HIKWALAHO KA YINI SWI RI SWA NKOKA: Vatotiwa swin’we ni lava tinyimpfu tin’wana va rhamba vanhu hinkwavo leswaku va ta ‘nwa mati ya vutomi mahala.’ (Nhl 22:17) Mati lawa yo fanekisela ma yimela swilo hinkwaswo leswi Yehovha a swi nyikaka vanhu hinkwavo lava n’wi yingisaka leswaku a va ponisa eka xidyoho ni rifu. Leswaku hi kota ku pfuna vanhu va mindhavuko yo hambanahambana ni vukhongeri byo hambanahambana, hi fanele hi va byela “mahungu lamanene lama nga heriki” hi ndlela leyi nga ta va koka rinoko.—Nhl 14:6.

NDLELA LEYI U NGA SWI ENDLAKA HA YONA:

• Hlawula xingheniso ni tsalwa leri nga ta khumba timbilu ta vanhu va le nsimu ya n’wina. U nga ha hlawula xiringanyeto xo sungula mabulo kumbe u tirhisa ndlela yin’wana leyi u tshameke u yi tirhisa leyi veke ni vuyelo lebyinene. Hi tihi tinhlokomhaka kumbe matsalwa lama vanhu va ma tsakelaka? Xana ri kona rungula leri nga emahungwini leri ra ha ku endlekaka leri ku vulavuriwaka hi rona? I yini leswi nga kokaka rinoko eka wanuna kumbe wansati?

• U nga rivali ku xeweta ni ku endla leswi tolovelekeke emugangeni wa ka n’wina.—2Ko 6:3, 4

• Titolovete tibuku ni tivhidiyo leti nga eka bokisi ra Switirhisiwa Swo Pfuneta Ku Dyondzisa leswaku u ta komba loyi a tsakelaka

• Kopa rungula hi tindzima hinkwato ta vanhu lava u hlanganaka na vona loko u ri ensin’wini

• Cinca cinca swingheniso swa wena leswaku u fambisana ni swiyimo swa n’wini wa muti. (1Ko 9:19-23) Hi xikombiso, u nga ku yini loko n’wini wa muti a ku byela leswaku wa ha ku loveriwa?

HLALELANI VHIDIYO KUTANI MI HLAMULA SWIVUTISO LESWI LANDZELAKA:

• Muhuweleri u ri sungule njhani bulo ra yena ni n’wini wa muti?

• I yini leswi a swi endleka evuton’wini bya n’wini wa muti?

• Hi rihi tsalwa leri a fanele a ri tirhisa eka xiyimo lexi naswona hikwalaho ka yini?

• U nga xi cinca njhani xingheniso xa wena leswaku xi fikelela timbilu ta vanhu lava u hlanganaka na vona ensin’wini ya ka n’wina?