1, 2. Yehovha u va pfune njhani vanhu vakwe hi singita?

YEHOVHA i Xikwembu lexi hananaka. Hinkwaswo leswi hi nga na swona swi huma eka yena. Silivhere ni nsuku ni hinkwaswo leswi nga laha misaveni i swa Yehovha naswona u tirhisa swona ku hi nyika vutomi. (Ps. 104:13-15; Hag. 2:8) Bibele yi ni marungula yo tala ya ndlela leyi Yehovha a phameleke malandza yakwe hi singita.

² Yehovha u nyike Vaisrayele manna ni mati loko va ri emananga ku ringana malembe ya 40. (Eks. 16:35) Hikwalaho ka sweswo, “a va pfumalanga nchumu.” (Neh. 9:20, 21) Yehovha u tirhise muprofeta Elixa ku tatisa mafurha ya noni yo tshembeka hi singita. Sweswo swi endle leswaku yi kota ku hakela swikweleti ni ku tlhela yi va ni mali yo tihanyisa swin’we ni vana va yona. (2 Tih. 4:1-7) Hi ku pfuniwa hi Yehovha Yesu u tlhele a kota ku nyika vanhu swakudya ni ku humesa mali loko yi laveka.—Mat. 15:35-38; 17:27.

3. Hi ta kambisisa yini exihlokweni lexi?

³ Swilo hinkwaswo swi huma eka Yehovha naswona swi endla  leswaku ku va na vutomi laha misaveni. Hambiswiritano, u lava leswaku malandza yakwe ma tirhisa rifuwo ra wona leswaku ma seketela nhlengeletano yakwe. (Eks. 36:3-7; hlaya Swivuriso 3:9.) Ha yini Yehovha a lava leswaku hi n’wi nyika swilo swa hina swa nkoka? Malandza ya Yehovha ya le nkarhini lowu hundzeke ma va seketele njhani lava a va rhangela, leswaku va yisa mintirho ya Yehovha emahlweni? Nhlengeletano yi yi tirhisa njhani mali leyi nyikeriwaka namuntlha? Exihlokweni lexi hi ta kambisisa swivutiso leswi.

4. Xana hi kombisa yini eka Yehovha loko hi seketela ntirho wakwe?

⁴ Ku nyikela ka hina eka Yehovha swi kombisa leswaku ha n’wi rhandza ni leswaku ha swi tlangela leswi a hi endlelaka swona. Hi sala hi lo gabaa, loko hi xiya hinkwaswo leswi Yehovha a hi endleleke swona. Loko hosi Davhida a hlamusela leswi a swi ta laveka leswaku ku akiwa tempele u vule leswaku hinkwaswo leswi hi nga na swona swi huma eka Yehovha naswona loko hi nyikela, hi va hi n’wi nyika leswi hi nyikiweke hi yena.—Hlaya 1 Tikronika 29:11-14.

5. Matsalwa ma swi kombisa njhani leswaku ku nyikela i xiphemu xa nkoka evugandzerini bya hina?

⁵ Ku nyikela i ndlela yin’wana yo gandzela Yehovha. Exivonweni, muapostola Yohane u twe malandza ya Yehovha ya le tilweni ma ku: “Swa ku fanela, Yehovha, wena Xikwembu xa hina, ku amukela ku vangama ni ku xiximiwa ni matimba, hikuva u tumbuluxe swilo hinkwaswo, naswona hikwalaho ka ku rhandza ka wena swi ve kona, swi tumbuluxiwile.” (Nhlav. 4:11) Hakunene Yehovha u faneriwa hi ku vangama ni ku xiximiwa naswona hi nga endla tano hi ku n’wi nyika swa nkoka eka leswi hi nga na swona. Yehovha u rhume Muxe ku byela Vaisrayele leswaku va fanele va hlengeletana emahlweni ka yena kanharhu hi lembe. Leswi tinhlengeletano teto a ku ri xiphemu xa vugandzeri bya vona eka Yehovha, a va nga fanelanga va “humelela emahlweni ka Yehovha [va] nga khomanga nchumu.” (Det. 16:16) Hilaha ku fanaka ku pfula xandla hi seketela ntirho wa Yehovha wa laha misaveni i xiphemu xa nkoka xa vugandzeri bya hina.

6. Ku hanana swi hi pfuna njhani? (Vona xifaniso lexi nga eku sunguleni ka xihloko lexi.)

⁶ Ku nyikela swa hi pfuna na hina. Loko hi nyika hi nga amukeli ntsena swi endla leswaku hi tsaka. (Hlaya Swivuriso 29:21.) Hi nga anakanya hi n’wana loyi a xavelaka vatswari nyiko yo karhi hi mali yitsongo leyi va hambaka va n’wi nyika yona. Swi le rivaleni leswaku vatswari va yi tlangela swinene nyiko yoleyo. N’wana loyi a ha tshamaka ekaya naswona a nga phayona a nga ha nyika vatswari mali yo karhi leswaku a va pfuna hi swa le kaya. Hambiloko vatswari va nga swi langutelanga, va yi amukela nyiko yoleyo hikuva va swi tiva leswaku i ndlela leyi a kombisaka ku tlangela leswi va n’wi endlelaka swona. Hilaha ku fanaka, Yehovha wa swi tiva leswaku ku hanana swi hi endla vanhu.

7, 8. Vanhu va Yehovha va le nkarhini wa Bibele va hi vekele xikombiso xihi loko swi ta emhakeni yo nyikela (a) loko ku endliwa mitirho yo karhi yo hlawuleka? (b) loko va seketela ntirho wakwe?

⁷ Mhaka ya ku nyikela hi leswi munhu a nga na swona ya hlamuseriwa eMatsalweni. Mikarhi yin’wana vanhu va Yehovha a va nyikela leswaku ku endliwa mitirho yo karhi. Hi xikombiso, Muxe u kombele minyikelo ya ku aka tabernakela nakambe Hosi Davhida na yena u endle tano leswaku ku ta akiwa tempele. (Eks. 35:5; 1 Tikr. 29:5-9) Enkarhini wa hosi Yehowaxi, vaprista va pfuxete yindlu ya Yehovha hi mali leyi hlengeletiweke. (2 Tih. 12:4, 5) Enkarhini wa vaapostola loko vamakwerhu va kume  mahungu ya leswaku vamakwerhu va le Yudiya va sika hi ndlala va “[tiyimisele] ku rhumela swo phalala vamakwavo lava tshamaka eYudiya un’wana ni un’wana wa vona hilaha a kotaka hakona.”—Mint. 11:27-30.

⁸ Mikarhi yin’wana vanhu va Yehovha a va seketela lava rhangelaka hi minyikelo leswaku va hetisisa ntirho wo karhi. Ehansi ka Nawu wa Muxe, Valevhi a va nga yi kumi ndzhaka ku hambana ni tinxaka letin’wana. Hambiswiritano Vaisrayele a va va nyika vukhume leswaku va kota ku ya emahlweni ni ntirho wa vona wa le tabernakeleni. (Tinhl. 18:21) Hilaha ku fanaka Yesu ni vaapostola vakwe va vuyeriwile hikwalaho ka ku hanana ka vavasati “lava a va va tirhela hi leswi nga swa vona.”—Luka 8:1-3.

9. Vaisrayele ni vaapostola a va yi kuma kwihi minyikelo leyi a va nyikela ha yona?

⁹ Minyikelo leyi a va yi nyikela a va yi kuma hi tindlela to hambanahambana. Loko Vaisrayele va nyikela leswaku ku ta akiwa tabernakela emananga, minyikelo ya vona a yi katsa leswi va sukeke na swona aEgipta. (Eks. 3:21, 22; 35:22-24) Enkarhini wa vaapostola van’wana va xavise swilo swa vona swo tanihi masimu kumbe tindlu kutani va yisa mali ya kona eka vaapostola. Vaapostola va yise mali yoleyo eka vanhu lava pfumalaka. (Mint. 4:34, 35) Van’wana va veka mali yo karhi nkarhi ni nkarhi leswaku va seketela ntirho wa mfumo. (1 Kor. 16:2) Hikwalaho, vanhu va swiyimo swo hambanahambana, lava fuweke kumbe swisiwana va hoxa xandla hi ku nyikela.—Luka 21:1-4.

10, 11. (a) Hi nga ma tekelela njhani malandza ya Yehovha ya le mikarhini ya Bibele? (b) U titwa njhani hi lunghelo leri u nga na rona ro seketela ntirho wa Xikwembu?

¹⁰ Namuntlha na hina hi nga komberiwa ku nyikela leswaku ku endliwa ntirho wo karhi. Hi xikombiso, xana ku lava ku akiwa Holo ya Mfumo evandlheni ra ka n’wina? Kumbe xana Holo ya Mfumo ya le vandlheni ra ka n’wina ya pfuxetiwa? Hi nga ha komberiwa ku nyikela leswaku ku pfuxetiwa rhavi ra le tikweni ra ka hina, kumbe ndhawu leyi vandlha ra ka hina ri nga ta khomela kona nhlengeletano kumbe ku pfuna vamakwerhu lava hlaseriweke hi timhangu ta ntumbuluko. Hi tlhela hi seketela lava tirhaka eyindlunkulu ya misava hinkwayo ni lava tirhaka emarhavini. Minyikelo ya hina yi seketela varhumiwa, maphayona yo hlawuleka ni valanguteri va miganga. A swi kanakanisi leswaku ni vandlha ra ka n’wina ri hoxa xandla ku seketela ntirho wa misava hinkwayo wo aka Tiholo ta Tinhlengeletano ni Tiholo ta Mfumo leswi vuyerisaka vamakwerhu emisaveni hinkwayo.

¹¹ Hinkwerhu hi nga hoxa xandla eku seketeleni ka ntirho lowu Yehovha a wu hetisisaka enkarhini lowu wa makumu. Lava humesaka minyikelo a va tsali mavito ya vona. Hi hoxa minyikelo yoleyo hi vutlhari emabokisini lama nga kona eHolweni ya Mfumo kumbe hi nyikela eka Internet hi ku tirhisa jw.org. Hi nga vona onge minyikelo ya hina i yitsongo lerova a yi pfuni nchumu. Kambe minyikelo yo tala namuntlha yi hlengeletiwa eka mali yitsongo leyi nyikeriwaka hi vamakwerhu vo hambanahambana ku nga ri hileswi va nga ni mali yo tala. Vamakwerhu hambiloko va ri swisiwana, va fana ni vamakwerhu va le Makedoniya lava a va ri ‘evusiwanini lebyikulu’ lava na vona va kombeleke ku nyikela.—2 Kor. 8:1-4.

12. Nhlengeletano yi ti karhata hi ndlela yihi leswaku yi tirhisa mali leyi nyikeriwaka hi ndlela leyinene?

¹² Huvo leyi fumaka yi khongelela ku tirhisa minyikelo ya nhlengeletano hi vutlhari ni hi ku tshembeka. (Mat. 24:45) Mali ya nhlengeletano yi hleriwa kahle ni ku tirhisiwa hi ndlela leyinene. (Luka 14:28) Enkarhini wa Bibele valanguteri va mali leyi nyikeriweke a va landzela  nkongomiso leswaku va tiyiseka ku mali leyi nyikeriweke yi tirhisiwa hi ndlela leyi faneleke. Hi xikombiso, Ezra u tlhelele eYerusalema a ri ni nsuku, silivhere ni swilo swin’wana swa nkoka leswi nyikeriweke leswi namuntlha swi tlulaka 100 wa timiliyoni ta tidolara (U.S.). Ezra u teke nhundzu leyi nyikeriweke yi ri minyikelo ya ku tirhandzela leyi yaka eka Yehovha. Hiloko a hlela ndlela leyi nga ta tameriwa ha yona loko va tlhelela eYerusalema, ku tiyiseka leswaku yi hlayisekile tanihi leswi a va famba endhawini leyi nga ni khombo. (Ezra 8:24-34) Muapostola Pawulo u hlengelete minyikelo leyi a yi ta pfuna vamakwerhu va le Yudiya lava a va ri exiyin’weni xo tika. U tiyisekile leswaku lava a va ta yisa minyikelo yoleyo va “endla lunghiselelo ro tshembeka, ku nga ri ntsena emahlweni ka Yehovha, kambe ni le mahlweni ka vanhu.” (Hlaya 2 Vakorinto 8:18-21.) Namuntlha nhlengeletano yi tekelela xikombiso xa Ezra na Pawulo hi ku landzela magoza yo karhi loko swi ta eku hlayiseni ni le ku tirhiseni ka mali ya minyikelo.

13. Hi fanele hi titwa njhani hi ndlela leyi nhlengeletano yi ringeteke ku hunguta ndlela leyi yi tirhisaka mali ha yona?

¹³ Ndyangu wu nga hlela ku olovisa vutomi bya wona hi ku ringanisela loko swi ta emhakeni ya leswi wu faneleke wu swi xava leswaku wu ta kota ku endlela Yehovha swo tala. Swi tano ni hi nhlengeletano ya Yehovha. Emalembeni ya sweswinyana, ku ve ni mitirho yo tala leyi nhlengeletano yi yi endleke. Mikarhi yin’wana, a ku huma mali yo tala ku tlula leyi a yi nghena. Kutani nhlengeletano yi lave tindlela to hunguta ndlela leyi yi tirhisaka mali ha yona ni ku endla mitirho yo olova leswaku yi kota ku endla swo tala hi mali leyi u yi nyikelaka.

14-16. (a) Hi swihi swilo swin’wana leswi endliwaka hi minyikelo ya wena? (b) U vuyeriwa njhani eka leswi endliwaka hi minyikelo leyi?

¹⁴ Malandza yo tala ya Yehovha lama ku nga khale ma n’wi tirhela ma vula leswaku a ma se tshama ma phameriwa hi ndlela leyi ematin’wini. Anakanya hi mhaka leyi! A hi khale ku sungule ku va na jw.org na Vuhaxi Bya JW. Bibele ya Vuhundzuluxeri Bya Misava Leyintshwa Bya Matsalwa Yo Kwetsima leyi humesiweke hi 2013 yi kumeka hi tindzimi to tala. Hi 2014 na hi 2015 ku ve ni tinhlengeletano ta matiko hinkwawo ta masiku manharhu leti khomeriweke eswitediyamu leswikulu emadorobeni ya 14 emisaveni hinkwayo leti a ti ri ni nhlokomhaka leyi nge, “Hambetani Mi Lava Mfumo Wa Xikwembu Ku Sungula!” Lava a va ri kona a va tsakile swinene.

 ¹⁵ Vo tala va ba mandla va vuyelela hi leswi nhlengeletano ya Yehovha yi hi endlelaka swona. Hi xikombiso, vatekani van’wana lava tirhelaka eAsia va te: “Hi tirhela exidorobanini. Hikwalaho ka sweswo mikarhi yin’wana hi titwa hi ri ekule ni vamakwerhu kutani hi pfa hi rivala vukulu bya nhlengeletano ya Yehovha. Kambe loko hi hlalela Vuhaxi Bya JW, hi tsundzuka leswaku hi xiphemu xa nhlengeletano ya misava hinkwayo. Vamakwerhu lava hi nga na vona evandlheni bya va tsakisa Vuhaxi Bya JW. Va vula leswaku endzhaku ko languta Vuhaxi Bya JW va titwa va ri ekusuhi na swirho swa Huvo leyi Fumaka. Sweswi va tinyungubyisa swinene hi ku va enhlengeletanweni ya Yehovha.”

¹⁶ Ku ni Tiholo ta Mfumo ta 2 500 leti lavaka ku akiwa ni ku pfuxetiwa emisaveni hinkwayo. Endzhaku ka loko vamakwerhu va le Honduras va sungule ku tirhisa Holo ya Mfumo va tsale va ku: “Ha tsaka hi leswi hi nga xiphemu xa nhlengeletano ya Yehovha naswona ha tiphina hi ku va ni vamakwerhu emisaveni hinkwayo lava hi pfuneke leswaku hi kota ku va ni Holo ya Mfumo.” Vo tala va titwa hi ndlela leyi fanaka loko va kuma Bibele ni mikandziyiso yin’wana hi ririmi ra vona, loko vamakwerhu va va phalala endzhaku ka mhangu, kumbe loko va vona vuyelo lebyi vaka kona hi ku chumayela hi xigolonyana ni ku chumayela etindhawini ta mani na mani etindhawini ta ka vona.

17. Ndlela leyi nhlengeletano yi tirhaka ha yona namuntlha yi swi kombisa njhani leswaku Yehovha wa hi seketela?

¹⁷ Vanhu van’wana a va swi twisisi leswaku swi kotekisa ku yini leswaku mitirho leyi hinkwayo yi endliwa hi minyikelo ya ku tirhandzela. Endzhaku ka loko mulanguteri wun’wana a endzele muako wun’wana wa hina wo kandziyisa, u hlamale swinene loko a twa leswaku muako wolowo wu akiwe hi vatirhi va ku tirhandzela ni hi minyikelo ya ku tirhandzela, naswona a hi pfuniwanga hi khampani yo karhi. U vule leswaku a swi tolovelekanga ku endla leswi hi swi endlaka. Na hina ha pfumela! Ha swi tiva leswaku sweswo swi koteka hikwalaho ka leswi Yehovha a hi seketelaka.—Yobo 42:2.

18. (a) Hi yihi mikateko leyi hi yi kumaka loko hi seketela mitirho ya Mfumo? (b) Hi nga va letela njhani vana swin’we ni lava ha ku sungulaka ku hlanganyela leswaku na vona va nyikela?

¹⁸ Yehovha u hi nyike lunghelo ro seketela ntirho lowukulu lowu endliwaka namuntlha. Wa hi tiyisekisa leswaku hi ta kuma mikateko loko hi seketela ntirho wa Mfumo. (Mal. 3:10) Yehovha u tshembisa leswaku loyi a nyikaka hi ku swi rhandza u ta tsaka. (Hlaya Swivuriso 11:24, 25.) Ku nyika swi endla leswaku hi tsaka hikuva Bibele yi ri: “Ku nyika swi tisa ntsako lowukulu ku tlula ku amukela.” (Mint. 20:35) Hi ni lunghelo ro letela vana ni lava ha ku sungulaka ku hlanganyela hi ku va vekela xikombiso lexinene lexi nga ta va pfuna leswaku va hoxa xandla ni ku kombisa leswaku va ri tlangela lunghiselelo leri, naswona sweswo swi ta endla leswaku va kuma mikateko yo tala.

19. Xihloko lexi xi ku khutaze yini?

¹⁹ Hinkwaswo leswi hi nga na swona swi huma eka Yehovha. Loko hi nyikela hi kombisa leswaku ha n’wi rhandza naswona ha swi tlangela leswi a hi endlelaka swona. (1 Tikr. 29:17) Loko va nyikele leswaku ku ta akiwa tempele, ‘vanhu va tsakile hi magandzelo ya vona ya ku tirhandzela lawa va ma humeseke, hikuva va humese magandzelo ya ku tirhandzela eka Yehovha hi mbilu leyi heleleke.’ (1 Tikr. 29:9) Onge na hina hi nga tsaka ni ku eneriseka loko hi tlherisela Yehovha leswi nga swa yena.