DON loyi a nga Mbhoni ya Yehovha naswona a tshamaka eCanada u endla matshalatshala yo vulavula ni vanhu lava tshamaka eswitarateni swa le madorobeni. Loko a vulavula hi un’wana wa vanhu volavo u ri: “A ndzi nga si tshama ndzi vona munhu a lo pyii, hi thyaka ku fana na Peter, ku nga wanuna loyi a a tshama eswitarateni.” A tshama a thyakile naswona swi tikomba onge yoleyo a ku ri ndlela yakwe yo endla leswaku vanhu va nga n’wi tshineleli. A nga pfumeli loko vanhu va lava ku n’wi pfuna.” Hambiswiritano, Don a nga n’wi helelanga mbilu wanuna yoloye naswona u we a pfuka leswaku a n’wi pfuna ku tlula malembe ya 14.

Siku rin’wana Peter u vutise Don a ku: “Hikwalaho ka yini u khathala hi mina? Vanhu hinkwavo a va na mhaka na mina, kambe wena wa khathala.” Hi vutlhari, Don u tirhise Matsalwa manharhu lama fikeleleke mbilu ya Peter. U sungule hi ku vutisa Peter loko a ri tiva vito ra Xikwembu, u tlhele a n’wi kombela leswaku a tihlayela rona eBibeleni eka Pisalema 83:18. Kutani leswaku a n’wi hlamusela leswaku hikwalaho ka yini a khathala hi yena, Don u kombele Peter leswaku a hlaya Varhoma 10:13, 14 leyi vulaka leswaku “un’wana ni un’wana loyi a vitanaka vito ra Yehovha u ta ponisiwa.” Eku heteleleni Don u hlaye Matewu 9:36 endzhaku ka sweswo u kombele Peter leswaku a tihlayela yona hi ku kongoma. Ndzimana yoleyo yi ri: “Loko a vona mintshungu [Yesu] a yi twela vusiwana, hikuva a yi vavisiwile ni ku tsalangana ku fana ni tinyimpfu leti nga riki na murisi.” Endzhaku ka sweswo, Peter u khanise timhunti ivi a vutisa a ku: “Xana u vula leswaku ndzi un’wana wa tinyimpfu teto?”

Peter u sungule ku cinca. U sungule ku hlamba, a tsemeta malebvu kahle a tlhela a ambala swiambalo leswi baseke leswi a a swi nyikiwe hi Don. Peter se a tshama a basile naswona a languteka kahle.

Peter a ri ni dayari. Swilo leswi a a swi tsale eka matluka yo sungula ya dayari yakwe a swi kombisa leswaku a nga ri na ntshembo kambe leswi a ha ku swi tsala sweswinyana a swi kombisa leswaku se a swi tiva leswaku u hanyela yini. Eka swin’wana swa leswi a swi tsaleke u te: “Namuntlha ndzi tive vito ra Xikwembu. Sweswi loko ndzi lava ku khongela, ndzi nga khongela eka Yehovha. Swa tsakisa ku tiva vito rakwe. Don u vule leswaku Yehovha a nga va  Munghana wa mina loyi a tshamaka a lunghekele ku ndzi yingisa mikarhi hinkwayo.”

Marito yo hetelela lawa Peter a ma tsaleke, a a ma kongomise eka vamakwavo. U tsale a ku:

“A ndzi titwi kahle naswona miri wa mina wu ni switlhavi swo tala, swi tikomba onge se ti dya ti ya emagoveni. Hambiloko ndzo fa namuntlha, ndzi ni ntshembo wa leswaku ndzi ta tlhela ndzi vona munghana wa mina [Don] eParadeyisini. Loko rungula leri ro fika eka n’wina se ndzi file, ndzi kombela leswaku loko mi vona wanuna un’wana loyi mi nga n’wi tiviki enkosini wa mina, vulavulani na yena, ndzi kombela leswaku mi sala mi hlaya xibukwana lexi xa wasi [a vula buku leyi a yi tirhisiwa ku dyondza Bibele leyi nge, Ntiyiso Lowu Yisaka eVuton’wini Lebyi Nga Heriki] leyi a yi kumeke eka malembe lama hundzeke. * Xi vula leswaku ndzi ta tlhela ndzi vona munghana wa mina eParadeyisini. Marito lawa ndzi ma tshemba hi mbilu ya mina hinkwayo. Buti wa n’wina Peter la mi rhandzaka swinene.”

Endzhaku ka nkosi, sesi wa Peter Ummi u te: “Kwalomu ka malembe mambirhi lama hundzeke, Peter u vulavurisane na mina. A ku ri ro sungula endzhaku ka malembe yo tala a twala a tsakile. A a tlhela a hlekelelanyana.” Ummi u byele Don a ku: “Ndzi ta yi hlaya buku leyi hikuva ndzi pfumela leswaku leswi khumbeke Peter lerova a cinca vutomi byakwe swi fanele swi ri swa risima.” Ummi u tlhele a pfumela ku dyondza buku leyi nge Xana Bibele Yi Dyondzisa Yini Hakunene? ni un’wana wa Timbhoni ta Yehovha.

Na hina hi nga swi kota ku va ni langutelo lerinene hi vanhu van’wana, ku nga khathariseki ndlela leyi va langutekaka ha yona, hi nga kombisa vanhu va mixaka hinkwayo leswaku ha va rhandza ni ku va lehisela mbilu. (1 Tim. 2:3, 4) Loko hi endla tano, hi nga kota ku fikelela timbilu ta vanhu vo fana na Peter, lava vonakaka va nga pfuni nchumu hi ku ya hi langutelo ra munhu kambe va nga ni timbilu letinene. Hi nga tiyiseka leswaku Xikwembu lexi “[vonaka] leswi mbilu yi nga swona,” xi ta endla leswaku ntiyiso wu kula etimbilwini ta vanhu lavanene.—1 Sam. 16:7; Yoh. 6:44.