HI VA 1910, vatswari va mina va rhurhe eTbilisi le Georgia va ya eCanada laha va fikeke va tshama epurasini leritsongo ekusuhi ni ndhawu leyi vuriwaka Pelly eSaskatchewan le vupeladyambu bya Canada. Ndzi velekiwe hi 1928 naswona ndzi rikotse eka vana va tsevu. Loko ndzi velekiwa tatana se a ri ni tin’hweti ta tsevu a file, kasi Manana yena u fe ndza ha ri ricece. Hi ku famba ka nkarhi sesi wa mina lonkulu Lucy na yena u file a ri ni malembe ya 17. Kutani malume Nick u hi tekile ni vamakwerhu hi ya tshama na yena leswaku a hi hlayisa.

Siku rin’wana loko ndza ha ri xihlangi, va le kaya va ndzi vone ndzi ri karhi ndzi koka hanci hi ncila, kutani leswi a va chava leswaku yi nga ndzi raha, va ndzi huwelerile leswaku ndzi yi tshika kambe a ndzi yi tshikanga. A ndzi langute eka tlhelo rin’wana naswona a ndzi nga va twi loko va ndzi huwelela. Nkateko wa kona, a yi ndzi vavisanga kambe ku sukela siku rero va ka hina va sungule ku swi xiya leswaku a ndzi twi etindleveni.

Un’wana loyi a ri munghana wa ndyangu wa ka hina u ringanyete leswaku ndzi ya nghena xikolo xa vanhu lava nga twiki, kutani Malume Nick u ndzi tsarisile eka xikolo xexo lexi a xi ri eSaskatoon eSaskatchewan. Ndzi tekiwe ndzi ya dyondza endhawini leyi nga le kule na le kaya naswona leswi a ndzi ri ni malembe ya ntlhanu ntsena, a ndzi chava swinene. A ndzi kota ku endzela ndyangu wa ka hina hi masiku yo wisa ni loko swikolo swi pfala ntsena. Hi ku famba ka nkarhi ndzi dyondze ririmi ra mavoko naswona a swi ndzi tsakisa ku tlanga ni vana van’wana.

Hi 1939, sesi wa mina Marion u tekane na Bill Danylchuck, kutani va teke mina na sesi wa mina Frances leswaku hi ya tshama na vona. Va ve vo sungula endyangwini wa ka hina ku hlangana ni Timbhoni ta Yehovha. Loko swikolo swi pfarile a va endla leswi va nga swi kotaka leswaku va ndzi dyondzisa leswi a va swi dyondza eBibeleni. Entiyisweni ku vulavula na vona a swi nga olovi tanihi leswi a va nga ri tivi ririmi ra mavoko. Kambe a va swi xiya leswaku ndza swi rhandza ku  dyondza Bibele. Nakambe a ndzi swi twisisa leswaku ndlela leyi a va endla swilo ha yona a yi fambisana ni leswi Bibele yi swi vulaka, kutani a ndzi famba na vona loko va ya eku chumayeleni. Endzhakunyana ka sweswo se a ndzi lava ku khuvuriwa, kutani hi September 5 1941, Bill u ndzi khuvurile endzeni ka diramu leri a ri tele hi mati lama a ma huma exihlobyeni naswona a ma titimela swinene!

Hi 1946 loko ndzi ye ekaya hi mikarhi ya ku pfala ka swikolo hi ye enhlengeletanweni leyi a yi ri eCleveland le Ohio eU.S.A. Eka siku ro sungula ra nhlengeletano, vasesi wa mina a va cincana ku tsala tinotsi leswaku va ndzi pfuna ndzi kota ku fambisana ni nongonoko. Kambe hi siku ra vumbirhi ndzi tsake ngopfu loko ndzi vona ntlawa wa vamakwerhu lava nga twiki va ri kona enhlengeletanweni naswona a ku ri ni makwerhu loyi a ri karhi a va tolokela. Eku heteleleni ndzi tiphinile hi nongonoko wa nhlengeletano naswona swi ndzi tsakisile swinene leswi se a ndzi wu twisisa kahle ntiyiso wa Bibele!

Hi nkarhi wolowo, Nyimpi ya Vumbirhi ya Misava a ya ha ku hela naswona vanhu a va lava ku tikombisa va tshembekile eka tiko ra ka vona. Kambe leswi a ndza ha ku vuya hi le nhlengeletanweni a ndzi tiyimisele ku yimela ripfumelo ra mina exikolweni. Kutani ndzi tshike ku losa mujeko wa tiko ni ku yimbelela risimu ra rixaka. Nakambe ndzi tlhele ndzi tshika ku tlangela masiku ya ku velekiwa ni le ka swikhongelo leswi a swi endliwa exikolweni. Leswi vadyondzisi a va nga tsakisiwi hi sweswo, va ringete ku ndzi chavisa ni ku vulavula mavunwa hi vukhongeri bya mina, a va anakanya leswaku ndzi ta cinca xiboho xa mina. Vadyondzikulorhi a va swi vona leswi a swi endleka kutani sweswo swi endle leswaku ndzi pfulekeriwa hi nkarhi wo chumayela. Eku heteleleni van’wana va vona ku nga Larry Androsoff, Norman Dittrick na Emil Schneider va amukele ntiyiso naswona ninamuntlha va ha tirhela Yehovha.

Loko ndzi endzela madoroba man’wana ndzi tikarhatela ku chumayela vanhu lava va nga twiki. Hi xikombiso, endhawini yin’wana yo hungasa eka yona ya vanhu lava va nga twiki eMontreal ndzi chumayele Eddie Taeger, ku nga jaha leri a a ri ri xirho xa ntlawa wa swigevenga. A a ri evandlheni ra ririmi ra mavoko ra le Laval eQuebec ku fikela loko a fa lembe leri nga hundza. Ndzi tlhele ndzi hlangana na Juan Ardanez loyi ku fana ni Vaberiya a a tinyika nkarhi wo endla ndzavisiso ku vona loko leswi a swi dyondza eBibeleni ku ri ntiyiso. (Mint. 17:10, 11) Eku heteleleni na yena u amukele ntiyiso naswona u tirhele Yehovha hi ku tshembeka nakambe a a ri nkulu eOttawa le Ontario, ku fikela loko a fa.

Hi 1950, ndzi rhurhele eVancouver. Hambileswi a ndzi rhandza ku chumayela vanhu lava nga twiki, a ndzi nge swi rivali leswi humeleleke loko ndzi chumayela wansati loyi yena a a twa ku nga Chris Spicer exitarateni. U amukele nkandziyiso a tlhela a kombela leswaku ndzi endzela nuna wa yena Gary. Kutani ndzi ye ekaya ra vona naswona hi bule nkarhi wo leha hi ku tsalelana kunene. A ha ha tlhelanga hi vonana nakambe ku ringana  malembe yo hlayanyana kambe siku rin’wana va te va ta ndzi xeweta enhlengeletanweni leyi a yi ri eToronto le Ontario. Hi siku rero Gary a fanele a khuvuriwa. Ntokoto wolowo wu ndzi tsundzuxe ndlela leyi swi nga swa nkoka ha yona ku hambeta hi chumayela tanihi leswi hi nga swi tiviki leswaku mbewu ya mfumo yi ta mila kwihi naswona rini.

Hi ku famba ka nkarhi, ndzi tlhelele eSaskatoon. Kwalaho ndzi hlangane ni manana un’wana loyi a kombeleke leswaku ndzi dyondza Bibele ni vana vakwe vambirhi va mahahlwa ku nga Jean na Joan va ka Rothenberger lava a ndzi nghena na vona xikolo xa vanhu lava nga twiki. Swi nga si ya kwihi, vanhwana lava se a va sungule ku byela vadyondzikulobye hi leswi a va swi dyondza eBibeleni naswona ntlhanu wa vona va ve Timbhoni ta Yehovha. Un’wana wa vona a ku ri Eunice Colin loyi ndzi hlanganeke na yena hi lembe ra mina ro hetelela exikolweni. Hi nkarhi wolowo u ndzi nyike xiwitsi a tlhela a kombela leswaku hi va vanghana. Hi ku famba ka nkarhi u ve wa nkoka evuton’wini bya mina. U ve nsati wa mina!

Loko mana wa Eunice a twa leswaku u sungule ku dyondza Bibele, u kucetele nhloko ya xikolo leswaku yi n’wi tshikisa ku dyondza. Yi kale yi n’wi tekela tibuku to dyondza ha tona Bibele. Hambiswiritano, Eunice a tiyimisele ku tshama a tshembekile eka Yehovha. Loko a lava ku khuvuriwa vatswari vakwe va te: “Loko wo khuvuriwa u va Mbhoni ya Yehovha u ta rhurha laha kaya.” Hakunene loko a ri ni malembe ya 17 u rhurhile ekaya kambe ndyangu wun’wana wa Timbhoni wu n’wi tekile wu tshama na yena. U ye emahlweni a dyondza Bibele kutani endzhaku u khuvuriwile. Hi 1960 loko hi tekana, vatswari vakwe a va tanga emucatweni wa hina. Hambiswiritano, hi ku famba ka nkarhi loko va vona ndlela leyi a hi kurisa vana va hina ha yona va sungule ku hi xixima.

A swi nga olovi ku kurisa vana va nkombo lava twaka hikwalaho ka leswi hina a hi nga twi. Kambe hi endle leswi hi nga swi kotaka leswaku hi va dyondzisa ririmi ra  mavoko, sweswo a swi ta endla leswaku swi hi olovela ku dyondza na vona Bibele. Vamakwerhu evandlheni va hi pfunile swinene. Hi xikombiso, siku rin’wana mutswari un’wana u tshame a hi tsalela rungula a hi byela leswaku un’wana wa vana va hina u vulavula marito lama nga amukelekiki eHolweni ya Mfumo. Hi kote ku hatla hi lulamisa xiphiqo xexo. Man’wana ya majaha ya mina ya mune ku nga, James, Jerry, Nicholas, na Steven ni mindyangu ya vona, sweswi va tirhela Yehovha hi ku tshembeka naswona hinkwavo i vakulu emavandlheni lawa va nga le ka wona. Nakambe Nicholas ni nsati wakwe Deborah va hundzuluxela ririmi ra mavoko erhavini ra le Britain kasi Steven ni nsati wakwe Shannan va pfuneta ku hundzuluxela ririmi ra mavoko erhavini ra le United States.

Loko ka ha sale n’hweti leswaku hi heta malembe ya 40 hi tekanile, Eunice u file endzhaku ko karhatiwa hi vuvabyi bya khensa. Hambileswi a swi tika u hambete a tiyisela naswona ntshembo lowu a ri na wona hi ku pfuxiwa ka vafi wu endle leswaku ripfumelo rakwe ri ya ri tiya. Ndzi swi langutele hi mahlongati ku tlhela ndzi n’wi vona nakambe loko vafi va pfuxiwa.

Hi February 2012, ndzi wile ivi ndzi tshoveka nyonga kutani ndzi endle xiboho xo ya tshama na un’wana wa vana va mina tanihi leswi a ndzi nga ta swi kota ku tikhathalela. Sweswi hi le Vandlheni ra Ririmi ra Mavoko ra le Calgary naswona ndzi ya emahlweni ndzi tirha tanihi nkulu. Entiyisweni a ku ri ro sungula ndzi va xirho xa vandlha ra ririmi ra mavoko. Anakanya ndlela leyi a ndzi tsake ha yona! Kambe i yini lexi ndzi pfuneke ku hambeta ndzi va ni vuxaka lebyinene na Yehovha hambileswi ndzi veke evandlheni ra Xinghezi ku sukela hi 1946? Ndzi pfuniwe hi Yehovha, u hetisise xitshembiso xakwe xo khathalela vana lava nga riki na vatatana. (Ps. 10:14) Ndzi khensa vamakwerhu lava tikarhateleke ku vulavula na mina hi ku ndzi tsalela, lava a va tiyimisele ku dyondza ririmi ra mavoko ni ku tlhela va ndzi tolokela.

Entiyisweni minkarhi yin’wana a ndzi pfa ndzi hela matimba ni ku lava ku lan’wa hikwalaho ka leswi a ndzi nga swi twisisi leswi a swi vuriwa naswona a swi tikomba onge vanhu lava nga twiki a va nga tekeriwi enhlokweni. Kambe minkarhi hinkwayo loko ndzi titwa hi ndlela yoleyo a ndzi tsundzuka marito lama Petro a ma byeleke Yesu a ku: “Hosi, xana hi ta ya eka mani? Hi wena u nga ni marito ya vutomi lebyi nga heriki.” (Yoh. 6:66-68) Kutani ku fana ni vamakwerhu vo tala lava ndzi kuleke na vona lava nga twiki, ndzi dyondze ku lehisa mbilu. Nakambe ndzi dyondze ku rindzela Yehovha ni nhlengeletano yakwe naswona sweswo swi ndzi vuyerisile. Sweswi ku ni minkandziyiso yo tala ya ririmi ra mavoko naswona ndzi tiphina hi ku endla xinghana ni vamakwerhu emihlanganweni ni le tinhlengeletanweni leti vaka kona hi ririmi ra mavoko ra le Amerika. Ninamuntlha ndza ha tirhela Yehovha hi ntsako naswona ndzi kuma mikateko yo tala entirhweni wakwe.