INA mikarhi yin’wana. Anakanya hi xikombiso lexi kumekaka eka Deteronoma 24:14, 15 lexi nge: “U nga tshuki u dyelela mutirhi la thoriweke loyi a karhatekaka, loyi a nga xisiwana, hambi i wa vamakwenu kumbe wa valuveri lava nga etikweni ra wena . . . leswaku a nga rili ha wena eka Yehovha, kutani swi ta va xidyoho eka wena.”

Ku kumeke rungula rin’wana leri yelanaka ni tsalwa leri nga laha henhla leri tsariweke hi va-700 BC ku ya eka 601 BC ekusuhi ni le Axidodo. Kumbexana a swi tsaleriwe mutshoveri loyi a hehliwa hi ku tsandzeka ku yisa mpimo lowu a wu laveka wa mavele, rungula leri a ri tsariwe eka xiphepherhele xa vumba ri ri: “Endzhaku ka masikunyana loko nandza [muvileri] wa wena a hete ku tshovela, Hoshayahu n’wana wa Shobay u tile a ta teka nguvu ya nandza wa wena. . . . Vanghana va mina hinkwavo lava a ndzi tshovela na vona dyambu ri ri karhi ri tuvika va nga nyikela vumbhoni . . . bya leswi ndzi swi vulaka. A ndzi dyanga xa munhu. . . . Loko muavanyisi a vona swi nga fanelanga hi ku ya hi nawu leswaku nguvu ya nandza wa wena yi vuya, a swi endle hikwalaho ka ntwelavusiwana! U nga swi bi hi makatla.”

N’wamatimu la vuriwaka Simon Schama u ri: “Rungula leri, a ro kombisa ntsena leswaku nandza loyi a swi lava hi mbilu hinkwayo leswaku nguvu yakwe yi vuya. Kambe ri tlhela ri kombisa leswaku a a tiva swo tala hi nxaxamelo wa milawu ya le Bibeleni ngopfungopfu leyi kumekaka ebukwini ya Levhitika na Deteronoma leyi a yi lwisana swinene ni ku va swisiwana swi nga khomiwi kahle.”