Xana u yi hlaye hi vukheta mikandziyiso ya sweswinyana ya Xihondzo xo Rindza? A hi vone loko u ta swi kota ku hlamula swivutiso leswi landzelaka:

Valanguteri va miganga ni vakulu, va fanele va endla yini loko va kuma nkongomiso lowu humaka eka nhlengeletano ya Xikwembu namuntlha?

Va fanele va hatla va amukela nkongomiso. Va nga ha tivutisa leswi: ‘Xana ndzi pfuna van’wana leswaku va va ni vuxaka lebyinene ni Xikwembu? Xana ndzi hatla ndzi amukela ni ku seketela nkongomiso lowu humaka eka vamakwerhu lava rhangelaka?’—w16.11, tl. 11.

Vanhu va Xikwembu va ve mahlonga ya Babilona rini?

Leswi swi endleke endzhaku ka loko vaapostola va file. Hi nkarhi wolowo ku sungule ku va ni ntlawa wa vafundhisi. Kereke ni valawuri a va seketela vukhongeri bya mavunwa naswona a va lava ku herisa Vakreste va ntiyiso. Kambe vatotiwa va sungule ku tihambanisa na Babilona Lonkulu eka makume ya malembe lama hundzeke ku ya fikela hi 1914.—w16.11, matl. 23-25.

Hikwalaho ka yini ntirho wa Lefèvre d’Étaples a wu ri wa nkoka?

Hi va-1520 Lefèvre u hundzuluxele Bibele hi Xifurwa ku endlela leswaku vanhu lava nga dyondzekangiki va ta kota ku yi hlaya hi ririmi ra vona. Ndlela leyi Lefèvre a a hlamusela Bibele ha yona yi ve ni nkucetelo lowukulu eka Martin Luther, William Tyndale na John Calvin.—wp16.6, matl. 10-12.

Hi kwihi ku hambana loku nga kona exikarhi ka ku “anakanya swa nyama” ni ku “anakanya swa moya”? (Rhom. 8:6)

Munhu loyi a anakanyaka swa nyama u lawuriwa hi ku navela kakwe kumbe u pfumela ku kanganyisiwa hi ku nga hetiseki kakwe naswona u tala ku vulavula hi swilo swa misava leyi. Munhu loyi a “anakanyaka swa moya” u anakanyisisa hi swilo leswi fambisanaka ni vuxaka byakwe ni Xikwembu naswona mianakanyo yakwe yi kongomisiwa hi moya lowo kwetsima. Ku anakanya swa nyama swi vula rifu kasi ku anakanya swa moya swi vula vutomi ni ku rhula.—w16.12, matl. 15-17.

Hi tihi tindlela tin’wana leti pfunaka to hunguta ku vilela?

Rhangisa swilo swa nkoka, vana ni langutelo lerinene, tivekele nkarhi wo

wisa siku ni siku, tsakela ntumbuluko wa Yehovha, tshama u tsakile, endla vutiolori nkarhi ni nkarhi ni ku etlela nkarhi lowu ringaneke.—w16.12, matl. 22-23.

‘Enoko u rhurhisiwe njhani leswaku a nga voni rifu?’ (Hev. 11:5)

Swi nga endleka Yehovha a endle leswaku Enoko a fa handle ko twa ku vava.—wp17.1, matl. 12-13.

Ha yini ku titsongahata swi ri swa nkoka?

Ku titsongahata swi katsa ku va ni langutelo lerinene ni ku tiva ku tsana ka hina. Hi fanele hi tivonela eka ndlela leyi hi va khomaka ha yona van’wana naswona hi nga titeki hi antswa ku va tlula.—w17.01, tl. 18.

Hi byihi vumbhoni lebyi kombisaka leswaku Xikwembu a xi kongomisa huvo leyi fumaka ya le nkarhini wa vaapostola ku fana ni ndlela leyi xi yi kongomisaka ha yona namuntlha?

Moya lowo kwetsima wu va pfune leswaku va kota ku twisisa Matsalwa naswona tintsumi ti endle leswaku va kota ku langutela ntirho wo chumayela. Nkongomiso lowu a va wu nyikela a wu sekeriwe eRitweni ra Xikwembu naswona swa ha ri tano ninamuntlha.—w17.02, matl. 26-28.

Hi swihi swilo leswi endlaka hi teka nkutsulo wu ri wa risima?

Ku ni swilo swa mune leswi endlaka nkutsulo wu va wa risima ku nga: Munhu loyi a hi nyikeke wona, xivangelo lexi endleke a hi nyika wona, matshalatshala lawa ma endliweke leswaku a kota ku hi nyika wona ni ndlela leyi wu hi vuyerisaka ha yona. Hi fanele hi anakanyisisa hi matshalatshala hinkwawo lama endliweke leswaku hi kuma nkutsulo.—wp17.2, matl. 4-6.

Xana loko Mukreste a endle xiboho swi fanerile leswaku a xi cinca?

Hi fanele hi hetisisa swiboho swa hina. Kambe, mikarhi yin’wana swiboho leswi hi swi endlaka swi lava hi tlhela hi swi kambisisa. Loko vanhu va le Ninivha va hundzukile Xikwembu xi cince xiboho xo lovisa muti wolowo. Mikarhi yin’wana, ku cinca ka swiyimo kumbe ku kuma rungula lerintshwa swi nga endla leswaku na hina hi endla leswi fanaka.—w17.03, matl. 16-17.

Hikwalaho ka yini ku hleva swi ri ni khombo?

Ku hleva swi nga nyanyisa timhaka. Ku nga khathariseki leswaku hi hoxile kumbe a hi hoxanga, loko hi hleva hi to nyanyisa timhaka.—w17.04, tl. 21.