero hi rito leri fanaka. Kutani yimbelela xivulwa xexo hi rito leri tlakuke. (Esa. 24:14) Rito ra wena ri ta va ni matimba loko u yimbelela naswona sweswo i swinene. Naswona a wu fanelanga u pfumelela sweswo leswaku swi ku chavisa kumbe swi ku khomisa tingana!

14. (a) Ku wu pfula swinene nomu wa hina loko hi yimbelela swi nga yi antswisa njhani ndlela leyi hi yimbelelaka ha yona? (Vona bokisi leri nge: “ U Nga Swi Kota Ku Antswisa Ndlela Leyi U Yimbelelaka Ha Yona.”) (b) Hi swihi swiringanyeto leswi u vonaka swi ta ku pfuna ku antswisa ndlela leyi u yimbelelaka ha yona?

¹⁴ A wu nge swi koti ku yimbelela hi ndlela leyi twakalaka kahle loko u nga wu pfuli swinene nomu. Kutani loko u yimbelela wu pfule swinene nomu wa wena ku tlula loko u vulavula. Xana u fanele u endla yini loko u twa onge loko u yimbelela rito ra wena ri le hansi ngopfu kumbe u twa onge ra tungula? U nga kuma swiringanyeto leswi nga ku pfunaka leswaku u hlula swiphiqo sweswo eka Buku leyi nge Vuyeriwa Eka Vuleteri Bya Xikolo Xa Vutirheli Bya Le Tilweni, eka tluka 184, eka bokisi leri nge “Ku Hlula Swiphiqo Swo Karhi.”

15. (a) Hi xihi xitiviso lexi endliweke eka nhlangano wa lembe wa 2016? (b) Hi swihi swikongomelo swin’wana swo va ku humesiwe buku leyintshwa ya tinsimu?

¹⁵ Vamakwerhu a va tsake swinene loko Makwerhu Stephen Lett loyi a nga xirho xa Huvo leyi Fumaka a tivisa ku humesiwa ka buku leyintshwa  ya tinsimu leyi nge, “Yimbelelani Yehovha Hi Ku Tsaka” eka nhlangano wa lembe ni lembe wa 2016 wa Watch Tower Bible and Tract Society of Pennsylvania, leyi a yi ta sungula ku tirhisiwa eminhlanganweni ya hina. Makwerhu Lett u hlamusele leswaku xikongomelo xin’wana xo va ku pfuxetiwe buku leyi ya tinsimu a ku ri leswaku yi fambisana ni Bibele leyi pfuxetiweke ya Vuhundzuluxeri Bya Misava Leyintshwa Bya Matsalwa Yo Kwetsima. Leswi a swi katsa ku pfuxeta kumbe ku susa marito lama a ma nga ha kumeki eka Bibele ya Vuhundzuluxeri Bya Misava Leyintshwa leyi pfuxetiweke hi 2013. Nakambe ku tlhele ku engeteriwa tinsimu letintshwa leti vulavulaka hi ntirho wa hina wo chumayela ni leti kombisaka ndlela leyi hi wu tlangelaka ha yona nkutsulo. Leswi ku yimbelela ku nga xiphemu xa nkoka swinene xa vugandzeri bya hina, Huvo leyi Fumaka yi endle leswaku xifunengeto xa buku leyintshwa ya tinsimu xi fana ni xa Bibele ya Vuhundzuluxeri Bya Misava Leyintshwa leyi pfuxetiweke.

16, 17. I ku antswisiwa kwihi loku endliweke eka buku leyintshwa ya tinsimu?

¹⁶ Leswaku swi ku olovela ku tirhisa buku leyintshwa leyi nge, “Yimbelelani Yehovha Hi Ku Tsaka” tinsimu ta yona ti hleriwe kahle hi ku ya hi tinhlokomhaka. Hi xikombiso, tinsimu to sungula ta 12 ti vulavula hi Yehovha kasi leti landzelaka ta nhungu ti vulavula hi Yesu ni nkutsulo, kutani swi fambisa sweswo. Buku leyi yi ni xikombo xa tinhlokomhaka lexi nga ku pfunaka loko u lava risimu ro karhi, hi xikombiso, loko u hlawula risimu ra nkulumo ya le rivaleni.

¹⁷ Leswaku ku pfuniwa un’wana ni un’wana leswaku a yimbelela hi mbilu hinkwayo, marito man’wana ma antswisiwile kasi man’wana lama nga ha tirhisiwiki namuntlha ma susiwile kutani ma siviwa hi man’wana. Hi xikombiso, ku cinciwa ka nhlokomhaka leyi nge “Hlayisa Mbilu Ya Wena” kutani yi ku: “Hi Hlayisa Mbilu Ya Hina” a swi fanerile. Ha yini? Hikuva eminhlanganweni ni le tinhlengeletanweni ku ta vanhu vo tala lavantshwa, lava tsakelaka, vana lavatsongo ni vamakwerhu va xisati lava loko va yimbelela marito lawa swi vonakaka onge hiloko va nyika van’wana ndzayo. Hikokwalaho nhlokomhaka ya risimu leri ni marito ya kona swi antswisiwile.

18. Ha yini hi fanele hi titoloveta tinsimu leti nga ebukwini leyintshwa ya tinsimu? (Vona nhlamuselo ya le hansi.)

¹⁸ Tinsimu to tala eka buku ya tinsimu leyi nge, “Yimbelelani Yehovha Hi Ku Tsaka” ti fana ni xikhongelo. Tinsimu leti, ti nga hi pfuna ku phofulela Yehovha ta le mbilwini. Tin’wana ta tinsimu leti ti ta hi pfuna leswaku hi “khutazana erirhandzwini ni le mintirhweni leyinene.” (Hev. 10:24) Kutani, a hi titoloveteni marito ni miloti ya tona. U nga endla tano hi ku yingisela tinsimu leti nga ni marito eka jw.org. Ku titoloveta ku yimbelela tinsimu leti loko u ri ekaya swi ta ku pfuna leswaku u yimbelela hi mbilu hinkwayo loko u ri eminhlanganweni. *

19. Xana vandlha hinkwaro ri nga katseka njhani eku gandzeleni ka Yehovha?

¹⁹ Tsundzuka leswaku vuyimbeleri i xiphemu xa nkoka evugandzerini bya hina. I ndlela yin’wana leyikulu yo kombisa rirhandzu ni ku tlangela ka hina eka Yehovha. (Hlaya Esaya 12:5.) Loko u yimbelela hi ntsako u ta khutaza van’wana leswaku na vona va endla tano. Hikwalaho, hinkwavo evandlheni, lavatsongo, lavakulu ni lava ha ku sungulaka ku hlanganyela va nga katseka eka ndlela leyi yo gandzela Yehovha hi ku yimbelela. Kutani u nga pfumeleli nchumu xi ku sivela ku yimbelela hi ntsako. Ku ri na sweswo, yingisa nkongomiso lowu mupisalema a huhuteriweke ku wu tsala loko a ku: “Yimbelelelani Yehovha miloti” ina yimbelelelani hi ntsako!—Ps. 96:1.