MARITO lama nga laha henhla ma vuriwe hi Davhida wa le Israyele wa khale loko a bumabumela wansati loyi a hlanganeke na yena. Vito ra wansati yoloye a ku ri Abigayele. I yini lexi endleke leswaku Davhida a n’wi bumabumela naswona hi nga vuyeriwa njhani eka xikombiso xakwe?

Davhida u hlangane ni wansati yoloye loyi a a tekiwile hi nkarhi lowu a a baleka Hosi Sawulo. Abigayele a ri nsati wa Nabali loyi a fuwile swinene naswona a ri ni swifuwo swo tala leswi a swi tshama etindhawini ta tintshava ta le dzongeni wa Yuda. Davhida ni vavanuna vakwe a va fana ni ‘rirhangu leri rhendzeleke’ varisi ni swifuwo swa Nabali. Hi ku famba ka nkarhi, Davhida u rhume majaha eka Nabali leswaku ma ya kombela ‘xin’wana ni xin’wana lexi voko ra Nabali ri nga xi kumaka’ leswaku va ta kota ku kuma swakudya. (1 Sam. 25:8, 15, 16) Leswi Davhida a swi kombeleke a swi fanela tanihi leswi yena ni vavanuna vakwe va sirheleleke varisi ni swifuwo swa Nabali.

Kambe Nabali u hanye hi ku pfumelelana ni vito rakwe leri vulaka leswaku “Xihunguki” kumbe “Xiphukuphuku.” U karihile a tlhela a rhukana Davhida naswona a nga xi amukelanga xikombelo xakwe. Kutani Davhida u hlele ku ya hlasela Nabali hikwalaho ka ndlela yo biha leyi a anguleke ha yona eka musa lowu a n’wi kombeke wona. Nabali a a hoxe ndyangu wakwe ekhombyeni hikwalaho ka swiendlo swakwe swa vuphukuphuku.—1 Sam. 25:2-13, 21, 22.

Hi ku xiya leswaku Davhida a ta veka vuxaka byakwe na Yehovha ekhombyeni, hi xivindzi Abigayele u nghenelerile. Hi xichavo u kombele Davhida leswaku a nga dyoheli Yehovha. Kutani u nyike Davhida loyi a ta va hosi swakudya swin’we ni malandza yakwe. Davhida u swi xiyile leswaku Yehovha u tirhise Abigayele ku n’wi sivela ku endla nchumu lowu a wu ta endla leswaku a endla xidyoho. Kutani Davhida u byele Abigayele a ku: “A ku katekisiwe ku twisisa ka wena, a ku katekisiwe wena u nga ndzi sivela esikwini leri leswaku ndzi nga vi na nandzu wa ngati.”—1 Sam. 25:18, 19, 23-35.

Ku hambana na Nabali loyi a nga tlangeli, hi fanele hi tlangela swilo leswinene leswi hi endleriwaka swona. Ku engetela kwalaho, loko hi xiya leswaku ku lava ku endleka nchumu wo karhi lowu nga ni khombo, hi fanele hi endla matshalatshala yo wu sivela. Loko hi endla tano, hi ta vula marito lama vuriweke hi mupisalema loyi a byeleke Xikwembu a ku: “Ndzi dyondzise vunene, ku twisisa ni vutivi.”—Ps. 119:66.

Loko hi endla swilo hi vutlhari van’wana va ta swi xiya. Ku nga khathariseki leswaku va swi vula hi ku kongoma kumbe e-e, va nga titwa ku fana na Davhida loyi a nga te: “A ku katekisiwe ku twisisa ka wena!”