1. I mikateko yihi leyi lunghiselelo ra nkutsulo ri endlaka leswaku hi yi kuma?

HI KUMA mikateko yo tala hikwalaho ka gandzelo ra nkutsulo ra Yesu Kreste. Lunghiselelo ra nkutsulo ri endla swi koteka leswaku vana va Adamu vo lulama va va xiphemu xa ndyangu wa Xikwembu. Nkutsulo wu tlhela wu endla swi koteka leswaku hi va ni lunghelo ro hanya hilaha ku nga heriki hi tsakile. Nakambe, gandzelo ra nkutsulo ra Kreste ri endla swo tala ku tlula ku hi nyika vumundzuku lebyinene. Ku va Yesu a fe a tshembekile eka Yehovha swi lulamise timhaka leti khumbaka swivumbiwa swa le tilweni ni swa laha misaveni.—Hev. 1:8, 9.

2. (a) Hi swihi swilo swa nkoka swinene leswi Yesu a swi katseke exikhongelweni xakwe? (Vona xifaniso lexi nga eku sunguleni ka xihloko lexi.) (b) Hi ta kambisisa yini exihlokweni lexi?

² Loko ku sale malembe mambirhi Yesu a nga si fa ni ku nyikela gandzelo ra nkutsulo, u dyondzise vadyondzisiwa vakwe ndlela yo khongela, u te va khongela hi ndlela leyi: “Tata wa hina la nge matilweni, vito ra wena a ri kwetsimisiwe. Mfumo wa wena a wu te. Ku  rhandza ka wena a ku endleke emisaveni, hilaha ku endlekaka hakona etilweni.” (Mat. 6:9, 10) Leswaku hi ya hi wu tlangela swinene nkutsulo, a hi kambisiseni leswaku wu fambisana njhani ni ku kwetsimisiwa ka vito ra Xikwembu, Mfumo wa xona ni ku hetiseka ka xikongomelo xa xona.

3. Xana vito ra Yehovha ri yimela yini naswona Sathana u ri thyakise njhani?

³ Exikhongelweni xakwe xa xikombiso, Yesu u rhange hi ku vula leswaku vito ra Xikwembu ri kwetsimisiwa. Vito ra Yehovha ri yimela leswi a nga swona. Siku rin’wana loko Yesu a khongela, u kombetele eka Yehovha tanihi “Tatana wo Kwetsima.” (Yoh. 17:11) Tanihi leswi Yehovha a kwetsimaka ni milawu yakwe ya kwetsima. Hambiswiritano, le ntangeni wa Edeni, Sathana u sole mfanelo ya Xikwembu yo va xi vekela vanhu milawu. Hi ku hembela Yehovha, Sathana u thyakise vito Rakwe ro kwetsima.—Gen. 3:1-5.

4. Yesu u ri vangamise njhani vito ra Xikwembu?

⁴ Yesu a a ri rhandza swinene vito ra Yehovha. (Yoh. 17:25, 26) U endle hinkwaswo leswi a nga swi kotaka leswaku a ri vangamisa. (Hlaya Pisalema 40:8-10.) Loko a ri laha misaveni, hambileswi a hetisekile Yesu u swi kombisile leswaku swa koteka ku hanya hi ku landza milawu ya Yehovha hi ku tshembeka. Hambiloko Sathana a endle leswaku a xaniseka a tlhela a fa kambe Yesu u tshame a tshembekile eka Tata wakwe wa le tilweni. Hi ku tshama a tshembekile, Yesu u kombise leswaku munhu loyi a hetisekeke a nga swi kota ku hanya hi milawu ya Xikwembu yo lulama.

5. Hi nga swi kombisa njhani leswaku hi vangamisa vito ra Xikwembu?

⁵ Hi nga swi kombisa njhani leswaku ha ri rhandza vito ra Yehovha? Hi nga swi kombisa hi ndlela leyi hi tikhomaka ha yona. Yehovha u lava leswaku hi kwetsima. (Hlaya 1 Petro 1:15, 16.) Leswi swi vula leswaku hi fanele hi gandzela Yehovha ntsena naswona hi n’wi yingisa hi timbilu ta hina hinkwato. Hambiloko hi xanisiwa, hi endla hinkwaswo leswi hi nga swi kotaka leswaku hi hanya hi milawu ya Yehovha yo lulama. Loko hi hanya hi ndlela leyinene, vanhu va ta hi xixima naswona sweswo swi ta endla leswaku vito ra Yehovha ri vangamisiwa. (Mat. 5:14-16) Tanihi vanhu lava kwetsimaka, hi swi kombisa hi mahanyelo ya hina leswaku milawu ya Yehovha i yinene ni leswaku swihehlo swa Sathana i mavunwa. Loko hi endla swihoxo, ha hundzuka hilaha ku heleleke naswona hi tshika ku endla swilo leswi nga tisaka xisandzu eka Yehovha.—Ps. 79:9.

6. Ha yini Yehovha a hi teka hi ri lava lulameke hambileswi hi nga hetisekangiki?

⁶ Hikwalaho ka gandzelo ra Kreste, Yehovha u rivalela hinkwavo lava kombisaka ripfumelo eka yena. Nakambe u amukela hinkwavo lava tinyiketelaka eka yena. Yehovha u teka Vakreste lava totiweke tanihi vana vakwe naswona lava tshembekaka va “tinyimpfu tin’wana” u va teka tanihi vanghana vakwe. (Yoh. 10:16; Rhom. 5:1, 2; Yak. 2:21-25) Ninamuntlha, nkutsulo wu endla hi va ni vuxaka lebyinene ni Tata wa hina wa le tilweni naswona wu endla hi kota ku vangamisa vito rakwe.

7. Hi yihi mikateko leyi nga ta va kona eMfun’weni wa Xikwembu hikwalaho ka nkutsulo?

⁷ Eka xikhongelo xakwe xa xikombiso, Yesu u tlhele a kombela Xikwembu a ku: “Mfumo wa wena a wu te.” Xana nkutsulo wu fambisana njhani ni Mfumo wa Xikwembu? Nkutsulo wu endla swi koteka leswaku ku hlengeletiwa lava 144 000 leswaku va ta va tihosi ni vaprista swin’we na Kreste etilweni. (Nhlav. 5:9, 10; 14:1) Yesu ni lava a nga ta fuma na vona, lava vumbaka Mfumo wa Xikwembu va ta endla leswaku  vanhu lava yingisaka va vuyeriwa eka nkutsulo ku ringana malembe ya gidi. Misava yi ta hundzuriwa paradeyisi naswona vanhu hinkwavo vo tshembeka va ta ya va hetiseka kutani ndyangu wa Xikwembu wa le tilweni ni wa laha misaveni wu ta va ni vun’we. (Nhlav. 5:13; 20:6) Yesu u ta pfotlosa nhloko ya nyoka a tlhela a herisa swihehlo hinkwaswo swa Sathana.—Gen. 3:15.

8. (a) Yesu u va pfune njhani vadyondzisiwa vakwe leswaku va vona nkoka wa Mfumo wa Xikwembu? (b) Namuntlha hi wu seketela njhani Mfumo wa Xikwembu?

⁸ Loko a ha ri laha misaveni, Yesu u pfune vadyondzisiwa vakwe leswaku va vona nkoka wa Mfumo wa Xikwembu. Endzhaku ka loko a khuvuriwile, hi ku hatlisa u sungule ku chumayela “mahungu lamanene ya mfumo wa Xikwembu” etindhawini to hambanahambana. (Luka 4:43) Loko Yesu a nga si tlhelela etilweni u byele vadyondzisiwa vakwe leswaku va fanele va nyikela vumbhoni ha yena “ku ya fika endhawini ya le kule swinene ya misava.” (Mint. 1:6-8) Hikwalaho ka ntirho wo chumayela hi Mfumo, vanhu emisaveni hinkwayo va ta va ni lunghelo ro dyondza hi nkutsulo ni ku fumiwa hi Mfumo wa Xikwembu. Namuntlha hi seketela Mfumo lowu hi ku seketela vamakwavo va Kreste laha misaveni leswaku ntirho wo chumayela mahungu lamanene ya Mfumo wu endliwa emisaveni hinkwayo.—Mat. 24:14; 25:40.

9. Ha yini hi nga tiyisekaka leswaku Yehovha u ta xi hetisisa xikongomelo xakwe hi vanhu?

⁹ Yesu a vula yini loko a ku: “Ku rhandza ka wena a ku endleke emisaveni”? Yehovha i Muvumbi wa swilo hinkwaswo. Loko Yehovha a vula leswaku swi ta endleka, hakunene swa endleka. (Esa. 55:11) A nge ku pfumeleli ku xandzuka ka Sathana ku endla leswaku xikongomelo xa Yena hi vanhu xi nga hetiseki. Ku sukela loko misava yi tumbuluxiwile, Yehovha a a lava leswaku misava yi tala hi vana va Adamu na Evha lava hetisekeke. (Gen. 1:28) Loko Adamu na Evha a va fe va nga ri na vana, xikongomelo xa Xikwembu hi ku tata misava hi vatukulu va vona a xi nga ta hetiseka. Hambileswi Adamu na Evha va dyoheke, Yehovha u va pfumelerile leswaku va va ni vana. Hi ku tirhisa nkutsulo, Xikwembu xi nyika vanhu hinkwavo lava kombisaka ripfumelo eka xona lunghelo ra leswaku va tlhela va va lava hetisekeke ni ku hanya hilaha ku nga heriki. Yehovha wa va rhandza swinene vanhu naswona u lava leswaku hinkwavo lava n’wi yingisaka va hanya hilaha a a lava hakona.

10. Lava feke va ta vuyeriwa njhani eka nkutsulo?

¹⁰ Ku vuriwa yini hi vanhu va tibiliyoni lava feke va nga ri kumanga lunghelo ro tiva ni ku tirhela Yehovha? Nkutsulo wu endla swi koteka leswaku vafi va tlhela va pfuxiwa. Tata wa hina wa le tilweni la nga ni rirhandzu u ta tlhela a va pfuxa ni ku va nyika lunghelo ro dyondza hi xikongomelo xa yena kutani va kuma vutomi lebyi nga heriki. (Mint. 24:15) Yehovha u lava leswaku vanhu va hanya ku nga ri leswaku va fa. Tanihi leswi a nga Munyiki wa vutomi, u ta va Tatana eka vanhu hinkwavo lava nga ta pfuxiwa. (Ps. 36:9) Hikwalaho, swa fanela leswi Yesu a hi dyondziseke ku khongela hi ndlela leyi: “Tata wa hina la nge matilweni.” (Mat. 6:9) Yehovha u nyike Yesu lunghelo ro pfuxa lava feke. (Yoh. 6:40, 44) EParadeyisini Yesu u ta va “ku pfuka ni vutomi.”—Yoh. 11:25.

11. I yini leswi Xikwembu xi lavaka ku swi endlela “ntshungu lowukulu”?

¹¹ Ku hanana ka Yehovha a hi ka vanhu vo karhi ntsena, Yesu u te: “Mani na mani la endlaka ku rhandza ka Xikwembu, hi yena a nga makwerhu wa xinuna, hi yena a nga makwerhu wa xisati, hi yena a nga manana.” (Mar. 3:35) Xikwembu xi lava leswaku vanhu vo tala va  “ntshungu lowukulu” lava humaka ematikweni hinkwawo ni tinyimba hinkwato ni tindzimi hinkwato va va vagandzeri va xona. Lava kombisaka ripfumelo eka nkutsulo ni lava endlaka ku rhandza ka Xikwembu va ta huwelela va ku: “Ku ponisiwa hi ku kolota Xikwembu xa hina, lexi tshameke exiluvelweni, ni le ka Xinyimpfana.”—Nhlav. 7:9, 10.

12. Xikongomelo xa Xikwembu hi vanhu xi kombisiwe njhani eka xikhongelo xa xikombiso?

¹² Xikongomelo xa Yehovha hi vanhu lava yingisaka xi vonaka eka marito ya xikhongelo xa Yesu xa xikombiso. Hi ku pfumelelana ni xikhongelo lexi, hi lava ku endla hinkwaswo leswi hi nga swi kotaka leswaku hi vangamisa vito ra Yehovha ni ku n’wi kwetsimisa. (Esa. 8:13) Vito ra Yesu ri vula leswaku “Yehovha I Muponisi,” naswona ku ponisiwa ka hina hikwalaho ka nkutsulo ku tisa xichavo ni ku vangama eka vito ra Yehovha. Mfumo wa Xikwembu hi wona lowu nga ta endla leswaku vanhu lava yingisaka va tiphina hi vuyelo lebyi tisiwaka hi nkutsulo. Entiyisweni, xikhongelo xa xikombiso xi hi tiyisekisa leswaku a ku na nchumu lexi nga sivelaka leswaku ku rhandza ka Xikwembu ku hetiseka.—Ps. 135:6; Esa. 46:9, 10.

13. Loko hi khuvuriwa hi va hi kombisa yini?

¹³ Ndlela yin’wana ya nkoka leyi hi nga kombisaka ku tlangela nkutsulo ha yona i ku va hi nyiketela vutomi bya hina eka Yehovha, hi kombisa ripfumelo eka nkutsulo ni ku va hi khuvuriwa. Loko hi khuvuriwa hi kombisa leswaku “hi va Yehovha.” (Rhom. 14:8) Nakambe loko hi khuvuriwa hi kombela Yehovha leswaku a hi nyika ripfalo lerinene. (1 Pet. 3:21) Yehovha u hlamula xikombelo xa hina hi ku hi basisa hi gandzelo ra ngati ya Yesu. Ha tiyiseka leswaku u ta hi nyika hinkwaswo leswi a hi tshembisaka swona.—Rhom. 8:32.

14. Ha yini hi lerisiwa ku rhandza vaakelani va hina?

 ¹⁴ Hi yihi ndlela yin’wana leyi hi nga kombisaka ku tlangela nkutsulo ha yona? Tanihi leswi rirhandzu ku nga rona leri susumetelaka Yehovha eka nchumu wun’wana ni wun’wana lowu a wu endlaka, hikwalaho u lava leswaku vagandzeri vakwe va kombisa mfanelo leyi ya nkoka swinene ku nga rirhandzu. (1 Yoh. 4:8-11) Hi kombisa leswaku hi lava ku va “vana va Tata wa [hina] la nge matilweni” hi ku va hi rhandza vaakelani va hina. (Mat. 5:43-48) Xileriso lexi nge rhandza muakelani xi landzela lexi nge u fanele u rhandza Yehovha. (Mat. 22:37-40) Ndlela yin’wana ya nkoka leyi hi kombisaka rirhandzu ro tano ha yona eka vaakelani va hina i ku chumayela mahungu lamanene ya Mfumo wa Xikwembu. Loko hi kombisa rirhandzu leri eka vanhu van’wana hi va hi vangamisa Xikwembu. Entiyisweni, loko hi yingisa xileriso xa Xikwembu xo rhandza vanhu van’wana ngopfungopfu vamakwerhu, ndlela leyi hi xi rhandzaka ha yona yi ta “endliwa [yi] hetiseka eka hina.”—1 Yoh. 4:12, 20.

15. (a) Hi yihi mikateko leyi hi yi kumaka sweswi? (b) Hi yihi mikateko leyi hi nga ta yi kuma enkarhini lowu taka?

¹⁵ Yehovha u ri loko hi kombisa ripfumelo eka nkutsulo, swidyoho swa hina swi ta “hlanguriwa.” U ta hi rivalela swidyoho swa hina hinkwaswo. (Hlaya Mintirho 3:19-21.) Hilaha se hi swi voneke ha kona, Yehovha u xave malandza yakwe lama totiweke hi nkutsulo leswaku ma va vana vakwe. (Rhom. 8:15-17) Kasi hina hinkwerhu va “tinyimpfu tin’wana” swi fana ni loko Yehovha a hi nyike xitifiketi lexi kombisaka leswaku hi ta va vana vakwe lexi tsariweke vito ra hina. Loko se hi hetisekile naswona hi ponile eka ndzingo wo hetelela, Yehovha u ta tsaka swinene loko a sayina xitifiketi xolexo ni ku hi amukela leswaku hi va vana vakwe va laha misaveni. (Rhom. 8:20, 21; Nhlav. 20:7-9) Rirhandzu leri Yehovha a nga na rona eka vana vakwe i ra hilaha ku nga heriki. Mikateko leyi vaka kona hikwalaho ka nkutsulo i ya hilaha ku nga heriki. (Hev. 9:12) Nyiko leyi ya nkutsulo yi ta tshama yi ri ya risima. A ku na munhu kumbe nchumu wo karhi lowu nga ta hi tekela yona.

16. Nkutsulo wu hi pfuna njhani leswaku hi ntshunxeka hi ku helela?

¹⁶ Diyavulosi a nge swi koti ku sivela vanhu hinkwavo lava hundzukaka hi ku helela leswaku va va xiphemu xa ndyangu wa Yehovha. Yesu u te la misaveni a ta hi fela “kan’we swi helela kwalaho.” Kutani nkutsulo lowu i wa hilaha ku nga heriki. (Hev. 9:24-26) Wu ta herisa xidyoho lexi hi xi kumeke eka Adamu. Hi nkhensa gandzelo ra Kreste leri endlaka leswaku hi ntshunxeka eka misava leyi yo biha leyi lawuriwaka hi Sathana ni leri endlaka leswaku hi nga ha ri chavi rifu.—Hev. 2:14, 15.

17. Rirhandzu ra Yehovha ri vula yini eka wena?

¹⁷ Switshembiso swa Xikwembu swa tshembeka. Ku fana ni leswi milawu yakwe ya ntumbuluko yi nga cincacinciki, Yehovha a nga cinci naswona a nge tsandzeki ku hetisisa switshembiso swakwe. (Mal. 3:6) Yehovha u hi nyike nchumu lowukulu ngopfu ku tlula vutomi. U hi nyike rirhandzu. Bibele yi ri: “Hina se hi tiva rirhandzu leri Xikwembu xi nga na rona eka hina naswona hi ri khorwile. Xikwembu i rirhandzu.” (1 Yoh. 4:16) Misava hinkwayo yi ta va paradeyisi, hi ta va ni ntsako lowukulu naswona un’wana ni un’wana u ta kombisa mfanelo ya Xikwembu ku nga rirhandzu. Kutani malandza hinkwawo ya Yehovha lama nga etilweni ni laha misaveni ma ta huwelela ma ku: “Ku dzuneka ni ku vangama ni vutlhari ni ku nkhensa ni ku xiximiwa ni matimba ni ntamu a swi ve eka Xikwembu xa hina hi masiku ni masiku. Amen.”—Nhlav. 7:12.