Ku sukela hi September, Xiyimiso Xa Minhlangano Xa Mahanyelo Ni Ntirho xi ta katsa xingheniso lexi nga tirhisiwaka lexi nga ni nhlokomhaka leyi nge “Dyondzisa Ntiyiso.” Xikongomelo xa hina ku ta va ku ri ku kandziyisa ntiyiso wa le Bibeleni hi ku tirhisa xivutiso ni tsalwa.

Loko hi vona leswaku vanhu va tsakela, hi nga endla leswaku va langutela riendzo ra hina leri landzelaka hi ku va siyela nkandziyiso kumbe ku va komba vhidiyo leyi nga eka jw.org. Hi fanele hi ringeta ku tlhelela eka vanhu hi ku hatlisa leswaku hi ta yisa bulo emahlweni. Swingheniso leswi leswintshwa ni swiavelo swa swichudeni swi ta va swi sekeriwe eka tinhlokomhaka leti nga ebukwini leyi nge I Yini Leswi Bibele Yi Swi Dyondzisaka? Eka bokisi leri katsakanyaka ndzima hi ta kuma matsalwa lama engetelekeke lama nga hi pfunaka leswaku hi endla maendzo yo vuyela kumbe ku fambisa dyondzo hi ku tirhisa Bibele ntsena.

Ku ni ndlela yin’we leyi yisaka evuton’wini lebyi nga heriki. (Mt 7:13, 14) Tanihi leswi hi chumayelaka vanhu lava humaka eka vukhongeri ni tinxaka to hambanahambana, hi fanele hi endla leswaku un’wana ni un’wana a tsakela ntiyiso lowu nga eBibeleni. (1Tm 2:4) Loko hi ya emahlweni hi vulavula na vona hi timhaka to hambanahambana ta le Bibeleni ni ku antswisa vutshila bya hina byo ri “tamela khwatsi rito ra ntiyiso,” hi ta va ni ntsako naswona hi ta swi kota ku dyondzisa vanhu van’wana ntiyiso.—2Tm 2:15.