LEXI ENDLAKA SWI VA SWA NKOKA: Yehovha u endla leswaku ntiyiso wu dzima timitsu etimbilwini ta vanhu lava nga ni “mboyamelo lowunene eka vutomi lebyi nga heriki.” (Min 13:48; 1Ko 3:7) Hi tirhisana na yena loko hi ti karhatela ku chumayela vanhu lava hi dyondzaka na vona Bibele ni lava taka emihlanganweni. (1Ko 9:26) Lava hi dyondzaka na vona Bibele swi lava va twisisa leswaku loko va lava ku ponisiwa, va fanele va khuvuriwa va va Vakreste. (1Pe 3:21) Leswaku hi va pfuna va va vadyondzisiwa, hi fanele hi va dyondzisa leswaku va cinca mahanyelo ya vona, va chumayela ni leswaku va tinyiketela eka Yehovha.—Mt 28:19, 20.

NDLELA LEYI U NGA SWI ENDLAKA HA YONA:

• Hlamusela vanhu lava u dyondzaka na vona Bibele leswaku xikongomelo xa wena i ku va pfuna va tiva Yehovha va tlhela va n’wi tsakisa.—Yh 17:3

• Va byele leswaku loko va lava ku va ni vuxaka lebyinene na Yehovha va fanele va tshika mikhuva yo biha ni vanghana vo biha

• Va tiyise u tlhela u va khutaza loko va nga si khuvuriwa ni loko se va khuvuriwile.—Min 14:22

HLALELANI VHIDIYO LEYI NGE YEHOVHA XIKWEMBU U TA KU PFUNA, KUTANI MI HLAMULA SWIVUTISO LESWI LANDZELAKA:

• I yini leswi nga endlaka leswaku munhu a chava ku tinyiketela ni ku khuvuriwa?

• Vakulu va nga va pfuna njhani vanhu lava dyondzeriwaka Bibele leswaku va kurisa vuxaka bya vona na Yehovha?

• Esaya 41:10 yi hi dyondzisa yini hi Yehovha?

• I yini leswi nga hi pfunaka leswaku hi kota ku gandzela Yehovha hi ndlela leyi amukelekaka hambileswi hi velekiweke hi ri vadyohi?