LEXI ENDLAKA SWI VA SWA NKOKA: Mikandziyiso ya hina leyi nga eka Switirhisiwa Swo Pfuneta Ku Dyondza Bibele yi ni website ya jw.org. Xikongomelonkulu xa khadi ro pfuna vanhu ku nghena eka jw.org ni xiphephana lexi nge Hi Nga Ti Kuma Kwihi Tinhlamulo Ta Swivutiso Swa Nkoka eVuton’wini? i ku kongomisa vanhu eka website ya hina. U nga rhumela munhu nkandziyiso lowu nga eka Switirhisiwa Swo Pfuneta Ku Dyondza Bibele hi ku tirhisa imeyili kumbe hi ku n’wi rhumela linki ya jw.org. Leswi swa pfuna, ngopfungopfu loko u chumayela munhu loyi a vulavulaka ririmi rimbe. Ku engetela kwalaho, vanhu va nga ha vutisa swivutiso leswi nga riki kona eka mikandziyiso leyi nga eka Switirhisiwa Swo Pfuneta Ku Dyondza Bibele. Loko hi yi tiva kahle website leyi, hi nga swi kota ku pfuna vanhu vo tona ensin’wini.

NDLELA LEYI U NGA SWI ENDLAKA HA YONA:

• Thlava eka “TIDYONDZO TA BIBELE.” A hi nge u chumayela mutswari loyi a tsakelaka ku tiva swo tala hi ku kurisa vana. Yana eka TIDYONDZO TA BIBELE > VUKATI NI NDYANGU.

• Thlava eka “MINKANDZIYISO.” A hi nge u chumayela hi xitshuketa exikolweni naswona u lava ku komba mudyondzikuloni broxara leyi nge Tinhlamulo Ta Swivutiso Swa Khume Leswi Vantshwa Va Swi Vutisaka. Yana eka MINKANDZIYISO > TIBUKU NI TIBROXARA.

• Thlava eka “MALUNGHANA NA HINA.” A hi nge u chumayela mutirhikuloni loyi a tsakelaka ku tiva tidyondzo leti hi pfumelaka eka tona. Yana eka MALUNGHANA NA HINA > SWIVUTISO LESWI TALAKA KU VUTISIWA.

HLALELANI VHIDIYO LEYI NGE YI TIVE KAHLE JW.ORG, KUTANI U XIYA LAHA U NGA NGHENAKA KONA LOKO U LAVA KU PFUNA:

• munhu loyi a vulaka leswaku Xikwembu a xi kona

• munhu loyi a ha ku weriwaka hi khombo

• makwerhu loyi a holeke

• loko u vuyela eka munhu loyi a lavaka ku tiva leswaku ntirho wa hina wu seketeriwa njhani hi timali

• munhu loyi a humaka etikweni rimbe naswona a lavaka ku ya emihlanganweni etikweni ra rikwavo