Xana u ni malembe ya 23 ku ya eka 65 naswona u le ka ntirho wa nkarhi hinkwawo? Xana u ni rihanyo lerinene naswona u tsakela ku ya tirha laha ku nga ni xilaveko? Loko nhlamulo ya wena yi ri ina, xana u tshame u ehleketa hi ku tata fomo yo ya eXikolweni Xa Vachumayeri Va Mfumo [SKE]? Ku sukela hi tlilasi yo sungula vamakwerhu vo tala lava tekeke ni lava nga tekangiki va apulayele ku ta exikolweni lexi. Nilokoswiritano, vamakwerhu va xinuna lava nga tekangiki hi vona lava lavekaka ngopfu. Kombela Yehovha leswaku a ku pfuna u endla leswi engetelekeke entirhweni wakwe ku fana ni N’wana wakwe. (Ps 40:8; Mt 20:28; Hv 10:7) Ehleketa hi swilo leswi u nga swi hungutaka leswaku u kota ku ya exikolweni lexi.

Hi yihi mitirho leyi lava yeke exikolweni lexi va nyikiwaka yona? Van’wana lava yeke exikolweni lexi va nyikiwa ntirho wo ya chumayela etindhawini leti ku vulavuriwaka ririmi rimbe kumbe ku ya chumayela emadorobeni lamakulu hi ku tirhisa swigolonyana. Swichudeni swin’wana swi nyikiwa ntirho wo pfuna valanguteri va miganga, ku va valanguteri va miganga kumbe varhumiwa. Loko u ri karhi u ehleketa hi mitirho leyi u nga yi endlaka enhlanganweni wa Yehovha va na ni langutelo ro fana ni ra muprofeta Esaya loyi a nga te: “Hi mina loyi! Ndzi rhume!”—Esa 6:8.

HLALELANI VHIDIYO LEYI NGE, VARHUMIWA LAVA TIRHAKA LAHA KU NGA NI XILAVEKO KUTANI MI HLAMULA SWIVUTISO LESWI LANDZELAKA:

• Varhumiwa vahlawuriwa njhani?

• Hi wihi ntirho lowunene lowu varhumiwa va wu endlaka?

• Hi yihi mikateko yin’wana leyi varhumiwa va yi kumaka?