Yesu u dyondzise a ku: “Mi amukele mahala, nyikani mahala.” (Mt 10:8) Ha wu yingisa nkongomiso lowu, lowu nga erivaleni hi ku va hi nga xaviseli vanhu Bibele kumbe minkandziyiso ya hina leyi sekeriweke eBibeleni. (2Ko 2:17) Yi ni rungula ra risima ra ntiyiso lowu nga eRitweni ra Xikwembu. Ku endliwa matshalatshala naswona ku tirhisiwa mali yo tala leswaku ku kandziyisiwa minkandziyiso ni ku tlhela yi rhumeriwa emavandlheni emisaveni hinkwayo. Hikwalaho ka sweswo, hi fanele hi teka ntsena leyi hi nga ta yi fambisa.

Vana ni vuxiyaxiya loko u nyika munhu nkandziyiso, hambiloko u chumayela etindhawini ta mani na mani. (Mt 7:6) Ematshan’weni yo phakela vahundzi va ndlela, endla matshalatshala yo sungula bulo ku vona loko va tsakela. Xana u nga hlamula u ku ina eka xin’wana xa swivutiso leswi xaxametiweke ebokisini leri nga kwala? Loko munhu a nga kombisi ku tsakela, swa antswa u n’wi nyika xiphephana. Loko a kombela magazini kumbe nkandziyiso wihi ni wihi hi fanele hi n’wi nyika hi mbilu yo basa.—Swiv 3:27, 28.