Lembe ni lembe Vakreste lava tsaneke va va kona eXitsundzuxweni. I khale va ri eka mphikizano lowu wa vutomi kambe va hume eka wona hikwalaho ka swivangelo swo hambanahambana, leswi swin’wana swa swona swi boxiweke eka broxara leyi nge Tlhelela Eka Yehovha. (Hv 12:1) Hambiswiritano, lava tsaneke va tshama va ri va nkoka eka Yehovha, loyi a va xaveke hi ngati ya N’wana wakwe. (Min 20:28; 1Pe 1:18, 19) Hi nga va pfuna njhani leswaku va tlhela va hlanganyela?

Vakulu va le vandlheni va tiyimisele ku lava ni ku pfuna Vakreste lava tsaneke, hilaha murisi a endlaka ha kona loko a lava xinyimpfana xakwe lexi hambukeke entlhambini. (Lk 15:4-7) Leswi swi kombisa rirhandzu leri Yehovha a nga na rona. (Yr 23:3, 4) Hinkwerhu ka hina, ku nga ri vakulu ntsena, hi nga swi kota ku khutaza lava tsaneke. Matshalatshala ya hina yo kombisa musa ni ntwelavusiwana ma n’wi tsakisa Yehovha naswona hi ta kuma hakelo. (Swiv 19:17; Min 20:35) Hikwalaho, anakanya hi loyi u nga n’wi khutazaka naswona u nga bi mariri!

HLALELA VHIDIYO LEYI NGE KHUTAZA LAVA TSANEKE, KUTANI U HLAMULA SWIVUTISO LESWI LANDZELAKA:

• Hi rihi goza leri Abbey a ri tekeke loko a hlangane ni Mbhoni leyi a nga yi tivi?

• Ha yini hi fanele hi rhanga hi ya eka vakulu loko hi lava ku pfuna munhu la tsaneke?

• Xana Abbey u ti lunghiselele njhani loko a lava ku endzela Laura ra vumbirhi?

• Abbey u ku kombise njhani ku tiyimisela, ku lehisa mbilu ni rirhandzu loko a ringeta ku khutaza Laura?

• Hi nga dyondza yini eka xifaniso xa Yesu lexi kumekaka eka Luka 15:8-10?

• Hi yihi mikateko leyi veke kona hikwalaho ka matshalatshala lama endliweke leswaku ku pfuniwa Laura?