MAHANYELO YA VAKRESTE
Tilunghiselele Sweswi Ku Langutana Ni Xiyimo Xa Xihatla Xa Swa Vutshunguri
Hikwalahokayini u fanele u tilunghiselela? Hikuva xiyimo xa xihatla xa swa vutshunguri ni ku tsutsumiseriwa exibedlhele swi nga humelela hi xitshuketa. Hikwalaho, tilunghiselela ku kuma vutshunguri lebyinene ku nga se va ni xiyimo xa xihatla. Loko u endla tano, u kombisa leswaku u xixima vutomi ni nawu wa Yehovha mayelana ni ngati.—Mi 15:28, 29.
U nga endla yini leswaku u tilunghiselela?
-
Khongela ni ku ri tata hi vukheta khadi ra durable power of attorney (DPA). a Vahuweleri lava khuvuriweke va nga tikumela khadi ra DPA swin’we ni makhadi ya vana va vona ya Identity Card (ic) eka nandza wa mikandziyiso.
-
Loko u ri muyimani, kombela vakulu va wena leswaku va ku nyika kopi ya Rungula Ra Vayimani (S-401). Rungula leri ri ta ku pfuna leswaku u endla swiboho leswinene swa timhaka ta swa vutshunguri leti nga vaka kona hi nkarhi lowu u tikeke ha wona ni loko n’wana a tswariwa
-
Loko u ta endliwa vuhandzuri lebyi katsaka ku cheriwa ngati kumbe ku etlela exibedlhele, tivisa vakulu va wena ka ha ri ni nkarhi u tlhela u tivisa ni xibedlhele leswaku u ta endzeriwa hi nkulu
Vakulu va nga pfuna njhani? Va nga ku pfuna ku tata khadi ra DPA. Hambiswiritano, vakulu a va nge ku tekeli swiboho leswi fambisanaka ni swa vutshunguri kumbe ku boxa matitwelo ya vona etimhakeni leti munhu a faneleke a tiendlela xiboho. (Rhm 14:12; Ga 6:5) Loko u tivisa vakulu va wena leswaku u ni xiyimo xa swa vutshunguri lexi nga katsaka ngati, hi ku hatlisa va ta fonela Komiti Yo Vulavurisana Ni Swibedlhele (HLC).
HLC yi nga pfuna njhani? Vamakwerhu lava tirhaka eka HLC va leteriwile leswaku va pfuna vaongori ni lava nga eka swa nawu leswaku va twisisa xiyimo xa hina mayelana ni ngati. Va nga hlamusela dokodela wa wena tindlela ta matshungulelo lama nga tirhisiki ngati. Loko swi laveka, va nga ku pfuna ku kuma dokodela loyi a xiximaka xiboho xa wena xa ku nga cheli ngati.
HLALELANI VHIDIYO LEYI NGE, U NGA SWI ENDLA NJHANI SWIBOHO EKA VUTSHUNGURI LEBYI KATSAKA KU TIRHISA NGATI? KUTANI, ENDZHAKU MI HLAMULA XIVUTISO LEXI LANDZELAKA:
-
U dyondze yini eka vhidiyo leyi leswi nga ku pfunaka ku lunghekela xiyimo xa xihatla xa vutshunguri lexi katsaka ku tirhisa ngati?
a Dyondzo 39 ya buku leyi nge, Tiphine Hi Vutomi Hilaha Ku Nga Heriki! yi nga ku pfuna ku endla swiboho swa vutshunguri leswi katsaka ku tirhisiwa ka ngati.
