Yakobe a a swi tiva leswaku Yehovha u lava leswaku ku gandzeriwa yena ntsena, hambileswi Yehovha a a nga si veka nawu wa leswaku ku nga gandzeriwi swikwembu swa hava. (Eks 20:3-5) Endzhaku ka loko Yehovha a n’wi byele leswaku a tlhelela eBethele, Yakobe u lerise vanhu hinkwavo leswaku va susa swikwembu swimbe exikarhi ka vona. Yakobe u hise swikwembu swimbe, ku katsa ni swingwavila swa le tindleveni leswi a va swi vehela hi xikongomelo xo lava ku tisirhelela. (Gn 35:1-4) A swi kanakanisi leswaku swiendlo swa Yakobe swi n’wi tsakisile Yehovha.

Emikarhini ya hina, hi nga swi kombisa njhani leswaku hi lava ku gandzela Yehovha ntsena? Hi nga papalata swilo hinkwaswo leswi fambisanaka ni swikwembu swa hava ni vungoma. Leswi swi katsa ku cukumeta swilo hinkwaswo leswi fambisanaka ni masalamusi ni ku kambisisa leswi hi tihungasaka ha swona hi vukheta. Tivutise: ‘Xana ndzi tihungasa hi ku hlaya tibuku kumbe ku hlalela tifilimi leti kombisaka tivhemphaya, tizombi kumbe swilo swa vungoma? Xana swilo leswi ndzi tihungasaka ha swona swi kombisa masalamusi, vuloyi kumbe mafenya lama thyakeke?’ Hi fanele hi papalata swilo hinkwaswo leswi Yehovha a swi vengaka.—Ps 97:10.

HLALELANI VHIDIYO LEYI NGE, U NGA NYIKI DYAVULOSI NDHAWU, KUTANI MI HLAMULA SWIVUTISO LESWI LANDZELAKA:

• Hi xihi xiphiqo lexi Palesa loyi a dyondzeriwaka Bibele a ri na xona?

• Hikwalaho ka yini ku ri vutlhari ku kombela mpfuno eka vakulu loko xichudeni xa Bibele xi karhatiwa hi madimona?

• Hi swihi swilo leswi lava va lavaka ku sirheleriwa hi Yehovha va faneleke va swi tshika?

• Hi xihi xiboho lexi Palesa a xi endleke?

• Hi tihi tindlela tin’wana leti u nga papalataka madimona ha tona?